TA MAS ku 10 aña desde ku Rei Nabukodonosor a hiba e israelitanan mihó eduká Babilonia. I awor mira loke ta sosodé! Yerusalèm ta ser kimá. I e israelitanan ku no a ser matá ta ser hibá prezu na Babilonia.

No lubidá ku e profetanan di Yehova a duna spièrtamentu ku esei lo sosodé si e hendenan no kambia nan mal kaminda. Pero e israelitanan no a skucha e profetanan. Nan a sigui adorá dios falsu en bes di Yehova. Pues, nan a meresé e kastigu. Nos sa esei pasobra Dios su profeta Ezekiel a bisa nos e mal kosnan ku e israelitanan tabata hasi.

Bo sa ken ta Ezekiel? E ta un di e hóbennan ku rei Nabukodonosor a hiba Babilonia 10 aña promé ku e destrukshon grandi di Yerusalèm. Daniel i su tres amigunan, Sadrak, Mesak i Abed-nego tambe a wòrdu hibá Babilonia na mesun tempu.

Miéntras ku Ezekiel tabata na Babilonia ainda, Yehova a mustr’é e mal kosnan ku tabata sosodé na Yerusalèm den e tèmpel. Yehova a hasi esei via un milager. Maske Ezekiel tabata na Babilonia, Yehova a lag’é mira tur loke tabata sosodé den e tèmpel. I loke Ezekiel a mira tabata skandaloso!

‘Mira e kosnan repugnante ku e hendenan ta hasi den e tèmpel,’ Yehova a bisa Ezekiel. ‘Mira e murayanan pintá tur na kolebra i otro bestia. I mira e israelitanan adorá nan! Ezekiel a mira tur esei, i a skirbi loke tabata sosodé.

Yehova a puntra Ezekiel: ‘Bo ta mira loke e lidernan di e israelitanan ta hasi den sekreto?’ Sí, el a mira esei tambe. Tabatin 70 hòmber, i nan tur tabata adorá dios falsu. Nan a bisa: ‘Yehova no ta mira nos. El a bandoná tera.’

Anto Yehova a mustra Ezekiel algun hende muhé na e porta nort di e tèmpel. Nan tabata sinta ei adorando e dios falsu Tamuz. I wak e hòmbernan na entrada di e tèmpel di Yehova! Tin rònt di 25 di nan. Ezekiel a mira nan. Nan tabata bùig ku kara pariba i adorá solo!

Yehova a bisa: ‘E hendenan ei no ta respetá mi. Nan no ta solamente hasi kosnan malu, sino ku nan ta bini te den mi tèmpel bin hasi nan.’ P’esei Yehova a primintí: ‘Nan lo sinti e forsa di mi rabia. I lo mi no sinti duele di nan ora nan wòrdu destruí.’

Rònt di tres aña so despues ku Yehova a mustra Ezekiel e kosnan ei e israelitanan a rebeldiá kontra Rei Nabukodonosor. P’esei el a bai pa bringa kontra nan. Despues di un aña i mei, e babilonionan a kibra e muraya di Yerusalèm i a kima e stat te na suela. Mayoria di e pueblo a ser matá òf hibá prezu na Babilonia.

Pakiko Yehova a laga e destrukshon teribel aki bini riba e israelitanan? Ta pasobra nan no a skucha Yehova ni no a obedesé su lei. Esei ta mustra nos ku ta importante pa nos semper hasi loke Dios ta bisa.

Na prinsipio nan a laga algun hende keda den e tera di Israel. Rei Nabukodonosor a pone un hudiu yamá Gedalias na enkargo di e pueblo. Pero algun israelita a mata Gedalias. Awor e pueblo tabatin miedu ku e babilonionan lo bin destruí nan tur debí na e mal kos ku a sosodé. P’esei nan a obligá Jeremias bai ku nan, i nan a hui bai Egipto.

Esei a laga e tera di Israel sin ningun hende. Pa 70 aña ningun hende no a biba den e tera. El a keda kompletamente bashí. Pero Yehova a primintí ku e lo trese su pueblo bèk na e tera despues di 70 aña. Miéntras tantu, kiko a sosodé ku e pueblo di Dios na e tera di Babilonia kaminda nan a ser hibá? Laga nos mira.

2 Reinan 25:1-26; Jeremias 29:10; Ezekiel 1:1-3; 8:1-18.