Riba tera, tabatin un lugá ku tabata yama Éden. Yehova Dios a prepará un hòfi den e lugá ei. Den e hòfi ei, tabatin masha hopi flor, palu i bestia. E ora ei, Dios a traha e promé hòmber. Nòmber di e hòmber ei tabata Ádam. Dios a traha Ádam di stòf. Anto Dios a supla den Ádam su nanishi pa Ádam haña rosea. Bo sa kiko a pasa e ora ei? Ádam a bira un persona bibu! Yehova a laga Ádam kuida e hòfi, i Yehova a bis’é ku e mester a duna e bestianan nòmber.

Yehova a duna Ádam un regla importante. El a bisa Ádam: ‘Bo tin mag di kome fruta di tur palu ku tin den e hòfi. Pero tin un palu spesial ku bo no tin mag di kome su fruta. Si bo kome fruta di e palu ei, bo ta muri.’

Mas despues, Yehova a bisa: ‘Mi ta bai traha un hende pa e yuda Ádam.’ E ora ei, Yehova a laga Ádam bai un soño profundo. Dios a usa un repchi di Ádam pa krea un esposa pa Ádam. Ádam su esposa  tabata yama Eva. Ádam ku Eva tabata e promé famia riba tera. Kon Ádam a sintié ora el a mira su kasá? Ádam a bira asina kontentu ku el a bisa: ‘Por fin! Yehova a traha un hende ku mi repchi, un hende manera mi.’

Yehova a bisa Ádam ku Eva pa haña yu i yena tera ku hende. I Yehova tabata ke pa nan dos traha huntu i hasi henter tera un paradeis, esta, un hòfi bunita. Nan tabata traha masha dushi huntu ku otro. Henter tera mester a bira manera hòfi di Éden. Pero esei no a sosodé. Dikon nò? Nos lo haña sa esei den e siguiente kapítulo.