Kapítulo Un

Kiko Adorashon Uní den Nos Tempu Ta Nifiká?

1, 2. (a) Ki movementu emoshonante ta tumando lugá den nos tempu? (b) Ki speransa maravioso hende di kurason onrado tin?

 RÒNT mundu tin un movementu emoshonante den direkshon di adorashon uní. E movementu aki ta uniendo miónes di hende di tur nashon, tribu i lenga. Tur aña mas ta bini aserka. Beibel ta identifiká e miónes di hendenan aki komo “testigunan” di Yehova i ta yama nan “un multitut grandi.” Nan ta ‘sirbi Dios di dia i anochi.’ (Isaías 43:10-12; Revelashon 7:9-15) Dikon nan ta hasi esaki? Pasobra nan a siña konosé Yehova komo e úniko Dios berdadero. Esaki ta motivá nan pa pone nan bida na armonia ku su normanan hustu. Tambe nan a siña ku nos ta bibando den “e último dianan” dje mundu malbado aki, ku pronto Dios lo kaba kuné, i ku lo e remplas’é ku su mundu nobo transformá den un paradeis.—2 Timoteo 3:1-5, 13; 2 Pedro 3:10-13.

² E Palabra di Dios ta primintí: “Aki poko tempu e malbado lo no t’ei mas . . . Ma e humildenan lo heredá e tera, i lo deleitá nan mes den pas abundante.” (Salmo 37:10, 11) “E hustunan lo heredá e tera, i lo biba den dje pa semper.” (Salmo 37:29) “[Dios] lo seka tur lágrima kita for di nan wowo; i lo no tin morto mas; lo no  tin lamento mas, ni yoramentu, ni doló; e promé kosnan a pasa.”—Revelashon 21:4.

3. Kiko ta uni hende den adorashon berdadero?

³ E hendenan ku ta ser uní awor den adorashon berdadero lo ta e promé residentenan dje mundu nobo ei. Nan a siña kiko ta e boluntat di Dios i ta hasié lo mihó ku nan por. Hesus a mustra kon importante ta pa konosé e boluntat di Dios i hasié, ora el a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Huan 17:3) Apòstel Huan a skirbi: “Mundu ta pasa bai i su deseonan tambe, ma esun ku hasi e boluntat di Dios ta permanesé pa semper.”—1 Huan 2:17.

Loke Adorashon Uní Realmente Ta Nifiká

4. (a) Kiko e reunimentu di asina hopi hende den adorashon uní den nos tempu realmente ta nifiká? (b) Kon Beibel ta deskribí e reunimentu aki?

⁴ Den nos tempu tin masha hopi hende ta ser tresé huntu den adorashon uní. Kiko esaki ta nifiká realmente? Esei ta indiká klaramente ku nos ta hopi serka dje fin di e mundu malbado aki, i ku Dios su mundu nobo lo kuminsá djis despues di esei. Ku nos propio wowo nos ta mira kon profesianan bíbliko ku a predisí e reunimentu importante aki, ta kumpli. Un dje profesianan ei ta bisa: “Lo sosodé den e último dianan [aki] ku e seru di e kas di SEÑOR [su adorashon elevá] lo wòrdu establesí komo hefe di e serunan [riba tur otro tipo di adorashon]. . . . I e pueblonan lo basha bai na dje. I hopi nashon lo bin bisa: ‘Ban laga nos subi bai na e seru di SEÑOR i na e kas di e Dios di Yakòb, pa e siña nos di su kamindanan i pa nos kana den su bereanan.’”—Mikéas 4:1, 2; Salmo 37:34.

5, 6. (a) Den ki sentido e nashonnan ta akudí na Yehova? (b) Ki preguntanan nos mester hasi nos mes?

 ⁵ No ta nashonnan kompleto ta presentá nan mes na Yehova su kas spiritual pa ador’é, pero sí tin miónes di hende for di tur nashon ku ta hasi esei. Segun ku nan ta siña tokante e propósito amoroso di Yehova Dios i di su personalidat atraktivo, nan kurason ta keda profundamente konmoví. Humildemente nan ta buska pa sa kiko Dios kier pa nan hasi. Nan orashon ta meskos ku esun di e salmista ku a bisa: “Siña mi hasi bo boluntat, pasobra abo ta mi Dios.”—Salmo 143:10.

⁶ Bo ta mira bo mes entre e multitut grandi di hende ku Yehova ta tresiendo huntu awor den adorashon uní? Bo reakshon riba e instrukshon ku bo a risibí for di su Palabra ta mustra ku realmente bo ta komprendé ku ta for di Yehova el a bini? Te na ki grado lo bo “kana den su bereanan”?

Loke Ta Uni Hende den Adorashon

7. (a) Te na ki grado lo alkansá adorashon uní finalmente? (b) Dikon ta urgente pa bira un adoradó di Yehova awor, i kon nos por yuda otro hende hasi esei?

⁷ E propósito di Yehova ta pa tur kriatura inteligente ta uní den adorashon berdadero. Nos ta anhelá e dia ora ku tur persona na bida lo adorá e úniko Dios berdadero! (Salmo 103:19-22) Pero promé ku esei por sosodé, Yehova tin ku eliminá tur persona ku ta nenga di hasi su boluntat hustu. Den su gran miserikòrdia e ta duna spièrtamentu di loke e ta bai hasi. Pues na tur parti di mundu hende tin e oportunidat di kambia nan komportashon. (Isaías 55:6, 7) P’esei den nos tempu e siguiente yamada urgente ta resoná “na tur nashon i tribu i lenga i pueblo”: “Teme Dios i dun’é  gloria, pasobra e ora di su huisio a yega; i adorá Esun ku a traha shelu i tera i laman i fuentenan di awa.” (Revelashon 14:6, 7) Abo a aseptá e invitashon ei? Si ta asina, bo tin e privilegio di invitá otro hende pa siña konosé e Dios berdadero i ador’é.

8. Una bes nos konosé e siñansanan básiko di Beibel, nos mester hasi esfuerso sinsero pa hasi ki progreso mas?

⁸ No ta Yehova su propósito p’e ser adorá dor di hende ku ta bisa ku nan ta kere den dje pero ku tòg ta sigui tras di nan propio interes. Dios kier pa hende haña un “konosementu eksakto di su boluntat” i demostrá esaki den nan bida. (Kolosensenan 1:9, 10, NW) Pues anto, hende gradisidu ku haña sa e siñansanan básiko di Beibel, kier sigui padilanti pa yega na madures kristian. Nan kier siña konosé Yehova mas íntimamente. Tambe nan kier amplia i profundisá nan komprendementu di su Palabra, i aplik’é mas kabalmente den nan bida. Nan ta trata di reflehá e kualidatnan di nos Tata selestial i mira asuntunan manera e ta mira nan. Esaki ta impulsá nan pa buska maneranan pa partisipá den e trabou di salba bida ku e ta laga su adoradónan hasi riba tera den nos tempu. Esei ta loke abo tambe kier hasi?—Marko 13:10; Hebreonan 5:12–6:3.

9. Di ki manera berdadero union ta posibel awe?

⁹ Beibel ta mustra ku e hendenan ku ta sirbi Yehova mester ta un pueblo uní. (Efesionan 4:1-3) E union aki mester ta eksistí awor, maske nos ta biba den un mundu dividí i ta lucha ku nos propio imperfekshonnan. Ku fervor Hesus a pidi den orashon pa tur su disipelnan ta unu, pa nan tin berdadero union. Kiko esaki lo a nifiká? Di promé, nan lo tin un bon relashon  ku Yehova i su Yu. Di dos, nan lo ta uní ku otro. (Huan 17:20, 21) Pa logra esei, e kongregashon kristian ta sirbi komo e organisashon ku Yehova ta usa pa instruí su pueblo.

Ki Faktor Ta Kontribuí na Union?

10. (a) Kiko nos ta desaroyá ora nos usa Beibel personalmente pa rasoná i yega na e kontesta riba preguntanan ku ta enbolbé nos? (b) Analisá e faktornan ku ta kontribuí na union kristian dor di kontestá e preguntanan ku tin den e paragraf aki.

¹⁰ Aki bou ta sigui shete faktor klave ku ta kontribuí na adorashon uní. Segun ku bo ta kontestá e siguiente preguntanan, pensa kon kada punto ta influensiá bo relashon ku Yehova i ku kompañeronan kristian. Dor di rasoná riba e puntonan aki i buska e tekstonan bíbliko menshoná, bo por desaroyá sabiduria divino, tambe e abilidat di pensa i distinguí, kualidatnan ku nos tur tin mester. (Proverbionan 5:1, 2, NW; Filipensenan 1:9-11) Konsiderá e faktornan aki un pa un.

(1) Nos ta rekonosé ku Yehova tin derecho di establesé e norma di loke ta bon i loke ta malu. “Konfia den SEÑOR ku henter bo kurason, i no dependé riba bo mes komprendementu. Den tur bo kamindanan rekonos’é, i e lo dirigí bo bereanan.”—Proverbionan 3:5, 6.

Dikon nos tin ku buska Yehova su konseho i guia ora di tuma desishon? (Salmo 146:3-5; Isaías 48:17)

(2) Nos tin e Palabra di Dios pa guia nos. “Ora boso a risibí for di nos e palabra di Dios su mensahe, boso a asept’é no komo palabra di hende, ma pa loke e ta berdaderamente, e palabra di Dios ku ta obra tambe den boso ku ta kere.”—1 Tesalonisensenan 2:13.

 Ki peliger tin den djis hasi loke nos ta “kere” ta korekto? (Proverbionan 14:12; Yeremías 10:23, 24; 17:9)

Si nos no sa ki konseho Beibel ta duna riba un sierto asuntu, kiko nos mester hasi? (Proverbionan 2:3-5; 2 Timoteo 3:16, 17)

(3) Nos tur ta benefisiá dje mesun programa di alimentashon spiritual. “SEÑOR lo siña tur bo yu hòmbernan.” (Isaías 54:13) “Laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan, manera ta kustumber di algun, ma enkurashá otro; i muchu mas ainda, ora boso ta mira ku e dia [di destrukshon] ta yegando serka.”—Hebreonan 10:24, 25.

Ki benefisio hende ku ta probechá plenamente di Yehova su areglo pa alimentashon spiritual ta risibí? (Isaías 65:13, 14)

(4) Hesukristu ta nos Lider, no hende. “Ma boso no mester wòrdu yamá rabi, pasobra ta un ta boso maestro, i boso tur ta ruman. I no yama ningun hende riba tera boso tata, pasobra ta un ta boso Tata, Esun ku ta den shelu. I boso no mester wòrdu yamá [lider, NW] pasobra ta un ta boso [Lider, NW], esta, Kristu.”—Mateo 23:8-10.

Ta korekto pa kere ku un di nos ta superior ku otro hende? (Romanonan 3:23, 24; 12:3)

(5) Pa nos e gobernashon dje Reino di Dios ta e úniko speransa pa humanidat. “Pues, hasi orashon anto asin’akí: ‘Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos  ku den shelu.’ Ma buska promé e reino di Dios i su hustisia.”—Mateo 6:9, 10, 33.

Di ki manera “buska promé e reino” ta yuda protehá nos union? (Mikéas 4:3; 1 Huan 3:10-12)

(6) Spiritu santu ta produsí den adoradó di Yehova kualidatnan ku ta vital pa union kristian. “Ma fruta di e spiritu ta amor, goso, pas, pasenshi, kariño, bondat, fieldat, mansedumbre, dominio propio.”—Galationan 5:22, 23.

Kiko nos tin ku hasi pa Dios su spiritu produsí fruta den nos? (Echonan 5:32)

Kon e echo ku nos tin Dios su spiritu ta influensiá nos relashon ku otro kristian? (Huan 13:35; 1 Huan 4:8, 20, 21)

(7) Tur berdadero adoradó di Dios ta prediká e bon nobo di su Reino. “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.”—Mateo 24:14.

Kiko mester motivá nos pa partisipá kabalmente den e aktividat di prediká aki? (Mateo 22:37-39; Romanonan 10:10)

11. Kiko lo ta e efekto ora nos ta apliká bèrdatnan bíbliko den nos bida?

¹¹ Adorá Yehova unidamente ta hala nos mas serka dje i ta hasi posibel ku nos por gosa di un asosiashon refreskante ku otro kreyentenan. Salmo 133:1 ta bisa: “Mira, ki bon i ki dushi ta pa rumannan biba huntu den armonia!” Ta masha refreskante pa kita for di mundu ku tur su egoismo, inmoralidat i violensia, i  reuní huntu ku hende ku di bèrdat ta stima Yehova i obedesé su leinan!

Evitá Influensianan Ku Ta Kousa Desunion

12. Dikon nos tin ku evitá un aktitut independiente?

¹² Pa nos no daña nos presioso union mundial, nos tin ku evitá influensianan ku ta kousa desunion. Un dje influensianan aki ta e aktitut di kier ta independiente di Dios i di su leinan. Yehova ta yuda nos evitá e aktitut aki dor di revelá ta ken ta esun ku a origin’é: Satanas e Diabel. (2 Korintionan 4:4; Revelashon 12:9) Satanas ta esun ku a influensiá Adam ku Eva pa ignorá loke Dios a bisa i tuma desishon kontrario n’e boluntat di Dios. E resultado tabata kalamidat pa nan i pa nos. (Génesis 3:1-6, 17-19) E aktitut dominante di mundu ta di kier ta independiente di Dios i di su leinan. P’esei nos tin ku frena e aktitut ei den nos mes.

13. Kiko lo demostrá ku nos ta preparando sinseramente pa biba den Dios su hustu mundu nobo?

¹³ Tuma por ehèmpel Yehova su promesa emoshonante di remplasá e mundu malbado aktual ku shelunan nobo i un tera nobo “den kual ta biba hustisia.” (2 Pedro 3:13) Esei no mester impulsá nos pa kuminsá prepará pa biba ora ku hustisia lo predominá? Esaki ta nifiká ku nos tin ku hasi kaso dje konseho bon kla di Beibel: “No stima mundu, ni e kosnan ku tin den mundu. Si un hende ta stima mundu, e amor di e Tata no ta den dje.” (1 Huan 2:15) Pues, nos ta evitá e spiritu, esta, e inklinashon mental dominante dje mundu aki: su aktitut independiente, su interes eksagerá den su mes, su inmoralidat i violensia. Nos ta hasié un kustumber pa skucha Yehova i obedes’é di kurason,  apesar ku nos naturalesa imperfekto kisas ta inkliná na lo kontrario. Henter nos bida ta duna prueba ku nos manera di pensa i nos motivashonnan ta basá riba hasi e boluntat di Dios.—Salmo 40:8.

14. (a) Dikon ta importante pa gara e oportunidat ku tin awor pa siña di e kamindanan di Yehova i sigui nan den nos bida? (b) Kiko e tekstonan bíbliko ku tin den e paragraf ta nifiká pa nos personalmente?

¹⁴ Ora Yehova su tempu fihá yega pa destruí e sistema di kosnan malbado aki huntu ku tur esnan ku ta preferá su estilo di bida, lo e no tarda. E no ta bai posponé e tempu ei òf kambia su normanan djis pa tene konsiderashon ku hende ku ainda ta purba pega na mundu i ku no tin masha gana di siña i hasi su boluntat. Awor ta tempu pa tuma akshon! (Lukas 13:23, 24; 17:32; 21:34-36) P’esei ta un gran animashon pa mira e multitut grandi gara e oportunidat presioso aki i buska ansiosamente e instrukshon ku Yehova ta perkurá mediante su Palabra i organisashon. Uní nan ta kana den e kamindanan di Yehova rumbo pa e mundu nobo! I mas nos siña tokante Yehova, mas nos lo stim’é i deseá di sirbié.

Komo Repaso

• Kiko ta Yehova su propósito pa loke ta adorashon?

• Una bes nos konosé e siñansanan básiko di Beibel, nos mester hasi esfuerso sinsero pa logra ki progreso mas?

• Kiko nos por hasi individualmente pa ta uní ku otro adoradó di Yehova?

[Preguntanan di Estudio]

 [Plachi na página 4]

“E humildenan lo heredá e tera, i lo deleitá nan mes den pas abundante”