Anthony: Con ta bay Tico! Mi ta contento di mira bo atrobe.

Tico: Mi tambe ta contento di mira bo.

Anthony: Mi a trece E Toren di Vigilancia y ¡Despertad! nobo pa bo. Mi tin sigur cu lo bo haya e articulonan den e revistanan aki interesante.

Tico: Danki. Bo sa, mi ta contento cu bo a bin awe pasobra tin un cos cu mi kier a puntra bo.

Anthony: Masha bon! Puntra mi numa.

Tico: Un par di dia pasa mi tabata bisa mi colega cu e bukinan cu bo a duna mi ta interesante. Pero el a bisa mi cu mi no mester lesa nan pasobra testigonan di Jehova no ta kere den Hesus. Esey ta berdad? Mi a bisa mi colega cu lo mi puntra bo esey ora bo bin cerca mi.

Anthony: Wel, mi ta hopi contento cu bo a haci mi e pregunta ey, ya bo por tende for di un Testigo mes kico nos ta kere.

Tico: Si, esey mes mi a pensa.

Anthony: Wel, nos como testigo di Jehova sigur sigur ta kere den Hesus. Nos ta kere cu fe den Hesus ta sumamente importante pa haya salbacion.

Tico: Mi tabata sa cu boso ta kere den Hesus, pero ora mi colega a bisa mi cu boso no ta kere den dje, el a pone mi duda un tiki. Mi kier sa cu nos no a yega di papia riba e topico aki ainda.

Anthony: Bo kier pa mi mustra bo algun texto di Bijbel cu ta mustra pakico ta importante pa pone fe den Hesus? Nos ta uza e textonan aki hopi biaha ora nos ta predica.

Tico: Okay.

Anthony: Ta bon pa wak loke Hesus mes a bisa na Juan 14:6. E palabranan aki ta parti di un combersacion cu Hesus tabatin cu un di su apostelnan. E texto ta bisa: “Hesus a contest’e: ‘Ami ta e caminda, e berdad y e bida. Ningun hende no ta yega cerca e Tata si no ta pa medio di mi.’” Segun e texto aki, con ta e unico manera cu nos por acerca e Tata?

Tico: Mediante Hesus.

Anthony: Exactamente. Y anos como testigo di Jehova ta kere firmemente den esey. Laga mi haci bo un pregunta: Di loke bo a siña tocante Dios, ora un hende haci oracion, den nomber di ken e mester haci oracion?

Tico: Den nomber di Hesus.

Anthony: Bo tin rason. Ta pesey cada biaha cu mi haci oracion mi ta hacie den nomber di Hesus. Y tur otro testigo di Jehova tambe ta haci mescos.

Tico: Interesante.

Anthony: Un otro texto cu nos por lesa ta Juan 3:16. E texto aki ta asina importante cu bo por bisa cu e ta un resumen di tur loke tin skirbi tocante e bida di Hesus y su ministerio den e Evangelionan. Bo kier a lesa e texto aki?

Tico: Okay. E ta bisa: “Pasobra Dios a stima mundo asina tanto cu el a duna su Yiu unigenito,  pa tur cu pone fe den dje no bay perdi, ma haya bida eterno.”

Anthony: Danki. Bo conoce e texto aki?

Tico: Si, mi conoce e texto ey bon, y mi a yega di tend’ele den misa y mir’e riba sticker di auto.

Anthony: Si, e texto aki ta bon conoci. Laga nos wak e un biaha mas, Hesus a bisa cu Dios a stima hende asina tanto cu el a habri caminda pa hende por haya bida eterno. Pero kico nos mester tin pa nos haya bida eterno?

Tico: Nos mester tin fe.

Anthony: Si. Nos mester pone fe den Hesucristo, e Yiu unigenito. E Toren di Vigilancia cu mi a trece pa bo ta enfatisa e punto aki na pagina 2. Eynan e revista ta bisa cu su proposito ta pa “anima hende pa pone fe den Hesucristo, kende a muri pa nos por haya bida eterno y kende ta reinando awor como Rey di e Reino di Dios.”

Tico: Wel, mas claro no canta un gayo. Den boso revistanan mes tin prueba cu testigonan di Jehova ta kere den Hesus.

Anthony: Corectamente.

Tico: Ta dicon anto hende ta bisa cu boso no ta kere den Hesus?

Anthony: Por tin varios motibo pakico hende ta bisa esey. Tin hende simplemente ta ripiti loke otro hende ta bisa. Of nan a tende esey na nan misa.

Tico: Kisas algun hende ta bisa cu boso no ta kere den Hesus pasobra boso ta yama boso mes testigonan di Jehova y no testigonan di Hesus.

Anthony: Esey tambe por ta un motibo.

Tico: Dicon boso ta papia asina tanto tocante Jehova?

Anthony: Un motibo ta cu nos ta kere cu ta importante pa uza Dios su nomber, Jehova, mescos cu su Yiu, Hesus, a uz’e. Wak kico Hesus a bisa su Tata den oracion na Juan 17:26. Bo kier a les’e?

Tico: Sigur no! “Y mi a haci bo nomber conoci na nan y lo mi sigui hacie conoci, pa nan por demostra e amor cu bo a stima mi cu ne y pa mi por ta den union cu nan.”

Anthony: Danki. Bo a ripara cu Hesus a bisa cu el a haci Dios su nomber conoci? Dicon bo ta kere cu el a haci esey?

Tico: Wel, mi no sa.

Anthony: Kisas nos por lesa un otro texto pa contesta e pregunta ey. Esun cu mi tin na mente ta Echonan 2:21. E ta bisa: “Tur hende cu invoca e nomber di Jehova lo ser salba.” Mi tin sigur cu bo ta di acuerdo cu si nos tin cu invoca e nomber di Jehova pa nos haya salbacion, Hesus lo mester tabata sa esey.

Tico: Claro cu si.

Anthony: Pues, un motibo pakico Hesus a haya cu ta importante pa su siguidornan conoce y uza Dios su nomber ta pa nan haya salbacion. Y esaki ta un di e motibonan principal pakico nos ta papia asina tanto tocante Jehova. Nos ta pensa cu ta importante pa haci Dios su nomber conoci y nos ta yuda otro hende pa nan tambe haci esey.

Tico: Pero hasta si hende no sa e nomber di Dios of no ta uz’e, toch nan sa tocante ken nan ta papia ora nan ta referi na Dios.

Anthony: Por ta bo tin rason. Pero como cu el a bisa nos su nomber, ta mas facil pa nos hala cerca dje.

Tico: Mi no a compronde bon.

Anthony: Laga mi duna bo un ehempel: No ta necesario pa sa e nomber di Moises. Nos por simplemente identific’e como e homber cu a parti Lama Cora na dos of e homber cu a haya e Dies Mandamento. Nos por bisa mescos di Noe.  Nos mester sa su nomber? Nos por a referi na dje djis como e homber cu a traha un arca y salba su famia y e animalnan. Den caso di Hesucristo tambe ta mescos; anos por referi na dje simplemente como e homber cu a bin for di cielo y a muri pa nos picanan, no ta berdad?

Tico: Mi ta kere cu si.

Anthony: Pero Dios a laga hende sa con yama e hombernan ey. E echo cu nos sa nan nomber ta haci e relatonan cu tin den Bijbel tocante nan mas bibo pa nos. Maske nunca nos no a conoce Moises, Noe ni Hesus personalmente, e solo echo cu nos sa nan nomber ta haci nan mas real pa nos.

Tico: Ami nunca no a pensa riba esey, pero e ta zona logico si!

Anthony: Esey ta un otro motibo pakico testigonan di Jehova ta uza e nomber di Dios asina tanto biaha. Nos kier yuda hende pone fe den Jehova Dios como un Persona real cu nan por hala cerca dje. Na mes momento, nos ta reconoce cu Hesus ta hunga un rol hopi importante den nos salbacion. Kisas nos por lesa un texto mas pa comproba e punto aki.

Tico: Si, ta bon.

Anthony: Aworey nos a lesa Juan 14:6. Corda cu Hesus a bisa cu e ta “e caminda, e berdad y e bida.” Laga nos bay na e mesun capitulo 14 pero awor na versiculo uno. Bo kier a lesa loke Hesus a bisa den e ultimo parti di e versiculo ey?

Tico: Okay. E ta bisa: “Pone fe den Dios; pone fe den mi tambe.”

Anthony: Masha danki. Awor, kico abo ta pensa: Esaki ta nifica cu bo tin cu dicidi ta den ken bo ta pone fe? Den Hesus of den Jehova?

Tico: No, pasobra Hesus a bisa cu nos mester pone fe den ambos.

Anthony: Hopi bon! Mi tin sigur cu bo ta eens cu no ta suficiente pa djis bisa cu nos tin fe den Dios y den Hesus. Nos tin cu biba di tal manera cu nos ta demostra cu nos tin fe den nan.

Tico: Claro cu si.

Anthony: Pero ta con un hende por demostra cu realmente e tin fe den Dios y den Hesus? Kisas nos por papia riba e pregunta ey e siguiente biaha. *

Tico: Esey ta un bon idea.