CON bo ta sinti ora bo pensa riba biehes? Hopi hende ta cuminsa preocupa, bira ansha y algun di nan ta hasta haya miedo. Esey ta pasobra hopi biaha hende ta conecta biehes cu cosnan menos agradabel, manera plooi, cabey blanco, curpa debil, perdida di memoria y maleza cronico.

Pero no ta tur hende ta bira bieu na e mesun manera. Tin hende cu den nan biehes ainda nan salud ta basta bon, tanto fisicamente como mentalmente. Avancenan den medicina a haci posibel cu hende por trata cierto malezanan cronico of tene nan bou di control. Pesey, den algun pais, cada dia tin mas hende cu ta biba mas largo y tin mihor salud.

Sinembargo, mayoria di hende kier saca lo mihor di nan biehes sea cu nan tin problema di salud of no. Con abo tambe por saca lo mihor di bo biehes? Wel, esey ta depende di bo actitud y si bo ta dispuesto pa adapta na e etapa nobo di bida aki. Laga nos considera algun principio simpel y practico di Bijbel cu por yuda bo logra esaki.

SEA MODESTO: “Sabiduria ta cu esnan modesto.” (Proverbionan 11:2, NW) “Esnan modesto” por referi na hende di edad cu ta reconoce y acepta cu nan no por haci tur loke nan tabata haci antes. Charles, di 93 aña, di Brazil, kende tin un actitud realistico, a bisa: “Si bo biba largo, ta bieu bo ta bira. Bo no por draai e holoshi bek y bira jong atrobe.”

Sinembargo, ser modesto no kiermen cu bo mester pensa cu tur cos a caba pa bo. E pensamento ey por amarga bo bida. Proverbionan 24:10 ta bisa: “Si bo desmaya den e dia di angustia, bo forsa ta keda limita.” Pues, un persona modesto lo mustra cu e ta sabi si e keda cu un actitud positivo y purba di saca lo mihor for di su situacion.

Corrado, di 77 aña, di Italia, a bisa: “Ora bo subi un sero cu auto, bo tin cu cambia speed pa evita cu e motor ta perde forsa.” Pues, segun cu un hende su edad ta subi, e mester haci cierto cambionan. Corrado cu su esposa ta wak trabou di cas cu un punto di bista balansa. Nan no ta yena nan schedule cu demasiado cos di haci, asina nan ta evita cu nan ta keda mucho cansa na final di dia.  Marian, di 81 aña, di Brazil, tambe ta tuma medidanan practico. El a bisa: “Mi a siña tuma mi tempo pa haci mi cosnan. Ora cu ta necesario, mi ta descansa un poco, drumi of sinta un rato pa lesa algo of pa scucha musica. Pues, mi ta acepta cu mi no por haci tur loke mi tabata haci antes.”

SEA BALANSA: “Bunitesa di hende muher ... [ta] den bisti na ordo, cu modestia y sano huicio.” (1 Timoteo 2:9) Pa nos bisti ta na ordo, e mester ta di bon gusto y no cuestionabel. Barbara, di 74 aña, di Canada, a bisa: “Semper mi ta purba di bisti paña nechi y limpi. Mi no kier bisti na un manera cu ta mustra cu mi ta bieu y cu mi no ta worry cu mi apariencia.” Fern, di 91 aña, di Brazil, a bisa: “Cada tanto tempo mi ta cumpra paña nobo pa mi sinti mi bon.” Y kico di hende homber di edad? Wel, Antônio, di 73 aña, di Brazil, a bisa: “Mi ta purba di duna hende un bon impresion bistiendo paña limpi y na ordo.” Anto relaciona cu higiena personal, Antônio a bisa: “Tur dia mi ta baña y dal un feita.”

Di otro banda, ta sabi pa bo demostra “sano huicio” y evita di preocupa demasiado cu bo apariencia. Bok-im, di 69 aña, di Sur Korea, tin un punto di bista balansa di bistimento. El a bisa: “Mi ta consciente cu no ta apropia pa mi bisti cierto pañanan cu mi tabata bisti tempo mi tabata jong.”

SEA POSITIVO: “Tur e dianan di esun cu ta afligi ta malo, ma esun di curason contento semper tin fiesta.” (Proverbionan 15:15) Kisas bo por sinti bo tristo ora bo corda cuanto energia bo tabatin y tur e cosnan cu bo por a haci tempo bo tabata jong. Esey ta comprendibel. Pero no laga e sintimentonan negativo ey keda molestia bo. Ora bo keda pensa riba pasado, bo ta perde bo goso y esey por stroba bo di haci loke bo por ainda. Joseph, di 79 aña, di Canada, ta keda positivo. El a bisa: “Mi ta purba di disfruta di loke mi por haci ainda en bes di lamenta tocante e cosnan cu mi no por haci mas.”

Lesa y siña cos nobo tambe por yuda bo sinti mas mihor y amplia bo conocemento. Pues, probecha di cada oportunidad pa lesa y siña algo nobo. Ernesto, di 74 aña, di Filipinas, ta busca buki interesante den bibliotheek pa e lesa. Ernesto a bisa cu ora e lesa un buki, e ta sinti e emocion di un aventura y e goso di biaha bay na cualkier parti di mundo. Anto Lennart, di 75 aña, di Suecia, a hasta tuma e reto di siña un idioma nobo.

SEA GENEROSO: “Custumbra duna, y hende lo duna boso.” (Lucas 6:38) Ora bo crea e custumber di comparti bo tempo y energia cu otro hende, lo bo haya satisfaccion y felicidad. Hosa, di 85 aña, di Brazil, ta haci esfuerso pa yuda otro hende a pesar cu su curpa mes no ta duna mucho mas. El a  bisa: “Mi ta yama mi amigonan cu ta desanima of cu ta malo. Mi ta skirbi nan carta of tin biaha mi ta manda regalo chikito pa nan. Ademas, mi gusta cushina pa esnan cu ta malo of traha cos dushi pa nan.”

Si nos ta generoso, otro hende tambe lo ta generoso cu nos. Jan, di 66 aña, di Suecia, a bisa: “Ora bo mustra amor na otro hende, nan tambe lo mustra amor y cariño na bo.” Sin duda, un persona generoso ta crea un ambiente caminda ta reina cariño y aprecio cu ta agradabel pa otro hende.

SEA AMABEL: “Esun cu isola su mes ta busca su mes deseo; su furia ta lanta contra tur sabiduria sano.” (Proverbionan 18:1) Maske tin biaha bo kier ta bo so, evita di isola bo mes of aleha bo mes for di otro hende. Innocent, di 72 aña, di Nigeria, ta gusta pa ta den compania di su amigonan. El a bisa: “Mi gusta anda cu hende di tur edad.” Börje, di 85 aña, di Suecia, a bisa: “Semper mi ta purba pa ta den compania di hende jong. Nan vigor ta laga mi sinti mi jong atrobe.” Tuma iniciativa pa invita bo amigonan pa bin cerca bo de bes en cuando. Han-sik, di 72 aña, di Sur Korea, a bisa: “Ami cu mi esposa gusta invita hende di tur edad pa pasa un rato ameno of pa come hunto cu nos.”

Hende amabel gusta combersa. Pero comunicacion tin cu bin di tur dos banda; pues haci esfuerso pa scucha otro hende y mustra interes den nan. Helena, di 71 aña, di Mozambique, a bisa: “Mi ta purba di ta amabel, y mi ta trata otro hende cu respet. Mi ta scucha loke nan tin di bisa pa mi por sa kico nan ta pensa y gusta.” José, di 73 aña, di Brazil, a bisa: “Hende gusta pa ta den compania di personanan cu ta scucha, cu ta mustra empatia y interes den otro hende, cu ta elogia otronan na e momento corecto y cu tin un bon sentido di humor.”

Ora bo ta papia, haci sigur cu bo palabranan semper ta “sasona cu salo.” (Colosensenan 4:6) Ademas, tene cuenta cu sintimento di otro hende y duna nan animacion.

SEA AGRADECIDO: “Mustra cu boso ta agradecido.” (Colosensenan 3:15) Ora un hende haci bo un fabor, mustra cu bo ta agradecido. Bo por haya bon amigo ora bo mustra cu bo ta aprecia loke hende ta haci pa bo. Marie-Paule, di 74 aña, di Canada, a bisa: “Ami cu mi casa tabata biba den un cas, pero recientemente nos a muda bay un apartamento. Hopi di nos amigonan a bin yuda nos. Nos tabata hopi agradecido na nan. Nos a manda un carchi di gradicimento pa cada un di nan, y for di e tempo ey nos a invita algun di nan pa bin come cerca nos.” Jae-won, di 76 aña, di Sur Korea, ta hopi contento cu e rumannan ta bin busc’e pa bay Salon di Reino. El a bisa: “Mi ta hopi agradecido pa tur e yudansa cu mi ta haya. Pesey mi ta duna nan algo pa nan pone gasoline den nan auto. Y tin biaha mi ta duna nan un regalo chikito cu un carchi di gradicimento.”

Riba tur cos, bo mester ta contento cu bo ta na bida. E Rey sabi Salomon a bisa: “Un cacho bibo ta mihor cu un leon morto.” (Eclesiastes 9:4) Pues, bo por saca lo mihor di bo biehes basta bo tin e actitud corecto y ta dispuesto pa adapta bo mes na e etapa di bida aki.