1, 2. Ki influencia e crianza cu nos a haya y e ambiente den cua nos a lanta tin riba nos bida?

 E CRIANZA cu nos a haya y e ambiente cu nos a lanta aden tin un influencia profundo riba nos. Nos ta bisti y comporta nos mes na un cierto manera y ta gusta cierto cumindanan. Parcialmente, esey ta debi na e influencia di e hendenan rond di nos y nos circunstancianan.

² Pero, tin cosnan mucho mas importante cu cuminda of e manera cu nos ta bisti. Por ehempel, for di chikito esnan cu ta educa nos ta siña nos kico ta bon y aceptabel y kico ta malo y inaceptabel. Pero hende tin diferente opinion tocante kico ta bon of malo. Nos consenshi tambe ta influencia e decisionnan cu nos ta tuma. Bijbel ta bisa cu hopi bes “hende di e nacionnan, cu no tin ley, ta haci di naturaleza e cosnan di ley.” (Rom. 2:14) Pero awor, kico nos mester haci ora no tin un ley specifico di Dios cu ta trata un cierto asunto? Nos por djis sigui e norma- y balornan cu nan a lanta nos cu ne of cu ta comun den e area caminda nos ta biba?

3. Menciona dos motibo pakico cristiannan no por djis sigui e norma- y balornan di mundo.

³ Wel, tin por lo menos dos motibo importante pakico un cristian lo no djis sigui e norma- y balornan di mundo. Pa di prome, Bijbel ta bisa: “Tin un caminda cu ta parce bon den bista di hende, ma su fin ta e caminda di morto.” (Prov. 16:25) Si, debi cu nos ta imperfecto, nos no ta capaz pa dirigi nos pasonan perfectamente. (Prov. 28:26; Jer. 10:23) Di dos, Bijbel ta mustra cu ta Satanas, “e dios di e mundo aki”, ta esun cu ta pone norma pa su mundo, esta, loke mundo ta haya ta bon of malo y loke ta bira popular. (2 Cor. 4:4; 1 Juan 5:19) Pesey, si nos kier e bendicion y aprobacion di Jehova, nos mester sigui e conseho cu nos ta haya na Romanonan 12:2.—Les’e.

4. Ki preguntanan nos lo contesta den e articulo aki?

 ⁴ E articulo aki lo contesta tres pregunta importante relaciona cu e conseho na Romanonan 12:2. Nan ta: (1) Dicon nos mester ser “transforma”? (2) Kico nos mester transforma? y (3) Con nos por ser transforma?

5. Pa ken specialmente Pablo a skirbi e palabranan registra na Romanonan 12:2?

⁵ E carta cu apostel Pablo a skirbi na e Romanonan no tabata dirigi na personanan no creyente of na e pueblo en general sino na su compañeronan cristian ungi. (Rom. 1:7) El a urgi nan pa nan transforma nan mes y pa no ‘laga e mundo forma’ nan. Pa e cristiannan di e tempo ey, esta, esnan cu a biba na Roma alrededor di aña 56 di prome siglo, “e mundo” tabata referi na e norma- y custumbernan, conducta y e manera di bisti cu tabata comun pa e hendenan na Roma. E echo cu Pablo a uza e palabra “stop” ta yuda nos compronde cu algun cristian tabata laga e mundo ey influencia nan. Den ki manera e mundo a influencia nos rumannan e tempo ey?

6, 7. Dicon bida no tabata facil pa e cristiannan na Roma den tempo di Pablo?

⁶ Awendia, si bo bishita Roma, loke bo ta mira generalmente ta ruina di por ehempel tempel, graf, monumento, arena y teater. Algun di esakinan a ser construi den prome siglo. E ruinanan aki ta yuda nos haya un bista di e manera cu e hendenan tabata biba y adora nan diosnan den Roma di antiguedad. Fuera di esaki, den buki di historia nos por lesa tocante e luchanan violento di nan gladiadornan, nan caredanan di garoshi y tocante nan obranan teatral y musical di cua algun tabata inmoral. Ademas, Roma tabata un stad comercial prospero cu a brinda hende hopi oportunidad pa gana placa na abundancia.—Rom. 6:21; 1 Ped. 4:3, 4.

⁷ Aunke e Romanonan tabatin hopi tempel y tabata adora hopi dios, nan no tabata conoci como hendenan cu tabatin un bon relacion cu nan diosnan. Pa nan, adoracion tabata consisti principalmente di ritonan religioso relaciona cu sucesonan di e bida di tur dia, manera nacemento, casamento y entiero. Bo por imagina bo con dificil bida lo tabata pa e cristiannan na Roma? Hopi di nan a ser lanta den e ambiente ey, pues ta obvio cu nan mester a ser transforma pa por a bira cristian berdadero. Y e transformacion aki mester a sigui hasta despues di nan bautismo.

8. Dicon e mundo ta forma un peliger pa cristiannan awe?

⁸ Mescos cu tabata e caso na Roma di antiguedad, e mundo di awendia tambe ta forma un peliger pa cristiannan. Dicon? Pasobra e spirito di mundo ta manifesta su mes den hopi manera. (Lesa Efesionan 2:2, 3; 1 Juan 2:16.) Constantemente, nos ta haya nos confronta cu mundo su deseonan,  pensamentonan, norma- y balornan. Si, tur dia nos ta core risico di ser influencia pa e mundo. Pesey, nos mester haci caso di loke Pablo a conseha nos, esta, pa “stop di laga e mundo aki forma” nos y pa “transforma” nos mes. Con nos por logra esey?

9. Ki cambio hopi hende ta haci pa nan por cualifica pa bautismo?

⁹ Segun cu un persona ta studia Bijbel y aplica loke e ta siña, e ta cuminsa progresa spiritualmente. Su progreso ta bira bisto na e cambionan cu e ta haci pa biba na harmonia cu loke e ta siña. E ta sali for di religion falso, ta stop di haci loke ta malo, bisti e personalidad nobo y imita Cristo. (Efe. 4:22-24) Nos ta contento cu tur aña cientos di miles di persona ta progresa y cualifica pa batisa como simbolo di nan dedicacion na Jehova Dios. Esaki sigur ta haci Jehova su curason contento. (Prov. 27:11) Pero ta bon pa nos pensa riba e pregunta aki: Esakinan ta e unico cambionan cu un persona mester haci?

10. Den ki sentido transformacion ta distinto for di mehoracion?

¹⁰ Eigenlijk, nos transformacion ta encera mas cu haci progreso of mehora. Por ehempel, kisas bo por haya un producto cu un etiket cu ta bisa cu “a mehora” e producto siendo cu basicamente e producto a keda mescos. Kisas ta djis un ingrediente nobo nan a añadi na e producto of ta djis su empake nan a cambia pa hacie mas atractivo. E expresion “transforma boso mes” na Romanonan 12:2 ta encera renoba of cambia nos manera di pensa mediante poder di spirito santo. Pues, e transformacion cu un cristian mester haci no ta simplemente stop cu bicio dañino, habla vulgar y conducta inmoral. Algun hende cu no tin conocemento di Bijbel tambe ta haci esfuerso pa evita di haci e cosnan malo aki. Kico e transformacion cu cristiannan mester haci ta encera anto?

11. Kico Pablo a bisa cu un hende mester haci pa e por transforma su mes?

¹¹ Pablo a skirbi: “Transforma boso mes door di renoba boso mente.” Aunke “mente” ta referi na nos capacidad di pensa, den Bijbel e ta referi tambe na nos actitud, na nos inclinacion mental y capacidad di rasona. Mas prome den su carta na e Romanonan, Pablo a describi hende cu ‘un estado mental desaproba.’ El a bisa cu nan tabata yen di “inhusticia, cos pecaminoso, golosidad, maldad, y tambe yen di envidia, asesinato, pleito, engaño” y otro cosnan malo. (Rom. 1:28-31) Pesey, ta logico cu Pablo a urgi esnan cu a lanta den un ambiente asina y cu despues a bira sirbidor di Dios pa nan ‘transforma nan mes door di renoba nan mente.’

12. Kico ta pensamento di hopi hende awe, y dicon e actitud aki por ta peligroso pa cristiannan?

¹² Lamentablemente, nos ta rondona pa hende cu e caracteristicanan cu Pablo  a describi. Nan ta pensa cu Bijbel su norma- y principionan ta mucho ouderwets pa hende sigui awe y cu niun hende no mester obliga otro pa biba segun Bijbel. Hopi maestro di scol y mayor ta permiti muchanan pa haci loke nan kier. Nan ta hasta siña nan cu cada persona ta liber pa dicidi kico ta bon of malo. Segun nan, no tin ningun manera cu hende por haya sa kico realmente ta bon of malo. Hasta hopi di e hendenan cu ta bisa cu nan ta kere den Dios no ta haya cu nan tin cu haci loke Dios ta bisa ta bon. (Sal. 14:1) E actitud aki por ta masha peligroso pa cristiannan berdadero. Pasobra si nan no tene cuidou, nan por adopta e punto di bista ey y keda sin cumpli cu instruccionnan cu nos ta ricibi di Jehova su organisacion y hasta cuminsa critica tur cos cu nan no ta di acuerdo cu ne. Kisas nan no ta completamente di acuerdo cu conseho biblico cu nan ta haya tocante entretenimento, enseñanza superior of uzo di Internet.

13. Dicon nos mester haci un analisis honesto di nos mes?

¹³ Si nos no kier pa e mundo aki forma nos, nos mester pensa seriamente riba e persona cu nos ta di paden. Nos mester analisa nos actitud y sintimentonan y wak kico ta nos meta- y normanan, cosnan cu hende no por mira. Como cu otronan kisas no sa realmente ken nos ta di paden, kisas nan ta bisa nos cu nos ta bayendo bon. Pero, en realidad, ta nos so sa si realmente nos a laga Bijbel transforma nos y si nos ta sigui lag’e transforma nos.—Lesa Santiago 1:23-25.

14. Con nos por haya sa ki cambio nos mester haci?

¹⁴ Pa nos por transforma nos mes, nos mester cambia nos curason, esta, e persona cu nos realmente ta di paden. Kico por yuda nos haci e cambionan profundo aki? Wel, Bijbel ta siña nos ki clase di persona Jehova kier pa nos ta. Anto e manera cu nos ta reacciona na loke nos ta siña den Bijbel ta yuda nos mira loke nos tin realmente den nos curason. Asina nos ta haya sa ki cambio nos tin cu haci pa nos por cumpli cu e ‘boluntad di Dios cu ta perfecto.’—Rom. 12:2; Heb. 4:12.

15. Ki transformacion ta tuma luga ora Jehova ta forma nos?

¹⁵ Lesa Isaias 64:8. E ilustracion cu profeta Isaias a uza ta siña nos un les importante. Nos ta manera klei y Jehova ta e Alfarero. Ora e ta forma nos, manera un alfarero ta haci cu klei, e no ta cambia nos fisicamente, kisas dunando nos un apariencia mas atractivo. No, Jehova ta forma nos den sentido spiritual y no fisicamente. Si nos permitie forma nos, e ta transforma e persona cu nos ta di paden, den sentido spiritual. Y e transformacion aki ta precies loke nos tin mester pa nos por resisti e influencianan di mundo. Awor, con Jehova ta forma nos?

16, 17. (a) Splica kico un alfarero ta haci cu un pida klei cu e kier uza pa traha un obheto valioso. (b) Con e Palabra di Dios ta transforma nos den personanan valioso den bista di Dios?

¹⁶ Si un alfarero kier traha un obheto di klei di bon calidad, e ta uza klei di bon calidad. Pero, tin dos cos cu e mester haci prome. Prome, e mester laba e klei bon pa kita tur impureza. Despues, e mester mescla e klei cu e cantidad exacto di awa pa e obheto cu e traha por mantene su forma.

¹⁷ Ripara cu e alfarero ta uza awa pa e haci e klei limpi y tambe pa e haci esaki mas facil pa traha cu ne. Di e manera ey, e por traha un obheto valioso cu e klei. Bo ta mira e efecto similar cu e Palabra di  Dios tin riba nos bida? E Palabra di Dios por yuda nos stop di pensa manera antes, tempo cu nos no tabata conoce Dios, y transforma nos den personanan valioso den bista di Dios. (Efe. 5:26) Pensa riba tur e biahanan cu nos a ser anima pa lesa Bijbel tur dia y pa asisti regularmente na nos reunionnan. Dicon nos ta ser anima pa haci e cosnan aki? Pasobra ora nos ta haci e cosnan ey, nos ta permiti Jehova forma nos.—Sal. 1:2; Echo. 17:11; Heb. 10:24, 25.

18. (a) Dicon ta importante pa nos medita riba e Palabra di Dios si nos kier pa esaki transforma nos? (b) Ki preguntanan por yuda nos den esaki?

¹⁸ Si nos kier pa e Palabra di Dios transforma nos, nos mester haci mas cu djis les’e y siña for di dje regularmente. Hopi hende ta lesa Bijbel y sa hopi cos cu Bijbel ta bisa. Kisas bo a yega di topa hende asina den sirbishi. Algun di nan hasta por menciona algun texto di Bijbel for di cabes. * Pero, esaki tin masha poco efecto riba nan manera di pensa y biba. Dicon? Pasobra pa e Palabra di Dios transforma un persona, e persona aki tin cu permiti loke e ta lesa baha den su curason. Pues, nos mester saca tempo pa medita riba loke nos ta siña di Bijbel. Nos tin cu puntra nos mes: ‘Mi ta convenci cu esaki ta mas cu djis siñansa religioso? Mi no a experencia personalmente cu esaki ta e berdad? Mi mes ta aplica loke mi ta siña otro hende, of ta djis siña so mi ta siña otro hende? Mi ta sinti cu Jehova ta papiando cu mi personalmente?’ Ora nos ta medita riba preguntanan asina, nos lo haya mas amor pa Jehova. Esey, na su turno, lo motiva nos pa haci cambio cu ta haci Dios contento.—Prov. 4:23; Luc. 6:45.

19, 20. Con nos ta beneficia ora nos ta aplica conseho biblico?

¹⁹ Si nos ta lesa e Palabra di Dios regularmente y ta medita riba loke nos ta lesa, esaki ta motiva nos pa sigui haci loke Pablo a bisa, esta, pa ‘kita e personalidad bieu cu su practicanan y bisti e personalidad nobo, cu pa medio di conocemento exacto ta ser renoba.’ (Col. 3:9, 10) Si, si nos ta compronde loke Bijbel ta siña y ta sigui aplica loke nos ta siña, esaki lo motiva nos pa sigui bisti e personalidad nobo. Y esaki na su turno lo sirbi como un proteccion contra e trampanan di Satanas.

²⁰ Apostel Pedro ta recorda nos lo siguiente: “Como yiu obediente, no laga e deseonan cu boso tabatin tempo cu boso no tabata conoce Dios forma boso mas. Mas bien, di acuerdo cu Esun Santo cu a yama boso, bira santo den tur boso conducta.” (1 Ped. 1:14, 15) Y si nos ta haci esfuerso pa permiti Jehova transforma nos manera di pensa y nos actitud, lo e bendiciona nos sigur, manera e siguiente articulo lo mustra.