Relato 102: Hesus Ta Bibu
BO SA ken e señora i e dos hòmbernan ta? E señora ta Maria Magdalena, un amiga di Hesus. I e dos hòmbernan na blanku bistí ta angel. Maria ta pará den porta di e graf kaminda nan a pone e kurpa di Hesus despues di su morto. Pero su kurpa no t’ei! Ken a bai kuné? Laga nos mira.
Despues di Hesus su morto, e saserdotenan a bisa Pilato: ‘Ora Hesus tabata na bida el a bisa ku lo e lanta despues di tres dia. P’esei, duna òrdu pa tene warda na e graf. E ora ei su disipelnan no por bai ku su kurpa i bisa ku el a lanta for di morto!’ Pilato a bisa e saserdotenan pa manda sòldá pa tene warda na e graf.
Pero mainta trempan riba e di tres dia despues di Hesus su morto, un angel di Yehova a presentá diripiente. El a hala e piedra dilanti di e graf un banda. E sòldánan a spantá asina tantu ku nan no por a ni move. Finalmente nan a wak den e graf i e kurpa no tabat’ei! Algun di e sòldánan a drenta e stat i a bisa e saserdotenan. Bo sa kiko e saserdotenan malbado a hasi? Nan a paga e sòldánan pa nan gaña. E saserdotenan a bisa e sòldánan: ‘Bisa ku e disipelnan di Hesus a bin den anochi, miéntras ku e sòldánan tabata drumí, i a bai ku e kurpa di Hesus.’
Miéntras tantu, algun amiga di Hesus a bini na e graf. Nan a keda masha sorprendé ora nan a hañ’é bashí! Diripiente dos angel den bistí briante a aparesé. Nan a puntra: ‘Pakiko boso ta buska Hesus aki? El a ser resusitá. Bai lihé i bisa su disipelnan.’ Esta duru nan a kore! Pero riba kaminda un hòmber a para nan. Bo sa ken esei tabata? Hesus mes! El a bisa: ‘Bai bisa mi disipelnan.’
Ora e hende muhénan a bisa e disipelnan ku Hesus ta bibu i ku nan a mir’é, e disipelnan a haña esei difísil pa kere. Pedro i Juan a kore bai na e graf pa nan mes wak, pero e graf tabata bashí! Despues ku Pedro i Juan a bai, Maria Magdalena a keda atras. E ora ei el a wak den e graf i a mira e dos angelnan.
Bo sa kiko a sosodé ku e kurpa di Hesus? Dios a hasié disparsé. Dios no a resusitá Hesus den e mesun kurpa karnal ku e tabatin ora el a muri. El a duna Hesus un kurpa spiritual nobo, meskos ku angelnan den shelu tin. Pero, p’e mustra su disipelnan ku e ta bibu, Hesus por a aparesé den un kurpa ku hende por mira, segun ku nos lo bai siña despues.
Mateo 27:62-66; 28:1-15; Lukas 24:1-12; Juan 20:1-12.
Pregunta
- Ken e señora riba e plachi ta, ken e dos hòmbernan ta, i na unda nan ta ei?
- Pakiko Pilato a bisa e saserdotenan pa manda sòldá pa tene warda na e graf di Hesus?
- Kiko un angel a hasi trempan riba e di tres dia despues ku Hesus a muri, pero kiko e saserdotenan a hasi?
- Pakiko algun hende muhé a keda sorprendí ora nan a bishitá e graf di Hesus?
- Dikon Pedro i Juan a kore bai na e graf di Hesus, i kiko nan a topa ei?
- Kiko a sosodé ku e kurpa di Hesus, pero kiko el a hasi pa mustra e disipelnan ku e ta bibu?
Preguntanan adishonal
- Lesa Mateo 27:62-66 i 28:1-15.
Ora Hesus a resusitá, kon e saserdotenan prinsipal, e fariseonan i e ansianonan a peka kontra spiritu santu? (Mat. 12:24, 31, 32; 28:11-15)
- Lesa Lukas 24:1-12.
Kon e relato di e resurekshon di Hesus ta mustra ku den Yehova su bista, hende muhé ta testigu konfiabel? (Luk. 24:4, 9, 10; Mat. 28:1-7)
- Lesa Juan 20:1-12.
Kon Juan 20:8 i 9 ta yuda nos mira ku nos mester tene pasenshi ora nos no ta komprondé kompletamente kon un profesia bíbliko ta bai kumpli? (Pro. 4:18; Mat. 17:22, 23; Luk. 24:5-8; Juan 16:12)
Otro Artíkulo Interesante
HESUS—E KAMINDA, E BÈRDAT I E BIDA
Hesus A Aparesé na Hopi Hende Despues di Su Resurekshon
Kon Hesus a konvensé su disipelnan ku el a ser resusitá?
E TOREN DI VIGILANSIA
Kiko e Morto i Resurekshon di Hesus Por Nifiká pa Bo?
Seis bèrdat di Beibel ta splika kon morto di un hende por duna hopi hende bida.
