POR lo general, tur hende ke tin un bida felis. Pero den e último dianan akí, tur hende ta enfrentá problema ku ta “difísil pa trata kuné.” (2 Tim. 3:1) Tin hopi kos ku por pone hende pèrdè nan goso tiki tiki. Nan por ta inhustisia, problema ku salú, desempleo, morto di un ser kerí òf otro problemanan ku por duna nos ansiedat i hasi nos tristu. Asta sirbidónan di Dios por desanimá i pèrdè nan goso. Si esei ta e kaso ku bo, kon bo por haña bo goso bèk?

Pa nos por kontestá e pregunta ei, nos mester komprondé promé kiko ta berdadero goso i kon otro sirbidónan di Dios a keda ku nan goso apesar di prueba. Despues, nos lo siña kiko nos por hasi pa nos keda ku nos goso òf asta oument’é.

Nos no mester konfundí berdadero goso ku alegria. Tuma por ehèmpel un buraché. Despues ku e bebe di mas, kisas e ta hari hopi. Pero, ora su fuma kita, e ta stòp di hari i e ta bolbe kòrda riba tur su tristesa i problemanan. Su alegria tabata temporal, i e no tabata berdadero goso.—Pro. 14:13.

Na kontraste, berdadero goso ta felisidat profundo ku nos ta sinti ora nos haña òf ta spera riba algu bon. Ora un hende tin goso, e ta sintié felis òf kontentu, sea ku su sirkunstansia ta bon òf nò. (1 Tes. 1:6) De echo, un hende por tin goso aunke ku e ta preokupá ku algu. Por ehèmpel, e apòstelnan a haña un halá di sota pasobra nan tabata papia tokante Kristu. Pero, nan “a sali bai masha kontentu for di dilanti di e Sanedrin, pasobra Dios a konsiderá nan digno di ser desonrá pa kousa di Hesus su nòmber.” (Echo. 5:41) Ta klaru ku nan no tabata kontentu ku e halá di sota ku nan a haña. Pero komo sirbidó di Dios, nan tabatin berdadero goso pasobra nan a keda leal na dje.

Goso no ta un kualidat ku nos ta nase kuné ni e no ta un kualidat ku nos ta kultivá outomátikamente. Dikon nò? Pasobra berdadero goso ta un aspekto di e fruta di spiritu santu di Dios. Pues, ta ku yudansa di e spiritu di Dios, nos por kultivá “e personalidat nobo” ku ta inkluí goso. (Efe. 4:24; Gal. 5:22) I ora nos ta kultivá goso, nos ta den mihó posishon pa trata ku ansiedat di bida.

Tempu ku Yehova a krea mundu, e tabata ke pa kos bon sosodé riba tera i no e kosnan malu ku nos ta mira awe. Pero, e mal echonan di hende no a kita Yehova su goso. E Palabra di Dios ta bisa: “Fortalesa i goso ta den su lugá.” (1 Kró. 16:27) Ademas, tur e kosnan bon ku Dios su sirbidónan ta hasi awe ta hasi “[Yehova su] kurason kontentu.”—Pro. 27:11.

Kon nos por imitá Yehova? Nos no ta preokupá demasiado ora kosnan no bai manera nos a pensa. En bes di pèrdè nos goso, ta bon pa nos enfoká riba e kosnan bon ku nos  tin awor i ta warda ku pasenshi pa e situashon drecha. *

Den Beibel tambe nos por haña hopi ehèmpel di hende ku a keda ku nan goso bou di sirkunstansianan difísil. Por ehèmpel, Abraham a perseverá ora su bida tabata na peliger i ora ku el a hañ’é ku difikultatnan ku otro hende a kousa. (Gén. 12:10-20; 14:8-16; 16:4, 5; 20:1-18; 21:8, 9) Apesar di tur e preshon ei, Abraham a keda ku su goso. Kon el a logra esei? Semper el a enfoká riba e speransa di biba den e mundu nobo bou di gobernashon di e Mesías. (Gén. 22:15-18; Heb. 11:10) Hesus a bisa: “Boso tata Abraham a alegrá mashá den e speransa di mira mi dia.” (Huan 8:56) Nos por imitá Abraham si nos ta meditá riba tur e kosnan bon ku nos lo disfrutá di dje den futuro.—Rom. 8:21.

Meskos ku Abraham, apòstel Pablo i su kompañero Sílas tabata enfoká riba e promesanan di Dios. I komo ku nan tabatin un fe fuerte, nan a keda ku nan goso apesar di tur e mal eksperensianan ku nan tabata pasa aden. Por ehèmpel, despues ku nan a haña un bon halá di sota i a ser tirá den prizòn, “meianochi [nan] tabata hasi orashon i alabá Dios ku kantika.” (Echo. 16:23-25) Nan speransa pa futuro a duna nan e forsa ku nan tabatin mester i nan tabatin goso pasobra nan tabata defendé e nòmber di Kristu. Si nos ke imitá Pablo i Sílas, nos tambe mester enfoká riba tur e benefisionan ku nos ta haña ora nos ta sirbi Dios fielmente.—Flp. 1:12-14.

Awe, tin hopi ruman ku ta bon ehèmpel pasobra nan a keda ku nan goso ora nan a enfrentá prueba. Por ehèmpel, na novèmber 2013, e tifon devastador Haiyan a asotá e parti sentral di Filipinas i a destruí mas ku 1.000 kas di famianan Testigu. George, kende tabata biba den e stat Tacloban i ku su kas tambe a keda destruí, a bisa: “Apesar di tur loke a pasa, e rumannan tabata felis. Ta difísil pa mi ekspresá e goso ku nos ta sinti.” Ki ora ku nos eksperensiá pruebanan difísil, nos lo keda ku nos goso si nos meditá ku apresio riba tur loke Yehova ta hasi pa nos. Kiko mas Yehova a duna nos pa nos por tin goso?

Kiko por duna nos mas goso ku nos amistat ku Dios? Pensa riba esaki: Nos konosé e Soberano di Universo. E ta nos Tata, nos Dios i nos Amigu.—Sal. 71:17, 18.

Un otro motibu pa goso ta e echo ku nos tin bida i por gosa di dje. (Ekl. 3:12, 13) Ademas, komo kriaturanan inteligente ku Dios a hala serka dje, nos ta komprondé kiko ta e propósito ku Dios tin pa nos. (Kol. 1:9, 10) P’esei, nos bida tin berdadero propósito i sentido. Di otro banda, mayoria di hende no ta komprondé bon kiko ta e propósito di bida. Pa enfatisá e diferensia akí, Pablo a skirbi: “‘Wowo no a mira ni orea no a tende ni no a drenta den kurason di hende e kosnan ku Dios a prepará pa esnan ku ta stim’é.’ Pues, ta na nos Dios a revelá e kosnan akí pa medio di su spiritu.” (1 Kor. 2:9, 10) E echo ku nos ta komprondé kiko Yehova su boluntat i propósito ta pa nos, ta un motibu mas pa nos tin berdadero goso.

Ban wak kiko mas Yehova a hasi pa su sirbidónan. Nos no ta kontentu ku nos por haña pordon pa nos pikánan? (1 Huan 2:12) Komo ku Dios ta miserikòrdioso, nos tin e speransa bibu ku pronto nos lo biba den un sistema nobo. (Rom. 12:12) For di awor, Yehova ta duna nos un bunita hermandat den kua nos por sirbié. (Sal. 133:1) Beibel ta sigurá nos tambe ku Yehova ta protehá su sirbidónan for di Satanas i su demoñonan. (Sal. 91:11) Si nos meditá riba tur e bendishonnan ku Yehova ta duna nos, nos lo haña mas i mas goso.—Flp. 4:4.

Un kristian ku tin goso kaba por haña mas goso? Hesus a bisa: “Mi a papia e kosnan akí ku boso pa boso por tin e goso ku mi tin, i pa boso goso por ta kompleto.” (Huan 15:11) E palabranan ei no ta mustra nos ku nos por haña mas goso? Nos por kompará goso ku kandela. Pa nos por haña mas kayente, nos mester pone mas palu den e kandela. Di mes manera, pa nos tin mas goso, nos mester di spiritu santu. Kòrda ku e spiritu di Dios ta duna goso. Pues, pa nos haña mas goso regularmente nos tin ku pidi Dios spiritu santu i nos tin ku meditá riba e Palabra di Dios ku ta inspirá pa spiritu santu.—Sal. 1:1, 2; Luk. 11:13.

Nos lo haña mas goso tambe ora nos ta aktivo hasiendo loke ta hasi Yehova kontentu. (Sal. 35:27; 112:1) Dikon? Beibel ta bisa: “Teme Dios i warda su mandamentunan, pasobra esaki ta aplikabel na kada persona.” (Ekl. 12:13) Ku otro palabra, Dios a traha nos pa hasi su boluntat. Pues, ta normal ku ora nos ta sirbi Dios, nos lo disfrutá mas di bida. *

Ora nos tin goso, nos lo haña benefisionan ku ta mas ku djis loke nos ta sinti di paden. Por ehèmpel, nos lo haña aprobashon di nos Tata den shelu ora nos ta sirbié apesar di kualke problema ku nos ta enfrentá. (Deu. 16:15; 1 Tes. 5:16-18) Ora nos tin berdadero goso, nos lo no hiba un bida materialista. Mas bien, nos lo hasi esfuerso pa hasi mas sakrifisio personal na benefisio di e Reino di Dios. (Mat. 13:44) Ora nos ta mira e bon resultado di nos sakrifisionan, nos lo haña mas goso, nos lo sinti nos mihó i nos por hasi otro hende felis.—Echo. 20:35; Flp. 1:3-5.

Un investigadó riba tereno di medisina di e Universidat di Nebraska, Merka, a bisa: “Si bo ta kontentu i satisfecho ku bo bida awor, tin mas chèns ku lo bo ta bon di salú den futuro.” Esei ta di akuerdo ku loke Beibel ta bisa, esta ku “un kurason kontentu ta un bon remedi.” (Pro. 17:22) Sí, ora bo oumentá bo goso, tin mas chèns ku lo bo tin mihó salú.

Pues, apesar ku nos ta biba den tempunan difísil, nos por kultivá berdadero goso. Pa nos por hasi esei, nos tin ku pidi Dios duna nos spiritu santu, i nos tin ku studia e Palabra di Dios i meditá riba loke nos ta siña. Ademas, pa nos haña mas goso, nos tin ku enfoká riba e bendishonnan ku nos tin awor, imitá fe di otro sirbidónan di Dios i hasi e boluntat di Dios. Ora nos hasi asina, nos por eksperensiá loke Salmo 64:10 ta bisa: “E hende hustu lo ta kontentu den SEÑOR i lo tuma refugio den dje.”