Hopi hende awe, mescos cu Alex, no ta gusta traha duro. Un mecanico cu yama Aaron a bisa: “Hopi hende ta pensa cu trabou duro ta bou di nan nivel. Nan ta dal bay cu ne te ora nan haya algo mihor.”

Pakico hopi hende ta pensa cu trabou duro no ta pa nan? Kisas pasobra nan ta laga medionan di comunicacion duna nan e impresion cu un bida “ideal” ta un bida di luho y trankilidad. Matthew, kende ta traha den mantencion, a bisa cu hende ta kere cu trabou duro ta pa esnan cu a fracasa den bida. Shane, un conciërge, tambe a ripara e tendencia ey. El a bisa: “Aworaki hende kier haya pago pa un dia completo di trabou, pero sin haci mucho esfuerso.”

Di otro banda, hopi hende cu a logra exito den bida si ta gusta traha duro. Daniel, di 25 aña, kende ta traha den construccion, a bisa: “Trabou duro ta duna hopi satisfaccion vooral ora bo ta traha pa logra un bon meta.” Andre, di 23 aña, ta di acuerdo. El a bisa: “Ami ta kere cu trabou ta haci bo feliz y contento. Hende cu no ta haci hopi na trabou lo no sinti nan feliz, mas bien laf so.”

Con hende manera Daniel y Andre a haya un punto di bista positivo di trabou duro? Cu poco palabra, nan a aplica principio di Bijbel. En bes di descurasha trahamento duro, Bijbel ta anima hende pa ta diligente y persevera den nan trabou. Pero e ta siña nos tambe kico pa haci pa gusta nos trabou.

Ki principio di Bijbel por yuda bo haya satisfaccion den bo trabou? Nos ta anima bo pa considera algun di nan den e siguiente articulo.