LÈS 53
Skohe Entretenimentu Ku Ta Agradá Yehova
Yehova ta “e Dios felis.” (1 Timoteo 1:11) E ke pa nos ta felis i disfrutá di bida. Yehova ta keda kontentu ora nos ta tuma tempu pa sosegá di nos trabou i rekreá. Den e lès akí, nos lo mira kon nos por disfrutá di nos tempu liber i na mes momento agradá Yehova ku loke nos a skohe pa hasi komo dibertishon.
1. Kiko nos tin ku tene kuenta kuné ora di skohe entretenimentu?
Kiko bo ta gusta hasi pa bo relahá? Algun hende, den nan tempu liber, ta gusta pasa un ratu trankil na kas pa lesa buki, skucha músika, wak pelíkula òf subi Internet. Otro hende ta gusta ta mas aktivo i pasa tempu ku nan amigunan; nan ta gusta bai kana, landa òf hunga wega huntu. Sin importá kiko nos ta gusta hasi den nos tempu liber, nos mester hasi sigur ku nos entretenimentu ta “agradá Señor.” (Efesionan 5:10) Esei ta masha importante pasobra loke mayoria di hende ta skohe pa wak, skucha òf hasi tin di haber ku kos ku Yehova ta odia, manera violensia, inmoralidat seksual òf spiritismo. (Lesa Salmo 11:5.) Kiko lo yuda nos skohe bon entretenimentu?
Si nos skohe amigu ku ta stima Yehova, nan por tin bon influensia riba nos i por yuda nos skohe bon entretenimentu. Manera nos a siña den Lès 48, “hende ku ta anda ku hende sabí ta bira sabí.” Di otro banda, si nos ta anda regularmente ku hende ku no ta stima Yehova su normanan, nos “lo sufri daño.”—Proverbionan 13:20.
2. Dikon ta importante pa wak kuantu tempu nos ta dediká na entretenimentu?
Aunke nos skohe entretenimentu ku ta aseptabel pa Yehova, nos mester wak pa nos no dediká demasiado tempu na dje. Si nos dediká demasiado tempu na entretenimentu, nos lo no sobra sufisiente tempu pa otro kos mas importante. Beibel ta animá nos pa usa nos “tempu di e mihó manera.”—Lesa Efesionan 5:15, 16.
KIKO MAS NOS POR SIÑA?
Laga nos wak kon bo por skohe bon entretenimentu.
3. Evitá entretenimentu ku no ta agradá Yehova
Dikon nos tin ku wak bon ki entretenimentu nos ta skohe? Pasa e VIDIO. Despues, analisá e siguiente preguntanan:
-
Den ki manera e weganan ku hende tabata hunga na Roma di antigwedat ta similar na algun entretenimentu djawe?
-
Kiko Danny a siña tokante entretenimentu?
Lesa Romanonan 12:9. Despues, analisá e siguiente pregunta:
-
Kon e teksto akí por yuda bo skohe bon entretenimentu?
Kiko ta algun kos ku Yehova ta odia? Lesa Proverbionan 6:16, 17 i Galationan 5:19-21. Despues di lesa kada teksto, analisá e siguiente pregunta:
-
Kua di e kosnan ku e teksto ta menshoná bo ta mira den entretenimentu awe?
Kon bo por skohe bon entretenimentu?
Puntra bo mes:
-
Tin kos ku Yehova ta odia den e entretenimentu akí?
-
E entretenimentu akí ta kita tempu for di kos mas importante?
-
Lo mi pasa muchu tempu ku hende ku no ta stima Yehova?
Ta importante pa nos keda kaminda ta safe, esta, mas leu for di peliger posibel. Di mes manera, nos mester keda leu for di entretenimentu ku nos ta pensa ku no ta bon
4. Usa bo tempu bon
Pasa e VIDIO. Despues, analisá e siguiente pregunta:
-
Aunke e ruman hòmber den e vidio su entretenimentu no tabata malu, kiko tabata su problema?
Lesa Filipensenan 1:10. Despues, analisá e siguiente pregunta:
-
Kon e teksto akí por yuda bo skohe kuantu tempu lo bo dediká na rekreo?
5. Skohe entretenimentu sano
Aunke tin entretenimentu ku ta desagradá Yehova, tin hopi kos leuk ku nos por hasi ku sí ta aseptabel p’e. Lesa Eklesiástes 8:15 i Filipensenan 4:8. Despues, analisá e siguiente pregunta:
-
Ki entretenimentu sano bo ta gusta?
Bo por disfrutá di bon entretenimentu i rekreo
LOKE HENDE SA BISA: “Mi no ta mira nada malu si mi entretenimentu ta kontené violensia, inmoralidat seksual òf spiritismo pasobra mi mes no ta praktiká e kosnan ei.”
-
Kiko lo bo bisa un hende ku bisa esei?
RESÚMEN
Yehova ke pa nos skohe i disfrutá di bon entretenimentu.
Repaso
-
Komo kristian, ki entretenimentu nos tin ku evitá?
-
Dikon nos mester wak kuantu tempu nos ta dediká na entretenimentu?
-
Bo ke skohe entretenimentu ku ta agradá Yehova? Dikon?
MAS INFORMASHON INTERESANTE
Wak ken mester skohe entretenimentu pa nos.
“Tin Sierto Pelíkula, Buki òf Kantika Ku Testigunan di Yehova Ta Prohibí?” (artíkulo riba jw.org)
Haña sa kon bo por skohe rekreo ku ta bon pa bo.
“Bo Rekreo Ta Benefisiá Bo?” (E Toren di Vigilansia di 1 di òktober 2011)
Lesa e relato “Mi A Vense Mi Prehuisio” pa wak dikon un hòmber a disidí di skohe otro entretenimentu.
“Beibel Ta Kambia Bida di Hende” (E Toren di Vigilansia di 1 di febrüari 2010, na spañó)
Wak kon un mama ta tuma desishon sabí enkuanto entretenimentu ku ta kontené spiritismo.
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
