“Nan No Ta Parti di Mundu”
Kapítulo Diesocho
“Nan No Ta Parti di Mundu”
1. (a) Promé ku Hesus su morto, kiko el a pidi den orashon na fabor di su disipelnan? (b) Dikon ta asina importante pa nan “no ta parti di mundu”?
E ANOCHI promé ku nan a mat’é, Hesus a hasi orashon na fabor di su disipelnan. Sabiendo ku Satanas lo pone tremendo preshon riba nan, Hesus a bisa su Tata: “Mi no ta pidi bo pa saka nan for di mundu, ma pa bo warda nan di e malbado. Nan no ta [parti, NW] di mundu, meskos ku ami no ta [parti, NW] di mundu.” (Huan 17:15, 16) Dikon tabata asina importante pa nan ta separá for di mundu? Pasobra ta Satanas ta e gobernante di mundu. Kristiannan lo no kier bira parti di un mundu ku ta bou di su kòntròl.—Lukas 4:5-8; Huan 14:30; 1 Huan 5:19.
2. Kon Hesus a demostrá ku e no tabata parti di mundu?
2 E echo ku Hesus no tabata parti di mundu no a nifiká ku e no a stima otro hende. Al kontrario, el a kura hende malu, lanta morto, i a siña hende tokante e Reino di Dios. El a asta duna su bida pa humanidat. Pero e no a stima e aktitut i akshonnan malbado di esnan ku a manifestá e inklinashon mental ku ta dominá e mundu di Satanas. Ta p’esei el a spièrta kontra kosnan manera deseonan inmoral, un moda di biba materialista i buskamentu di prominensia. (Mateo 5:27, 28; 6:19-21; Lukas 20:46, 47) Nada straño anto ku Hesus no a mete den asuntunan polítiko di mundu. Ounke e tabata un hudiu, el a keda neutral den e kontroversianan polítiko ku tabatin entre Roma i e hudiunan.
“Mi Reino No Ta di e Mundu Aki”
3. (a) Di kiko e lidernan religioso hudiu a akusá Hesus dilanti Pilato, i dikon? (b) Kiko ta mustra ku Hesus no tabata interesá pa bira un rei humano?
3 Konsiderá kiko a sosodé ora e lidernan religioso hudiu a laga arestá Hesus i hib’é dilanti e gobernadó romano Ponsio Pilato. Eigenlijk e lidernan ei tabata rabiá pasobra Hesus a desenmaskará nan hipokresia. Pa pone e gobernadó tuma akshon kontra Hesus, nan a akus’é bisando: “Nos a haña e hòmber aki ta gaña nos nashon i ta prohibí di paga belasting na Sésar, i ta bisa ku ta e mes ta Kristu, un rei.” (Lukas 23:2) Esaki tabata un mentira flagrante pasobra un aña promé ora e pueblo kier a hasi Hesus rei, el a nenga. (Huan 6:15) Hesus tabata sa ku lo e bira un Rei selestial den futuro. (Lukas 19:11, 12) I ku ta Yehova lo a pon’é riba trono, no hende.
4. Ki aktitut Hesus tabatin pa ku pagamentu di belasting?
4 Apénas tres dia promé ku su aresto, e fariseonan a purba pone Hesus bisa algu ku lo a konden’é den e asuntu di paga belasting. Pero Hesus a bisa: “Mustra mi un denario [un moneda romano]. Ken su imágen i inskripshon tin riba dje?” Ora nan a bisa “di Sésar,” el a bisa nan: “Anto duna Sésar loke ta di Sésar, i Dios loke ta di Dios.”—Lukas 20:20-25.
5. (a) Ki lès Hesus a siña su disipelnan ora e hendenan a bin arest’é? (b) Ki splikashon Hesus a duna pa loke el a hasi? (c) Kiko tabata e resultado dje huisio?
5 Nò, Hesus no a siña su disipelnan rebeldiá kontra outoridat di gobièrnu. Ora sòldá a bini huntu ku otro hende pa arestá Hesus, Pedro a saka su spada i a kita orea di un dje hòmbernan. Pero Hesus a bisa: “Pone bo spada bèk na su lugá; pasobra tur esnan ku saka spada lo peresé pa medio di spada.” (Mateo 26:51, 52) E siguiente dia Hesus a splika su akshon na Pilato, bisando: “Mi reino no ta di e mundu aki. Si mi reino tabata di e mundu aki, mi sirbidónan lo a bringa, pa mi no wòrdu entregá na e hudiunan.” (Huan 18:36) Pilato a atmití ku e ‘no a haña ningun kulpa den Hesus di loke nan ta akus’é.’ Pero bou di preshon dje multitut violento, Pilato a laga klaba Hesus na staka.—Lukas 23:13-15; Huan 19:12-16, NW.
E Disipelnan Ta Sigui Hesus Su Ehèmpel
6. Kon kristiannan di promé siglo a mustra ku nan a evitá e aktitut di mundu pero ku nan a stima hende?
6 Pues e disipelnan di Hesus a komprendé loke nan mester a hasi pa nan no ta parti di mundu. Nan tabatin ku evitá e aktitut i akshonnan malbado di mundu, lokual a inkluí e dibertishonnan violento i inmoral dje arena i teatro romano. Pa motibu ku nan no a hasi e kosnan ei, hende tabata bisa ku nan a odia hende. Pero ningun ora so nan no a odia nan próhimo; al kontrario, nan a traha duru pa yuda otro hende benefisiá di Dios su areglonan pa salbashon.
7. (a) Komo ku e disipelnan di promé siglo no tabata parti di mundu, kiko nan a eksperensiá? (b) Kon nan a mira gobernantenan polítiko i pagamentu di belasting, i dikon?
7 Hesus su siguidónan a ser persiguí meskos kuné, i hopi bes dor di funshonarionan gubernamental mal informá. Sin embargo, rònt di aña 56 Era Komun, apòstel Pablo a urgi kristiannan na Roma den un karta pa nan “someté nan mes na e outoridatnan ku ta goberná. Pasobra no tin outoridat ku no ta di Dios.” No ta asina ku ta Yehova ta establesé gobièrnunan di mundu, pero sí e ta pèrmití nan eksistí te ora ku su Reino so ta goberná henter mundu. Apropiadamente, Pablo a konsehá kristiannan pa respetá funshonarionan gubernamental i paga belasting.—Romanonan 13:1-7; Tito 3:1, 2.
8. (a) Te na ki grado kristiannan mester ta sumiso na outoridat gubernamental? (b) Kon e promé kristiannan a sigui Hesus su ehèmpel?
8 Sin embargo, sumishon na gobernantenan polítiko mester ta relativo, no sin límite. Ora tin un konflikto entre e leinan di Yehova i e leinan di hende, personanan ku ta sirbi Yehova ta obedesé Su leinan. Tuma nota di loke e buki On the Road to Civilization—A World History (Riba Kaminda pa Sivilisashon—Un Historia di Mundu) ta bisa dje promé kristiannan: “E kristiannan a nenga di partisipá den sierto deber di siudadanonan romano. Pa e kristiannan, . . . tabata un violashon di nan fe pa drenta servisio militar. Nan a nenga di aseptá puesto polítiko. Nan a nenga di adorá emperador.” Ora e korte supremo hudiu ‘a taha e disipelnan estriktamente’ pa stòp di prediká, nan a kontestá: “Nos mester obedesé Dios mas ku hende.”—Echonan 5:27-29.
9. (a) Dikon kristiannan den Yerusalèm a hui bai dje stat na aña 66 Era Komun? (b) Ki ehèmpel balioso esaki ta pa nos?
9 Pa loke ta kontroversianan polítiko i militar, e disipelnan a keda estriktamente neutral. Na aña 66 Era Komun, hudiunan na Hudea a lanta kontra Sésar. E ehérsito romano a rondoná Yerusalèm rápidamente. Kiko e kristiannan den e stat a hasi? Nan a kòrda Hesus su konseho pa sali for dje stat. Ora e romanonan a retirá temporalmente, e kristiannan a hui bai na otro banda di riu Yordan, den e serunan di Pella. (Lukas 21:20-24) Nan neutralidat ta sirbi komo un ehèmpel pa kristiannan fiel ku a bini despues.
Kristiannan Mester Ta Neutral den e Último Dianan Aki
10. (a) Ki trabou Testigunan di Yehova ta hasiendo, i dikon? (b) Relashoná ku kiko nan ta neutral?
10 Historia ta mustra ku tabatin un grupo den e último dianan aki ku a tene nan mes estriktamente neutral, imitando asina e promé kristiannan? Sí, Testigunan di Yehova a hasi esei. Durante henter e periodo di último dianan aki, nan a keda prediká ku e Reino di Dios ta e úniko medio pa trese pas, prosperidat i felisidat duradero pa amante di hustisia. (Mateo 24:14) Pero nan a keda estriktamente neutral pa loke ta e kontroversianan entre e nashonnan.
11. (a) Kon e posishon neutral dje Testigunan ta na kontraste ku e práktikanan di pastornan? (b) Ki punto di bista Testigunan di Yehova tin di loke otro hende ta hasi tokante polítika?
11 Un kontraste skèrpi ku esaki ta ku pastornan di religionnan dje mundu aki tabata masha enbolbí den asuntunan polítiko. Den algun pais, nan a hiba kampaña aktivo sea na fabor òf kontra di kandidatonan polítiko. Algun pastor asta tin puesto polítiko. Otronan a preshoná polítikonan pa bini ku proyektonan ku nan komo pastor ta aprobá. Sin embargo, Testigunan di Yehova no ta mete den polítika. Tampoko nan no ta stroba otro hende di djòin un partido polítiko ni di bira kandidato pa un puesto polítiko ni di vota den elekshon. Hesus a bisa ku su disipelnan lo no ta parti di mundu, p’esei Testigunan di Yehova no ta tuma parti den polítika.
12. E echo ku religionnan dje mundu aki no ta neutral, a resultá den kiko?
12 Manera Hesus a profetisá, nashonnan a bai guera bes tras bes. Asta partidonan den e mesun nashon a bringa kontra otro. (Mateo 24:3, 6, 7) Kasi semper lidernan religioso a apoyá un nashon òf partido kontra e otro, urgiendo nan siguidónan pa hasi meskos. Ku ki resultado? Miembronan di mesun religion ta mata otro den bataya djis pa motibu di diferensia di nashonalidat òf tribu. Esaki ta kontrario na Dios su boluntat.—1 Huan 3:10-12; 4:8, 20.
13. Ki evidensia tin ku ta mustra ku Testigunan di Yehova ta neutral?
13 Sin embargo, Testigunan di Yehova a keda estriktamente neutral den tur konflikto. E Toren di Vigilansia (na ingles) di 1 di novèmber 1939, a deklará: “Tur hende ku ta na banda di Señor lo ta neutral en kuanto nashonnan den guera.” Testigunan di Yehova den tur nashon i bou di tur sirkunstansia ta sigui mantené e posishon aki. Nan no ta pèrmití mundu su polítika i gueranan ku ta kousa desunion, kibra nan hermandat mundial. Nan ta “bati nan spadanan traha plug ku nan, i nan [ta] bati nan lansanan traha skèr-pa-snui ku nan.” Komo ku nan ta neutral, nan no ta train mas pa guera.—Isaías 2:3, 4; 2 Korintionan 10:3, 4.
14. Kiko Testigunan di Yehova a eksperensiá komo ku nan ta keda separá di mundu?
14 Kiko ta un dje resultadonan di nan neutralidat? Hesus a bisa: “Pasobra boso no ta [parti, NW] di mundu, . . . mundu ta odia boso.” (Huan 15:19) Hopi Testigu di Yehova a ser enkarselá pasobra nan ta sirbidó di Dios. Tin di nan a ser torturá, asta matá, meskos ku a pasa ku e kristiannan di promé siglo. Esei ta pasobra Satanas, “e dios di e mundu aki,” ta oponé e sirbidónan di Yehova, kendenan no ta parti di su mundu.—2 Korintionan 4:4; Revelashon 12:12.
15. (a) Den ki direkshon tur nashon ta marchando, i kiko Testigunan di Yehova ta sòru evitá? (b) Dikon keda separá di mundu ta un asuntu asina serio?
15 Yehova su sirbidónan ta kontentu ku nan no ta parti di mundu, pasobra tur e nashonnan di mundu ta marchando rumbo pa nan fin na Armagedon. (Daniel 2:44; Revelashon 16:14, 16; 19:11-21) Nos lo evitá e fin desastroso ei, pasobra nos ta keda separá for di mundu. Komo un pueblo mundialmente uní, nos ta fiel na Dios su Reino selestial. Ta bèrdat ku komo ku nos no ta parti di mundu, hende ta hasi bofon di nos i persiguí nos. Pero djis akí esei lo stòp, ya ku e mundu malbado aki bou di mando di Satanas lo ser destruí pa semper. Na otro banda, esnan ku ta sirbi Yehova lo biba pa semper den su hustu mundu nobo bou dje Reino di Dios.—2 Pedro 3:10-13; 1 Huan 2:15-17.
Komo Repaso
• Kon Hesus a demostrá kiko ta enserá ‘no ser parti di mundu’?
• Ki aktitut e promé kristiannan tabatin pa ku (a) e inklinashon mental ku a dominá mundu, (b) gobernantenan di mundu, i (c) pagamentu di belasting?
• Den ki manera Testigunan di Yehova di tempu aktual a duna prueba di nan neutralidat kristian?
[Preguntanan di Estudio]
[Plachi na página 165]
Hesus a splika ku ni e ni su siguidónan no tabata “parti di mundu”
