Laga Nos Alegra den Nos Speransa
“[Nos tin] e speransa di bida eterno cu Dios, kende no por gaña, a priminti hopi tempo pasa.”—TITO 1:2.
1. Con e speransa cu Jehova ta duna nos por yuda nos persevera?
JEHOVA ta “e Dios cu ta duna speransa.” Despues di a expresa e palabranan ey, apostel Pablo a bisa cu Jehova por ‘yena nos cu pleno goso y paz pa medio di nos confianza den dje, pa asina nos por abunda den speransa cu poder di spirito santo.’ (Rom. 15:13) Si nos ta abunda den speransa, nos lo por soporta cualkier situacion cu presenta, sin perde nos goso y paz. Pues, sea cu nos ta cristian ungi of di e otro carnenan, si nos ta abunda den speransa, esey lo ta ‘un anker sigur y firme pa nos alma.’ (Heb. 6:18, 19) Si, ora nos ta pasa den momentonan dificil, nos mester tene duro na nos speransa, pasobra esaki lo yuda nos pa nos no cuminsa duda y drif bay for di e fe.—Lesa Hebreonan 2:1; 6:11.
2. Cua dos speransa cristiannan tin awe, y dicon e ‘otro carnenan’ ta interesa den e unginan?
2 Tur cristian cu ta biba den e tempo di fin aki tin un speransa. Esnan ungi, esta e resto di e “tou chikito”, cu ta riba tera tin e speransa di ricibi bida inmortal den cielo; nan lo sirbi como rey y sacerdote hunto cu Cristo den e Reino di Dios. (Luc. 12:32; Rev. 5:9, 10) E ‘otro carnenan’, cu ta un cantidad mucho mas grandi, tin e speransa di biba pa semper den Paradijs riba tera; nan lo ta subditonan di e Reino Mesianico. (Rev. 7:9, 10; Juan 10:16) No obstante, e otro carnenan no mester lubida nunca cu nan salbacion ta depende di e manera cu nan ta apoya Cristo su “rumannan” ungi cu ainda ta riba tera. (Mat. 25:34-40) Na e debido tempo, e unginan lo haya nan recompensa, y e speransa cu e otro carnenan tin tambe lo bira realidad. (Lesa Hebreonan 11:39 y 40.) Pero awor, laga nos analisa prome e speransa cu e unginan tin.
E “SPERANSA BIBO” DI CRISTIANNAN UNGI
3, 4. Con cristiannan ungi ta “nace di nobo pa un speransa bibo”, y kico e speransa ey ta encera?
3 Apostel Pedro a dirigi dos carta na e cristiannan ungi, kendenan el a yama “esnan scogi.” (1 Ped. 1:1) Den e cartanan aki, el a duna detaye di e speransa maraviyoso cu e tou chikito aki tin. Den su prome carta, el a skirbi: “Alaba sea e Dios y Tata di nos Señor Hesucristo, pasobra di acuerdo cu su gran misericordia, el a laga nos nace di nobo pa un speransa bibo pa medio di e resureccion di Hesucristo for di morto, pa un herencia cu no por caba na nada, cu ta sin mancha y cu no ta marchita. Esey ta reserva pa boso den cielo, boso cu Dios ta proteha pa medio di su poder pasobra boso tin fe. Dios ta proteha boso pa un salbacion cu ta cla pa keda revela den tempo di fin. Debi na esaki boso ta alegra masha.”—1 Ped. 1:3-6.
4 Jehova a scoge un cantidad limita di cristian pa sirbi hunto cu Cristo den e Reino selestial. E cristiannan aki ta “nace di nobo” ya cu nan ta ser engendra pa spirito santo; asina nan ta bira yiunan di Dios. Ademas, nan ta ser ungi cu spirito santo pa bira rey y sacerdote hunto cu Cristo. (Rev. 20:6) Pedro a bisa cu e ‘nacemento di nobo’ aki ta duna nan “un speransa bibo”, loke el a describi como “un herencia cu no ta caba na nada, cu ta sin mancha y cu no ta marchita.” Anto el a bisa cu e herencia aki ‘ta reserva pa nan den cielo.’ Pesey, no ta nada straño cu e unginan ta “alegra masha” den nan speransa bibo. Pero ta solamente si nan keda fiel, nan speransa lo bira realidad.
5, 6. Dicon cristiannan ungi mester haci tur nan esfuerso pa nan por ta sigur di nan yamamento?
5 Den su di dos carta, Pedro a urgi cristiannan ungi pa nan ‘haci tur nan esfuerso pa nan por ta sigur di nan yamamento y scogemento.’ (2 Ped. 1:10) Nan mester traha duro pa cultiva cualidadnan cristian, manera fe, devocion na Dios, cariño pa rumannan y amor. Pedro a bisa nan: “Si boso tin e cualidadnan aki na abundancia, boso lo no sinta pornada ni keda sin duna fruta.”—Lesa 2 Pedro 1:5-8.
6 Cristo a bisa e ancianonan ungi di e congregacion di Filadelfia na Asia Menor: ‘Como cu boso a sigui e ehempel di mi perseverancia, ami tambe lo proteha boso durante e ora di prueba cu lo bini riba henter e tera pa pone esnan cu ta biba riba dje na prueba. Mi ta bini pronto. Sigui tene duro na loke boso tin, pa ningun hende no kita boso corona.’ (Rev. 3:10, 11) Bijbel ta priminti cu esnan scogi cu keda fiel te na morto lo ricibi “e corona di gloria cu no ta marchita.” Pues, si un cristian ungi bira infiel, lo e no ricibi e corona ey.—1 Ped. 5:4; Rev. 2:10.
UN GLORIOSO ENTRADA DEN E REINO
7. Ki speransa maraviyoso Judas a menciona den su carta?
7 Alrededor di aña 65 di nos era, Judas, mitar ruman di Hesus, tambe a skirbi e cristiannan ungi un carta. Den e carta ey, el a referi na su compañeronan ungi como “esnan yama.” (Judas 1; compara cu Hebreonan 3:1.) Judas su intencion tabata pa skirbi nan tocante e glorioso speransa di salbacion cu cristiannan ungi “tin en comun.” (Judas 3) Pero debi cu tabatin otro asuntonan urgente cu e mester a skirbi nan di dje, e no a haci esey. Ma na final di su carta cortico, el a haci mencion di e speransa maraviyoso cu cristiannan ungi tin. El a skirbi: “Awor bon, Dios por proteha boso pa boso no trompica, y e por pone boso para sin mancha, cu gran goso, dilanti di su gloria. Na e unico Dios ey, nos Salbador pa medio di nos Señor Hesucristo, sea gloria, mahestad, poder y autoridad pa tur e eternidad cu a pasa, pa awor y te den tur eternidad.”—Judas 24, 25.
8. Con Judas 24 ta indica cu tin goso den cielo ora un ruman ungi muri fiel na Jehova?
8 Sin duda, tur fiel cristian ungi kier pa Dios proteha nan pa nan “no trompica”, esta bira infiel, y ser destrui. Nan tin e speransa cu Hesucristo lo lanta nan for di morto como criaturanan selestial perfecto pa asina nan por presenta dilanti di Dios. Si, ora un cristian ungi muri fiel na Jehova, lo e ser ‘lanta den gloria y cu un curpa spiritual, cu lo no caba na nada.’ (1 Cor. 15:42-44) Bijbel ta bisa cu ‘ora un pecador arepenti tin goso den cielo.’ Awor, bo por imagina bo cuanto goso lo tin den cielo ora un di Cristo su rumannan ungi cu spirito santo a keda fiel te na morto? (Luc. 15:7) Si, tanto Jehova como e criaturanan selestial lo alegra hunto cu e persona ungi cu lo ricibi su recompensa cu “gran goso.”—Lesa 1 Juan 3:2.
9. (a) Segun Pedro, ki recompensa e cristiannan ungi por ta sigur di dje si nan keda fiel te na morto? (b) Ki efecto e speransa aki tin riba e unginan cu ainda ta riba tera?
9 Pedro tambe a skirbi e cristiannan ungi cu nan por ta sigur di nan yamamento si nan keda fiel te na morto. El a bisa nan: “Boso lo ricibi un entrada glorioso den e Reino eterno di nos Señor y Salbador Hesucristo.” (2 Ped. 1:10, 11) Si, nan entrada den e Reino selestial lo ta “glorioso.” Podise Pedro tabata kiermen tambe cu nan lo ricibi hopi bendicion den cielo. Ora e rumannan ungi corda riba nan bida riba tera, nan lo keda contento cu nan a keda fiel te na morto. No tin duda, e speransa aki ta duna e cristiannan ungi cu ainda ta riba tera forsa pa sigui ‘faha nan mente pa actividad.’—1 Ped. 1:13.
E SPERANSA DI E OTRO CARNENAN
10, 11. (a) Ki speransa e otro carnenan tin? (b) Ki relacion tin entre e speransa pa biba riba tera y Cristo y e ‘revelacion di e yiunan di Dios’?
10 Apostel Pablo a skirbi e ‘yiunan di Dios’, esta e cristiannan ungi cu spirito santo, tocante nan speransa glorioso como “heredero” hunto cu Cristo. Despues, el a haci mencion di e maraviyoso speransa cu Jehova ta ofrece e otro carnenan, cu ta un cantidad ilimita. Pablo a bisa: “Creacion [esta hende] ta spera cu gran expectativa riba revelacion di e gloria di e yiunan di Dios [esta e unginan]. Pasobra creacion a keda someti na un bida di banidad, no di su mes boluntad, sino pa boluntad di Dios cu a somet’e a base di e speransa aki: creacion mes tambe lo ser libra di sclavitud na un curpa cu ta caba na nada y lo tin e glorioso libertad di e yiunan di Dios.”—Rom. 8:14-21.
11 Jehova a duna humanidad speransa ora el a priminti cu, pa medio di e “simia” priminti, lo e libra nan for di gara di “e colebra original”, cu ta Satanas e Diabel. (Rev. 12:9; Gen. 3:15) Hesucristo ta e parti principal di e “simia.” (Gal. 3:16) Hesus, pa medio di su morto y resureccion, a haci posibel cu humanidad por tin e speransa di ser libra di sclavitud na pica y morto. E speransa aki tin di haber cu e ‘revelacion di e yiunan di Dios.’ Con asina? Wel, como e parti secundario di e “simia”, e unginan ta ser ‘revela’ ora nan yuda Cristo destrui Satanas su mundo malbado. (Rev. 2:26, 27) Anto esey lo nifica salbacion pa e otro carnenan cu ta sali for di e tribulacion grandi.—Rev. 7:9, 10, 14.
12. Ki bendicion glorioso e revelacion di cristiannan ungi lo trece pa humanidad?
12 Cristo su Reinado di Mil Aña lo trece berdadero alivio pa e “creacion”, esta humanidad. Durante e periodo ey, “e yiunan di Dios” lo ser ‘revela’ na un otro manera. Hunto cu Cristo, nan lo sirbi como sacerdote y yuda humanidad ricibi e bendicionnan di Cristo su sacrificio di rescate. Bou di e gobernacion di e Reino di Dios, hende obediente gradualmente “lo ser libra di sclavitud na un curpa cu ta caba na nada.” Si, nan lo ser libra di e efectonan di pica y morto. Anto si nan keda fiel na Jehova durante e Milenio y durante e ultimo prueba cu ta bini na final di esaki, nan nomber lo ser skirbi permanentemente den “e buki di bida.” Nan lo haya “e glorioso libertad di e yiunan di Dios.” (Rev. 20:7, 8, 11, 12) Ki un speransa maraviyoso!
LAGA NOS TENE NOS SPERANSA BIBO
13. Di kico nos speransa ta depende, y na ki tempo Cristo lo keda revela?
13 E dos cartanan cu Pedro a skirbi ta contene hopi informacion valioso cu por yuda tanto e cristiannan ungi como e otro carnenan tene nan respectivo speransa bibo. Pedro a indica cu nan speransa no ta depende di nan obranan, sino di Jehova su bondad inmereci. El a skirbi: “Mantene boso sano huicio completamente; pone boso speransa den e bondad inmereci cu lo ser mustra na boso na e revelacion di Hesucristo.” (1 Ped. 1:13) Cristo lo keda revela ora e bini pa recompensa su fiel siguidonan y pa destrui e malbadonan.—Lesa 2 Tesalonicensenan 1:6-10.
14, 15. (a) Con nos por tene nos speransa bibo? (b) Kico Pedro a conseha nos?
14 Pa tene nos speransa bibo, nos mester keda corda cu e “dia di Jehova” ta bini pronto. Y nos bida mester demostra cu nos ta consciente di esaki. Si, Jehova lo destrui “cielo”, esta gobernacion humano, y tambe “tera”, esta hende malbado, y su “elementonan.” Pedro a skirbi: “Ki sorto di hende boso mester ta . . . segun cu boso ta spera y corda semper riba e binida di e dia di Jehova! Durante e dia ey vlam di candela lo destrui cielo, y e elementonan lo dirti di e cayente intenso.”—2 Ped. 3:10-12.
15 E “cielo” y “tera” actual lo ser reemplasa respectivamente pa un “cielo nobo [Cristo su gobernacion] y un tera nobo [un sociedad nobo riba tera].” (2 Ped. 3:13) Y Pedro a bisa nos bon cla kico nos mester haci segun cu nos ta “spera” e cielo nobo y e tera nobo ey; cu otro palabra, con nos por tene nos speransa bibo. El a bisa: “Pesey, mi rumannan stima, como cu boso ta spera riba e cosnan aki, haci tur boso esfuerso pa Dios haya boso finalmente sin mancha, sin defecto y na paz.”—2 Ped. 3:14.
LAGA NOS BIBA NA HARMONIA CU NOS SPERANSA
16, 17. (a) Kico un “conducta santo” ta encera, y kico ta e “obranan cu ta demostra devocion na Dios”? (b) Con nos speransa lo ser realisa?
16 Si, no solamente nos mester tene nos speransa bibo, ma nos tin cu biba tambe na harmonia cu ne. Manera Pedro a conseha, nos mester haci esfuerso pa nos ta e sorto di persona cu tin Jehova su aprobacion. Pues, na prome luga nos mester tin un “conducta santo.” Esaki ta encera: “mantene un conducta excelente meymey di hende di e nacionnan”, haciendo loke ta corecto den bista di Dios. (2 Ped. 3:11; 1 Ped. 2:12) Di dos, nos mester “stima” nos rumannan. Esey ta encera cu nos mester haci nos maximo esfuerso pa mantene union den nos hermandad mundial, cuminsando den nos mes congregacion. (Juan 13:35) Di tres, nos mester tin “obranan cu ta demostra devocion na Dios.” Esakinan ta encera cosnan cu ta fortalece nos relacion cu Jehova, manera por ehempel oracion, lesamento diario di Bijbel, estudio personal profundo, adoracion como famia y participacion activo den e trabou di predica e ‘bon noticia di Reino.’—Mat. 24:14.
17 Nos tur kier ta e sorto di persona cu Jehova ta aproba y cu lo e salba ora e “destrui” e mundo malbado aki. E ora ey, nos speransa lo bira realidad, esta, “e speransa di bida eterno cu Dios, kende no por gaña, a priminti hopi tempo pasa.”—Tito 1:2.
[Preguntanan di Estudio]
[Plachi na pagina 22]
Cristiannan ungi ta “nace di nobo pa un speransa bibo”
[Plachi na pagina 24]
Tene boso speransa bibo como famia
