JOZEF tabata cana pasa den un gang scur, papa soda despues di a caba di traha duro den un calor insoportabel. Pafo, e solo di Egipto tabata kima asina tanto cu e prizon a bira manera un forno. Probablemente Jozef tabata conoce cada klinker di e prizon y delaster un nachi den su murayanan. Esaki tabata su mundo awor. Ta berdad cu hende tabata respet’e, pero esey no ta kita cu e tabata un prizonero.

Cuanto falta e lo a sinti di su bida den e seronan di Hebron, tempo cu e tabata cuida e tounan di carne di su tata. E tabatin mas o menos 17 aña di edad ora su tata Jacob a mand’e bay haci un respondi masha leu for di cas. Como un preso, e no por a pensa mes di tin e libertad ey. Jozef su rumannan tabatin asina tanto odio contra dje cu nan kier a mat’e, pero despues nan a dicidi di bend’e como catibo. E comerciantenan cu a cumpr’e a hib’e Egipto, caminda el a sirbi prome den cas di Potifar, un oficial Egipcio. Su doño tabata confi’e y a laga tur cos di cas na su encargo, pero e casa di Potifar a acusa Jozef falsamente di kier a viol’e, y pesey el a bay cera. *—Genesis, capitulo 37, 39.

Awor Jozef tabatin 28 aña y a pasa casi dies aña como catibo den prizon. Esaki sigur no tabata e clase di bida cu e lo kier a hiba. Lo e haya su libertad un dia? E por bolbe mira su tata keri cu tabata bieu caba of su ruman homber stima Benjamin? Pa cuanto tempo mas lo e mester a keda den e condicion deplorabel aki?

Abo a yega di sinti bo manera Jozef? Tin biaha cosnan por sali completamente diferente for di loke bo a spera como hoben. Bo por haya bo cu un situacion dificil tras di otro y kisas bo no ta mira un salida of un manera pa persevera. Laga nos wak kico nos por siña for di e fe di Jozef.

Jozef tabata sa cu su Dios, Jehova, hamas lo a lubida riba dje y esey siguramente a yud’e persevera. Hasta den prizon, Jehova a haya manera pa bendiciona Jozef. Bijbel ta bisa: “SEÑOR tabata cu Jozef y a mustr’e misericordia, y a dun’e gracia den bista di e hefe di prizon.” (Genesis 39:21-23) Jozef a sigui haci su best y asina el a duna su Dios motibo pa bendicion’e. Esta un alivio pa sa cu semper Jehova a sosten’e!

Acaso Jehova tabata kier pa Jozef keda den e prizon ey pa semper? Jozef no tabata sa kico pa spera, pero sin duda e tabata haci oracion bes tras bes tocante su situacion. Manera sa sosode hopi biaha, e contesta a bin na un manera inespera. Un dia tabatin un consternacion den prizon ora nan a trece dos prizonero nobo, kendenan tabata oficial di Farao. Un di nan tabata hefe di e panaderonan y e otro tabata hefe di e coperonan di e Rey.—Genesis 40:1-3.

E hefe di guardia a encarga Jozef pa percura pa e dos hombernan aki, cu un tempo tabatin puesto  importante. * Un anochi, tur dos tabatin un soño cu a parce real y cu a laga nan basta turdi. Ora Jozef a mira nan mainta, el a ripara cu nan tabata mustra preocupa. Pesey, el a puntra nan: “Pakico boso cara ta tristo asina awe?” (Genesis 40:3-7) Kisas su tono suave a pone e hombernan sinti nan mes trankil pa cont’e loke nan a soña. Jozef no tabata sa cu e combersacion ey lo a trece un cambio grandi den su bida. Si Jozef no a mustra interes den e dos hombernan ey, nan lo no a bis’e kico tabata preocupa nan. Su ehempel por motiva nos pa puntra nos mes: Mi tambe ta mustra interes den mi prohimo, demostrando asina mi fe den Dios?

E dos hombernan a splica Jozef cu nan tabata preocupa cu nan soñonan straño, pasobra no tabatin niun hende cu por a interpreta nan. Pa e Egipcionan, soño tabata masha importante y nan tabata depende hopi riba hende cu a pretende di por a interpreta soño. E dos hombernan no tabata sa cu e soñonan ey a bin di Jehova, e Dios di Jozef. Pero Jozef si tabata sa. Pesey el a duna nan e siguransa: “Interpretacion no ta Dios su asunto? Pa fabor, conta mi e soño.” (Genesis 40:8) Loke Jozef a bisa ta importante pa tur studiante sincero di Bijbel awe. Mare tur hende religioso por ta mes humilde. Nos mester ta dispuesto pa pone orguyo un banda y pidi Dios yuda nos haya e interpretacion corecto di su Palabra.—1 Tesalonicensenan 2:13; Santiago 4:6.

E copero a cuminsa prome. El a conta Jozef cu el a soña cu un mata di wendruif cu tres taki cu tabatin troshi di druif na nan. E druifnan a hecha y e copero a primi e juice di e druifnan den e copa di Farao. Di biaha Jehova a laga Jozef compronde e nificacion di e soño. Jozef a bisa e copero cu e tres takinan ta nifica tres dia; den un lapso di tres dia Farao lo a duna e copero su puesto bek. Ora Jozef a mira un alivio riba cara di e copero, el a pidie: “Corda riba mi ora cos ta bay bon pa bo y haci mi un fabor di papia cu Farao pa mi.” Jozef a splica e copero cu el a wordo secuestra for di su pais y a bay cera sin cu el a haci nada malo.—Genesis 40:9-15.

E panadero a bira contento ora el a tende e bon noticia cu e copero a haya. Pesey, el a conta Jozef cu el a mira tres macutu di pan y tambe parhanan cu tabata come for di den un di e macutunan riba su cabes. Jozef a haya nificacion di e soño aki tambe, pero esaki si no tabata un bon noticia pa e panadero. Jozef a bis’e: “Esaki ta su interpretacion: e tres macutunan ta tres dia. Denter di tres dia Farao lo halsa bo cabes y lo colga bo na un palo; y parhanan lo come bo carni for di bo curpa.”  (Genesis 40:16-19) Mescos cu tur otro fiel sirbidor di Dios, cu curashi Jozef a revela Dios su mensahe, tanto bon como mal noticia.—Isaias 61:2.

Tres dia despues, e palabranan di Jozef a cumpli. Farao a tene un fiesta di hacimento di aña—un custumber cu e pueblo di Dios no tabatin—y a dicta sentencia riba su dos sirbidornan. E panadero a ser ehecuta y e copero a haya su puesto bek manera Jozef a profetisa. Pero, lamentablemente e homber ey a lubida limpi limpi riba Jozef.—Genesis 40:20-23.

Dos aña completo a pasa. (Genesis 41:1) Imagina bo con frustrante esey lo mester tabata pa Jozef. Kisas e echo cu Jehova a yud’e interpreta e soñonan di e copero y e panadero a dun’e motibo pa carga speransa. Pesey, dia tras dia Jozef tabata lanta mainta pensando cu un momento pa otro lo e sali liber. Pero e bida laf di prizon a sigui sin ningun cambio. Probablemente, e dos añanan ey tabata e periodo di mas dificil di su bida. Sinembargo, nunca el a stop di pone confianza den su Dios, Jehova. En bes di perde cabes, e tabata determina pa sigui persevera, y el a sali for di e situacion dificultoso ey mas fuerte cu nunca.—Santiago 1:4.

Den e tempo critico aki, nos tambe tin cu haci esfuerso pa persevera, no ta berdad? Pa nos por enfrenta e circunstancianan dificil di bida, nos mester tin e determinacion, pasenshi y paz mental cu Dios so por duna nos. Mescos cu Jehova a yuda Jozef, e por yuda nos lucha cu desesperacion pa nos no perde speransa.—Romanonan 12:12; 15:13.

E copero por a lubida riba Jozef, pero Jehova si no a lubida su sirbidor. Riba un anochi, Jehova a laga Farao haya dos soño inolvidabel. Den e prome soño, Farao a mira shete baca gordo y bunita sali for di Riu Nilo, sigui pa shete baca flaco y mahos. E bacanan flaco a habraca e bacanan gordo. Despues di esey, den un otro soño Farao a mira shete tapushi di maishi yen y bunita cu tabata crece na un solo richi. Pero mas despues, el a mira shete tapushi bashi y kima pa biento; nan a spruit y habraca e tapushinan yen y bunita. Su mañan, Farao a spierta masha intrankil y pesey el a manda yama tur su magonan y sabionan pa interpreta e soñonan p’e. Pero ningun di nan no tabata por. (Genesis 41:1-8) Nos no sa si nan no tabata sa kico pa bisa, of cu ta contradeci nan a contradeci otro. En todo caso, Farao a keda decepciona y tabata mas desespera cu nunca pa haya un hende cu por a revela nificacion di e soñonan aki.

Finalmente, e copero a corda riba Jozef. Su consenshi a cuminsa molesti’e y el a conta Farao cu dos aña mas prome un hoben remarcabel den prizon a logra interpreta su soño y esun di e panadero. Inmediatamente, Farao a manda yama Jozef.—Genesis 41:9-13.

Imagina bo con Jozef lo mester a sintie ora e mensaheronan a bin riba ordo di Farao pa sac’e for di prizon. Lihe lihe el a cambia paña y feita—y probablemente a feita su cabes tambe, pasobra esey tabata e custumber Egipcio. Sin duda lo el a haci un oracion ferviente na Jehova pa yud’e presenta dilanti di Farao. Poco despues e tabata den e mahestuoso palacio real, para dilanti di e monarca. Segun e relato di Bijbel, “Farao a bisa Jozef: ‘Mi tabatin un soño, ma ningun hende no por a interpret’e; y mi a tende nan bisa di bo, cu ora bo tende un soño, bo por interpret’e.’” Loke Jozef a bisa Farao un biaha mas a demostra su humildad y su fe den Dios: “Ami nò, esei ta Dios so por. E lo duna fárao un kontesta faborabel [BPK].”—Genesis 41:14-16.

Jehova ta stima hende fiel y humilde; pues no ta nada straño cu el a duna Jozef e interpretacion cu ni e sabionan ni e sacerdotenan no por a compronde. Jozef a splica Farao cu su dos soñonan tabatin e mesun nificacion. Jehova a ripiti e mensahe dos biaha pa indica cu e asunto tabata firmemente “estableci” y cu lo el a cumpli sigur. E bacanan gordo y e tapushinan di maishi yen y bunita a representa shete aña di abundancia na Egipto, mientras cu e bacanan flaco y e shete tapushinan di maishi seco a representa shete aña di hamber cu lo a sigui despues di e añanan di abundancia. E hamber ey lo a caba completamente cu e cosecha abundante.—Genesis 41:25-32.

 Farao tabata sa cu Jozef su interpretacion tabata corecto. Pero kico e por a haci? Jozef a bin cu un plan di accion. El a recomenda Farao pa busca un homber cu tabatin “discernimento y sabiduria” pa supervisa e recogemento di e exceso di grano durante e shete añanan di abundancia y warda esakinan den mangashina. Anto durante e añanan di hamber lo por a distribui e reserva di grano ey pa alimenta e pueblo pa nan keda na bida. (Genesis 41:33-36) Jozef su experencia y preparacion a capacit’e pa haci e trabou ey, pero e no a promove su mes. Como cu e tabatin fe y un actitud humilde, e idea ey no a pasa mes den su cabes. Si di berdad nos tin fe den Jehova, nos lo no ta ambicioso ni lo no busca pa promove nos mes. En bes di esey, nos lo keda trankil y laga tur cos den su man.

Farao y tur su sirbidornan a mira e beneficio di e plan di accion di Jozef. Ademas, e Rey a reconoce cu ta e Dios di Jozef tabata e fuente di su sabiduria. Farao a puntra su sirbidornan: “Nos por haya un homber manera esaki, cu tin e spirito di Dios den dje?” Anto el a bisa Jozef: “Como cu Dios a mustra bo tur esaki, no tin ningun hende cu discernimento y sabiduria manera abo. Abo lo ta hefe di mi cas, y segun bo ordo henter mi pueblo lo wordo goberna; solamente riba trono lo mi ta mas grandi cu bo.”—Genesis 41:38-41.

Farao a cumpli cu su palabra. Poco despues, nan a bisti Jozef cu paña di lino fini. Y Farao a dun’e un cadena di oro, un renchi di seyo, un garoshi real y tur autoridad pa biaha den henter e pais pa ehecuta su plan. (Genesis 41:42-44) Pa increibel cu esaki por zona, riba un solo dia Jozef a pasa di prizon pa palacio di Rey; el a cuminsa su dia como un prizonero despreciabel y cab’e como e di dos homber mas poderoso di Egipto. Ta bisto anto cu Jozef tabatin bon motibo pa pone fe den Jehova Dios. Jehova a mira e inhusticia cu Jozef a sufri a traves di tur e añanan y na e momento adecuado y na e mihor manera posibel el a corigi asuntonan. Jehova su intencion tabata pa no solamente trece un cambio den Jozef su situacion, sino tambe pa proteha e futuro nacion di Israel. Nos lo mira con Dios a haci esey den un proximo articulo di e serie aki.

Si bo ta pasando den un situacion dificil aworaki, kisas sufriendo pa hopi aña caba di un inhusticia, no perde speransa. Corda riba Jozef. Semper el a mustra bondad, humildad, perseverancia y fe, y asina el a duna Jehova tur motibo pa recompens’e.