Durante luna di juli 2022, hopi pais rond mundo a registra temperatura halto cu nunca prome nan no a yega di registra:

•   “Pa casi 70 stad na China, gobierno a saca e alerta di mas halto pa un ola di calor. Esaki ta di dos biaha den un luna cu nan a saca e alerta ey.”—25 di juli 2022, CNN Wire Service.

•   “Na tur parti di Europa temperatura a subi drasticamente, y esey a causa candela di mondi grandi na hopi pais.”—17 di juli 2022, e corant The Guardian.

•   “Riba diadomingo, varios stad na Merca a registra temperatura halto cu nunca prome nan no a yega di registra. E ola di calor inmenso aki a afecta Merca na parti oost y zuid y na parti central west.”—24 di juli 2022, e corant The New York Times.

 Kico tur e noticianan ey ta bisa nos? Nos por conclui cu pronto hende lo no por biba riba Tera mas? Kico Bijbel ta bisa?

 Si. E olanan aki di calor cu ta tumando luga rond mundo ta cuadra cu loke Bijbel ta bisa tocante nos tempo. Por ehempel, Hesus a profetisa cu nos lo mira “escenanan spantoso”, of “kosnan teribel.” (Lucas 21:11; Beibel na papiamentu koriente) E echo cu temperatura ta subiendo asina drasticamente ta preocupa hopi hende. Esey ta hasta pone nan pensa cu hende lo caba cu nos planeta Tera.

 No. Dios a traha Tera pa hende por biba riba dje pa semper. (Salmo 115:16; Eclesiastes 1:4) Dios lo no laga hende destrui Tera. Mas bien, Dios a priminti cu lo e “caba cu esnan cu ta caba cu e Tera.”—Revelacion 11:18.

 Wak e siguiente dos profecianan cu ta mustra kico mas Dios ta priminti tocante nos planeta:

•   “Laga desierto i tera seku alegrá, mondi bira kontentu i floresé.” (Isaias 35:1, Beibel na papiamentu koriente) Dios lo no laga nos Tera bira manera un desierto cu hende no por biba riba dje. Al contrario, Dios lo restaura e areanan cu hende a daña.

•   “Bo ta cuida Tera; bo ta gord’e y hacie masha fructifero.” (Salmo 65:9, Traduccion di Mundo Nobo) Dios lo bendiciona Tera, y Tera lo bira un paradijs.

 Tin mas manera cu cambio di clima ta cumpli cu profecia di Bijbel. Pa haya sa mas, lesa e articulo: “Kico Bijbel Ta Bisa Tocante Cambio di Clima y Nos Futuro?”

 Bijbel tin mas promesa cu ta mustra con Dios lo restaura medioambiente. Pa haya sa mas, lesa e articulo: “Ken Lo Salba Nos Planeta?”