1, 2. (a) Kiko por parse imposibel pa hopi hende, pero kiko Beibel ta garantisá nos? (b) Ki relashon íntimo Abraham a haña chèns di disfrutá di dje, i pakiko?

KON lo bo sinti bo si e Kreadó di shelu i tera bisa bo ku bo ta su amigu? Pa hopi hende, esei lo ta duru pa kere. Al fin i al kabo, ta ki mishi un simpel ser humano bira amigu di Yehova Dios? Tòg Beibel ta garantisá nos ku un relashon íntimo asina ta realmente posibel.

² Abraham mes tabata un dje personanan di antigwedat ku tabatin un relashon íntimo asina ku Dios. Yehova a referí n’e patriarka ei komo “mi amigu.” (Isaias 41:8) Sí, Yehova a konsider’é un amigu personal. Abraham a haña chèns di eksperensiá e relashon íntimo ei pa motibu ku el a “kere Dios.” (Santiago 2:23) Awe tambe Yehova ta buska oportunidat pa ‘mustra su afekto’ na hende ku ta sirbié motivá pa amor. (Deuteronomio 10:15) Su Palabra ta hasi e siguiente apelashon: “Hala serka Dios i e lo hala serka boso.” (Santiago 4:8) Den e palabranan aki nos ta haña tantu un invitashon komo un promesa.

3. Ki invitashon Yehova ta ekstendé na nos, i kiko e ta primintí nos en konekshon ku esei?

³ Yehova ta invitá nos pa hala serka dje. E ta kla i dispuesto pa aseptá nos komo su amigu. Na mes momentu, e ta primintí nos ku si nos dal e pasonan nesesario pa hala serka dje, e di su banda tambe lo hasi meskos. E lo hala serka nos. Di e manera ei nos lo por haña algu sumamente presioso: “komunion íntimo [ku] SEÑOR.” * (Salmo 25:14)  “Komunion íntimo” ta duna e idea di kòmbersashon konfidensial ku un amigu spesial.

4. Kon lo bo deskribí un amigu íntimo, i den ki sentido Yehova ta un amigu asina pa esnan ku ta hala serka dje?

⁴ Abo tin un amigu íntimo di konfiansa? Un amigu asina ta un persona ku ta interesá den bo. Bo ta konfi’é pasobra el a demostrá ku e ta leal na bo. Bo goso ta bira mas kompletu ora bo kompartí bo alegria kuné, i e solo echo ku e por skucha bo ora bo tin problema ta aliviá bo pena. Asta ora ta parse ku niun otro hende no ta komprondé bo, e sí t’ei pa bo. Meskos tambe, ora bo hala serka Dios, bo ta bin haña un Amigu spesial ku di bèrdat ta apresiá bo, ku tin interes profundo den bo i ku ta komprondé bo kompletamente. (Salmo 103:14; 1 Pedro 5:7) Bo ta konfi’é bo sintimentunan di mas íntimo pasobra bo sa ku e ta fiel na esnan ku ta fiel na dje. (Salmo 31:5) Un kos sí, nos lo no por tabatin e privilegio di tin Dios komo nos amigu íntimo si no ta pasobra é a hasi esaki posibel.

5. Kon Yehova a hasi posibel pa nos hala serka dje?

⁵ Riba nos mes, komo pekadónan hamas nos lo por hala serka Dios. (Salmo 5:4) “Ma Dios ta demostrá su mes amor pa ku nos den esaki, ku tempu nos tabata pekadó ainda, Kristu a muri pa nos,” segun apòstel Pablo. (Romanonan 5:8) Sí, Yehova a hasi areglo pa Hesus “duna su bida komo preis di reskate pa hopi.” (Mateo 20:28) Fe den e sakrifisio di reskate ei ta permití nos hala serka Dios. Siendo ku Dios a “stima nos promé,” el a pone e base pa nos bira su amigu.—1 Juan 4:19.

6, 7. (a) Kon nos por sa ku Yehova no ta un Dios misterioso, imposibel pa konosé? (b) Den ki maneranan Yehova a revelá su mes?

⁶ Yehova a dal un paso mas: El a revelá su mes na nos. Pa un persona por ta bo amigu íntimo, bo tin ku konos’é bon, i apresiá su kualidatnan i forma di aktua. Pues si  Yehova tabata un Dios misterioso i imposibel pa konosé, hamas nos lo por a hala serka dje. Sin embargo, en bes di skonde su mes, e kier pa nos konos’é. (Isaias 45:19) Ademas, loke e ta revelá tokante su mes ta disponibel pa tur hende, asta pa hende ku mundu ta konsiderá insignifikante.—Mateo 11:25.

⁷ Kon Yehova a revelá su mes na nos? Den su obranan di kreashon nos por mira sierto aspektonan di su personalidat, manera su poder enorme, su sabiduria infinito i su amor inmenso. (Romanonan 1:20) Pero no ta mediante su kreashon so Yehova a revelá su mes na nos. E Gran Komunikadó a manifestá su mes tambe mediante un revelashon por eskrito den su Palabra, Beibel.

8. Pakiko nos por bisa ku Beibel mes ta un prueba dje amor ku Yehova tin pa nos?

⁸ Beibel mes ta un prueba dje amor ku Yehova tin pa nos. Den su Palabra, e ta revelá su mes ku términonan ku nos por komprondé—un prueba ku no solamente e ta stima nos, sino tambe ku e kier pa nos konos’é i stim’é. Loke nos ta lesa den e buki presioso aki ta permití nos kontemplá “e bunitesa di Señor” i ta motivá nos pa hala serka dje. (Salmo 27:4) Laga nos analisá algun dje maneranan alentador den kua Yehova ta revelá su mes den su Palabra.

9. Menshoná algun pasashi di Beibel ku ta papia di e kualidatnan spesífiko di Dios.

⁹ E Skritura ta hasi hopi menshon direkto di e kualidatnan di Dios. At’akí un par di ehèmpel. “Señor ta stima hustisia.” (Salmo 37:28) Dios ta “ekselente den poder.” (Jòb 37:23) E ta “e Dios fiel.” (Deuteronomio 7:9) E ta “sabí di kurason.” (Jòb 9:4) E ta un “Dios, yen di kompashon i grasia, kende no ta rabia lihé i kende ta abundá den miserikòrdia i bèrdat.” (Eksodo 34:6) “Abo, Señor, ta bon, i kla pa pordoná.”  (Salmo 86:5) I manera e kapítulo anterior a menshoná, esun ku ta destaká mas ta: “Dios ta amor.” (1 Juan 4:8) Segun ku bo ta reflekshoná riba e bunita kualidatnan aki, bo no ta sinti bo atraí n’e Dios inkomparabel aki?

10, 11. (a) Pa yuda nos komprondé su personalidat mihó, kiko Yehova a inkluí den su Palabra? (b) Ki ehèmpelnan di Beibel ta yuda nos visualisá kon Dios ta desplegá su poder?

¹⁰ Ademas di bisa nos kiko ta su kualidatnan, debí na su gran amor Yehova a inkluí den su Palabra ehèmpelnan konkreto di kon el a desplegá esakinan. E relatonan ei ta pinta kuadronan mental bibu ku ta yuda nos mira e vários fasetanan di su personalidat na un manera mas kla. Esei, na su turno, ta yuda nos hala serka dje. Laga nos wak un ehèmpel.

¹¹ Beibel ta papia di “e grandesa di [Dios] su forsa.” (Isaias 40:26) Pero ta muchu mas impaktante pa lesa kon el a libra Israel dor di Laman Kòrá i despues sostené e nashon 40 aña largu den e desierto. Bo por visualisá kon e awanan brutu ta parti den dos. Bo por mira kon e nashon—kisas un 3.000.000 hende na tur—ta kana riba fondo seku dje laman entre dos enorme muraya di awa na kada banda. (Eksodo 14:21; 15:8) Bo por mira evidensia di kon Dios a kuida nan i protehá nan den desierto. Nan a haña awa for di baranka. Yehova a laga kuminda, ku a parse manera simia blanku, aparesé riba suela. (Eksodo 16:31; Numbernan 20:11) Aki Yehova ta revelá no solamente ku e tin poder sino ku e ta us’é tambe na fabor di su pueblo. No ta un konsuelo pa sa ku ta un  Dios poderoso ta tende nos orashonnan, unu ku “ta nos refugio i fortalesa, un pronto ousilio den tempu di angustia”?—Salmo 46:1.

12. Kon Yehova ta yuda nos “mir’é” den términonan ku nos por komprondé?

¹² Yehova, kende ta un spiritu, a bai mas aleu ainda pa yuda nos konos’é. Komo hende nos por mira solamente loke ta visibel pa wowo humano; e region di spiritu ta invisibel pa nos. Si Dios a deskribí su mes den términonan spiritual, lo ta meskos ku ora bo purba splika un hende ku a nase siegu e detayenan di bo aparensia, manera koló di bo wowo òf tokante bo purunchinan. Mas bien, Yehova tabatin e bondat di yuda nos “mir’é” den términonan ku nos por komprondé. Tin biaha e ta usa idioma figurativo pa kompará su mes ku kosnan ku nos konosé. E ta asta deskribí su mes komo si fuera e tin sierto karakterístikanan humano. *

13. Ki kuadro mental Isaias 40:11 ta krea, i ki sintimentu esei ta duna bo?

¹³ Ripará kon Isaias 40:11 ta deskribí Yehova: “Manera un wardadó di karné e lo kuida su tou, e lo kohe e lamchinan den su brasa, i tene nan serka di su kurason [“pechu,” NW].” Aki Beibel ta kompará Yehova ku un wardadó di karné ku ta kohe lamchi den “su brasa.” Esaki ta laga nos mira ku Dios ta kapas pa protehá i sostené su sirbidónan, asta esnan mas vulnerabel. Nos por sinti nos protehá den su brasa fuerte, pasobra si nos ta leal na dje, lo e no bandoná nos nunka. (Romanonan 8:38, 39) E Gran Wardadó ta karga e lamchinan na “su pechu”—un ekspreshon ku ta referí  n’e ploinan na e parti ariba di paña di un wardadó, ku ta forma manera un saku, i den kua e sa karga un lamchi ku a kaba di nase. Esei ta duna nos e siguransa anto ku Yehova ta stima nos i ta kuida nos ku ternura. Nos deseo natural ta di ta serka dje, no ta bèrdat?

14. Pakiko nos por bisa ku Yehova ta revelá e aspektonan mas íntimo di su personalidat pa medio di Hesus?

¹⁴ Den su Palabra, Yehova ta revelá e aspektonan mas íntimo di su personalidat pa medio di su Yu stimá, Hesus. No tin niun hende ku por reflehá e pensamentu i sintimentunan di Dios mihó ku Hesus, òf splika na un manera mas bibu kon Dios ta. Al fin i al kabo, e Yu primogénito ei a eksistí huntu ku su Tata promé ku Dios a krea otro kriaturanan spiritual i e universo físiko. (Kolosensenan 1:15) Hesus a konosé Yehova íntimamente. P’esei e por a bisa: “Ningun no sa ken e Yu ta, sino e Tata so, i ken e Tata ta, sino e Yu so, i esun na kende e Yu kier revel’é.” (Lukas 10:22)  Tempu ku Hesus tabata riba tera komo hende, el a revelá su Tata den dos manera importante.

15, 16. Den ki dos maneranan Hesus a revelá su Tata?

¹⁵ Na promé lugá, e siñansanan di Hesus ta yuda nos konosé su Tata. Hesus a papia di Yehova na un manera ku ta konmové nos kurason. Por ehèmpel, pa splika ku Dios ta miserikòrdioso i ku e ta risibí bèk e pekadónan ku repentí, Hesus a kompará Yehova ku un Tata pordonadó ku ta sinti su mes asina profundamente konmoví ora e mira su yu pèrdí bolbe bèk, ku e ta kore bai top’é, bras’é i sunch’e tiernamente. (Lukas 15:11-24) Tambe Hesus a deskribí Yehova komo un Dios ku ta atraé hende hustu pasobra e ta stima nan komo persona. (Juan 6:44) E sa asta ki ora un para chikitu ta kai na tera. Hesus a splika nan: “No tene miedu; boso bal mas ku un kantidat di mòfi.” (Mateo 10:29, 31) Nos no ta sinti nos atraí na un Dios bondadoso asina?

¹⁶ Na di dos lugá, Hesus ta yuda nos konosé Yehova pa medio di su ehèmpel. Hesus a reflehá su Tata na un manera asina perfekto ku e por a bisa: “Esun ku a mira mi a mira e Tata.” (Juan 14:9) Pues, ora nos lesa den e Evangelionan tokante Hesus—e sintimentunan ku el a manifestá i e manera ku el a trata ku otro hende—den un sentido nos ta mirando un refleho bibu di su Tata. Yehova no por a duna nos un revelashon mas kla di su kualidatnan ku esei. Pakiko?

17. Ilustrá kiko Yehova a hasi pa yuda nos haña un idea kon e ta.

¹⁷ Pa ilustrá esaki, imaginá ku bo ta purba splika kiko ta bondat. Lo bo por purba definié ku palabra. Pero si bo por mustra riba un persona ku n’e momentu ei ta hasiendo un akto di bondat i bisa, “Esei ta un ehèmpel di bondat,” e palabra “bondat” ta haña mas nifikashon i ta bira mas fásil pa komprondé. Yehova a hasi algu paresido pa yuda nos haña un idea di kon e ta. Ademas di deskribí su mes ku palabra, el a duna nos e ehèmpel bibu di su Yu. Den Hesus nos ta mira e kualidatnan di Dios na akshon. Ta komo si fuera  Yehova ta bisa nos pa medio di e Evangelionan ku ta deskribí Hesus: “Ta asina mi ta.” Kon e registro inspirá ta deskribí Hesus tempu ku e tabata riba tera?

18. Kon Hesus a manifestá e kualidatnan prinsipal di poder, hustisia i sabiduria?

¹⁸ Den Hesus nos ta haña un bunita ekspreshon di e kuater kualidatnan prinsipal di Dios. E tabatin poder riba enfermedat, hamber i asta morto. Pero distinto di hòmbernan egoista ku ta hasi mal uso di nan poder, nunka el a usa e poder di hasi milager pa benefisiá su mes òf pa kousa daño na otro hende. (Mateo 4:2-4) El a stima hustisia. Ora el a mira komersiantenan desonesto probechá di hende pober, su sentido di hustisia a pon’é bira masha indigná. (Mateo 21:12, 13) El a trata hende pober i oprimí na un manera imparsial. El a yuda nan “haña sosiegu” pa nan alma. (Mateo 11:4, 5, 28-30) Hesus, kende tabata “mas ku Salomon,” a manifestá un sabiduria inkomparabel den su siñansanan. (Mateo 12:42) Pero nunka Hesus a broma ku su sabiduria. Su palabranan a alkansá kurason di e pueblo komun, pasobra su siñansanan tabata kla, simpel i práktiko.

19, 20. (a) Pakiko nos por bisa ku Hesus tabata un ehèmpel sublime di amor? (b) Segun ku nos ta lesa i meditá riba e ehèmpel di Hesus, kiko nos mester kòrda semper?

¹⁹ Hesus tabata un ehèmpel sublime di amor. Den henter su ministerio, el a desplegá amor den su hopi fasetanan, manera empatia i kompashon. E no por a mira sufrimentu di otro hende sin sinti duele, i na vários okashon esaki a impuls’é pa hasi algu pa nan. (Mateo 14:14) Ounke Hesus a kura hende malu i a alimentá esnan ku tabatin hamber, el a ekspresá kompashon den un manera muchu mas vital. El a yuda otro hende konosé, aseptá i stima e bèrdat tokante e Reino di Dios, ku lo trese bendishonnan permanente pa humanidat. (Marko 6:34; Lukas 4:43) Pero e manera mas importante ku Hesus a demostrá su amor inegoista ta ora el  a entregá su alma boluntariamente na fabor di otro hende.—Juan 15:13.

²⁰ No ta nada straño anto ku hende di tur edat i antesedente a sinti nan atraí na e hòmber tierno i yen di sintimentu aki. (Marko 10:13-16) Sin embargo, segun ku nos ta lesa i meditá riba e ehèmpel bibu di Hesus, laga nos kòrda semper ku den e Yu aki nos ta mira un refleho kla di su Tata.—Hebreonan 1:3.

21, 22. Kiko ta nifiká buska Yehova, i kiko e buki aki ta kontené pa yuda nos hasi esei?

²¹ Dor di revelá su mes asina kla den su Palabra, Yehova no ta laga duda ku e kier pa nos hala serka dje. Na mes momentu, e no ta obligá nos kuminsá un relashon kuné i buska su aprobashon. Ta nos tin e responsabilidat di buska Yehova “miéntras ku e por wòrdu hañá.” (Isaias 55:6) Buska Yehova ta enserá konosé su kualidatnan i su forma di trata manera Beibel ta revelá. E buki ku bo ta lesando aki ta diseñá pa yuda bo hasi esei.

²² Lo bo ripará ku e buki aki ta dividí den sekshonnan ku ta korespondé ku Yehova su kuater kualidatnan prinsipal:  poder, hustisia, sabiduria i amor. Kada sekshon ta kuminsá ku un resúmen di e kualidat. E siguiente kapítulonan ta analisá kon Yehova ta manifestá e kualidat ei den su vários aspektonan. Kada sekshon ta kontené tambe un kapítulo ku ta mustra kon Hesus a sirbi komo ehèmpel di e kualidat en kuestion, i tambe un kapítulo ku ta siña nos kon nos por refleh’é den nos bida.

23, 24. (a) Splika kiko ta e meta di e kuadro spesial “Pregunta pa Meditá Ariba.” (b) Kon meditashon ta yuda nos hala mas i mas serka Dios?

²³ Kuminsando ku e kapítulo aki, tin un kuadro spesial titulá “Pregunta pa Meditá Ariba.” Wak por ehèmpel e kuadro na página 24. E intenshon no ta pa usa e tekstonan i preguntanan komo un repaso di e kapítulo. Mas bien, nan t’ei pa yuda bo meditá riba otro aspektonan importante relashoná ku e tema. Kon bo por hasi bon uso di e rasgo aki? Buska kada un di e tekstonan sitá i lesa e versíkulonan atentamente. Despues lesa e pregunta ku tin tras di kada teksto. Meditá riba e kontestanan. Tambe bo por hasi algun investigashon. Ademas, puntra bo mes: ‘Kiko e informashon aki ta siña mi tokante Yehova? Ki efekto e tin riba mi bida? Kon mi por us’é pa yuda otro hende?’

²⁴ E análisis ei por yuda nos hala mas i mas serka Yehova. Pakiko? Beibel ta relashoná meditashon ku nos kurason. (Salmo 19:14) Ora nos reflekshoná ku gratitut riba loke nos ta siña tokante Dios, e informashon ta baha den nos kurason figurativo, kaminda e ta influensiá nos moda di pensa, stimulá nos sintimentunan i finalmente move nos na akshon. Nos amor pa Dios ta bira mas profundo, i e amor ei ta duna nos e deseo di agrad’é komo nos mihó Amigu. (1 Juan 5:3) Pa kuminsá un relashon asina ku Yehova, nos mester konosé su kualidatnan i forma di aktua. Pero promé ku esei, laga nos analisá un aspekto di su personalidat ku ta duna nos un motibu konvinsente pa hala serka dje: su santidat.