UN GRUPO di hoben testigo di Jehova ta dicidi di bay wak un pelicula. Hopi di nan compañeronan di scol tabata papia di e pelicula aki y a bisa cu e ta hopi bon. Pero ora nos rumannan ta yega na e cinema y ta tira un bista riba e posternan cu ta promove e pelicula, nan ta mira armanan poderoso y muhernan na un manera indecente bisti. Awor, kico nan lo haci? Nan lo drenta pa wak e pelicula toch?

E situacion ey ta mustra cu diariamente nos tin cu tuma decisionnan cu por sea mehora of daña nos relacion cu Jehova. Tin biaha bo ta pensa di haci algo, pero ora bo reevalua e situacion, bo ta cambia di idea. Esey ta nifica cu bo ta un persona indeciso of bo ta haciendo loke ta corecto?

Nos amor pa Jehova a motiva nos pa dedica nos bida na dje y batisa. Nos a priminti di keda fiel na dje y nos kier cumpli cu e promesa ey. Sinembargo, nos enemigo Satanas e Diabel ta dicidido pa kibra nos integridad. (Rev. 12:17) Pero nos a tuma e decision pa sirbi Jehova y cumpli cu su mandamentonan. Lo ta masha tristo si nos cambia di opinion den e asunto aki pasobra esey por costa nos nos bida.

Mas cu 26 siglo pasa, Nabucodonosor, Rey di Babilonia a traha un imagen grandi di oro y a duna ordo pa tur hende buig y adora e imagen aki. Ken cu a nenga di haci esey, lo a ser tira den forno di candela. Tabatin tres hoben adorador di Jehova, Sadrak, Mesak y Abed-nego, cu no kier a desagrada nan Dios. Pesey, nan no a obedece e Rey, y el a laga tira nan den e forno cayente. Jehova a haci un milager y a scapa nan bida. Si, e hobennan ey tabata dispuesto pa perde nan bida y no cambia nan decision di keda leal na Dios.—Dan. 3:1-27.

 Mas despues, profeta Daniel tampoco no a cambia su decision di haci oracion maske e tabata sa cu, haciendo esey, e por a ser tira den cueba di leon. Si, el a sigui cu su custumber di haci oracion tres biaha pa dia na Jehova. E no a cambia e decision cu el a tuma pa adora e Dios berdadero. Y como resultado, Jehova a libr’e “for di e poder di e leonnan.”—Dan. 6:1-27.

Jehova su sirbidornan di awe tambe ta cumpli cu e promesa cu nan a haci ora nan a dedica nan mes na dje. Na un scol na Africa, un grupo di hoben testigo di Jehova a nenga di participa na un ceremonia pa rindi adoracion na un simbolo nacional. Y e maestronan a menasa di kita nan for di scol si nan no haci manera e otro muchanan. Poco tempo despues, e minister di educacion a bishita e pueblo y a papia cu algun di e hobennan Testigo ey. Na un manera respetuoso, y sin miedo, e hobennan a splic’e nan punto di bista. For di e dia ey, e problema no a presenta mas. Awor, nos hobennan Testigo por bay scol sin haya nan cu e presion pa desobedece Jehova.

Un otro ehempel ta esun di Joseph, kende a perde su esposa diripiente debi na cancer. Joseph su famia a respeta su punto di bista relaciona cu entiero di su esposa. Pero e famianan di su esposa, kendenan no ta testigo di Jehova, si tabata kier inclui nan ritonan cu ta desagrada Dios. Joseph a bisa: ‘Como cu mi tabata determina pa mantene mi punto di bista, nan a purba di influencia mi yiunan; pero nan tur a para firme. Ademas, nan tabata kier a tene un velorio na mi cas segun e custumber local. Pero mi a laga nan compronde bon cla cu esey no por tuma luga na mi cas. Nan tabata sa cu nan tradicion no ta na harmonia cu mi creencianan ni cu esun di mi esposa difunto. Despues di hopi discusion, nan a organis’e na un otro caminda.

Durante e temporada di tristeza aki, mi a suplica Jehova pa e yuda nos famia pa nos no desobedece su leynan. El a tende mi oracionnan y a yuda nos keda firme a pesar di tur presion.’ Joseph y su yiunan no a pensa na ningun momento pa cambia di opinion y desobedece Jehova.

Poco tempo despues di Pasco Hudiu di aña 32 di prome siglo, un señora di Fenicia a acerca Hesus den e area di Sidon. Bes tras bes, el a pidi Hesus pa saca demoño for di su yiu muher. Na prome instante, Hesus no a contest’e nada. El a bisa su discipelnan: “Ta na e carnenan perdi di e cas di Israel so Dios a manda mi.” Ora cu e señora a sigui insisti, Hesus a bis’e: “No ta bon pa coy pan di e yiunan y tir’e pa cacho chikito.” Demostrando su gran fe, e señora a contesta: “Berdad, Señor, ma en realidad e cacho chikitonan tambe ta come [garnachi] cu ta cay for di mesa di nan doño.” Despues di esey, Hesus a cumpli cu e señora su peticion y a cura su yiu muher.—Mat. 15:21-28.

Hesus a imita Jehova kende ta dispuesto pa haci cambio ora ta necesario. Por ehempel, ora cu e Israelitanan a desobedece Jehova y a adora un bishe di oro, Jehova a dicidi cu nan a merece morto. Pero Moises a roga Jehova pa no mata nan, y Jehova tabata dispuesto pa cambia Su decision.—Exo. 32:7-14.

Apostel Pablo a sigui ehempel di Jehova y Hesus. Pa algun tempo, Pablo tabata di opinion cu no ta apropia pa laga Juan Marco bay cu ne y cu Barnabas riba nan biahenan di misionero pasobra el a bandona nan durante nan prome biahe. Sinembargo mas despues, Pablo a reconoce cu Marco a madura y cu lo e tabata di gran yudansa p’e. Pesey, Pablo a bisa Timoteo: “Trece Marco ora bo ta bin, pasobra e ta util pa mi den sirbishi.”—2 Tim. 4:11.

Awor, kico nos por siña for di loke nos a caba di analisa? Aunke Jehova ta perfecto, e  ta cla pa cambia di idea pasobra e ta misericordioso, e tin pasenshi y ta stima nos. Como cu nos si no ta perfecto y tin biaha ta mira cosnan na un manera incorecto, nos tin mucho mas motibo ainda pa, de bes en cuando, cambia di idea of di opinion. Por ehempel, tin biaha nos ta cambia nos opinion tocante un persona ora nos haya mas informacion tocante su situacion.

Tin biaha, nos tin cu cambia nos manera di pensa relaciona cu metanan teocratico. Kisas nos tin hopi tempo ta studia Bijbel y ta asisti na e reunionnan, pero nos ta pospone nos bautismo. Of kisas nos situacion ta permiti nos sirbi como pionero pero nos tin miedo di cuminsa. Ademas, tin ruman homber cu no kier haci esfuerso pa nan por cualifica pa sirbi como sirbidor ministerial of anciano den congregacion. (1 Tim. 3:1) Bo por identifica bo mes cu un di e situacionnan aki? Si ta asina, pakico no cambia bo manera di pensa? Jehova ta stima bo. Pesey, e ta anima bo pa acepta privilegionan asina cu lo haci bo feliz sirbiendo Dios y bo prohimo.

Ella, un ruman muher cu ta traha na un sucursal di testigonan di Jehova na Africa, a bisa: “Ora mi a yega Betel pa prome biaha, mi no tabata sa si lo mi a keda pa hopi tempo. Mi tabata kier sirbi Jehova cu henter mi alma, pero mi tabata hopi pega na mi famia. Na prome instante, mi tabata sinti nan falta masha hopi mes! Pero mi compañera di camber a anima mi y mi a dicidi di keda. Despues di dies aña na Betel, mi ta sinti cu mi kier sigui sirbi mi rumannan mas tanto posibel, cumpliendo cu mi asignacion na Betel.”

Bo ta corda kico a pasa cu Cain ora el a bira jaloers riba su ruman homber y “a rabia masha pisa”? Dios a mira cu Cain tabata bay haci algo robes y a spiert’e pa e controla su rabia. Dios a bis’e cu pica “ta loer na porta.” Pero en bes di cambia su actitud y su manera di pensa, Cain a ignora Dios su conseho. Lamentablemente, Cain a mata su ruman homber y a bira e prome asesino!—Gen. 4:2-8.

Pensa tambe riba e ehempel di Rey Uzias. Na principio, e tabata obedecido y tabatin un bon relacion cu Jehova. Pero lamentablemente, el a bira orguyoso. El a bay den e tempel pa ofrece sencia aunke e no tabata sacerdote. Ora cu e sacerdotenan a spiert’e pa no comete e acto imprudente aki, e no a cambia di idea. Mas bien, Uzias ‘a rabia masha’ hopi y a ignora nan. Kico a pasa cu ne? Jehova a castig’e cu lepra.—2 Cro. 26:3-5, 16-20.

Si, tin biaha no tin awa pa laba, nos mester cambia di idea. Ata aki, un ehempel di nos tempo. Joachim a batisa na 1955, pero na 1978 el a ser expulsa. Despues di 20 aña, el a arepenti y a ser restaura como testigo di Jehova. Recientemente, un anciano a puntr’e dicon el a warda asina tanto tempo pa e por ser restaura. El a contesta: “Mi tabata rabia y orguyoso. Ta duel mi cu mi a warda asina hopi. Tempo cu mi tabata expulsa, mi tabata sa cu testigonan di Jehova ta siña e berdad.” Si, Joachim mester a cambia su actitud y arepenti.

Nos tambe por haya nos den un situacion den cua nos tin cu cambia di idea y tambe nos manera di haci cosnan. Ora nos ta dispuesto pa haci esey, Jehova ta keda contento cu nos.—Sal. 34:8.