Tabata e anochi di Pasku Hudiu. Hesus a kaba di laba pia di su apòstelnan, siñando nan asina un lès tokante humildat. Despues, e i su apòstelnan a selebrá e sena di Pasku. Probablemente, ta despues di e sena ei Hesus a sita un profesia di David, ku ta bisa: “Asta mi amigu íntimo, den ken mi a konfia, kende a kome mi pan, a lanta su hilchi kontra mi.” I el a splika su palabranan, bisando: “Un di boso lo traishoná mi.”—Salmo 41:9; Huan 13:18, 21.

E apòstelnan a bira wak otro i kada un di nan a puntra Hesus: “Señor, no ta ami tòg?” Asta Hudas Iskariot a puntra esei. Pedro a hasi seña ku Huan, kende tabata sintá banda di Hesus, pa Huan saka afó ta ken Hesus tabata ke men. P’esei, Huan a lèn riba Hesus i a puntr’é: “Señor, ta ken?”—Mateo 26:22; Huan 13:25.

Hesus a kontest’é: “Ta esun ku mi duna e pida pan ku mi dòp den kònchi.” Hesus a kue pida pan, dòp e den e kònchi ku tabata riba mesa i duna Hudas, bisando: “E Yu di hende ta bai laga boso, manera ta pará skirbí tokante dje, ma ai di esun pa medio di ken e Yu di hende ta ser traishoná! Lo tabata mihó pa e hende ei si e no a nase mes.” (Huan 13:26; Mateo 26:24) Anto Satanas a drenta Hudas. I e hòmber akí, kende tabata korupto kaba, a entregá su mes pa hasi boluntat di e Diabel i asina a bira “yu di destrukshon.”—Huan 6:64, 70; 12:4; 17:12.

Hesus a bisa Hudas: “Loke bo ta hasiendo, kaba di hasié pa kaba.” Awor, komo ku Hudas tabatin e kaha di plaka, e otro apòstelnan a kere ku ta manda Hesus a mand’é bai “kumpra loke nan tabatin mester pa e fiesta, òf ku e mester a duna hende pober algu.” (Huan 13:27-30) Pero, esei no tabata e kaso; en realidat, Hudas a sali pa bai traishoná Hesus.

 Anto riba e mesun anochi ei ku nan a selebrá e sena di Pasku, Hesus a introdusí un otro selebrashon. El a kue un pan, gradisí Dios, kibra e pan i duna su apòstelnan pa kome. Anto el a bisa nan: “Esaki ta representá mi kurpa ku lo mi duna pa boso. Sigui hasi esaki na mi memoria.” (Lukas 22:19) E apòstelnan a pasa e pan pa otro i nan tur a kome di dje.

Kaba, Hesus a kue un kopa ku biña, a gradisí Dios i a pas’é pa su apòstelnan. Nan a bebe for di e kopa di kua Hesus a bisa: “E kopa akí ta representá e pakto nobo a base di mi sanger ku lo mi drama pa boso.”—Lukas 22:20.

Asina, Hesus a introdusí e manera ku su siguidónan mester konmemorá su morto tur aña, riba 14 di nisan. E konmemorashon akí ta yuda nos rekordá loke Hesus i su Tata a hasi pa libra hende ku fe for di kondena di piká i morto. E areglo akí ta logra mas ku loke Pasku Hudiu a logra pa e hudiunan; e ta yuda hende deboto na Dios haña berdadero liberashon.

Hesus a bisa ku su sanger ‘lo a ser dramá pa pordon di piká di hopi hende.’ Entre e hopi hendenan ei, nos ta haña e apòstelnan fiel. Nan lo ta algun di esnan ku lo ta huntu ku Hesus den e Reino di su Tata.—Mateo 26:28, 29.