ORA hende a kuminsá oumentá riba tera, mayoria di nan a hasi kos malu meskos ku Kain. Pero tabatin ún hòmber ku tabata diferente. Esei tabata e hòmber ku yama Enok. Enok tabata un hòmber ku kurashi. Hende tur rònt di dje tabata hasi kosnan masha malu, pero Enok a sigui sirbi Dios.

Bo sa pakiko hende di e tempu ei tabata hasi tantu kos malu? Wèl, pensa. Ken a pone Adam ku Eva desobedesé Dios i kome e fruta ku Dios a prohibí? Sí, esei tabata un mal angel. Beibel ta yam’é Satanas. I e ta purba hasi tur hende bira mal hende.

Un dia Yehova Dios a manda Enok bisa e pueblo algu ku nan no kier a tende. Esaki ta Su palabra: ‘Un dia Dios lo destruí tur hende malbado.’ Probablemente e hendenan a rabia mashá ora nan a tende esei. Kisas nan a purba mata Enok. P’esei Enok tabatin mester di masha kurashi pa e bisa e pueblo kiko Dios ta bai hasi.

Dios no a laga Enok biba hopi tempu entre e hendenan malbado ei. Enok a biba 365 aña so. Pakiko nos ta bisa “365 aña so”? Pasobra hende di e tempu ei tabata hopi mas fuerte ku nos i nan tabata biba hopi mas tantu aña. Sí, Matusalen, yu di Enok, a biba 969 aña!

Wèl, despues di morto di Enok hende a bira pió ainda. Beibel ta bisa ku ‘tur loke nan a pensa tabata malu tur ora,’ i ku ‘tera a yena ku violensia.’

Bo sa un motibu pakiko tabatin tantu tròbel riba tera e tempu ei? Dor ku Satanas a bini ku un manera nobo pa hasi hende kometé maldat. Nos lo bai siña di esei.

Génesis 5:21-24, 27; 6:5; Hebreonan 11:5; Hudas 14, 15.