Tabata un seis luna despues ku Huan a kuminsá prediká. Hesus, kende tabatin mas o ménos 30 aña di edat, a bai buska Huan na Riu Yordan. Hesus no a bai serka Huan djis pa bishit’é òf pa wak kon su trabou di prediká tabata bayendo. El a bai pa pidi Huan batis’é.

Pero Huan a nenga na promé instante. El a bisa Hesus: “Ta ami ta esun ku mester laga abo batisá mi, anto abo ta bini serka mi?” (Mateo 3:14) Huan tabata sa ku Hesus tabata un yu spesial di Dios. Kòrda kiko a pasa ora Maria tabata na estado di Hesus i a bishitá Elisabèt, mama di Huan: Huan a bula di alegria den barika di Elisabèt. Elisabèt lo mester a konta Huan loke a pasa. I Huan lo a tende tambe tokante e anunsio ku e angel a hasi relashoná ku e nasementu di Hesus i tokante e angelnan ku a aparesé na e wardadónan di karné riba e anochi ku Hesus a nase.

Ademas, Huan tabata sa ku e boutismo ku e tabata efektuá tabata un símbolo di arepentimentu. Ma Hesus no tabatin piká; p’esei Huan tabata trata di strob’é. Pero Hesus a bis’é: “Laga bai asina e biaha akí. Ta apropiá pa di e manera akí nos kumpli ku tur loke ta hustu.”—Mateo 3:15.

Dikon tabata apropiá pa Hesus batisá? Wèl, Hesus su boutismo no tabata un símbolo di arepentimentu. Su boutismo tabata un prueba ku el a presentá su mes pa hasi e boluntat di su Tata. (Hebreonan 10:5-7) Sí, aunke Hesus tabata karpinté, e tempu a yega pa e kuminsá ku e trabou ku su Tata selestial a mand’é pa hasi na tera. Awor, bo ta kere ku Huan lo a spera ku algu inusual lo a sosodé ora Hesus batisá?

Wèl, Huan mes a bisa despues: “Esun ku a manda mi batisá hende den awa a bisa mi: ‘Riba esun ku bo mira e spiritu baha i keda, é ta esun ku ta batisá den spiritu santu.’” (Huan 1:33) Pues, Huan tabata spera ku un dia Dios lo a drama spiritu santu riba un persona ku e batisá. P’esei, kisas e no a keda sorprendí ora el a mira “spiritu di Dios baha riba [Hesus] manera un palomba” ora Hesus a sali for di awa.—Mateo 3:16.

Pero algu mas a sosodé. Beibel ta bisa ku “shelu a habri” pa Hesus. Kiko esaki a nifiká?  Probablemente esaki a indiká ku, ora Hesus a batisá, el a kòrda tur kos relashoná ku su bida ku e tabatin den shelu, inkluso e kosnan ku Dios a siñ’é promé ku el a bini tera.

Beibel ta bisa tambe ku, ora Hesus a batisá, un stèm for di shelu a bisa: “Esaki ta mi Yu stimá, esun ku tin mi aprobashon.” (Mateo 3:17) Stèm di ken esei tabata? Klaru ku no por tabata stèm di Hesus, pasobra e tabata huntu ku Huan. Tabata Dios su stèm. Pues, Hesus ta Yu di Dios i no Dios mes.

Ta bon pa nota ku, meskos ku e promé hòmber, Adam, Hesus tambe tabata un yu di Dios ku a biba riba tera. Despues ku disipel Lukas a duna algun detaye tokante Hesus su boutismo, el a bisa: “Hesus tabatin mas o ménos 30 aña di edat tempu ku el a kuminsá siña hende. I segun e hendenan, e tabata yu di Hose, yu di Heli, . . . yu di David, . . . yu di Abraham, . . . yu di Noe, . . . yu di Adam, yu di Dios.”—Lukas 3:23-38.

Sí, Hesus tabata meskos ku e hòmber Adam, un ser humano ku tabata “yu di Dios.” Pero ora Hesus a batisá, el a kuminsá un relashon spesial ku Dios. El a komprondé ku e ta Yu di Dios ku despues lo a bira un kriatura selestial i bai shelu bèk. Awor, Hesus por a kuminsá siña hende e bèrdat tokante Dios i e kaminda pa bida. Sí, Hesus tabata kla pa kuminsá su sirbishi ku lo a hiba na sakrifisio di su bida perfekto na benefisio di humanidat.