1. Na ki momento tur e ungínan lo ta den shelu?

 HOPI aña pasá, nos komo Testigunan di Yehova tabata puntra nos mes: ‘Na ki momento e último ungínan lo bai shelu?’ Promé nos tabata pensa ku, despues di Armagedon, algun di nan lo keda biba pa un tempu den Paradeis aki riba tera. Pero, den E Toren di Vigilansia di 15 di yüli 2013 nos a bin komprondé ku, promé ku Armagedon kuminsá, tur e 144.000 ungínan lo ta den shelu.—Mat. 24:31.

2. Ki pregunta algun di nos kisas ta hasi, i kiko nos lo analisá den e artíkulo akí?

² Ma algun di nos kisas ta puntra: Kiko lo pasa ku Kristu su ‘otro karnénan’ ku ta sirbiendo Yehova fielmente riba tera durante “tribulashon grandi”? (Huan 10:16; Mat. 24:21) Algun di e ‘otro karnénan’ kisas ta preokupá ku, despues ku e rumannan ungí bai shelu, nan lo no sa kiko pa hasi òf ku lo no tin niun hende pa yuda ni guia nan. Kisas nan ta pensa asina debí na dos relato ku ta bini na nan mente. Laga nos ban wak e relatonan ei i mira dikon nos no tin nodi di preokupá.

LOKE LO NO PASA

3-4. Kiko algun ta puntra nan mes, i dikon?

³ Algun kisas ta preokupá ku e otro karnénan lo stòp di sirbi Yehova ora ku e rumannan di Kuerpo Gobernante no t’ei mas pa guia nan. E preokupashon ei kisas ta bini debí na algun relato di Beibel. Laga nos wak dos di nan.  E promé ta tokante Sumo Saserdote Yehoyada. E tabata un fiel sirbidó di Dios. E ku su kasá, Yehóshabat, a protehá un hobensito ku yama Yehóas i a yud’é bira un bon rei ku tabata fiel. Miéntras ku Yehoyada tabata na bida, Yehóas tabata sirbi Yehova i tabata hasi kosnan bon. Pero despues ku Yehoyada a muri, Yehóas a kuminsá hasi kosnan malu. El a skucha konseho di e kabesantenan malbado i a stòp di sirbi Yehova.—2 Kró. 24:​2, 15-19.

⁴ E di dos relato ta tokante e kristiannan ku a biba despues di e apòstelnan. E último apòstel ku a muri tabata Huan. Miéntras ku e tabata na bida, el a yuda hopi kristian keda fiel na Yehova. (3 Huan 4) Meskos ku e otro apòstelnan di Hesus, Huan a hasi tur loke e tabata por pa protehá e kongregashon kontra e apostasia ku tabata plamando. (1 Huan 2:18; 2 Tes. 2:7) Despues ku Huan a muri, apostasia a plama den e kongregashonnan. Denter di un par di aña, e apóstatanan tabata siña hopi idea falsu i tabata permití hopi kos robes den tur e kongregashonnan.

5. Ki konklushon nos no mester saka for di e dos relatonan ei?

⁵ Akaso e dos relatonan ei ta indiká ku despues ku e ungínan bai shelu e kristiannan fiel riba tera lo kuminsá hasi loke ta malu, manera Yehóas, òf bira apóstata, manera hopi kristian a hasi despues ku e apòstelnan a muri? Apsolutamente ku nò! Nos por tin sigur ku ora e ungínan bai shelu, e otro karnénan lo sigui sirbi Yehova na e manera korekto i Yehova lo sigui kuida nan. Dikon nos por ta asina sigur?

ADORASHON PURU LO T’EI PA SEMPER

6. Kiko ta e tres tempunan ku nos lo bai trata?

⁶ Dikon nos por tin sigur ku, asta durante e tempunan difísil ku nos lo bai enfrentá, adorashon puru lo sigui eksistí? Pasó Beibel ta splika ku nos tempu ta hopi diferente for di esun di e israelitanan i for di esun despues ku e apòstelnan a muri. P’esei laga nos analisá brevemente e tres tempunan ei, esta, (1) e tempu di Israel, (2) e periodo despues ku e apòstelnan a muri, i (3) nos tempu, e tempu “pa drecha tur kos manera nan tabata promé.”—Echo. 3:21.

7. Kiko a duna e israelitanan fiel kurashi pa sigui sirbi Yehova?

⁷ E tempu di Israel. Poko promé ku Moises a muri, el a bisa e israelitanan: ‘Mi sa bon bon ku despues di mi morto boso sigur lo kometé maldat i desviá for di e kaminda ku mi a manda boso sigui.’ (Deu. 31:29) Pero tambe Moises a spièrta e israelitanan ku si nan rebeldiá, nan lo bai den eksilio. (Deu. 28:​35, 36) E palabranan ei a kumpli? Sí. Durante sientos di aña, hopi rei a hasi loke ta malu den bista di Yehova i a pone ku e pueblo a bai praktiká adorashon falsu. Anto debí na esei, Yehova a kastigá e israelitanan malbado i no a permití niun rei israelita goberná su pueblo. (Eze. 21:​25-27) Pero ora e israelitanan ku tabata fiel a mira kon Yehova su palabranan a kumpli, nan a haña kurashi pa sigui sirbi Yehova fielmente.—Isa. 55:​10, 11.

8. Akaso mester sorprendé nos ku despues ku e apòstelnan a muri e kongregashon kristian a bira korumpí? Splika.

⁸ E periodo despues ku e apòstelnan a muri. Akaso mester sorprendé nos ku despues ku e apòstelnan a muri e kongregashon  kristian a bira korumpí? Nò, pasó Hesus a profetisá ku esei lo a pasa. (Mat. 7:​21-23; 13:​24-30, 36-43) E apòstelnan Pablo, Pedro i Huan a bisa ku e profesia di Hesus ya a kuminsá kumpli den promé siglo. (2 Tes. 2:​3, 7; 2 Ped. 2:1; 1 Huan 2:18) Poko despues ku e último apòstel a muri, kristiannan apóstata a bira parti di Babilonia e Grandi, esta, tur religion falsu. Pues, loke Hesus a profetisá a kumpli.

9. Kon nos tempu ta diferente for di esnan menshoná den e paragrafnan anterior?

⁹ E tempu “pa drecha tur kos manera nan tabata promé.” Nos tempu ta hopi diferente for di e tempu di Israel i for di e tempu ku apostasia a plama mas den e kongregashon despues ku e apòstelnan a muri. Pero, kon yama e tempu ku nos ta biba aden? Normalmente nos ta yam’é “e último dianan” di e mundu malbado akí. (2 Tim. 3:1) Pero Beibel ta mustra ku na mes momento ku “e último dianan” a kuminsá, un otro periodo di tempu mas importante i mas largu tambe a kuminsá. E periodo ei yama “e tempu . . . pa drecha tur kos manera nan tabata promé.” (Echo. 3:21) El a kuminsá na 1914 i lo kaba te ora e Reino Mesiániko yuda humanidat bira perfekto i transformá e tera den Paradeis. Pero, kiko eigenlijk Yehova a kuminsá drecha kaba manera nan tabata promé, esta, restorá, na 1914? Pa kuminsá, Hesus a bira Rei den shelu. Pues, atrobe Yehova tabatin un gobernante ku a represent’é, un heredero di fiel Rei David. Ma esei no ta tur kos. Poko despues, adorashon puru por fin a ser restorá! (Isa. 2:​2-4; Eze. 11:​17-20) Pero, lo e ser korumpí atrobe?

10. (a) Kiko Beibel ta profetisá tokante adorashon puru den nos tempu? (Isaías 54:17) (b) Dikon e profesianan ei ta animá nos?

¹⁰ Lesa Isaías 54:17. Paga tinu na loke e profesia ei ta bisa: “Niun arma ku ser trahá pa hasi bo daño lo no tin éksito”! E teksto ei ta kumpliendo awe. E siguiente palabranan di konsuelo tambe ta kumpliendo: “Yehova lo siña tur bo yunan, i bo yunan lo tin pas na abundansia. Lo bo ta firmemente establesí pasobra bo ta hasi loke ta korekto. . . . Lo bo no tin miedu di nada ni lo bo no tin motibu pa ta morto spantá, pasobra nada spantoso lo no yega serka bo.” (Isa. 54:​13, 14) Ni sikiera Satanas, “e dios di e mundu akí,”  no por stòp e trabou ku e pueblo di Yehova ta hasi di siña otronan tokante Yehova. (2 Kor. 4:4) Adorashon puru a ser restorá i nunka mas lo e ser korumpí. Niun arma ku ser trahá pa hasi nos daño lo no tin éksito!

LOKE SÍ LO PASA

11. Kiko ta konvensé nos ku e multitut grandi lo no keda desampará ora ku e ungínan bai shelu?

¹¹ Kiko ta loke sí lo pasa ora e ungínan bai shelu? Kòrda ku Hesus ta nos Wardador i kabes di e kongregashon kristian. E mes a bisa bon kla: “Ún so ta boso Lider: Kristu.” (Mat. 23:10) Nos Rei semper lo kuida nos. Pues ku Kristu na mando, su siguidónan aki riba tera lo no mester tin miedu di nada. Klaru ku nos no sa presis kon Kristu lo guia su siguidónan na e momento ei. Pero, tin algun ehèmpel den Beibel ku por trankilisá nos.

12. Kon Yehova a kuida su pueblo (a) despues ku Moises a muri? (b) despues ku Elías a haña un otro asignashon? (Wak e plachi.)

¹² Moises a muri promé ku Israel a drenta e pais ku Yehova a primintí nan. Kon a para ku e pueblo di Dios? Akaso nan a keda desampará sin e guia di e hòmber fiel ei? Nò. Tanten nan tabata fiel, Yehova tabata pèrkurá pa nan. Promé ku Moises a muri, Yehova a bis’é ku Hosue lo guia e pueblo. Moises tabatin hopi aña ta entrená Hosue. (Éks. 33:11; Deu. 34:9) Ademas, tabatin hopi hòmber kapas ku lo a yuda guia e pueblo—kabesante di mil, di shen, di sinkuenta i asta di dies. (Deu. 1:15) E pueblo di Dios tabata bon kuidá. Un otro ehèmpel ta Elías. Durante hopi aña, el a yuda e israelitanan adorá Yehova. Pero despues, Yehova a dun’é un asignashon na Huda. (2 Rei. 2:1; 2 Kró. 21:12) Akaso e israelitanan fiel den e reino di dies tribu a keda desampará? Nò. Elías tabatin añanan ta entrená Eliseo. Ademas, tabatin “e yu hòmbernan di e profetanan” ku tambe a haña entrenamentu. (2 Rei. 2:7) Pues, tabatin hopi hòmber fiel pa yuda guia e pueblo di Dios. Yehova a sigui kumpli ku su propósito i a kuida su sirbidónan fiel

13. Kiko Yehova ta primintí na Hebreonan 13:5b? (Wak e plachi.)

¹³ Ku e dos ehèmpelnan ei na mente, kiko bo ta kere lo pasa ora e último ungínan bai shelu? Bo no tin nodi di rei. Beibel ta sigurá nos: Hamas Yehova  lo laga su pueblo riba tera desampará. (Lesa Hebreonan 13:5b.) Awe Kuerpo Gobernante, kende ta un grupo chikitu di kristiannan ungí, ta guia e pueblo di Dios. Meskos ku Moises i Elías, Kuerpo Gobernante sa ku ta masha importante pa entrená otro ruman. P’esei, nan ta entrená ruman hòmber for di e otro karnénan pa guia e pueblo di Dios. Por ehèmpel, nan a organisá skol pa entrená ansiano, superintendente di sirkuito, miembro di Komité di Sukursal, superintendente na Bètel, misionero, etcetera. Anto e miembronan di Kuerpo Gobernante mes ta entrená e ayudantenan di nan vários komiténan. E ayudantenan akí ya tin responsabilidatnan den e organisashon i ta bon prepará pa kuida e karnénan di Kristu ora e ungínan bai shelu.

14. Na ki konklushon importante nos ta yega?

¹⁴ Tur loke nos a trata ta yuda nos yega na un konklushon masha importante: Ora e último ungínan bai shelu, kasi na fin di tribulashon grandi, e pueblo di Dios lo sigui ador’é fielmente aki riba tera. Ku Hesukristu komo nos lider, nada no por stòp nos di sirbi Yehova. Ta bèrdat ku durante e tempu ei un koalishon di nashon, ku Beibel ta yama Gòg di Magòg, lo ataká nos. (Eze. 38:​18-20) Pero e atake kòrtiku ei lo frakasá; lo e no stroba nos di adorá Yehova. Yehova lo reskatá nos! Den un vishon, Apòstel Huan a mira “un multitut grandi” di Kristu su karnénan. Huan a bin haña sa ku e “multitut grandi” ei “a sobrebibí e tribulashon grandi.” (Rev. 7:​9, 14) Pues, nos no tin nodi di preokupá, Yehova lo salba nos!

15-16. Segun Revelashon 17:​14, kiko e ungínan lo hasi durante e guera di Armagedon, i dikon esei ta animá nos?

¹⁵ Pero kisas ta keda un pregunta den laira: ‘Kiko e ungínan lo hasi ora nan bai shelu?’ Beibel ta splika esei bon kla. E ta bisa ku gobièrnunan di e mundu akí “lo bringa kontra e Lamchi.” Nos sa ku e  gobièrnunan lo pèrdè e bataya ei pasó Beibel ta bisa ku e Lamchi lo “vense nan.” Pero, ken lo yuda e Lamchi? E versíkulo ta bisa: “Esnan ku Dios a yama i skohe.” (Lesa Revelashon 17:14.) Ken eseinan ta? Nan ta e ungínan resusitá! Pues ora e último ungínan riba tera bai shelu, kasi na fin di tribulashon grandi, un di e promé asignashonnan ku nan lo haña ta pa bringa. Esei ta un asignashon interesante! Algun kristian ungí tabata bringadó promé ku nan a bira Testigu. Tin di nan asta tabata den ehérsito. Pero despues nan a bira kristian i a siña e kaminda di pas. (Gal. 5:22; 2 Tes. 3:16) Nan a stòp di apoyá guera. Sinembargo, ora nan ta den shelu, nan lo bringa huntu ku Kristu i su angelnan santu den e guera final kontra Dios su enemigunan.

¹⁶ Pensa riba esaki: Algun di e ungínan ku ta aki riba tera ta di edat i no tin masha forsa. Pero ora nan ta den shelu, nan lo ta spiritunan poderoso i inmortal ku lo bringa lado a lado ku Hesukristu, nan Rei i Guerero. Despues di e guera di Armagedon, nan lo yuda hende bira perfekto. No tin duda, ora nan ta den shelu, nan lo hasi muchu mas kos pa yuda nan rumannan stimá ku ora nan tabata hende imperfekto aki riba tera!

17. Kon nos por sa ku tur sirbidó di Dios lo ta safe durante e guera di Armagedon?

¹⁷ Abo ta forma parti di e otro karnénan? Si ta asina, kiko abo tin ku hasi durante e guera importante di Armagedon? Esaki so: Konfia den Yehova i sigui su instrukshonnan. Kisas esei ta enserá loke Isaías 26:20 ta bisa: “Bai den boso kambernan di mas paden i sera porta boso tras. Skonde un ratu te ora Dios su furia pasa.” Tur fiel sirbidó di Dios, tantu den shelu komo riba tera, lo ta safe durante e tempu ei. Meskos ku Apòstel Pablo, nos lo ta konvensí ku “ni gobièrnu, ni loke tin awor ni loke tin ku bini . . . lo por separá nos for di e amor di Dios.” (Rom. 8:​38, 39) Nunka lubidá esaki: Yehova stima bo i hamas lo e laga bo desampará!