Hende cu ta sensitivo pa holo fuerte ta den un situacion dificil. Hopi biaha, durante nan actividadnan diario, nan no por evita di ta den contacto cu hende cu ta uza perfume. Pesey algun di nan a puntra si ta posibel pa pidi e rumannan pa no uza perfume of aftershave na reunion, asamblea y congreso.

Naturalmente, ningun cristian conscientemente lo kier haci algo cu ta stroba un ruman di asisti na reunion. Nos tur tin mester di e animacion cu nos ta haya na e reunionnan. (Heb. 10:24, 25) Pesey, si tin un ruman cu no por ta na reunion pasobra holo di perfume ta pone sinti malo, e por papia di e asunto cu e ancianonan. Aunke lo no ta apropia ni biblico pa bin cu regla tocante uzo di perfume, e ancianonan kisas por yuda e congregacion compronde ki problemanan algun ruman ta haya nan cu ne. Dependiendo di e circunstancia, e ancianonan por dicidi di duna un discurso den un parti di necesidad local durante e Reunion di Sirbishi, basa riba informacion cu a keda publica anteriormente, of nan por haci un anuncio discreto tocante e asunto. * Pero, e ancianonan no mester keda haci e tipo di anuncionan aki constantemente. Corda cu na nos reunionnan tur ora tin hende nobo y bishitante cu no ta na altura di e situacion, y nos kier pa e personanan aki sinti nan bonbini. Nos no mester laga niun hende sinti nan incomodo pasobra nan a uza un tiki perfume.

Si circunstancianan local ta permiti, e cuerpo di anciano por aparta un espacio den Salon di Reino pa e rumannan cu no por cu perfume. Por ehempel, kisas tin un otro sala cu ta ekipa cu sistema di zonido caminda nan por sinta pa asina beneficia di e reunion. Si e ancianonan a haci nan best pa resolve e asunto pero toch ainda tin ruman ta bira hopi malo di e holo di perfume, e congregacion por graba e reunionnan pa e personanan aki of laga nan sigui e reunion via telefon, manera ta haci den caso di rumannan cu ta malo y cu no por sali for di cas.

Durante ultimo añanan, Nos Ministerio di Reino a anima nos pa limita uzo di perfume y colonia fuerte ora nos ta asisti na congresonan regional. E rumannan ta urgi nos pa sigui e instruccion aki ya cu mayoria di congreso ta den luganan cera cu ta depende di sistema di ventilacion. Ademas, generalmente no ta posibel pa percura un area aparta na e sitionan ey pa rumannan cu ta alergico pa holo fuerte. Pero, no tabata e intencion pa e instruccionnan aki bira un regla general pa reunionnan di congregacion, y niun hende no mester aplica nan asina tampoco.

Tanten cu nos ta biba den e mundo aki, nos tur ta sufri e consecuencianan di imperfeccion. Pesey nos ta aprecia e esfuerso cu otronan ta haci pa alivia nos sufrimento. Kisas pa nos ta un sacrificio pa no uza perfume of aftershave. Pero amor lo motiva nos pa haci esey, ya asina ta mas facil pa un ruman cu ta alergico pa holo fuerte por asisti na reunion.

Lesadornan di Bijbel conoce Poncio Pilato pa su papel den e huicio y ehecucion di Hesus. (Mat. 27:1, 2, 24-26) Pero, e nomber di e gobernador Romano aki ta aparece tambe den otro registronan historico di e epoca ey. Segun The Anchor Bible Dictionary, e coleccion di referencia historico cu ta papia tocante Poncio Pilato ta “mas grandi y mas detaya cu di cualkier otro gobernador Romano di Judea.”

E nomber di Pilato ta aparece mas tanto den e obranan skirbi di e historiador Hudiu Josefo, kende a menciona tres incidente specifico relaciona cu Pilato, tempo cu e tabata goberna Judea. Un otro historiador Hudiu cu yama Filo tambe a menciona un di cuater incidente. E escritor Romano Tacito, cu a registra e historia di e emperadornan Romano, a confirma cu Poncio Pilato a duna ordo pa mata Hesus durante e reinado di Tiberio.

Na 1961, arkeologonan cu tabata traha den un antiguo theater Romano na Cesarea (Israel) a haya un pida piedra riba cua por a lesa claramente e nomber di Pilato na Latin. E inscripcion (wak e potret) no ta completo, pero ta parce cu originalmente e tabata bisa: “Poncio Pilato, Prefecto di Judea, a dedica e Tiberieum [aki] na e honorabel diosnan.” “Tiberieum” probablemente tabata un tempel cu nan a traha na honor di e Emperador Romano Tiberio.

Un articulo di “Pregunta di Lector”, publica den E Toren di Vigilancia di 15 di juli 2002, a splica cu un ruman muher mester tapa su cabes ora e ta dirigi un estudio di Bijbel den presencia di un publicador masculino, sea cu e publicador ta batisa of no. Despues di un analisis mas profundo di e asunto aki ta parce apropia pa ahusta e instruccion aki.

Un ruman muher mester tapa cabes ora cu e ta dirigi un estudio di Bijbel estableci caba den presencia di un ruman homber batisa. Dicon? Wel, asina e ta mustra respet pa Jehova su principio di autoridad den e congregacion cristian; cu otro palabra, e ruman muher ta efectuando un tarea cu normalmente un ruman homber batisa mester haci. (1 Cor. 11:5, 6, 10) Claro cu un otro opcion ta pa e ruman muher pidi e ruman homber pa dirigi e estudio, si e ta capacita pa haci esaki.

Di otro banda, si un ruman muher ta bay un estudio di Bijbel estableci caba cu un publicador masculino no batisa cu no ta su casa, no tin niun norma biblico cu ta indica cu e ruman muher mester tapa cabes. Pero kisas tin ruman muher cu a base di nan consenshi ta dicidi di tapa nan cabes toch na ocasionnan asina.