“Profecia no a sali nunca for di boluntad di hende; mas bien, hende a papia di parti di Dios segun cu spirito santo tabata guia nan.”​—2 PED. 1:21.

1. Dicon nos tin mester di e Palabra di Dios?

DI UNDA nos a bin? Pakico nos ta aki na mundo? Unda nos ta bay? Dicon mundo ta asin’aki? Kico ta pasa cu nos ora nos muri? Rond mundo hende kier haya contesta riba e preguntanan aki. Nos mes lo no tabata sa e contesta riba nan y riba otro preguntanan importante si nos no tabatin e Palabra di Dios. Sin Bijbel, nos lo tabatin cu siña tocante bida principalmente di experencia personal. Y si ta di experencia personal so nos por a siña, nos lo no por tabatin e mesun sintimentonan cu e escritor di salmo a expresa pa ‘e ley di Jehova.’​—Lesa Salmo 19:7.

2. Kico lo yuda nos pa keda aprecia Bijbel como un regalo precioso di Dios?

² Pero lamentablemente, algun hende a perde e amor cu nan tabatin un tempo pa e siñansanan di Bijbel. (Compara cu Revelacion 2:4.) Nan no ta cana mas den e caminda cu ta agrada Jehova. (Isa. 30:21) Esey no tin nodo di pasa cu nos. Nos por​—y mester​—haci nos best pa keda aprecia Bijbel y su siñansanan. Bijbel ta un regalo masha precioso cu nos Creador a duna nos. (Sant. 1:17) Kico lo yuda nos haya mas aprecio pa “e palabra di Dios”? Un manera clave ta di medita riba e manera cu Dios a guia e escritornan di Bijbel pa skirbi e Scritura. Tambe nos por analisa algun di e tantisimo pruebanan cu ta indica cu e ta inspira pa Dios. Esaki lo motiva nos pa lesa e Palabra di Dios tur dia y aplica su conseho.​—Heb. 4:12.

CON ‘SPIRITO SANTO A GUIA NAN’?

3. Den ki sentido ‘spirito santo a guia’ e profeta- y escritornan di Bijbel?

³ Durante un periodo di 1.610 aña​—for di aña 1513 prome cu e era cristian te cu aña 98 di e era cristian​—un  40 homber asina a skirbi Bijbel. Algun di nan tabata profeta, y Bijbel ta bisa cu ‘spirito santo a guia nan.’ (Lesa 2 Pedro 1:20, 21.) E expresion Griego “guia” tin e sentido di “carga of hiba di un luga pa otro”, y “por traducie na varios manera: cambia di luga of posicion, ser hiba of motiva, of laga nan cambia bo di luga.” * Echonan 27:15 ta uza e mesun palabra ey pa describi un boto cu biento a hiba den un cierto direccion. Pues, ora nos lesa cu ‘spirito santo a guia’ e profeta- y escritornan di Bijbel, esey ta nifica cu Dios a comunica cu nan, motiva nan y dirigi nan pa medio di su forsa activo. Kiermen, nan no a skirbi nan propio ideanan, sino e pensamentonan di Dios. Tabatin biaha cu e profeta- y escritornan no tabata compronde mes kico nan a profetisa of skirbi. (Dan. 12:8, 9) Pues, en berdad “henter e Scritura ta inspira di Dios.” Nos no ta haya opinion di hende den dje.​—2 Tim. 3:16.

4-6. Ilustra e maneranan cu Jehova a transmiti su mensahe na e escritornan di Bijbel.

⁴ Pero con Dios a uza spirito santo pa transmiti su mensahe na e escritornan di Bijbel? Acaso nan a ricibi e palabranan exacto cu nan mester a skirbi of djis e ideanan cu nan por a expresa cu nan mes palabra? Pensa un rato riba e manera cu kisas un comerciante ta redacta un carta. Ora ta importante pa uza cierto palabra specifico, e mes ta skirbi e carta of e ta dicta e carta palabra pa palabra pa su secretaria skirbi. E secretaria ta type e carta y e comerciante ta pone su firma bou di dje. Na otro ocasion, e ta djis bisa e secretaria e ideanan principal, y e secretaria ta skirbi e carta na su estilo of cu su mes palabranan. E comerciante kisas ta controla e carta y laga e secretaria haci e cambionan necesario. Ora caba, e comerciante ta pone su firma y esun cu haya e carta ta acept’e comosifuera ta e comerciante a skirbie.

⁵ Asina tambe a pasa cu algun parti di Bijbel; Dios mes a skirbi nan. (Exo. 31:18) Ademas, ora tabata masha importante pa uza cierto palabra specifico, Jehova a dicta kico pa skirbi. Por ehempel, na Exodo 34:27 nos ta lesa: “E ora ey SEÑOR a bisa Moises: ‘Skirbi e palabranan aki, pasobra conforme e palabranan aki mi a cera un alianza cu bo y cu Israel.’ ” Asina tambe Jehova a bisa profeta Jeremias: “Skirbi tur e palabranan cu mi a papia cu bo den un buki.”​—Jer. 30:2.

⁶ Pero den mayoria di caso Jehova no a bisa e escritornan di Bijbel ki palabra precies pa skirbi. Pa medio di un milager el a pone cierto pensamento den nan mente y curason y a laga nan scoge nan propio palabranan pa expresa eseynan. Eclesiastes 12:10 ta bisa: “E predicador a busca pa haya palabranan agradabel y pa skirbi palabranan di berdad na manera corecto.”  Y Lucas, e escritor di Evangelio, “a investiga tur cos for di principio cu exactitud” pa e por a “skirbi nan den orden logico.” (Luc. 1:3) E spirito di Dios a percura pa imperfeccion humano no cambia su mensahe.

7. Con e echo cu Dios a uza hende pa skirbi Bijbel ta un prueba di su gran sabiduria?

⁷ Dios a demostra su gran sabiduria ora el a uza hende pa skirbi Bijbel. Palabra ta transmiti no solamente informacion sino tambe emocion. Con lo tabata si Jehova a uza angel pa skirbi Bijbel? Nan lo por a describi sintimentonan humano cu ta asina comun, manera miedo, tristeza y desanimacion? Dios su mensahe ta conmove nos curason pasobra el a laga hende imperfecto scoge nan propio palabranan pa expresa e ideanan cu nan a ricibi pa medio di spirito santo. Esey a haci e mensahe caluroso, varia y yen di emocion y sintimento humano.

PRUEBA CU BIJBEL A BIN DI DIOS

8. Dicon nos por bisa cu Bijbel ta un buki sin igual compara cu otro bukinan religioso?

⁸ Tin hopi prueba cu ta indica cu Bijbel ta e Palabra inspira di Dios. Bijbel ta sin igual pasobra e ta laga nos siña conoce Dios na un manera cu ningun otro buki religioso ta haci. Por ehempel, e religion hindu tin e bukinan di cantica di Veda cu ta conta tocante su ceremonianan religioso, bukinan di filosofia cu yama Upanishad y bukinan di mito conoci como Ramayana y Mahabharata. E buki Bhagavad Gita ta parti di Mahabharata y ta contene reglanan di moralidad. Budismo tin un coleccion di buki sagrado cu yama Tipitaka (Tres Macutu). Un volumen ta trata principalmente tocante e reglanan di bida den convento. Un otro volumen ta splica principalmente e doctrinanan di budismo. Un di tres volumen ta un registro di e siñansanan di Buda. Buda mes no a bisa cu e tabata un dios, y casi e no a papia nada tocante Dios. E bukinan di e religion di Confucio ta papia tocante cosnan cu a sosode den pasado, reglanan di moralidad, formulanan magico y canticanan. Ta berdad cu e buki sagrado di islam (e religion di moslim) ta siña hende cu ta un Dios so tin y ta present’e como e Dios cu sa tur cos y cu ta mira tur cos di antemano, pero e no ta ni sikiera revela e nomber di Dios, Jehova, cu ta aparece miles di biaha den Bijbel.

9, 10. Kico nos por siña tocante Dios for di Bijbel?

⁹ Mayoria di buki religioso no ta bisa casi nada tocante Dios, mientras cu Bijbel si ta laga nos siña conoce Jehova Dios y tur su actividadnan. Bijbel ta yuda nos conoce su personalidad. E ta mustra nos cu Jehova no solamente ta un Dios todopoderoso, sabi y husto, sino tambe un Dios cu ta stima nos. (Lesa Juan 3:16; 1 Juan 4:19.) Ademas, Bijbel ta bisa nos cu “Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.” (Echo. 10:34, 35) Algo cu ta confirma esaki ta e echo cu Bijbel ta disponibel  na masha hopi idioma. Segun linguistanan, awe hende ta papia rond di 6.700 idioma na mundo, y aproximadamente 90 porciento di e poblacion mundial ta papia 100 di e idiomanan ey. Pero asina mes, hende a traduci Bijbel, sea completo of parcialmente, na mas cu 2.400 idioma. Casi tur hende na mundo por lesa por lo menos un parti di Bijbel na nan propio idioma.

¹⁰ Hesus a bisa: “Mi Tata ta traha te ainda, y ami tambe ta sigui traha.” (Juan 5:17) Jehova ta Dios “di eternidad te na eternidad.” Pues, imagina bo cuanto cos el a haci! (Sal. 90:2) Ta Bijbel so ta conta nos kico Dios a haci den pasado, kico e ta haciendo actualmente y kico lo e haci den futuro. Tambe e Scritura ta siña nos kico ta agrad’e, kico e no ta keda contento cu ne y con nos por hala cerca dje. (Sant. 4:8) Nos no mester permiti ningun actividad of preocupacion personal pone nos bandona Jehova.

11. Ki sabiduria inmenso y confiabel nos ta haya den Bijbel?

¹¹ E sabiduria inmenso y confiabel cu nos ta haya den Bijbel ta indica tambe cu e ta bin di un Fuente cu ta superior na hende. Apostel Pablo a puntra: “Ken a siña conoce e mente di Jehova pa e instru’e?” (1 Cor. 2:16) E versiculo ey ta basa riba loke profeta Isaias a puntra e hendenan di su tempo: “Ken a yega di sondia spiritu di SEÑOR, ken komo konsehero por siñ’É algu?” (Isa. 40:13, BPK) Naturalmente, ningun hende no por, pasobra ningun hende no sa mas cu Jehova. Pesey, ora nos aplica Bijbel su conseho tocante matrimonio, yiu, diberticion, amistad, diligencia, honestidad y moralidad, nos ta haya e mihor resultado posibel. Bijbel nunca ta duna nos mal conseho! Di otro banda, hende simplemente no tin suficiente sabiduria pa duna conseho cu semper ta resulta bon. (Jer. 10:23) Constantemente hende tin cu revisa y actualisa nan conseho, ya cu nan ta realisa cu loke nan a yega di conseha tabata robes. Bijbel ta bisa cu ‘e pensamentonan di hende ta banidad.’​—Sal. 94:11.

12. Con hende a purba di caba cu Bijbel a traves di siglonan?

¹² Un otro prueba cu ta e Dios berdadero ta Autor di Bijbel ta bin di loke historia ta conta nos di e esfuersonan cu hende a haci pa caba cu su mensahe. Na aña 168 prome cu e era cristian, Rey Antioco IV di Siria a purba di haya tur e bukinan inspira di e Ley pa laga kima nan. Na aña 303 di e era cristian, Emperador Diocleciano di Roma a decreta pa basha tur luga di reuni di e cristiannan abou y kima nan Bijbelnan. E destruccion aki a dura un dies aña. Di siglo 11 en adelante, papanan a haci tur loke nan tabata por pa para e traduccion di e Scritura na idioma di e pueblo comun, ya cu nan no tabata kier pa e hendenan siña tocante Bijbel. A pesar di tur e intentonan ey di Satanas y su compinchinan, Bijbel t’ey te awe. Jehova no a permiti ningun hende caba cu e regalo cu el a duna humanidad.

PRUEBA CU A CONVENCE HOPI HENDE

13. Menciona algun prueba cu Bijbel ta inspira di Dios.

¹³ Tin mas prueba cu Bijbel ta inspira di Dios: e no ta contradeci su mes, e ta cientificamente exacto, su profecianan a cumpli, su escritornan semper tabata honesto, e tin e poder pa cambia bida, su echonan historico ta veridico y e ta duna contesta satisfactorio riba e preguntanan menciona den paragraf 1. Laga nos considera kico a yuda algun hende mira cu Bijbel ta bin di Dios.

14-16. (a) Kico a convence un moslim, un hindu y un agnostico cu Bijbel ta bin di Dios? (b) Cua di e pruebanan cu ta indica cu Bijbel ta inspira di Dios abo gusta uza den sirbishi?

¹⁴ Anwar * a lanta como moslim den un  pais na Medio Oriente. Un dia, tempo cu e tabata biba na Norte America, Testigonan di Jehova a bati na su porta. Anwar a conta: “E tempo ey mi no tabata gusta religionnan cristian, ya cu nan a participa den e gueranan di Crusada y e Inkisicion. Pero como cu di naturaleza mi ta un hende curioso, mi a acepta un estudio di Bijbel.” Poco despues, Anwar a bay su pais bek y a perde contacto cu e Testigonan. Añanan despues, el a muda pa Europa, y eynan el a reanuda su estudio di Bijbel y a yega na e siguiente conclusion: “Mi a keda convenci cu Bijbel ta e Palabra di Dios ora mi a mira cu profecianan di Bijbel a cumpli, cu e Santo Scritura tin un tema basico for di cuminsamento te na final, cu Bijbel no ta contradeci su mes y cu sirbidornan di Jehova di berdad ta stima otro.” Anwar a batisa na 1998.

¹⁵ Asha tin 16 aña y ta bin di un famia hindu masha devoto. El a conta: “Mi tabata haci oracion solamente ora mi bay tempel of ora mi tin problema. Pero mi no tabata corda nunca riba Dios ora cos ta bay bon. Ma ora Testigonan di Jehova a bati na mi porta, mi bida a cambia 180 grado.” Asha a studia Bijbel y a siña conoce Dios. Awor Dios a bira su Amigo. Kico a convenc’e cu Bijbel ta inspira di Dios? El a splica: “Bijbel a contesta tur pregunta cu mi tabatin. El a yuda mi haya fe sin cu mi tabatin nodo di mira Dios, es decir, sin cu mi mester a bay un tempel pa buig dilanti di un imagen.”

¹⁶ Paula a lanta den un famia catolico, pero ora el a bira grandi, el a bira un agnostico, es decir, un hende cu no tabata sigur cu Dios ta existi. Anto algo a pasa. El a conta: “Mi a topa un amigo cu mi tabatin basta luna sin mira. Tabata e epoca di hippie. Ora mi a mira con el a cambia​—cu su cara feita, cabey nechi pela y cu un aspecto feliz​—mi a puntr’e: ‘Ta kico a pasa bo? Unda bo tabata?’ El a bisa mi cu e ta studia Bijbel cu Testigonan di Jehova, y el a cuminsa duna mi testimonio.” Ora Paula a mira con e berdad di e Scritura a cambia su amigo, el a mustra interes den e mensahe di Bijbel, y despues e tambe a acepta Bijbel como inspira di Dios.

“BO PALABRA TA UN LAMPI PA MI PIA”

17. Ki beneficio bo por saca si bo ta lesa e Palabra di Dios tur dia y medita riba dje?

¹⁷ Bijbel ta un regalo maraviyoso cu Jehova a duna nos pa medio di su spirito santo. Si bo les’e tur dia, lo bo haya mas amor pa Bijbel y pa su Autor. (Sal. 1:1, 2) Cada biaha cu bo ta bay lesa of studia Bijbel, haci oracion prome, y pidi Dios duna bo su spirito santo pa bo por compronde kico bo ta lesa. (Luc. 11:13) Bijbel tin e pensamentonan di Dios, pues segun cu bo ta medita riba loke e ta bisa, bo por siña pensa manera Dios ta pensa.

18. Dicon bo kier sigui siña for di Bijbel?

¹⁸ Mientras cu bo ta sigui haya mas conocemento exacto di e berdad, aplica loke bo ta siña. (Lesa Salmo 119:105.) Lesamento di Bijbel ta casi mescos cu ora bo ta wak den spiel. Si bo mira cu bo mester haci algun cambio, haci nan. (Sant. 1:23-25) E Palabra di Dios ta manera un spada. Uz’e pa defende bo creencianan y pa corta siñansanan falso cu tin den curason di hende manso kita afo. (Efe. 6:17) Segun cu bo ta haci esey, sea gradicido cu ‘spirito santo a guia’ e profetanan y otro hombernan cu Dios a uza pa skirbi e mensahe di Bijbel.

[Nota]

[Preguntanan di Estudio]

[Comentario na pagina 32]

Lesa Bijbel tur dia, y lo bo haya mas amor pa su Autor

[Plachi na pagina 29]

E firma ta indica ta di ken e carta ta