Probablemente, ainda Hesus tabata na Perea, ost di Riu Yordan, ora el a konta e ilustrashon tokante e karné pèrdí i esun tokante e moneda ku a pèrdè. Ámbos ilustrashon ta siña nos mesun lès, esta, ku nos mester alegrá ora un pekadó arepentí i bolbe serka Dios. E fariseo- i e eskribanan tabata kritiká Hesus pasobra e tabata aseptá hende asina. Nan a siña algu for di e dos ilustrashonnan ei di Hesus? Nan a komprondé kon nos Tata selestial ta sinti ora un pekadó arepentí? Wèl, Hesus a konta un otro ilustrashon konmovedor ku ta siña hende e mesun lès importante akí.

E ilustrashon tabata tokante un tata ku tabatin dos yu hòmber; e yu mas chikitu ta e personahe prinsipal. Tantu e fariseonan, e eskribanan komo otro hende ku a tende e ilustrashon mester por a siña un lès importante for di loke a ser bisá di e yu mas chikitu. Pero loke Hesus a bisa di e tata i di e yu mayó tambe ta importante, pasobra nos por siña hopi for di e aktitut ku nan a desplegá. Pues, ta bon pa presta atenshon na tur e tres hòmbernan akí den Hesus su ilustrashon.

Hesus a kuminsá bisa: “Un tata tabatin dos yu hòmber. Esun mas chikitu a bis’é: ‘Tata, duna mi e parti di bo propiedat ku ta toka mi.’ Anto e tata a parti su propiedat entre nan dos.” (Lukas 15:11, 12) Ripará ku e yu mas chikitu a pidi su herensia siendo ku e tata tabata na bida. E tabata ke su parti na e momento ei pa e por tabata independiente i hasi loke e tabata ke ku su herensia. Kiko e tabata ke hasi?

Hesus a splika: “No muchu tempu despues, e yu mas chikitu a piki tur su kosnan i a biaha bai un pais leu, kaminda el a hiba un bida di paranda i malgastá tur loke e tabatin.” (Lukas 15:13) En bes di a keda kas, kaminda e tabata safe serka su tata ku tabata stima nan i perkurá pa nan, e yu akí ta biaha bai un otro pais. E ta malgastá su herensia koriendo paranda i satisfasiendo su deseonan seksual. Despues, e ta hañ’é ku hopi difikultat. Hesus a sigui konta:

 “Despues ku el a kaba di gasta tur loke e tabatin, a bini un hamber pisá den henter e pais ei, i el a kai den miseria. Asta el a bai traha pa un siudadano di e pais ei ku a mand’é bai kuida porko den su kunuku. I e tabatin masha gana di yena su barika ku e bonchinan ku e porkonan tabata kome, ma ningun hende no tabata dun’é nada.”—Lukas 15:14-16.

Bou di e Lei di Dios, porko tabata un bestia impuru; no opstante, e yu akí a hañ’é ta traha komo kuidadó di porko. Anto e tabatin asina tantu hamber ku el a haña gana di kome kuminda di e porkonan. Su situashon penoso a yud’é “rekobrá su sano huisio.” El a bisa den su mes: “Mira kuantu trahadó di mi tata tin pan na abundansia, anto ami ta muri di hamber akinan! Mi ta lanta bai serka mi tata i bis’é: ‘Tata, mi a peka kontra shelu i kontra bo. Mi no ta digno mas di ser yamá bo yu. Hasi mi manera un di bo trahadónan.’” Pues, el a lanta bai serka su tata.—Lukas 15:17-20.

Kon e tata a reakshoná? El a rabia ku su yu hòmber i zundr’é pa e bobedat ku el a kometé di bai for di kas? Òf e tabata indiferente i no a wòri ku su yu a bolbe? Si tabata bo yu hòmber òf yu muhé, kon abo lo a reakshoná?

Hesus a deskribí e tata su sintimentunan i reakshon. El a bisa: “Miéntras ku e [yu] tabata leu ainda, su tata a mir’é ta bini i a haña duele di dje. E tata a kore bai serka dje, bras’é i sunch’e tiernamente.” (Lukas 15:20) Sea ku e tata a tende di e bida di paranda ku su yu a hiba òf nò, el a aseptá su yu ku brasa habrí. E lidernan hudiu, kendenan tabata pretendé di konosé Yehova i di ador’é, a siña un lès for di e ehèmpel akí? Nan a komprondé kon nos Tata selestial ta sinti ora un pekadó arepentí? Nan por a diserní ku Hesus a demostrá e mesun aktitut ku su Tata?

Probablemente e tata den e ilustrashon por a mira na su yu su kara ku e tabata tristu i ku el a arepentí. El a risibí su yu amorosamente i esei a pone ku tabata mas fásil pa e yu konfesá su pikánan. E yu a bisa e tata: “Tata, mi a peka kontra shelu i kontra bo. Mi no ta digno mas di ser yamá bo yu. Hasi mi manera un di bo trahadónan.”—Lukas 15:21.

E tata a bisa su esklabonan: “Hasi lihé! Trese un paña, esun di mas mihó, bistiele, i pone un renchi na su dede i sandalia na su pia. Trese tambe e toro yòn gòrdá, mat’é i laga nos kome i gosa, pasobra e yu di mi akí tabata morto i el a bolbe biba; e tabata pèrdí i a hañ’é.” I nan a kuminsá “gosa.”—Lukas 15:22-24.

Anto relashoná ku e yu mayó kende tur e ora ei tabata den kunuku, Hesus a bisa: “Ora e tabata bini kas i a yega serka, el a tende muzik i bailamentu. Anto el a yama un di e sirbidónan i a puntr’é kiko tabata pasando. E sirbidó a bis’é: ‘Bo ruman a bini, i bo tata a laga mata e toro yòn gòrdá, pasobra el a hañ’é bèk bon di salú.’ Ma e yu mayó a rabia i no kier a drenta paden. Anto su tata a sali pafó i a suplik’é pa e drenta. El a kontestá su tata: ‘Wak kuantu aña mi tin ta sirbi bo manera esklabo, i nunka mi no a falta ku bo mandamentu. I tòg nunka bo no a duna mi ni ún yu di kabritu pa mi gosa ku mi amigunan.  Ma asina ku e yu di bo ei, ku a malgastá tur bo rekursonan ku prostituta, a yega, bo a laga mata e toro gòrdá p’e.’”—Lukas 15:25-30.

Ken tabata manera e yu mayó akí i tabata kritiká Hesus pa motibu ku e tabata mustra miserikòrdia i dediká atenshon na hende komun i koriente i pekadó? E eskriba- i e fariseonan. Ta pasobra nan tabata kritik’é debí ku e tabatin trato ku pekadó, el a konta e ilustrashon akí. Bon mirá, tur hende ku ta kritiká Dios pasobra e ta mustra miserikòrdia mester siña un lès for di e ilustrashon akí.

Hesus a terminá su ilustrashon ku e palabranan ku e tata a usa pa yuda e yu mayó kambia su manera di pensa. E tata a bisa: ‘Mi yu, abo no tabata semper serka mi, i tur loke ta di mi no ta di bo? Ma nos no por a keda sin selebrá i alegrá, ya ku e ruman di bo akí tabata morto i el a bolbe biba; e tabata pèrdí i a hañ’é.’—Lukas 15:31, 32.

Hesus no a bisa kiko e yu mayó a hasi despues. Pero ta interesante pa sa ku despues di Hesus su morto i resurekshon, ‘un gran kantidat di saserdote a aseptá e fe.’ (Echonan 6:7) Podisé algun di nan lo tabata presente ora Hesus a konta e ilustrashon impaktante akí tokante e yu pèrdí. Sí, asta nan a rekobrá nan sano huisio, a arepentí i a bolbe serka Dios.

Tur disipel di Hesus por i mester hasi kaso di e lèsnan importante ku e ekselente ilustrashon akí ta siña nos. Un di e promé lèsnan ku nos por siña ta e importansia di keda den e pueblo di Dios, kaminda nos por ta safe i por disfrutá di e kuido di nos Tata, kende ta stima nos i ta perkurá pa nos. Di otro banda, si nos desvia, na moda di papia bai buska plaser den “un pais leu,” nos lo no por disfrutá di e bendishonnan akí.

Un di dos lès ku nos por siña ta ku si kualke un di nos desvia for di Dios su kaminda, nos mester bolbe serka nos Tata pa nos por tin su aprobashon atrobe.

Tin un lès mas ku nos por siña for di e ilustrashon akí si nos kompará e manera bondadoso ku e tata a risibí su yu ku e manera rabiá ku e yu hòmber mayó a reakshoná. Dios su sirbidónan mester ta personanan ku ta kla pa pordoná i ku ta duna bonbiní na hende ku a bandoná e bèrdat pero ku a arepentí sinseramente i a bolbe na e ‘kas di e Tata.’ Laga nos alegrá ku nos rumannan ku ‘tabata morto pero ku a bolbe biba,’ ku ‘tabata pèrdí pero ku a ser hañá.’