1. Kiko ta hasi nos masha felis?

 YEHOVA ke pa nos ta felis. Nos sa esei pasobra goso ta un kualidat ku Dios su spiritu santu ta kultivá den nos. (Gal. 5:22) Anto komo ku tin mas felisidat den duna ku den risibí, nos ta sinti nos masha felis ora nos duna tur di nos den sirbishi i ta yuda nos rumannan di vários manera.—Echo. 20:35.

2-3. (a) Segun Galationan 6:4, kiko ta e dos kosnan ku lo yuda nos keda ku nos goso? (b) Kiko nos lo trata den e artíkulo akí?

² Apòstel Pablo a menshoná na Galationan 6:4 dos kos ku lo yuda nos keda ku nos goso. (Les’é.) E promé ta ku nos mester duna Yehova lo mihó di nos. Si nos hasi esei, nos lo ta felis. (Mat. 22:36-38) Di dos, nos no mester kompará nos mes ku otro ruman. Loke sea nos salú, entrenamentu òf abilidat ta permití nos hasi, nos tin ku yama Yehova danki. Pasó, tur loke nos tin a bini di dje. Pero awor kiko si tin otro rumannan ku ta mas ábil den sierto rasgo di sirbishi ku nos? Nos mester keda kontentu ku nan ta usa nan don pa Yehova i no pa broma òf pa interes personal. Pues, na lugá di kompetí ku nan, nos mester siña for di nan.

³ Den e artíkulo akí nos lo wak kiko lo yuda nos pa no desanimá ora ku nos no por hasi tur loke nos tin gana di hasi pa Yehova. Tambe nos lo wak kon nos por hasi mihó uso di kualke don òf abilidat ku nos tin i loke nos por siña for di otro hende.

4. Kiko por desanimá nos? Duna un ehèmpel.

⁴ Algun di nos no por hasi tur loke nos tin gana di hasi pa Yehova debí na edat avansá òf malesa. Anto esei por desanimá nos. Esei ta loke a pasa ku Carol. Un tempu e tabata prediká kaminda tabatin mester di mas publikadó. E tabata dirigí 35 estudio di Beibel i a yuda vários hende yega na boutismo. Sin duda, Carol tabata hasi hopi den sirbishi. Pero, el a bira malu i kasi e no por a sali mas for di su kas. El a bisa: “Mi sa ku debí na mi malesa mi no por hasi mes tantu ku otro rumannan ta hasi. Pero tòg mi ta sinti ku mi no ta un bon sirbidó di Yehova manera nan. Dia aden i dia afó mi tin un lucha entre loke mi ke hasi i loke mi por hasi. Anto e kos ei ta kibra mi.” Carol ta deseá di duna Yehova lo mihó di dje, i esei ta algu bon. Nos por tin sigur ku Yehova, kende ta un Dios masha kompasivo, ta keda masha kontentu ku Carol ta duna lo mihó di dje.

5. (a) Kiko nos tin ku rekordá nos mes si nos ta desanimá pasobra nos no por hasi tur loke nos tin gana di hasi? (b) Di akuerdo ku e plachinan, kon e ruman semper a duna Yehova lo mihó di dje?

⁵ Si tin biaha bo ta sinti bo desanimá pasobra bo no por hasi tur loke bo tin gana di hasi pa Yehova, para un ratu i puntra bo mes: ‘Kiko Yehova ta ferwagt di mi?’ Yehova ke pa bo dun’é lo mihó di bo den e situashon ku bo ta aktualmente. Pensa riba e situashon aki: Un ruman muhé ku tin 80 aña ta sintié desanimá pasobra e no por hasi mesun tantu den sirbishi ku tempu e tabatin 40 aña. E ta pensa ku aunke e ta duna lo mihó di dje, Yehova no ta kontentu kuné. Pero esei ta bèrdat? Pens’é bon. Si e ruman ei a duna Yehova lo mihó di dje tempu e tabatin 40 aña i te ainda e ta duna Yehova lo mihó di dje ku su 80 aña, ke men ku nunka e no a stòp di dun’é lo mihó. Pues, si nos kuminsá sinti ku nos no ta hasiendo sufisiente pa Yehova den nos sirbishi, nos tin ku rekordá nos mes ku ta Yehova ta esun ku ta disidí loke ta hasié kontentu, i no nos. Si nos ta duna lo mihó di nos, Yehova lo bisa nos: “Hopi bon!”—Kompará ku Mateo 25:20-23.

6. Kiko nos por siña for di Maria su ehèmpel?

⁶ Algu ku por yuda nos keda ku nos goso, ta ora nos enfoká riba loke nos por hasi i no riba loke nos no por hasi. Wak e ehèmpel di Maria. Debí na su malesa, e no por sali hopi den sirbishi. Na kuminsamentu e tabata sintié deprimí i a pensa ku e no tabata bal nada. Pero, Maria a kòrda ku den su kongregashon tabatin un ruman na kama i el a disidí di bai yud’é. Maria a bisa: “Mi a hasi mi mes disponibel pa bai serka dje i pa huntu nos prediká via karta i telefòn. Kada biaha ku mi kaba di prediká i yuda mi ruman, mi tabata bin kas masha kontentu i satisfecho.” E mesun kos ta konta pa nos. Nos tambe por bira mas felis si nos focus riba loke nos por hasi, en bes di focus riba loke nos no por hasi. Pero, kiko si nos por hasi mas òf si tin un sierto rasgo di sirbishi ku nos ta bon den dje?

7. Ki bon konseho Apòstel Pedro a duna e kristiannan?

⁷ Den e promé karta ku Apòstel Pedro a skirbi, el a animá su rumannan pa usa kualke don òf talento ku nan tin pa animá nan kompañeronan kristian. El a  skirbi: “Te na e grado ku kada un di boso a risibí un don, us’é pa sirbi otro komo bon mayordomo di e bondat inmeresí di Dios.” (1 Ped. 4:10) Nos no ke keda sin usa un don òf talento ku nos tin djis pasó nos tin miedu ku otronan por bira yalurs òf desanimá. Si nos hasi esei, nos lo no ta bezig ta duna Yehova lo mihó di nos.

8. Segun 1 Korintionan 4:6 i 7, dikon nos no mester broma ku nos don?

⁸ Ta bèrdat ku nos mester usa nos don, pero nos tin ku tene kuidou pa nos no broma ku nan. (Lesa 1 Korintionan 4:6, 7.) Por ehèmpel, kisas bo ta masha bon den kuminsá estudio di Beibel. Bo no mester keda sin usa e don ei. Pero, tin un diferensia entre usa e don i broma kuné. Imaginá ku bo a sali den sirbishi anto bo a kuminsá un estudio di Beibel. Bo ta masha kontentu mes ku esei. Bo no por warda pa konta bo grupo di sirbishi bo eksperensia. Pero ora bo yega, bo ta haña un ruman ta konta kon el a laga un revista den sirbishi. El a laga un revista; abo a kuminsá un estudio. Kiko bo ta bai hasi? Bo sa ku bo eksperensia lo animá e grupo mashá, pero tòg bo ta opta di kont’é un otro biaha pa no kita e goso di e ruman ku a laga e revista. Esei ta masha amoroso di bo parti. Pero, no stòp di ofresé estudio di Beibel sí nò. Bo tin un don, us’é!

9. Kon nos mester usa nos donnan?

⁹ Kòrda ku kualke talento òf abilidat ku nos tin, ta Yehova a duna nos nan. P’esei, usa nan pa animá e kongregashon i no pa broma. (Flp. 2:3) Ora nos usa nos energia i abilidat pa hasi e boluntat di Dios, nos tin motibu pa ta masha kontentu. Dikon? Pasobra nos ta usa nos donnan pa alabá Yehova, no pa kompetí ku nos rumannan ni mustra ku nos ta superior na nan.

10. Pakiko nos tin ku evitá di kompará nos mes ku otronan?

¹⁰ Si nos no paga tinu, nos por kai den e trampa di kompará nos puntonan fuerte ku e puntonan débil di un ruman. Por ehèmpel, ban bisa ku un ruman su punto fuerte ta ku e ta duna bon diskurso. Pero, e ta mira un otro ruman ku no ta dje bon den esei i den su mes e ta pensa ku e ta mihó kuné. Ta bèrdat ku dunamentu di diskurso no ta e ruman ei su punto fuerte. Ma kisas e tin otro punto fuerte. Kisas e ta un hende hopi hospitalario,  ta lanta su yunan bon òf ta prediká ku masha entusiasmo. Nos ta masha kontentu ku tin asina tantu ruman ku ta usa nan don i abilidat pa sirbi Yehova i pa yuda otronan.

11. Dikon nos tin ku hasi esfuerso pa sigui Hesus su ehèmpel?

¹¹ Aunke no ta bon pa nos kompará nos mes ku otro, nos por siña hopi for di otro sirbidónan di Yehova. Laga nos kue e ehèmpel di Hesus. Ta bèrdat ku nos niun no ta perfekto manera e. Pero, nos por siña hopi for di su bunita kualidatnan i e kosnan ku el a hasi. (1 Ped. 2:21) Ora ku nos hasi esfuerso pa sigui su pasonan fielmente, nos lo bira mihó sirbidónan di Yehova i nos lo tin mas éksito den sirbishi.

12-13. Kiko nos por siña for di Rei David?

¹² Den Beibel nos ta haña relato di hopi hòmber i muhénan ku, aunke nan tabata imperfekto, nos por imitá. (Heb. 6:12) Un di nan tabata Rei David. Yehova a bisa ku e tabata “un hòmber ku ta na agrado di [Su] kurason.” (Echo. 13:22) Pero, David no tabata perfekto. Si bo ta kòrda, el a kometé algun fayo basta grave. Apesar di esei, e ta un bon ehèmpel pa nos. Dikon? Pasobra ora nan a korigié, e no a purba di bini ku èksküs. Mas bien, el a aseptá e disiplina fuerte ku el a haña i di kurason el a sinti duele pa loke el a hasi. I p’esei Yehova a pordon’é.—Sal. 51:3, 4, 10-12.

¹³ Ku e ehèmpel di David na mente hasi bo mes e siguiente preguntanan: ‘Kon mi ta reakshoná ora mi haña konseho? Mi ta kla pa aseptá mi fayo, òf mi ta purba di bin ku èksküs? Mi ta tira falta riba otronan? Mi ta hasi esfuerso pa mi no hasi e mesun fout?’ Bo por hasi bo mes e tipo di preguntanan ei ora bo ta lesa tokante otro hendenan fiel den Beibel. Nan tabatin e mesun problemanan ku abo tin? Ki bon kualidatnan nan a mustra? Puntra bo mes: ‘Kon mi por imitá e fiel sirbidó ei di Yehova?’

14. Kiko nos por siña for di nos rumannan?

¹⁴ Tambe nos por siña hopi for di nos rumannan, tantu esnan yòn komo esnan di edat. Kisas den nos kongregashon nos tin rumannan ku ta fiel apesar ku nan ta pasando den prueba manera preshon di pareunan, oposishon den famia òf salú  ku ta bayendo atras. Ora bo kòrda riba e ehèmpel di e rumannan ei, kisas bo por siña algu ku por yuda bo dil ku bo mes pruebanan. Esta kontentu nos ta di tin ehèmpelnan di fe asina den nos kongregashon!—Heb. 13:7; Sant. 1:2, 3.

15. Ki konseho Apòstel Pablo a duna ku lo yuda nos sigui ta kontentu den loke nos por hasi pa Yehova?

¹⁵ Si kada un di nos duna Yehova lo mihó di nos, esei lo yuda ku den kongregashon lo tin pas i union. Wak e kaso di e kristiannan di promé siglo. Nan tabatin diferente don i asignashon. (1 Kor. 12:4, 7-11) Pero, esei no a krea kompetensia ni divishon entre nan. Mas bien, Pablo a animá e kristiannan na Efeso pa hasi loke tabata nesesario pa “edifiká e kurpa di Kristu.” Anto el a skirbi nan tambe: “Ora kada parti di e kurpa ta funshoná manera mester ta, esaki ta kontribuí na kresementu di e kurpa segun ku e ta edifiká su mes den amor.” (Efe. 4:1-3, 11, 12, 16) Esnan ku a sigui e konseho di Pablo a kontribuí na pas i union—loke nos por mira awe tambe den nos kongregashon.

16. Kiko nos mester ta determiná pa hasi? (Hebreonan 6:10)

¹⁶ Laga nos ta determiná pa no kompará nos mes ku otronan. Siña for di Hesus i hasi esfuerso pa imitá su kualidatnan. Siña for di e hendenan ku tin den Beibel i di nos rumannan. Sigui duna Yehova lo mihó di bo konfiando ku Yehova “no ta inhustu pa lubidá [bo] trabou.” (Lesa Hebreonan 6:10.) Sigui ta kontentu i felis den bo sirbishi na Yehova i sa ku e ta balorá bo esfuerso pa dun’é lo mihó di bo.