1-3. Relata brevemente con Hesus a alimenta un multitud grandi di hende den cercania di Betsaida. (Wak e plachi na cuminsamento di e articulo aki.)

 VISUALISA e siguiente escena: (Lesa Mateo 14:14-21.) Tabata un poco prome cu Pasco Hudiu di aña 32 di nos era. Un multitud di hende—un 5.000 homber, sin conta hende muher y mucha—a sigui Hesus y su discipelnan te na un pueblito aisla cu tabata keda den bisindario di Betsaida na costa noord di Lama di Galilea.

² Ora Hesus a mira e multitud, el a haya duele di nan. Pesey, el a cura esnan cu tabata malo y despues el a siña e multitud hopi cos tocante e Reino di Dios. Pero ora a cuminsa bira laat, e discipelnan a bisa Hesus pa manda e multitud bay, ya nan por a bay den e pueblitonan den cercania y cumpra algo di come. Pero Hesus a bisa su discipelnan: “Boso duna nan algo di come.” Su palabranan lo mester a sorprende nan un poco pasobra nan no tabatin mucho cos di come: cinco pan y dos pisca chikito so.

³ Hesus su compasion a motiv’e pa haci un milager—e unico milager cu ta registra den tur e cuater Evangelionan. (Mar. 6:35-44; Luc. 9:10-17; Juan 6:1-13) Hesus a instrui su discipelnan pa nan laga e multitud sinta riba yerba den grupo di 50 of di 100. Despues di a haci oracion, el a kibra e pannan y parti e piscanan den porcion. Pero en bes di Hesus mes parti e cuminda, el a duna su discipelnan e pannan y e piscanan, “y e discipelnan a parti nan pa e multitud.” Tabatin asina tanto cuminda, cu tur hende a come, y hasta a resta. Pensa riba esaki: Hesus a alimenta miles di hende uzando un par di hende so—su discipelnan. *

4. (a) Ki tipo di cuminda, segun Hesus, tabata mas importante pa su siguidornan ricibi, y dicon? (b) Kico nos lo trata den e articulo di estudio aki y den e siguiente?

⁴ Sinembargo, loke tabata mas importante pa Hesus tabata pa su siguidornan haya cuminda spiritual. Dicon? Pasobra e tabata sa cu cuminda spiritual, esta, e berdadnan cu nos ta haya den e Palabra di Dios, ta hiba na bida eterno. (Juan 6:26, 27; 17:3) Pesey, conmovi pa e mesun compasion cu a motiv’e pa alimenta un multitud di hende cu  pan y pisca, Hesus a dedica oranan largo siñando su siguidornan. (Mar. 6:34) Pero e tabata sa cu su ora pa bay cielo bek tabata yegando cerca. (Mat. 16:21; Juan 14:12) Awor, unabes cu el a bay cielo, con lo el a sigui percura pa su siguidornan riba tera ser bon alimenta den sentido spiritual? Wel, Hesus lo a sigui e mesun sistema cu e tabata sigui ora e tabata riba tera—esta, di uza algun hende pa alimenta miles. Pero, ken Hesus lo a uza? Laga nos wak prome con Hesus a uza poco hende pa alimenta su grupo grandi di siguidor ungi den prome siglo. Y e siguiente articulo lo contesta un pregunta cu ta di vital importancia pa cada un di nos, esta: Ken ta e poco hendenan cu Cristo ta uza awe pa alimenta nos?

5, 6. (a) Ki decision importante Hesus a tuma pa haci sigur cu despues di su morto su siguidornan lo tabata bon cuida den sentido spiritual? (b) Con Hesus a prepara su apostelnan pa nan por a cumpli cu un asignacion sumamente importante despues di su morto?

⁵ Un cabes di famia responsabel ta haci areglo pa, si en caso e muri, su famia por ta semper bon cuida. Di mes manera, Hesus—kende lo a bira Cabes di e congregacion Cristian—a haci areglo pa su siguidornan tabata bon cuida den sentido spiritual despues di su morto. (Efe. 1:22) Por ehempel, mas o menos dos aña prome cu el a muri, Hesus a tuma un decision masha importante: El a scoge e prome hendenan cu lo a forma e grupo chikito di hende cu lo el a uza pa alimenta hopi siguidor. Laga nos wak con el a haci esey.

⁶ Despues di a haci oracion henter anochi, Hesus a reuni su discipelnan y, for di nan, el a scoge 12 apostel. (Luc. 6:12-16) E siguiente dos añanan, el a cera un amistad intimo cu su diesdos apostelnan y a dedica hopi tempo na nan, siñando nan cu echo y palabra. E tabata sa cu nan tabatin hopi cos mas di siña; de echo, nan tabata sigui ser yama su “discipelnan”, cu ta nifica studiante. (Mat. 11:1; 20:17) El a duna nan conseho valioso y a entrena nan bon pa sirbishi. (Mat. 10:1-42; 20:20-23; Luc. 8:1; 9:52-55) Evidentemente, e tabata preparando nan pa nan por a cumpli cu un asignacion sumamente importante despues cu e muri y bay cielo bek.

7. Con Hesus a indica kico lo tabata e responsabilidad principal di e apostelnan?

⁷ Ki asignacion e apostelnan lo a haya? Segun cu Pentecoste di aña 33 di nos era tabata yegando cerca, tabata bisto cu e apostelnan lo a sirbi como “superintendente” den e congregacion cristian. (Echo. 1:20) Pero, kico lo tabata nan responsabilidad principal? Despues di Hesus su resureccion, el a duna un indicacion di esey den un combersacion cu e tabatin cu apostel Pedro. (Lesa Juan 21:1, 2, 15-17.) Den presencia di algun di e otro apostelnan, Hesus a bisa Pedro: “Cuida mi lamchinan.” E verbo traduci como “cuida” na Juan 21:17 ta ser traduci tambe como ‘duna di kome.’ (BPK) Pues, Hesus su palabranan ta indica bon cla cu su apostelnan lo tabata entre e poco hendenan cu lo el a uza pa percura cuminda spiritual pa hopi hende. Sin duda, Hesus su palabranan ta mustra tambe cuanto e ta stima su “lamchinan.” *

8. Con esnan cu a bira cristian na Pentecoste a demostra cu nan no tabatin ningun duda ken Cristo tabata uza pa alimenta su siguidornan?

⁸ Desde Pentecoste di aña 33 di nos era, Cristo resucita a cuminsa uza su apostelnan pa duna e resto di cristian ungi cu tabata riba tera cuminda spiritual. (Lesa Echonan 2:41, 42.) E Hudiunan y e proselitonan cu e dia ey a comberti y bira cristian ungi no tabatin ningun duda cu ta e apostelnan Cristo tabata uza pa alimenta otronan den sentido spiritual. Cu pleno confianza, “nan a sigui presta atencion na siñansa di e apostelnan.” Un experto riba tereno di Bijbel a bisa cu e verbo Griego traduci akinan como “sigui presta  atencion” por nifica tambe “sigui cierto rumbo lealmente.” E cristiannan nobo tabata ansioso pa siña e berdadnan cu tin den e Palabra di Dios, y nan tabata sa precies ken por a siña nan e berdadnan aki. Pesey cu pleno confianza, nan a acudi na e apostelnan pa haya splicacion di e cosnan cu Hesus a bisa y haci y di e textonan cu ta papia tocante Hesus. *—Echo. 2:22-36.

9. Con e apostelnan a demostra cu nan enfoke principal tabata nan responsabilidad di siña y dirigi e congregacion cristian?

⁹ E apostelnan tabata enfoca principalmente riba nan responsabilidad di siña y dirigi e congregacion cristian. Por ehempel, wak con nan a resolve un problema delicado cu por a causa division den e congregacion cristian cu a caba di ser forma. Pa straño cu por parce, e problema tabata encuanto cuminda. Tabata asina cu algun discipel a cuminsa keha pasobra tabata neglisha e viudanan di habla Griego ora tabata parti cuminda di tur dia, siendo cu e viudanan di habla Hebreo si tabata haya. Con “e 12 apostelnan” a resolve e asunto delicado aki? Wel, nan a pone shete ruman homber di bon reputacion na encargo di “e tarea necesario aki”, esta, e reparticion di cuminda. Probablemente, mayoria di e apostelnan aki a yuda reparti e cuminda cu Hesus a provee na un manera milagroso pa alimenta e multitud di hende. Pero awor nan tabata consciente cu nan trabou di mas importante tabata pa alimenta e congregacion den sentido spiritual. Pesey, nan a dedica nan mes na e trabou di “siña hende e palabra di Dios.”—Echo. 6:1-6.

10. Con Cristo a uza e apostelnan y e ancianonan na Jerusalem?

¹⁰ Na aña 49 di nos era, algun otro anciano cualifica a uni cu e apostelnan cu tabata na bida e tempo ey y hunto nan tabata fungi como un cuerpo gobernante. (Lesa Echonan 15:1, 2.) Bijbel ta referi na nan como “e apostelnan y e ancianonan na Jerusalem.” Cristo, e Cabes di e congregacion cristian, tabata uza e grupo chikito aki di homber cualifica pa resolve asuntonan di doctrina y pa supervisa y dirigi e trabou di predica y di siña hende tocante e bon noticia di e Reino.—Echo. 15:6-29; 21:17-19; Col. 1:18.

11, 12. (a) Kico ta mustra cu Jehova a bendiciona e sistema cu su Yiu a establece pa alimenta e congregacionnan den prome siglo? (b) Con bin e hendenan tabata sa precies ken Hesus tabata uza pa alimenta e congregacionnan?

¹¹ Manera nos a mira, den prome siglo Cristo a uza un cuerpo gobernante pa alimenta e congregacionnan. Jehova a bendiciona e areglo aki? Claro cu si. Con nos por ta asina sigur? Wel, e buki di Echonan ta bisa: “Awor bon, segun cu nan [apostel Pablo y  su compañeronan di biahe] tabata bishita e stadnan, nan tabata entrega e rumannan e decretonan cu e apostelnan y e ancianonan di Jerusalem a stipula pa nan cumpli cu ne. Si, pesey e congregacionnan a sigui bira firme den fe y crece na cantidad dia tras dia.” (Echo. 16:4, 5) Ripara cu e congregacionnan a bira fuerte spiritualmente y tabata aumenta den cantidad pasobra nan tabata coopera fielmente cu e cuerpo gobernante na Jerusalem. Esey no ta un prueba cu Jehova a bendiciona e sistema cu su Yiu a establece pa alimenta e congregacionnan spiritualmente? Laga nos nunca lubida: Ta cu e bendicion di Jehova so e congregacion cristian por prospera.—Prov. 10:22; 1 Cor. 3:6, 7.

¹² Pues, nos a mira cu den prome siglo Hesus tabata alimenta su siguidornan den sentido spiritual di e mesun manera cu el a alimenta e multitud ora cu e tabata riba tera: El a uza un par di hende pa alimenta un multitud. Anto e tempo ey, e hendenan tabata sa precies ken tabata esnan cu Hesus tabata uza pa percura cuminda spiritual pa e congregacionnan. Al fin y al cabo, e apostelnan—e prome miembronan di e cuerpo gobernante—por a duna prueba palpabel cu nan tabatin Jehova su aprobacion. Echonan 5:12 ta bisa: “E apostelnan a sigui haci hopi milager y cos maraviyoso den e pueblo.” * Pues, esnan cu a bira cristian no tabatin ningun motibo pa puntra nan mes ‘ken realmente Cristo tabata uza pa alimenta su carnenan.’ Pero na final di prome siglo, e situacion a cambia.

13, 14. (a) Encuanto ki atake Hesus a duna spiertamento, y na ki tempo su palabranan a cuminsa cumpli? (b) Menciona e dos maneranan cu e congregacion cristian lo a ser ataca. (Wak nota 5.)

¹³ Hesus a profetisa cu e congregacion cristian lo ta e blanco di atake. Corda cu, den su ilustracion profetico di trigo y mal yerba, el a bisa cu e enemigo lo a sembra mal yerba (cristiannan falso) meymey di e trigo (cristiannan ungi). Anto el a bisa cu lo permiti e dos gruponan aki crece hunto te na cosecha, cu lo ta na “conclusion di un era.” (Mat. 13:24-30, 36-43) Y no a dura mucho cu Hesus su palabranan a cuminsa cumpli. *

¹⁴ Apostasia a lanta cabes for di prome siglo, pero Hesus su fiel apostelnan a fungi como “frena.” Si, nan a preveni cu siñansa falso lo a contamina e congregacion cristian. (2 Tes. 2:3, 6, 7) Sinembargo, despues cu e ultimo apostel a muri, apostasia a plama, y asina e trigo y mal yerba a crece hunto pa hopi siglo. Durante e periodo ey, e mal yerba a bira mas tanto cu e trigo. No tabatin un grupo organisa cu tabata alimenta Hesus su siguidornan den sentido spiritual riba un base regular. Eventualmente esey lo a cambia. Pero na ki tempo?

15, 16. Kico tabata e resultado di e estudio diligente cu e Studiantenan di Bijbel a haci di e Scritura, y ki pregunta esaki ta lanta?

¹⁵ Segun cu e periodo pa e trigo y mal yerba crece hunto tabata yegando na su fin, algun hende a cuminsa mustra hopi interes den berdadnan biblico. Corda cu den e añanan di 1870, un grupo chikito cu tabata yama nan mes Studiantenan di Bijbel tabata bin hunto y forma klasnan pa analisa Bijbel. E klasnan aki no tabata forma parti di ningun iglesia of grupo religioso di cristiandad. E Studiantenan di Bijbel aki tabata studia e Palabra di Dios cuidadosamente, cu un curason humilde y un mente habri, pa nan por a haya sa e berdad.—Mat. 11:25.

¹⁶ Y nan estudio diligente di e Scritura a duna bon resultado. E homber- y muhernan leal aki a saca doctrinanan falso na cla y a plama berdadnan biblico rond mundo mediante literatura basa riba Bijbel cu nan tabata publica y distribui. Hopi hende sincero cu tabatin hamber y sed pa e berdad a lesa nan literatura  y a keda convenci cu esaki ta e berdad. Pesey ta lanta un pregunta masha interesante: Ta e Studiantenan di Bijbel aki Cristo tabata uza prome cu 1914 pa alimenta su carnenan? No. Dicon no? Pasobra e tempo ey, ainda e trigo y mal yerba tabata creciendo hunto, y e grupo cu Cristo lo a uza pa percura cuminda spiritual tabata den desaroyo; nan no tabata cla ainda. Si, ainda no tabata tempo pa separa e supuesto cristiannan for di esnan berdadero.

17. Ki sucesonan importante a cuminsa tuma luga na 1914?

¹⁷ Manera nos a siña den e articulo anterior, e tempo di cosecha a cuminsa na 1914. Y un cantidad di suceso importante a cuminsa tuma luga desde e aña ey. Hesus a ser entronisa como Rey y e ultimo dianan a cuminsa. (Rev. 11:15) Desde di 1914 pa comienso di aña 1919, Hesus y su Tata a inspecciona e tempel spiritual y a haci esaki limpi. * (Mal. 3:1-4) Despues di esey, na cuminsamento di aña 1919, tabata tempo pa e cosechadonan cuminsa recoge e trigo. Awor si tabata tempo pa Cristo nombra, of asigna, un grupo organisa pa percura cuminda spiritual!

18. Ki nombramento Hesus a bisa lo e haci, y ki pregunta importante a surgi despues cu e ultimo dianan a cuminsa?

¹⁸ Den su profecia tocante e tempo di fin, Hesus a profetisa cu lo el a nombra un esclavo, un grupo organisa, pa percura “cuminda [spiritual] na e debido tempo.” (Mat. 24:45-47) Ken ta e esclavo ey? Siguramente Hesus lo a uza e mesun sistema cu el a establece den prome siglo: Lo e uza un par di hende pa alimenta un multitud. Pero ora e ultimo dianan a cuminsa, a lanta e pregunta importante: Ken ta e esclavo, of e par di hendenan, cu Hesus lo a uza? E siguiente articulo lo contesta e pregunta aki y algun otro pregunta tocante e profecia di Hesus.