1-3. (a) Dikon e kas di Abigail tabata den peliger? (b) Kiko nos lo bai analisá tokante e muhé remarkabel akí?

ABIGAIL por a mira ku e hóben tabata morto spantá, i ku rason. Un peliger grave tabata menasá nan. Kuatershen guerero tabata riba kaminda pa bin mata tur hende hòmber di e kas. Ta kiko a pasa anto?

² Tur e problema a kuminsá ku Nabal, kasá di Abigail. El a trata algun hòmber na un manera kruel i denigrante manera ta su hasí, pero e biaha akí sí el a dal su dede duru: el a insultá e komandante di un grupo di guerero leal i bon entrená. P’esei un di e trahadónan di Nabal—kisas un wardadó di karné—a kore bini serka Abigail ku e speransa ku é lo a haña un manera pa skapa nan. Pero kiko un muhé so por a hasi kontra henter un ehérsito?

³ Promé ku nos bai wak kiko Abigail a hasi, laga nos haña sa algu mas di e muhé remarkabel akí. Ki klase di muhé Abigail tabata? Kiko a provoká e krísis akí? I kiko nos por siña for di su ehèmpel di fe?

4. Ki klase di hòmber Nabal tabata?

⁴ Abigail ku Nabal no tabata pas ku otro. Nabal no por a haña un mihó kasá, miéntras ku Abigail no por a haña un pió kasá. Ta bèrdat ku Nabal tabata riku i p’esei a konsiderá su mes masha importante. Pero kiko otro hende tabata pensa di dje? Wèl, no ta fásil pa haña un otro personahe den Beibel ku ta ser menshoná ku mas despresio. Su nòmber so kaba a nifiká “Bobo” òf “Dòmverstant (BPK).” Nos no sa si ta ora el a nase nan a dun’é e nòmber ei òf si esei tabata un beinam ku el a haña despues debí na su komportashon. En todo kaso, e nòmber tabata pas kuné. Nabal tabata “brutu i di mala fe.” Niun hende no tabatin lei kuné. E tabata un abusadó i un buraché, un hòmber ku tur hende tabatin miedu di dje.—1 Sam. 25:2, 3, 17, 21, 25.

5, 6. (a) Kiko bo ta haña tabata e kualidatnan mas atraktivo di Abigail? (b) Kiko lo por a pone Abigail kasa ku un hòmber ku no a sirbi pa nada manera Nabal?

 ⁵ Ma Abigail tabata totalmente diferente for di Nabal. Su nòmber a nifiká “Mi Tata A Bira Kontentu.” Mayoria di tata ta sinti nan orguyoso si nan tin un yu muhé bunita, pero un tata sabí ta mas felis ora su yu muhé tin un bunita karakter i personalidat. Lamentablemente, hopi biaha sa sosodé ku personanan ku ta bunita di pafó no ta wòri kultivá bon kualidat manera sano huisio, sabiduria, kurashi i fe. Pero esei no tabata e kaso ku Abigail. Segun Beibel, ademas di bunita, e “tabata inteligente.” Ke men, e tabata un muhé di sano huisio, un muhé ku a usa su kabes.—Lesa 1 Samuel 25:3.

⁶ Awor bon, dikon un mucha muhé asina inteligente a kasa ku un hòmber ku no a sirbi pa nada? Kòrda ku den e tempunan ei, mayornan tabata buska kasá pa nan yu òf mester a duna nan aprobashon pa un matrimonio tuma lugá. Den kaso di Abigail, ta su mayornan tabata na fabor di e matrimonio? Akaso nan a buska Nabal p’e kasa kuné pasobra nan tabata impreshoná ku su rikesa i posishon prominente? Òf ta pobresa a pone nan aprobá e matrimonio? En todo kaso, Nabal su rikesa no a hasié un bon kasá.

7. (a) Kiko mayornan djawe mester evitá si nan ke pa nan yunan tin un punto di bista korekto di matrimonio? (b) Kiko Abigail tabata determiná pa hasi?

⁷ Mayornan sabí ta siña nan yunan pa nan tin un punto di bista korekto di matrimonio. Nan no ta animá nan yunan pa kasa pa kos. Tampoko nan no ta preshoná nan pa kuminsá namorá miéntras ku ainda nan no tin e madures pa karga responsabilidat di hende kasá. (1 Kor. 7:36) Pero Abigail tabata kasá kaba. I sea kual sea e motibu pakiko el a kasa ku Nabal, e tabata determiná pa hasi lo mihó ku e tabata por den su situashon.

8. Ken Nabal a insultá, i dikon nos por bisa ku esei no tabata niun tiki sabí di su parti?

⁸ Pero awor Nabal a hasi Abigail su situashon mas difísil ku nunka. E hòmber ku Nabal a insultá tabata David, un fiel sirbidó di Dios. Profeta Samuel a ungí David komo susesor di Rei Saul. (1 Sam. 16:1, 2, 11-13) David tabata biba den desierto huntu ku su 600 guereronan leal pa skapa di Rei Saul, kende tabata masha yalurs i tabata buska moda di mat’é.

9, 10. (a) Den ki situashon David ku su hòmbernan tabata trata di sobrebibí? (b) Dikon Nabal lo mester a apresiá loke David ku su hòmbernan tabata hasi? (Wak tambe e nota na paragraf 10.)

⁹ Nabal tabata biba na Maon, pero e tabata traha pegá ku e  stat Karmelo (òf Karmel), i probablemente e tabatin tereno einan tambe. * Nabal tabatin 3.000 karné, i e statnan ei tabata keda meimei di un region elevá, yen di sabana ku tabata bon pa krio di karné. Pero e restu di e área ei tabata mondi desolá: pa zùit tabatin e inmenso desierto di Paran i den direkshon ost tabatin e kaminda ku a hiba na Laman Salu i ku tabata pasa dor di terenonan desolá, yen di kueba i klof. Ta den e region ei David ku su hòmbernan tabata lucha pa sobrebibí; nan tabata biba di loke nan a yag i kasi sigur nan a pasa basta miseria. Na vários okashon nan a topa e hóbennan ku tabata kuida e karnénan di e hòmber riku Nabal.

¹⁰ Kon e sòldánan ei a trata e wardadónan? Lo tabata fásil pa de bes en kuando nan kue un karné bai kuné, pero nan no a hasi esei. Al kontrario, nan a protehá e tounan i e sirbidónan di Nabal. (Lesa 1 Samuel 25:15, 16.) Bida di e wardadónan ei no tabata niun tiki fásil. Den e tempu ei tabatin masha hopi bestia salbahe, i komo ku e área ei tabata serka di Israel su frontera di zùit, trupa di bandidu hopi biaha tabata ataká nan. *

11, 12. (a) Kon David a mustra takto i rèspèt den e mensahe ku el a manda pa Nabal? (b) Dikon e manera ku Nabal a reakshoná riba e mensahe no tabata bon?

¹¹ Lo mester tabata basta trabou pa alimentá tantu hòmber asina den desierto. P’esei un dia, David a manda dies mensahero serka Nabal pa pidié yudansa. David a skohe un bon momento: ora di pela karné, un periodo ku e hendenan normalmente sa ta masha generoso i den ambiente di fiesta. Ademas, David a skohe su palabranan ku kuidou i a dirigí su mes na Nabal ku masha rèspèt. Asta el a referí na su mes komo “bo yu David,” rekonosiendo asina ku Nabal tabata mas grandi kuné. Kon Nabal a reakshoná?—1 Sam. 25:5-8.

¹² El a rabia masha pisá! Ora e hóben menshoná na prinsipio a deskribí e esena na Abigail, e di ku Nabal “a despresiá [“rous,” BPK]” e mensaheronan di David. Na bos haltu e hòmber pichiri ei a nenga di kompartí su pan, awa i karni ku nan. El a hasi bofon di David i a deskribié komo un hòmber insignifikante i komo un katibu ku a hui. Sin duda Nabal tabata pensa meskos ku Saul, kende tabatin rabia riba David. Ni Nabal ni Saul no tabatin e punto di  bista di Yehova. Yehova a stima David i no a mir’é komo un katibu rebelde, sino komo e futuro rei di Israel.—1 Sam. 25:10, 11, 14.

13. (a) Kon David a reakshoná na promé instante riba e insulto di Nabal? (b) Kiko e prinsipio di Santiago 1:20 ta siña nos tokante e reakshon di David?

¹³ Ora David a tende kon Nabal a reakshoná, el a bira furioso. “Faha boso spada,” el a ordená su guereronan. E tambe a arma su mes i a sali bai ku 400 hòmber, kla pa ataká Nabal i mata tur hende hòmber di su kas, manera el a hura ku lo e hasi. (1 Sam. 25:12, 13, 21, 22) Ta di komprondé ku David a rabia, pero su manera di ekspresá su rabia no tabata bon. Manera Beibel ta bisa: “Rabia di hende no ta produsí loke ta hustu den bista di Dios.” (Sant. 1:20) Pero kon Abigail por a salba e hendenan di su kas?

14. (a) Den ki sentido Abigail a dal e promé paso pa korigí e fayo ku Nabal a kometé? (b) Ki lès nos ta siña for di e kontraste entre Nabal i Abigail? (Wak tambe e nota.)

¹⁴ Den sierto sentido, Abigail ya a dal e promé paso pa korigí e fayo teribel ei di Nabal. Na kontraste ku su esposo, e sí tabata dispuesto pa skucha. E kriá hóben a bisa ku Nabal tabata “un hòmber asina pèrvèrso ku ningun hende no por papia kuné.” * (1 Sam. 25:17) Lamentablemente, Nabal tabata haña su mes asina importante ku e no tabata ke skucha ningun hende. Te awe e aktitut arogante ei ta masha komun. Ma e hóben tabata sa ku Abigail sí no tabata asina, i sin duda ta p’esei el a bai serka dje ku e problema akí.

15, 16. (a) Kon Abigail a demostrá ku e tabata manera e esposa kapas deskribí den e buki di Proverbionan? (b) Dikon loke Abigail a hasi no tabata un falta di rèspèt pa e outoridat di su kasá?

¹⁵ Abigail a realisá umbes kon grave e situashon tabata i a aktua mesora. Nos ta lesa ku “e ora ei Abigail a hasi lihé-lihé.” Kuater biaha den e relato akí Beibel ta bisa ku Abigail a hasi lihé. El a prepará un regalo generoso pa David ku su hòmbernan: pan, biña, karni di karné, maishi totá, rasenchi i figu. Ta bisto ku Abigail a tuma su responsabilidat komo ama di kas na serio, i e tabata sa presis kiko e tabatin den kas, meskos ku e esposa kapas deskribí den e buki di Proverbionan. (Pro. 31:10-31) El a manda su kriánan bai dilanti ku e regalo, i e mes a sigui nan tras. “Ma e no a konta su esposo Nabal nada,” segun e relato.—1 Sam. 25:18, 19.

 ¹⁶ Akaso esaki ta indiká ku Abigail no a respetá e outoridat di su esposo komo kabes di e famia? Nò, di ningun manera. Kòrda ku Nabal a trata un sirbidó ungí di Yehova ku gran falta di rèspèt, i esei a pone bida di hopi hende inosente na peliger. Si Abigail a sinta man krusá sin hasi nada, e tambe lo no tabata responsabel pa loke su kasá a hasi? En todo kaso, e mester a pone sumishon na Dios promé ku sumishon na su esposo.

17, 18. (a) Kon Abigail a aserká David i kiko el a bisa David? (b) Dikon e palabranan di Abigail a yega na David su kurason?

¹⁷ No a tarda hopi ku Abigail a topa David ku su hòmbernan. El a baha lihé for di su buriku i a bùig abou dilanti di David. (1 Sam. 25:20, 23) Anto el a splika David presis kon e tabata sinti i a rog’é pa tene miserikòrdia di Nabal i di su hendenan di kas. Kiko el a bisa ku a yega na David su kurason?

¹⁸ Pa kuminsá, el a tuma e falta riba dje i a pidi David pordon’é. Kaba el a rekonosé ku su kasá realmente tabata bobo, manera su nòmber ta indiká, i kisas e kier a bisa David ku no tabata bale la pena p’e rebahá su mes pa kastigá un hòmber asina. Ademas, el a demostrá ku el a mira David komo Yehova su representante ora el a bisa ku David tabata ‘bringa e batayanan di Yehova.’ Tambe el a indiká ku e tabata sa ku Dios a primintí di hasi David rei, pasobra el a bisa ku Yehova lo a ‘establesé David komo gobernante di Israel.’ Asta el a urgi David pa no hasi nada ku lo a hasié kulpabel di sanger òf ku despues lo por a “kousa tristesa [òf] remordimentu di kurason.” (Lesa 1 Samuel 25:24-31.) Palabranan sabí i konmovedor!

19. Kon David a reakshoná riba e palabranan di Abigail, i dikon el a elogi’é?

¹⁹ Anto kon David a reakshoná? El a aseptá e regalo di Abigail i a bis’é: “Bendishoná sea e SEÑOR Dios di Israel, kende a manda bo e dia akí pa kontra ku mi, i bendishoná sea bo disernimentu, i bendishoná sea abo mes, kende a kita mi awe di drama sanger.” David a elogi’é pa e kurashi ku e tabatin di bin kontr’é, i el a rekonosé ku Abigail a previnié di drama sanger inosente. El a bisa Abigail: “Bai bo kas na pas.” I humildemente el a agregá: “Mi a skucha bo.”—1 Sam. 25:32-35.

20, 21. (a) Dikon ta atmirabel ku Abigail a bai bèk serka su kasá? (b) Kon Abigail a demostrá kurashi i sano huisio ora el a skohe e momento pa papia ku Nabal?

²⁰ Riba kaminda pa kas, Abigail no por a keda sin pensa riba e enkuentro ei. E mester a ripará e diferensia entre David, un hòmber fiel i amabel, i e hòmber brutu ku e tabata kasá kuné.  Pero e no a sigui pensa riba esei. Beibel ta bisa: “Anto Abigail a bini serka Nabal.” Sí, el a bai bèk serka su kasá, determiná pa kumpli ku su papel komo esposa lo mihó ku e tabata por. E tabatin ku laga Nabal sa di e regalo ku el a duna David ku su hòmbernan pa asina evitá un matansa. Al fin i al kabo, Nabal tabatin derecho di sa esei. Abigail mes a disidí di konta Nabal, promé ku e tende for di boka di otro hende kiko su kasá a hasi, ya ku esei lo tabata mas bèrgwensa ainda. Pero e no por a kont’é asina ku el a yega kas, pasobra Nabal tabata festehá manera un rei i tabata stòm burachi.—1 Sam. 25:36.

²¹ Un biaha mas, Abigail a demostrá sano huisio. El a warda te su siguiente mainta, ora ku Nabal su wayabá a pasa, pa kont’é kiko el a hasi. Ademas, Abigail a demostrá ku e tabata un muhé ku kurashi, pasobra mainta su kasá lo tabata mas na tinu, pero tambe lo tabatin mas chèns ku e hòmber lo a rabia i hasié un daño. El a kont’é tur loke a pasa. Kasi sigur Abigail a ferwagt ku su kasá lo a bira furioso òf asta violento. Ma pa su sorpresa, Nabal a keda sinta ketu ketu, “manera un piedra.”—1 Sam. 25:37.

22. Kiko a pasa ku Nabal, i kiko esei ta siña nos tokante tur e kasonan di maltrato òf diktadura ku ta tuma lugá den kasnan di famia?

²² Ta kiko a pasa Nabal? Segun e relato: “Su kurason a para den su kurpa.” Nos no sa si ta un tipo di atake el a haña. Pero un dies dia despues, el a muri, i no ta parse ku ta únikamente pa motibu di un problema di salú. Beibel ta bisa ku “SEÑOR a afligí Nabal, i el a muri.” (1 Sam. 25:38) Pues, asina e matrimonio difísil di Abigail a yega na un fin, grásias na e kastigu meresí ku Dios a duna Nabal. Yehova no ta intervení asina drástikamente awe. Pero e relato akí ta rekordá nos ku e ta tuma nota di tur kaso di maltrato òf diktadura ku ta tuma lugá den kasnan di famia i ku, na su debido tempu, lo e rektifiká tur asuntu.—Lesa Lukas 8:17.

23. Ki bendishon mas Abigail a haña, i kon el a demostrá ku e chèns di bira kasá di David no a susha su kabes?

²³ Abigail a libra for di su matrimonio infelis, pero esei no tabata tur kos. Un bendishon mas tabata sper’é. Ora David a haña sa ku Nabal a muri, el a manda algun mensahero pa bai pidi Abigail pa kasá kuné. Kon Abigail a reakshoná? E di: “Mira, bo sirbiente ta un kriá pa laba pia di mi señor su sirbidónan.” Esta un humildat! Ora el a ofresé pa hasi e tarea di un  kriá, el a demostrá bon kla ku e chèns di kasa ku David no a susha su kabes. Un biaha mas nos ta lesa ku el a aktua lihé i desididu, i mesora el a prepará pa bai serka David.—1 Sam. 25:39-42.

24. Kua ta algun difikultat ku Abigail a enfrentá den su bida nobo, pero kon su kasá i su Dios a mir’é?

²⁴ Akaso esaki a nifiká ku djei padilanti su bida lo tabata manera un sprookje? Klaru ku nò, pasobra komo esposa di David, bida lo no tabata semper fásil. David tabata kasá kaba ku Ahinoam, i aunke Dios a permití poligamia, e situashon ei lo no tabata niun tiki fásil pa muhénan fiel den e tempu ei. Ademas, David mester a superá hopi opstákulo i difikultat ainda promé ku e por a bira rei. Abigail a apoyá David henter su bida, i ku tempu el a haña un yu kuné. Tambe el a bin realisá ku el a kasa ku un hòmber ku tabata stim’é i proteh’é. Na un okashon David a asta salb’é for di man di sekuestradó. (1 Sam. 30:1-19) Pues, David a imitá Yehova Dios, kende ta balorá i stima hende muhé ku ta desplegá sano huisio, kurashi i fieldat.