“Jehova sa con pa libra hende devoto na dje for di prueba.”​—2 PED. 2:9.

1. Con e situacion lo ta riba mundo durante e “tribulacion grandi”?

UN ORA pa otro, na un momento cu hende no ta spera, Jehova lo destrui e mundo di Satanas. (1 Tes. 5:2, 3) Durante “e gran dia di [Jehova]”, mundo lo ta aribabou. (Sof. 1:14-17) E tempo ey lo tin asina tanto angustia y sufrimento cu Bijbel ta papia di “un tribulacion grandi manera no a yega di sosode nunca, for di principio di mundo te awor.”​—Lesa Mateo 24:21 y 22.

2, 3. (a) Ki situacion e pueblo di Dios lo hay’e cu ne durante e “tribulacion grandi”? (b) Con nos conviccion cu Jehova por y lo salba su pueblo por bira mas fuerte?

² Na culminacion di e “tribulacion grandi”, “Gog di tera di Magog” lo ataca e pueblo di Dios. Si, “un ehercito poderoso” lo bini contra nan “manera un nubia cu ta tapa tera.” (Eze. 38:2, 14-16) Y ningun organisacion na mundo lo sali na defensa di Jehova su pueblo. Nan salbacion lo depende unicamente di Jehova. Awor, con nan lo reacciona ora nan enemigonan bini pa caba cu nan?

³ Bo ta un sirbidor di Jehova? Si ta asina, bo tin fe cu Jehova por y lo spaar bida di su sirbidornan durante e tribulacion grandi? Apostel Pedro a skirbi cu “Jehova sa con pa libra hende devoto na dje for di prueba, ma tambe con pa warda hende inhusto pa nan ser destrui riba e dia di huicio.” (2 Ped. 2:9) Ademas, ora nos medita riba relatonan cu ta mustra con Jehova a libra su pueblo den pasado, nos conviccion cu Jehova por y lo salba su pueblo lo bira mas fuerte. Pesey, laga nos analisa tres di e relatonan aki.

NOE A SOBREVIVI E DILUVIO

4. Kico mester a ser haci prome cu e Diluvio a tuma luga?

⁴ Laga nos cuminsa cu e relato di e Diluvio cu a tuma luga den tempo di Noe. E factor tempo tabata importante pasobra prome cu Jehova a manda e Diluvio, mester a construi un arca inmenso y hinca e bestianan aden. No obstante,  e relato di Genesis no ta bisa cu Jehova a warda te ora e arca tabata cla pa dicidi ki ora e ta manda e Diluvio. Jehova no mester a warda pa wak ki dia e arca lo a keda cla pa e por a stipula un fecha pa e Diluvio cuminsa. Al contrario, Dios a fiha e dia ey hopi tempo prome cu el a manda Noe construi un arca. Con nos por sa esey?

5. Segun Genesis 6:3, ki decreto Jehova a saca, y na ki tempo el a anuncia esaki?

⁵ Segun Genesis 6:3, Jehova a saca un decreto y a anuncia esaki den cielo, bisando: “Mi spirito lo no lucha cu hende pa semper, pasobra di berdad ta carni e ta; sinembargo, su dianan lo ta shentibinti aña.” Aki Jehova no tabata referi na e cantidad di aña cu hende en general lo a biba, ma na e lapso di tempo cu lo mester a pasa prome cu lo el a pone fin na tur maldad riba tera. * Y como cu e Diluvio a cuminsa na aña 2370 prome cu nos era, nos por conclui cu ta for di aña 2490 prome cu nos era Dios a anuncia su decreto. E tempo ey, Noe tabatin 480 aña. (Gen. 7:6) Un 20 aña despues, esta na aña 2470 prome cu nos era, su prome yiu a nace. (Gen. 5:32) E tempo ey, ainda tabata falta un 100 aña pa e Diluvio cuminsa. Anto ainda Jehova no a informa Noe di e trabou importante cu E tabatin p’e y con esaki lo a yuda salba humanidad. Ta cuanto tempo Jehova a warda prome cu el a informa Noe di e Diluvio?

6. Na ki tempo Jehova a duna Noe e mandato pa construi e arca?

⁶ Aparentemente, Jehova a laga decadanan pasa prome cu el a revela su decision na Noe. A base di kico nos ta saca e conclusion ey? Wel, Bijbel ta bisa cu ora Dios a duna Noe e mandato pa construi e arca, su yiunan tabata grandi y casa. Jehova a bisa Noe: “Lo mi establece mi alianza cu bo; y lo bo bay den e arca​—abo cu bo yiu hombernan y bo esposa, y esposanan di bo yiu hombernan hunto cu bo.” (Gen. 6:9-18) Pues aparentemente, ora Jehova a manda Noe traha e arca, tabata falta solamente 40 of 50 aña prome cu e Diluvio a cuminsa.

7. (a) Con Noe y su famia a demostra fe? (b) Ki dia finalmente Dios a bisa Noe e dia cu e Diluvio lo a cuminsa?

⁷ Segun cu Noe y su famia tabata construi e arca, nan lo mester a puntra nan mes con Dios lo a cumpli cu su proposito y na ki tempo e Diluvio lo a cuminsa. Pero maske nan no tabata sa e detayenan aki, nan no a stop di traha e arca. Bijbel ta bisa: ‘Noe a haci conforme tur loke Dios a orden’e. Asina Noe a haci.’ (Gen. 6:22) Finalmente, Jehova a bisa Noe cu e Diluvio lo a bini exactamente denter di shete dia. Noe y su famia tabatin net suficiente tempo pa hinca e bestianan den e arca. Pesey, ora e bentananan di cielo a habri “den e di seisshen aña di bida di Noe, den e di dos luna, riba e di diesshete dia di e luna”, tur cos tabata cla.​—Gen. 7:1-5, 11.

8. Con e relato di e Diluvio ta duna nos confianza cu Jehova sa ki ora pa libra su pueblo?

⁸ E relato di e Diluvio ta duna prueba cu Jehova sa ki ora ta e mihor momento pa libra, of salba, su pueblo y con ta e mihor manera pa haci esey. Segun cu Jehova ta conta e dianan cu falta pa e era aki yega na su fin, nos por tin sigur cu Jehova su proposito lo cumpli, anto riba e “dia y [na e] ora” exacto cu el a stipula.​—Mat. 24:36; lesa Habacuk 2:3.

JEHOVA A SALBA SU PUEBLO NA LAMA CORA

9, 10. Con Jehova a uza su pueblo pa laga e ehercito di Egipto cay den un trampa?

⁹ Manera nos a mira caba, ta Jehova ta determina ki ora cierto cosnan tin cu tuma luga pa su proposito cumpli. E di dos ehempel cu nos lo trata ta resalta un otro motibo pakico nos por tin confianza cu Jehova lo libra su pueblo: Jehova lo uza su poder sin limite pa salba su pueblo y haci sigur cu su boluntad lo cumpli. Maske Jehova tin poder pa libra su pueblo, tabatin ocasion cu el a uza su pueblo mes como as pa gara nan enemigonan den trampa.  Esey ta precies loke Jehova a haci ora el a libra e Israelitanan for di sclavitud na Egipto.

¹⁰ Mas o menos tres miyon Israelita a bandona Egipto. Jehova a laga Moises dirigi nan den un direccion cu a pone Farao pensa cu nan tabata perdi y cu nan a dual. (Lesa Exodo 14:1-4.) Farao no por a resisti e tentacion y a sali mesora cu su ehercito pa persigui e Israelitanan y changa nan na Lama Cora. A parce cu e Israelitanan tabata lomba contra muraya. (Exo. 14:5-10) Pero en realidad, nan no tabata den ningun peliger. Dicon no? Pasobra Jehova tabata cla pa yuda nan.

11, 12. (a) Con Jehova a interveni na fabor di su pueblo? (b) Kico tabata e resultado, y kico e relato aki ta siña nos tocante Jehova?

¹¹ “E pilar di nubia” cu tabata guia e Israelitanan a bay para nan tras y a pone cu e ehercito di Farao tabata den scuridad y no por a ataca nan. No obstante, e mesun pilar ey a produci claridad pa e Israelitanan, asta anochi. (Lesa Exodo 14:19 y 20.) Despues di esey, Jehova a habri e lama pa medio di un biento fuerte di pariba y “a haci e lama bira tera seco.” Esaki sin duda a tuma hopi tempo, pasobra e relato ta bisa cu ta henter anochi un biento fuerte a supla riba e lama y cu despues di esey, “e yiunan di Israel a pasa meymey di e lama riba tera seco.” Compara cu e garoshinan di guera di e ehercito di Farao, e Israelitanan tabata move pocopoco. Toch, e Egipcionan no por a alcansa nan, pasobra Jehova tabata bringa pa Israel. “El a trece confusion den e ehercito di e Egipcionan. Y el a haci nan wiel di garoshi slip, y el a haci cu nan tabata core cu dificultad.”​—Exo. 14:21-25.

¹² Unabes cu tur e Israelitanan a yega sano y salvo na e otro banda, Jehova a instrui Moises: “Extende bo man over di e lama, pa e awanan bini bek riba e Egipcionan, riba nan garoshinan y riba nan coredonan di cabay.” Ora e soldanan Egipcio tabata purba di huy pa e awanan, ‘Jehova a derota nan meymey di lama.’ No tabatin scapatorio. “Ni un di nan no a scapa.” (Exo. 14:26-28) Asina Jehova a demostra cu e tin poder pa libra su pueblo for di cualkier situacion.

ALGUN HENDE A SOBREVIVI E DESTRUCCION DI JERUSALEM

13. Ki instruccion Hesus a duna su siguidonan, y kico nan lo por a puntra nan mes?

¹³ Jehova sa precies con cosnan mester sosode pa su proposito cumpli. Nos lo mira esey den e di tres ehempel cu nos lo trata: e sitiamento di Jerusalem den prome siglo. Pa medio di su Yiu, Jehova a duna instruccion specifico con cristiannan cu tabata biba den Jerusalem y Judea por a sobrevivi e destruccion di Jerusalem cu lo a tuma luga na aña 70 di nos era. Hesus a bisa nan: “Ora boso mira e ‘cos repugnante’ cu ta causa destruccion, cu profeta Daniel a papia di dje, para den un luga santo, . . . laga esnan cu ta na Judea huy bay den sero.” (Mat. 24:15, 16) Pero con e siguidonan di Hesus por a ripara cu e profecia aki tabata cumpliendo?

14. Ki suceso a yuda e cristiannan compronde Hesus su instruccion?

¹⁴ Ta despues di hopi aña e cristiannan a bin compronde e instruccion di Hesus. Na aña 66 di nos era, e ehercito Romano, bou di mando di Cestio Galo, a yega Jerusalem pa stop un rebelion Hudiu. Anto debi cu e rebeldenan Hudiu, conoci como e Celotenan, a bay sconde den e tempel, e soldanan Romano a cuminsa zwak e murayanan di e tempel. E cristiannan  cu tabata alerta a compronde bon cla kico e sucesonan aki a nifica. Nan a compronde cu e ehercito pagano Romano cu a yega te na e muraya di e tempel cu su simbolonan di idolatria ta “e cos repugnante” para den “un luga santo.” Pues, tabata tempo pa Hesus su siguidonan “huy bay den sero.” Pero con nan por a sali for di un stad cu tabata rondona pa enemigo? Diripiente algo inespera a sosode.

15, 16. (a) Ki instruccion specifico Hesus a duna, y dicon tabata importante pa su siguidonan a obedece? (b) Di kico nos salbacion ta depende?

¹⁵ Pa motibonan desconoci, Cestio Galo y su ehercito a bati retirada, y e Celotenan a cuminsa persigui nan. E ora ey, Hesus su siguidonan a haya chens di huy, pasobra tanto e Romanonan como e rebeldenan Hudiu a bandona e stad. Y nan a corda cu Hesus a bisa nan specificamente pa bandona e stad mesora y laga nan pertenencianan atras. (Lesa Mateo 24:17 y 18.) Dicon tabata importante pa nan a huy di biaha? Wel, despues di un par di dia, e Celotenan a bini bek y a cuminsa obliga tur habitante di Jerusalem y Judea pa participa den e rebelion. Y debi cu diferente grupo Hudiu tabata bringa otro pa haya control den Jerusalem, e situacion a bira pio. Cada bes, tabata mas dificil pa huy for di e stad. Ora e Romanonan a bini bek na aña 70 di nos era, niun hende no por a huy mas for di Jerusalem. (Luc. 19:43) Esnan cu no a huy a keda atrapa den e stad. Pero e cristiannan cu a haci caso di Hesus su instruccion pa huy bay den sero si a salba. Sin duda, nan a experencia cu Jehova sa con pa libra su pueblo. Ki les nos por siña for di e relato aki?

¹⁶ Wel, cu durante e tribulacion grandi, cristiannan mester obedece instruccion di e Palabra di Dios y sigui guia di su organisacion. Tuma por ehempel Hesus su mandato pa “huy bay den sero.” Durante e tribulacion grandi, nos tambe lo haya instruccion pa huy. Pero nos no sa ainda kico e huymento ey lo encera. * Ma esaki si nos por ta sigur di dje: Na e debido tempo, Jehova lo laga nos compronde su instruccionnan. Anto como cu nos salbacion ta depende di nos obediencia, ta bon pa nos puntra nos mes: ‘Con mi ta reacciona riba e instruccionnan cu Jehova ta duna su pueblo awe? Mi ta obedece di biaha, of mi ta vacila pa obedece?’​—Sant. 3:17.

FORTALECE BO MES PA ENFRENTA FUTURO

17. Kico e profecia di Habacuk ta revela tocante e binidero atake di Gog contra e pueblo di Dios?

¹⁷ Awor, laga nos papia un poco mas tocante e atake di Gog cu nos a menciona na principio. Habacuk tambe a profetisa di e atake aki. El a bisa: “Ora mi tende tur esaki, mi barika ta kohe kramp; mi tende e bochincha, mi boka ta tembla, mi wesunan ta pèrdè tur forsa, mi ta tembla manera bara bèrdè. Tòg mi ta warda ku pasenshi riba e dia ku lo trese destrukshon pa e pueblo di nos agresornan.” (Hab. 3:16, BPK) Ora profeta Habacuk a haya sa di e atake aki cu lo a bay tuma luga, su bariga a coy cram, of manera e idioma original ta bisa, su stoma a cuminsa bira, su lipnan tabata tembla y su curpa a perde forsa. Pero e tabata dispuesto pa spera riba e gran dia di Jehova. E manera cu Habacuk a reacciona ta indica cu nos tambe lo por haya miedo ora Gog y su compinchinan bini pa ataca nos. Pero mescos cu Habacuk, nos por tin confianza cu Jehova lo libra su pueblo.​—Hab. 3:18, 19.

18. (a) Dicon nos no mester tin miedo di e binidero atake di Gog? (b) Kico nos lo trata den e siguiente articulo?

¹⁸ E tres ehempelnan cu nos a caba di trata sin duda ta duna prueba cu Jehova sa con pa libra su pueblo. Su proposito lo cumpli sigur y lo e derota su enemigonan sin faya. Pero, si nos kier celebra e victoria grandi aki di Jehova, nos mester keda fiel te na fin. Awor, con Jehova ta yuda nos mantene nos integridad for di awor? E siguiente articulo lo contesta e pregunta aki.

[Nota]

[Preguntanan di Estudio]