Hesus tabata na e tèmpel, papiando tokante su morto ku tabata aserkando. Tabata djaluna 10 di nisan. Hesus tabata preokupá tokante e efekto ku su morto lo tabatin riba nòmber di Dios. P’esei, el a bisa: “Tata, glorifiká bo nòmber.” Un stèm fuerte for di shelu a kontestá: “Mi a glorifik’é, i lo mi bolbe glorifik’é.”—Huan 12:27, 28.

E hendenan ku tabata ei banda a keda tur konfundí. Algun di nan a pensa ku ta bos a zona. Otronan a bisa: “Ta un angel a papia kuné.” (Huan 12:29) Pero ta Yehova su stèm nan a tende! I esaki no tabata e promé biaha—desde ku Hesus a kuminsá su sirbishi aki riba tera—ku hende a tende Yehova su stèm.

Tres aña i mei promé, na Hesus su boutismo, Huan Boutista a tende Dios bisa di Hesus: “Esaki ta mi Yu stimá, esun ku tin mi aprobashon.” Mas despues, despues di e Pasku Hudiu di aña 32 di promé siglo, Hesus a ser transfigurá den presensia di Santiago, Huan i Pedro, kendenan a tende Dios bisa: “Esaki ta mi Yu stimá, esun ku tin mi aprobashon; skuch’é.” (Mateo 3:17; 17:5) Pero awor, e di tres biaha akí, Yehova a papia di manera ku hopi hende por a tende.

Hesus a bisa: “E stèm akí no tabata pa mi, sino pa boso.” (Huan 12:30) Pues, e stèm a duna prueba ku Hesus di bèrdat ta Yu di Dios, e Mesías primintí.

Hesus a pone un ekselente ehèmpel di fe durante su bida aki riba tera. Su ehèmpel ta siña hende kon nan mester biba i ta konfirmá ku Satanas e Diabel, e gobernante di e mundu akí, meresé destrukshon. Hesus a bisa: “Awor ta ora pa husga e mundu akí; lo bai saka e gobernante di e mundu akí afó.” Pues, ora Hesus lo a muri lo tabata un viktoria i no un derota. Den ki sentido? Hesus a splika: “Ma ami, ora nan hisa mi na haltu riba tera, lo mi hala tur sorto di hende serka mi.” (Huan 12:31, 32) Sí, pa medio di su morto na staka i pa medio di su siñansanan, Hesus lo a hala hende serka dje i asina duna nan e oportunidat di haña bida eterno.

Ora e multitut a tende Hesus bisa ku lo el a ser ‘hisá na haltu,’ nan a bis’é: “Nos a tende for di e Lei ku Kristu lo keda pa semper; kon por ta ku abo ta bisa ku mester hisa e Yu di hende na haltu? Ta ken e Yu di hende akí ta anto?” (Huan 12:34) Mayoria di e hendenan akí, aunke nan a haña yen di prueba, inkluso a tende Dios mes papia for di shelu, no a aseptá Hesus komo e berdadero Yu di hende, e Mesías primintí.

Anto manera Hesus a hasi anteriormente, el a bolbe referí na su mes komo “e lus.” (Huan 8:12; 9:5) El a urgi e multitut: “E lus lo ta meimei di boso pa un poko tempu mas. Kana tanten ku boso tin e lus, pa skuridat no dominá boso . . . Tanten ku boso tin e lus, pone fe den dje, pa boso bira yu di lus.” (Huan 12:35, 36) Despues ku Hesus a kaba di papia e kosnan akí, el a bai pasobra 10 di nisan no tabata su dia di muri. Ta riba 14 di nisan, ku tabata Pasku Hudiu, e mester a ser ‘hisá na haltu,’ esta, klabá na staka.—Galationan 3:13.

Ora nos reflekshoná riba e sirbishi di Hesus, nos ta mira ku e hudiunan en general no a pone fe den Hesus. De echo, esei tabata kumplimentu di un otro profesia. Isaías a profetisá ku wowo di e hendenan lo a ser siegá i ku nan kurason lo tabata asina duru ku nan lo no a arepentí pa nan por a ser kurá. (Isaías 6:10; Huan 12:40) Sí, mayoria di e hudiunan tabata kabesura i nan a rechasá tur e pruebanan ku a mustra ku Hesus tabata nan Libertador, e kaminda ku ta hiba na bida.

En kambio Nikodemo, Hose di Arimatea i hopi lider mas sí “a pone fe” den Hesus. Awor, nan lo a demostrá nan fe òf nan lo a keda sin hasi esei  pa nan no ser ekspulsá for di snoa òf pasobra nan tabata ‘stima gloria for di hende’?—Huan 12:42, 43.

Hesus mes a splika kiko pone fe den dje a enserá. El a bisa: “Esun ku pone fe den mi no ta pone fe den ami so, sino tambe den Esun ku a manda mi. I esun ku mira mi ta mira tambe Esun ku a manda mi.” E bèrdatnan ku Dios a instruí Hesus pa siña hende i ku Hesus a sigui proklamá ta masha importante. Nan ta asina importante ku Hesus a bisa: “Tin algu ku lo husga esun ku no hasi kaso di mi i no aseptá mi palabranan. E palabra ku mi a papia ta loke lo husg’é riba e último dia.”—Huan 12:44, 45, 48.

Hesus a konkluí ku e siguiente palabranan: “Mi no a papia di mi mes, ma ta e Tata ku a manda mi a duna mi òrdu tokante kiko pa bisa i kiko pa siña hende. Ademas, mi sa ku su mandamentu ta hiba na bida eterno.” (Huan 12:49, 50) Hesus tabata sa ku denter di poko tempu lo el a drama su sanger komo sakrifisio pa hende ku pone fe den dje.—Romanonan 5:8, 9.