Religion y Guera
Alberto, kende tabata den servicio militar pa casi dies aña, a conta: “Nos kapelaan a bendiciona nos, bisando: ‘Dios sea cu boso.’ Pero ami tabata puntra mi mes: ‘Ta con mi por bay mata hende siendo cu Bijbel ta bisa: “No mata”?’”
Ray tabata den marina durante Segundo Guera Mundial. Un biaha, el a puntra e kapelaan: “Bo ta subi nos barco y ta resa pa e soldaatnan y pa nos haya victoria. Pero e enemigonan tambe no ta haci mescos?” E kapelaan a contesta cu Dios ta obra den maneranan misterioso.
Si bo no ta satisfecho cu e contesta ey, bo no ta e unico.
KICO BIJBEL TA SIÑA?
Hesus a bisa cu un di e mandamentonan di mas importante ta “stima bo prohimo mescos cu bo mes.” (Marco 12:31) Acaso Hesus a bisa cu ta hende di cierto nacionalidad so nos tin cu stima como nos prohimo? No. El a bisa su discipelnan: “Na esaki tur hende lo sa cu boso ta mi discipelnan, esta, si boso ta stima otro.” (Juan 13:34, 35) E manera cu nan lo stima otro lo tabata asina extraordinario cu esey lo a haci nan diferente. Nan no a djis nenga di kita bida di nan prohimo, mas bien nan tabata dispuesto pa entrega nan bida p’e.
Ta net esey e prome cristiannan a haci. The Encyclopedia of Religion ta bisa: “E prome tatanan di iglesia, incluyendo Tertuliano y Origenes, a afirma cu e cristiannan no tabata por a kita bida di un hende. Esey tabata un principio cu a stroba nan di ta den servicio di e ehercito Romano.”
KICO TESTIGONAN DI JEHOVA TA HACI?
Casi tur caminda na mundo tin Testigo di Jehova. Ora paisnan tin conflicto cu otro, e Testigonan cu ta biba den e areanan ey ta haci nan maximo esfuerso pa demostra e amor cu nan tin pa otro.
Lidernan religioso a siña nan miembronan con pa mustra berdadero amor cristian?
Por ehempel, na 1994 durante e guera etnico cu tabatin entre e tribunan Hutu y Tutsi na Ruanda, Testigonan di Jehova a keda completamente neutral. E Testigonan di un tribu tabata sconde esnan di un otro tribu, poniendo nan mes bida na peliger. Un biaha e guerrilla Hutu Interahamwe a captura dos Testigo di Jehova Hutu cu a proteha nan rumannan Tutsi. E guerrilleronan a bisa nan: “Wak kico ta pasa ora bo yuda e Tutsinan scapa.” Y nan a tira e dos Testigonan Hutu aki mata.—Juan 15:13.
Kico bo ta pensa: E manera cu e Testigonan ta actua ta cuadra cu loke Hesus a bisa tocante amor?
