LÈS 6
Ki Speransa Tin pa Hende Ku A Muri?
1. Kiko ta e bon notisia relashoná ku e mortonan?
Ora Hesus a yega Betania, un pueblito serka di Herúsalèm, su amigu Lázaro tabatin kuater dia morto kaba. Anto Hesus a bai na e graf huntu ku Marta i Maria, ruman muhénan di e defuntu. Djis despues, un multitut di hende a yega einan. Imaginá bo kon kontentu Marta i Maria a keda ora Hesus a resusitá Lázaro.—Lesa Huan 11:21-24, 38-44.
Marta tabata sa kaba di e bon notisia relashoná ku e mortonan. E tabata sa ku Yehova lo resusitá nan pa biba riba tera atrobe.—Lesa Yòb 14:14, 15.
2. Kiko ta pasa ku nos ora nos muri?
Dios a bisa Adam: “Stòf bo ta, i na stòf lo bo bolbe.”—GÉNESIS 3:19.
Hende ta trahá di stòf. (Génesis 2:7; 3:19) Nos tin un kurpa físiko, i despues ku nos muri no tin nada ku ta sali bai i sigui biba otro kaminda. Ora nos muri, nos selebro ta muri i nos pensamentunan ta kaba na nada. Pues, despues ku Lázaro a resusitá, e no a papia nada di loke el a pasa aden miéntras ku e tabata morto, pasobra e mortonan no sa nada.—Lesa Salmo 146:4; Eklesiástes 9:5, 6, 10.
Dios ta tormentá hende den kandela despues di morto? Ya ku Beibel ta mustra ku e mortonan ta inkonsiente, ta bisto ku e siñansa di un fièrnu di kandela ta kalumniá Dios. E idea so di tormentá hende den kandela ta algu repugnante p’e.—Lesa Yeremías 7:31.
Wak e vidio Kiko Ta Pasa ku Nos Ora Nos Muri?
3. E mortonan por komuniká ku nos?
E mortonan no por papia ni tende. (Salmo 115:17) Pero tin angel malbado ku ta papia ku hende i ta hasi komo si fuera nan ta hende ku a fayesé. (2 Pedro 2:4) Yehova ta prohibí hende di purba konsultá ku e mortonan.—Lesa Deuteronomio 18:10, 11.
4. Ken lo haña resurekshon?
Miónes di hende ku a muri lo haña resurekshon pa biba riba tera. Asta hende ku a yega di hasi malu debí ku nan no tabata konosé Dios lo haña resurekshon.—Lesa Lukas 23:43; Echonan 24:15.
Hende resusitá lo haña oportunidat di siña e bèrdat tokante Dios i mustra fe den Hesus pa medio di nan obedensia na dje. (Revelashon 20:11-13) Si nan hasi loke ta bon, nan lo por biba pa semper riba tera.—Lesa Huan 5:28, 29.
5. Kiko resurekshon ta siña nos tokante Yehova?
Dios a manda su Yu pa e bin muri pa nos i asina habri kaminda pa hende haña resurekshon. Pues, e speransa di resurekshon ta siña nos tokante Yehova su amor i su bondat inmeresí. Ora hende kuminsá lanta for di morto, ken lo bo tin masha gana di mira?—Lesa Huan 3:16; Romanonan 6:23.
