KIKO ta pisa apénas 1.4 kilo pero ku a ser deskribí komo “e kos di mas kompliká ku nos a yega di deskubrí den universo”? Esei ta e selebro humano. E ta algu sumamente asombroso. Mas nos siña di dje, mas apresio nos lo haña pa Yehova su obranan “maravioso.” (Sal. 139:14) Ban konsiderá djis ún di e vários kosnan ku nos mente ta kapas di hasi; nos imaginashon.

Kiko ta imaginashon? Un dikshonario ta definié komo “e kapasidat ku bo tin pa forma imágen- òf ideanan den bo mente di kosnan ku ta nobo i emoshonante, òf kosnan ku bo no a eksperensiá ainda.” Ora bo pensa riba e definishon ei, lo ta un kos ku bo ta hasi tur ora, no ta bèrdat? Por ehèmpel, bo a yega di lesa òf tende di un lugá ku nunka bo no a yega di bai? Esei lo no a stroba bo di imaginá kon e ta. Echo ta ku kada biaha ku nos pensa algu ku nos no por mira, tende, purba, sinti òf hole, ta nos imaginashon nos ta usando.

Beibel ta bisa ku Dios a diseñá i krea hende den su imágen. (Gén. 1:26, 27) Pues, bo no ta kere ku, den un sentido, Yehova tambe tin un imaginashon? Ya ku el a haña ta bon pa krea nos ku e kapasidat ei, ta lógiko ku e ta ferwagt pa nos us’é pa komprondé kiko ta su boluntat. (Ekl. 3:11) Kon nos por usa nos imaginashon pa logra esei, i pa ki propósito nos no mester us’é?

(1) Laga bo mente drif bai na e momento inadekuá òf fantasiá kos inapropiá.

Soña lantá riba su mes no ta malu. De echo, tin prueba ku ta mustra ku e por ta asta benefisioso. Pero Eklesiástes 3:1 ta yuda nos komprondé ku “tin un tempu stipulá pa tur kos”; pues, por sosodé ku nos ta okupá nos mes ku sierto aktividat na e momento inadekuá. Por ehèmpel, si nos ta laga nos mente drif bai durante reunion òf estudio personal, nos imaginashon lo ta un yudansa òf un strobansa? Hesus a duna un spièrtamentu serio tokante e peliger di pensa riba kos robes, manera fantasia inmoral. (Mat. 5:28) Yehova no ta keda niun tiki kontentu ku algun kos ku nos ta permití nos mes pensa ariba. Fantasia inmoral por pone nos kometé inmoralidat. Sea determiná pa nunka laga bo imaginashon alehá bo for di Yehova!

(2) Suponé ku kos material por duna bo siguridat berdadero.

Kosnan material ta nesesario i útil. Pero nos lo keda desapuntá si nos kuminsá pensa ku nan por duna nos felisidat i siguridat. E hòmber sabí Sálomon a bisa: “E rikesa di un hende riku ta su stat fortifiká, i manera muraya haltu den su mes imaginashon.” (Pro. 18:11) Tuma por ehèmpel loke a pasa  na Manila, Filipinas. Na sèptèmber 2009, áwaseru pisá a inundá mas ku 80 porshento di e stat. Hende ku tabatin hopi kos material a skapa di e efektonan di e inundashon? Un hòmber riku ku a pèrdè hopi propiedat a bisa: ‘E inundashon akí a afektá tur hende; el a kousa difikultat i sufrimentu pa tantu riku komo pober.’ Ta fásil pa imaginá ku kos material por duna nos protekshon i siguridat. Pero esei ta leu for di e bèrdat.

(3) Preokupá ku kosnan ku kisas lo no sosodé nunka.

Hesus a konsehá nos pa no bira demasiado “anshá” ku futuro. (Mat. 6:34) Nos lo mester tin hopi imaginashon pa preokupá tantu asina. Fásilmente nos por haña nos ta gasta hopi energia na preokupá tokante problemanan imaginario, esta, problemanan ku no ta eksistí ainda òf ku lo no bini nunka. E Skritura ta indiká ku e tipo di ansha ei por hiba na desanimashon i asta depreshon. (Pro. 12:25) Pues, ta masha importante pa apliká e konseho di Hesus pa no preokupá di mas ku futuro i trata ku e problemanan di tur dia segun ku nan ta presentá.

(1) Mira un situashon peligroso di antemano i evit’é.

E Skritura ta animá nos pa ser prudente i pensa di antemano. (Pro. 22:3) Nos por usa nos imaginashon pa pensa riba e konsekuensianan di un desishon promé ku nos tum’é. Por ehèmpel, si bo a haña un invitashon pa bai un evento sosial, kon bo imaginashon por yuda bo disidí si bo tin ku bai òf nò? Despues di konsiderá algun faktor manera ken mas a ser invitá, kuantu hende lo bai tin i na unda i ki ora lo e ta, puntra bo mes: ‘Kiko tin chèns di sosodé einan?’ Bo ta kere ku lo bai tin un ambiente saludabel ku lo ta na armonia ku prinsipio di Beibel? E preguntanan ei por yuda bo visualisá e evento. Ora bo usa bo imaginashon pa tuma bon desishon, lo bo evitá situashonnan ku por ta un peliger pa bo spiritualidat.

(2) Prepará bo mes mentalmente pa trata ku problema.

Imaginashon ta enserá tambe e “kapasidat pa konfrontá un problema i resolv’é.” Imaginá ku bo ta haña bo ku un malkomprondementu ku un ruman den kongregashon. Kon lo bo aserká bo ruman pa purba di sera pas kuné? Tin hopi faktor pa tene kuenta kuné. Kon su manera di komuniká ta? Na ki momento lo ta mas apropiá pa papia tokante e  problema? Kiko mi tin ku bisa i ku ki tono mi tin ku papia? Ora bo usa bo imaginashon, bo por pensa diferente manera pa trata ku e situashon i skohe esun ku bo ta sinti lo ta mas efikas i ku lo kai den bon tera. (Pro. 15:28) Ora bo pensa bon kon pa trata ku un situashon difísil, lo bo promové pas den kongregashon. Esei sigur ta un bon manera pa usa nos imaginashon.

(3) Hinka bida den bo lesamentu di Beibel i estudio personal.

Ta esensial pa nos lesa Beibel tur dia. Pero nos mester hasi mas ku djis lesa pa lesa. Nos mester komprondé e lèsnan práktiko ku tin den Beibel i sinti nos motivá pa apliká nan den nos bida. Lesamentu di Beibel mester duna nos mas apresio pa e kamindanan di Yehova. Nos imaginashon por yuda den esaki. Kon? Wèl, tuma e buki Imitá Nan Fe komo ehèmpel. E relatonan den e buki ei ta stimulá nos imaginashon i yuda nos visualisá e esenanan i sirkunstansianan ku kada un di e personahenan di Beibel a haña nan aden. Den nos imaginashon nos ta mira e paisahenan, tende e zonidonan, hole e aromanan i purba di saka afó ki sintimentu e hòmber- i muhénan fiel ei tabatin. Esei lo yuda nos saka lèsnan maravioso i edifikante for di e relatonan di Beibel ku kisas nos a pensa nos tabata konosé bon kaba. Ora nos usa nos imaginashon di e manera ei, nos lesamentu di Beibel i estudio personal ta haña mas bida.

(4) Mustra empatia.

Empatia ta un bunita kualidat ku a yega di ser deskribí komo sinti den nos kurason e doló di un otro persona. Ya ku tantu Yehova komo Hesus ta mustra empatia, ta bon pa nos imitá nan. (Éks. 3:7; Sal. 72:13) Kon nos por kultivá e kualidat akí? Un di e mihó maneranan pa hasi esei ta ora nos ta usa nos imaginashon. Kisas nunka nos no a yega di eksperensiá loke un sierto ruman ta pasando aden. Pero bo por puntra bo mes: ‘Si ta ami ta den e situashon ei, kon lo mi sinti mi? Kiko lo mi tin mester di dje?’ Ora nos usa nos imaginashon pa kontestá e preguntanan ei, nos lo por mustra mas empatia. De echo, ora nos mustra empatia, nos ta mehorá den tur aspekto di nos bida kristian, inkluso nos sirbishi i nos relashon ku nos rumannan.

(5) Imaginá kon bida lo ta den e mundu nobo.

E Skritura ta deskribí na un manera masha real kon bida lo ta den e mundu nobo ku Dios a primintí. (Isa. 35:5-7; 65:21-25; Rev. 21:3, 4) Nos publikashonnan ta komplementá e deskripshonnan ei ku vários plachi bunita pa stimulá nos imaginashon i yuda nos mira kon nos lo bai disfrutá di e bendishonnan ku Yehova a primintí nos. Yehova, e Kreador di imaginashon, sa mihó ku kualke hende kuantu kos nos ta kapas pa imaginá. Ora nos usa nos imaginashon pa meditá riba su promesanan, nos ta haña mas konfiansa ku nan lo kumpli i nos ta keda fiel, asta ora nos ta wanta difikultat den bida.

Yehova a demostrá su amor ora el a duna nos e kapasidat maravioso pa imaginá kosnan. Esei por ègt yuda nos sirbié mihó. Laga nos mustra Yehova ku nos ta apresiá e regalo akí i hasi bon uso di dje.