LÈS 3
E Bon Notisia Realmente Ta Bini di Dios?
1. Ken ta e Outor di Beibel?
E bon notisia di ku hende lo biba pa semper riba tera ta skirbí den Beibel. (Salmo 37:29) Beibel ta konsistí di 66 buki. Dios a usa rònt di 40 hòmber fiel pa skirbi nan. Moises a skirbi e promé sinku bukinan mas o ménos 3.500 aña pasá. Anto apòstel Huan a skirbi e último buki rònt di 1.900 aña pasá. Ken su ideanan nan a skirbi? Dios a komuniká ku e eskritornan di Beibel pa medio di su spiritu santu. (2 Samuel 23:2) Loke nan a skirbi tabata Dios su pensamentunan, no di nan mes. Pues, e Outor di Beibel ta Yehova.—Lesa 2 Timoteo 3:16; 2 Pedro 1:20, 21.
Wak e vidio Ken Ta e Outor di Beibel?
2. Kon nos por tin sigur ku loke Beibel ta bisa ta bèrdat?
Nos sa ku Beibel ta bini di Dios pasobra e ta profetisá futuro en detaye i ku eksaktitut. No tin niun hende ku por hasi esei. (Hosue 23:14) Ta Dios Todopoderoso so por premirá futuro di humanidat ku eksaktitut.—Lesa Isaías 42:9; 46:10.
Nos mester por ferwagt di un buki di Dios ku e ta úniko, i e ta tambe. Awe Beibel ta disponibel den sientos di idioma i nan a produsí i distribuí miónes i miónes di ehemplar. Aunke Beibel ta un buki hopi bieu, e ta kuadra ku siensia. Ademas, su eskritornan no a kontradisí otro. * I loke Beibel ta bisa relashoná ku amor por bini solamente di e Dios berdadero—e Dios di amor—i te awe e tin poder pa kambia bida di hende. E echonan akí ta konvensé miónes di hende ku Beibel ta e Palabra di Dios.—Lesa 1 Tesalonisensenan 2:13.
Wak e vidio Kon Nos Por Tin Sigur Ku Loke Beibel Ta Bisa Bèrdat?
3. Kiko Beibel ta kontené?
Beibel ta enfoká riba e bon notisia di ku Dios tin un propósito amoroso pa humanidat. E Skritura ta splika kon hende a pèrdè e privilegio di biba den un paradeis riba tera na prinsipio di historia di humanidat i kon finalmente Dios lo bolbe hasi tera un paradeis.—Lesa Revelashon 21:4, 5.
Tambe e Palabra di Dios ta kontené lei, prinsipio i konseho. Ademas, Beibel ta konta kon Dios a trata ku hende; e relatonan ei ta siña nos ki klase di Dios e ta. Pues, Beibel por yuda bo konosé Dios. E ta splika bo kon bo por bira su amigu.—Lesa Salmo 19:7, 11; Santiago 2:23; 4:8.
4. Kiko por yuda bo komprondé Beibel?
E foyeto akí ta sigui e mesun método ku Hesus a usa pa yuda bo komprondé Beibel. Hesus a referí na vários teksto bíbliko i a splika “nifikashon di e Skritura.”—Lesa Lukas 24:27, 45.
E bon notisia ku ta bini di Dios ta realmente fasinante. Tòg, algun hende no ta interesá den dje i otronan ta asta disgustá kuné. Ma no desanimá. Bo speransa di biba pa semper ta dependé di e konosementu ku bo ta hañando di Dios.—Lesa Huan 17:3.
^ par. 3 Wak e foyeto Un Buki pa Tur Hende.
