1, 2. (a) Ora carne ta bon cuida, kico ta e resultado? (b) Dicon hopi hende den tempo di Hesus tabata manera carne sin wardador?

 PA UN tou di carne ta bon cuida, e carnenan mester tin un wardador cu ta interesa den nan bienestar. Un buki cu ta siña con pa cria carne ta bisa cu si un wardador di carne ta djis hiba su carnenan cunucu pa come y laga nan pa nan cuenta, sin atende nan otro necesidadnan, denter di un par di aña e carnenan ta bira zwak y haya tur sorto di maleza. Pero si un wardador ta duna bon cuido na cada carne, henter e tou lo ta fuerte y saludabel.

² Esaki ta conta tambe pa e congregacion. E cuido y atencion cu e wardadornan cristian ta duna cada carne lo beneficia e condicion spiritual di henter e congregacion. Kisas bo ta corda cu Hesus a sinti duele di un multitud pasobra “nan tabata soya y descuida, manera carne sin wardador.” (Mat. 9:36) Dicon nan tabata den e condicion deplorabel ey? Pasobra e hendenan cu tabatin e responsabilidad di siña e pueblo e Ley di Dios tabata cruel, exigente y hipocrita. En bes di cuida e miembronan di nan tou y yuda nan sirbi Dios, e lidernan spiritual ey di Israel a pone “carga pisa” riba nan schouder.—Mat. 23:4.

3. Segun cu ancianonan ta eherce nan papel como wardador spiritual, kico nan mester corda?

³ E wardadornan di carne cristian di awendia—e ancianonan—tin un responsabilidad serio. E carnenan cu nan ta cuida ta di Jehova y di Hesus, kende a yama su mes “e bon wardador.” (Juan 10:11) Dios a cumpra e carnenan “pa un prijs halto”, esta, cu e “sanger precioso” di Hesus. (1 Cor. 6:20; 1 Ped. 1:18, 19) Y Hesus ta stima e carnenan asina tanto cu el a sacrifica su bida pa nan. Semper ancianonan mester corda cu nan ta bou di supervision di Hesucristo, “e gran  wardador di carne.” Pues, nan tin cu rindi cuenta na dje pa e manera cu nan ta trata e tou.—Heb. 13:20.

4. Kico e articulo aki lo considera?

⁴ Con wardador cristian mester trata e carnenan? Bijbel ta anima tur hende den congregacion pa “obedece esnan cu ta dirigi” nan. Di otro banda, e ancianonan ta haya e conseho pa nan no “manda riba esnan cu ta propiedad di Dios.” (Heb. 13:17; lesa 1 Pedro 5:2, 3.) Pues, con anciano por “dirigi” e tou sin “manda” riba e carnenan? Cu otro palabra, con nan por atende necesidad di e carnenan sin abusa di e autoridad cu Dios a duna anciano?

5. Kico Isaias 40:11 ta siña nos di Jehova?

⁵ Profeta Isaias a bisa di Jehova: “Manera un wardador di carne e lo cuida su tou, e lo coge e lamchinan den su brasa, y tene nan cerca di su curason; cu ternura e lo guia esnan cu tin yiu chikito.” (Isa. 40:11) E versiculo aki ta describi con Jehova ta interesa den necesidad di e rumannan cu ta zwak of cu tin mester di proteccion. Mescos cu un wardador sa precies kico ta necesidad di cada carne den su tou y ta cla pa yuda nan, asina Jehova ta consciente di e necesidadnan di e rumannan den congregacion y gustosamente ta percura pa nan haya e cuido necesario. Ademas, mescos cu un wardador tin biaha ta carga un lamchi recien naci den su brasa, asina Jehova, “e Tata di tierno misericordia”, ta duna nos consuelo y cuido special ora nos ta confronta un prueba grandi of un periodo dificil.—2 Cor. 1:3, 4.

6. Con un anciano por imita e ehempel di Jehova?

⁶ Esta un bunita les un wardador den congregacion por siña for di nos Tata celestial! Mescos cu Jehova, e mester presta atencion na necesidad di e carnenan. Si un anciano sa kico ta e dificultadnan cu e carnenan ta pasa aden y cua necesidad specifico mester di atencion mesora, lo e ta den un mihor posicion pa sa ki ora y con pa duna nan e animacion y apoyo cu nan mester. (Prov. 27:23) Ta bisto anto cu un anciano mester tuma tempo pa papia cu e rumannan y scucha nan. Aunke e ta respeta e privacidad di e rumannan, toch e ta paga tino na loke e ta mira y tende den congregacion y, motiva pa amor, ta tuma tempo pa “yuda esnan cu ta zwak.”—Echo. 20:35; 1 Tes. 4:11.

7. (a) Con e wardadornan den tempo di Ezekiel y Jeremias a trata e carnenan di Dios? (b) Kico ancianonan por siña for di e echo cu Jehova a rechasa wardadornan infiel?

⁷ Pensa un rato riba e actitud di e wardadornan cu Jehova a condena den tempo di Ezekiel y Jeremias. Jehova a rechasa e wardadornan ey pasobra nan tabatin e tarea di cuida e carnenan pero nan no tabata haci esey. Como cu ningun hende no tabata vigila e tou, e carnenan a bira prooi di bestia salbahe y a plama for di otro. Pio ainda, e wardadornan ey a probecha di e carnenan, y en bes di alimenta nan, nan “a alimenta nan mes.” (Eze. 34:7-10; Jer. 23:1) Pa e mesun motibonan ey Dios ta rechasa e lidernan di cristiandad. Ki les importante ancianonan ta siña for di e echo cu Jehova a rechasa wardadornan infiel? Wel, nan mester duna e tou di Jehova e debido atencion y amor.

8. Con ancianonan por imita e bon ehempel di Hesus ora nan ta conseha e rumannan?

⁸ Imperfeccion humano por pone cu algun carne di Dios no ta compronde bon kico Jehova ta spera di nan. Kisas nan ta tuma decisionnan cu no ta cuadra cu principio biblico of nan comportacion ta  indica cu ainda nan no ta cristian maduro. Con ancianonan mester reacciona riba esey? Nan mester mustra pasenshi, mescos cu Hesus. Su discipelnan tabata discuti tur ora ta ken lo ta esun di mas grandi den e Reino. Hesus no a perde pasenshi cu nan, sino mas bien el a sigui siña nan y a duna nan conseho amoroso tocante humildad. (Luc. 9:46-48; 22:24-27) El a hasta laba nan pia pa laga nan mira kico kiermen ser humilde. Awe, ancianonan tambe mester demostra humildad.—Lesa Juan 13:12-15; 1 Ped. 2:21.

9. Ki actitud di su discipelnan Hesus mester a corigi?

⁹ Hesus su punto di bista di e papel di un wardador spiritual tabata distinto for di loke Santiago y Juan a pensa un tempo. E dos apostelnan ey a pidi Hesus pa duna nan un puesto prominente den e Reino. Pero Hesus a corigi nan actitud y a siña nan pensa na un otro manera. E di cu nan: “Boso sa ku gobernantenan ta dominá e hendenan di nan nashon i ku lidernan ta hunga bas riba nan. Esei no mester tuma lugá serka boso. Al kontrario, esun ku ke ta grandi meimei di boso mester sirbi e otronan.” (Mat. 20:25, 26, BPK) E apostelnan mester a resisti e inclinacion di kier “manda riba” nan compañeronan, of di “hunga bas riba nan.”

10. Con Hesus kier pa ancianonan trata e tou, y ki bon ehempel Pablo a pone den esaki?

¹⁰ Hesus ta spera di ancianonan cu nan ta trata e tou manera el a trat’e. Nan mester ta dispuesto pa sirbi nan rumannan y no manda riba nan. Apostel Pablo tabatin e actitud humilde ey, pasobra el a bisa e ancianonan di e congregacion na Efeso: “Boso mes sa con mi a comporta mi [mes] meymey di boso for di e prome dia cu mi a pone pia na Asia. Mi a sirbi manera esclavo pa Señor cu gran humildad.” E apostel tabata kier pa e ancianonan ey yuda e rumannan cu sinceridad y humildad. El a bisa nan: “Mi a mustra boso den tur cos cu pa medio di trabou duro boso mester yuda esnan cu ta zwak.” (Echo. 20:18, 19, 35) Pablo a bisa e rumannan di Corinto cu e no tabata doño di nan fe. Al contrario, e tabata un humilde sirbidor di Dios mescos cu nan, y e kier a yuda nan sirbi Dios cu goso. (2 Cor. 1:24) Pues, Pablo ta un bon ehempel pa ancianonan di awendia. E tabata un persona humilde cu a traha duro pa otronan.

11, 12. Con un anciano lo por yuda un ruman tuma un decision?

¹¹ Un anciano di congregacion mester “tene firmemente na e palabra fiel pa loke ta su arte di siña.” (Tito 1:9) Pero e tin cu haci esey “cu suavidad.” (Gal. 6:1) En bes di obliga e rumannan pa haci algo na un cierto manera, un bon wardador ta purba di yuda nan tuma nan mes decision a base di nan amor pa Jehova y pa su Palabra. Por ehempel, si un ruman homber tin cu tuma un decision importante, un anciano por yud’e door di considera cu ne algun principio biblico. Kisas e por repasa un articulo cu ne cu a sali den nos publicacionnan tocante e topico ey. Tambe lo e por anima e ruman pa pensa riba diferente opcion cu tin y e manera cu cada un lo por afecta su relacion cu Jehova. Ademas, e anciano por corda e ruman riba e importancia di pidi Dios su guia den oracion prome cu e tuma un decision. (Prov. 3:5, 6) Despues di a considera tur e asuntonan ey cu e ruman, e anciano lo lag’e tuma su propio decision.—Rom. 14:1-4.

¹² E unico base cu ancianonan tin pa duna instruccion ta for di e Scritura. Pesey ta masha importante pa nan uza Bijbel  bon y sigui loke e ta bisa. Si ancianonan haci asina, esey ta yuda nan evita cualkier posibel abuso di poder. Al fin y al cabo, e carnenan no ta di nan, y cada ruman den congregacion tin cu duna cuenta na Jehova cu Hesus pa e decisionnan cu nan tuma.—Gal. 6:5, 7, 8.

13, 14. Menciona algun aspecto den cua un anciano mester ta un ehempel pa e tou.

¹³ Despues cu apostel Pedro a conseha e ancianonan pa no ‘aktua komo si fuera nan ta doño di e karnénan ku nan tin responsabilidat p’e’ (BPK), el a anima nan pa nan “bira ehempel pa e tou.” (1 Ped. 5:3) Con un anciano por ta un ehempel pa e tou? Laga nos considera dos cualidad cu un ruman homber mester tin pa por sirbi como anciano. Di prome, e mester ta “di sano huicio.” Esaki ta nifica cu e tin un bon comprondemento di principionan biblico y sa con pa uza nan den su bida. E ta keda trankil den situacionnan dificil y ta pensa bon prome cu e tuma decision. Di dos, e mester “dirigi su cas na un manera excelente.” Esaki kiermen cu si un anciano tin un famia, e mester ta un bon ehempel como esposo y tata, pasobra “si un homber no sa con pa dirigi su mes cas, con lo e por cuida e congregacion di Dios?” (1 Tim. 3:1, 2, 4, 5) E rumannan den congregacion ta sinti cu nan por confia e ancianonan cu tin e cualidadnan aki.

¹⁴ Un otro aspecto den cua ancianonan ta pone un bon ehempel pa nan rumannan cristian ta ora nan ta sali den sirbishi di veld y tambe dirigi e actividadnan di sirbishi. Hesus tabata un ehempel pa e ancianonan den esaki. Un parti importante di su actividad riba tera tabata e predicacion di e bon noticia di Reino. El a mustra su discipelnan con nan mester a haci e trabou aki. (Mar. 1:38; Luc. 8:1) Den nos tempo, ta un gran animacion pa e publicadornan ora nan por predica hunto cu e ancianonan. Nan ta mira e entusiasmo di e ancianonan pa e trabou importante aki y ta siña for di nan manera di siña hende. Ora e rumannan ta mira cu e ancianonan ta uza nan tempo y energia regularmente pa predica e bon noticia a pesar cu nan ta hopi druk, esey ta motiva henter e congregacion pa demostra e mesun entusiasmo pa e trabou di predica. Ademas, ancianonan por ta un bon ehempel pa nan rumannan ora nan ta prepara pa e reunionnan y duna comentario y tambe ta yuda cu limpieza y mantencion di Salon di Reino.—Efe. 5:15, 16; lesa Hebreonan 13:7.

15. Dicon ancianonan ta haci bishita di pastoreo?

¹⁵ Un bon wardador ta cla pa yuda un carne cu ta malo of herida. Asina tambe e ancianonan mester ta cla pa yuda e rumannan cu ta sufriendo of cu mester di conseho of animacion. Kisas e rumannan di edad y esnan enfermo tin mester  di yudansa cu nan necesidadnan fisico, pero loke mas nan tin mester di dje ta yudansa spiritual, esta, animacion y consuelo for di e Scritura. (1 Tes. 5:14) Hobennan den congregacion kisas tin cu lucha contra “di e deseonan di hubentud.” (2 Tim. 2:22) E ancianonan ta yuda tur ruman den congregacion door di haci bishita di pastoreo. Esaki ta encera cu e ancianonan ta bishita nan periodicamente pa purba di compronde kico ta e dificultadnan cu e rumannan ta pasando aden y pa anima nan cu conseho biblico apropia. Ora ancianonan ta cla pa duna nan rumannan e yudansa cu nan tin mester, nan por resolve hopi problema prome cu nan bira mas grandi.

16. Kico e ancianonan por haci ora un ruman den congregacion tin un problema serio?

¹⁶ Kico si un ruman den congregacion tin un problema asina serio cu su relacion cu Jehova ta na peliger? E discipel Santiago a skirbi: “Tin un hende den boso cu ta malo? Lag’e manda yama e ancianonan di congregacion, y laga nan haci oracion p’e y hunt’e cu zeta den nomber di Jehova. Y e oracion haci cu fe lo cura esun cu ta malo, y Jehova lo lant’e. Ademas, si el a comete pica, lo e ser pordona.” (Sant. 5:14, 15) Hasta ora e ruman cu ta spiritualmente “malo” no “manda yama e ancianonan”, nan mester trata di yud’e asina cu nan haya sa di su situacion. Ora e ancianonan ta haci oracion cu nan rumannan—y pa nan—y ta apoya nan durante tempo dificil, nan ta demostra cu nan ta bon wardador cu ta anima nan rumannan pa sigui sirbi Dios cu goso.—Lesa Isaias 32:1, 2.

17. Ora ancianonan ta imita “e gran wardador di carne”, con e congregacion ta beneficia?

¹⁷ Den tur loke ancianonan cristian ta haci den Jehova su organisacion, nan ta traha duro pa imita “e gran wardador di carne”, Hesucristo. E tou ta beneficia masha hopi mes di e yudansa di e rumannan responsabel aki y ta sigui bira mas fuerte. Tur esaki ta yena nos cu gratitud y ta motiva nos pa alaba nos Wardador incomparabel, Jehova.