Curashi Fortifica pa Amor

“Dios no a duna nos un spirito di temor, sino di poder y di amor y di sano huicio.”—2 TIMOTEO 1:7.

1, 2. (a) Amor por motiva un persona pa haci kico? (b) Dicon Hesus su curashi tabata excepcional?

UN PAREHA recien casa tabata duik cerca di un pueblito na costa oriental di Australia. Nan tabata a punto di bin ariba ora cu diripiente un tribon blanco grandi a bin riba e muher. Den un acto heroico, e homber a pusha su casa un banda y laga e tribon ataca e. “El a entrega su bida pa mi”, e viuda a bisa na su entiero.

² Si, amor por motiva hende pa demostra curashi extraordinario. Hesucristo mes a declara: “Ni un hende no tin amor mas grandi cu esaki, cu un hende ta duna su bida pa su amigonan.” (Juan 15:13) Menos cu 24 ora despues cu Hesus a bisa e palabranan aki, el a duna su propio bida, no pa un hende so, sino pa henter humanidad. (Mateo 20:28) Ademas, Hesus no a entrega su bida como un acto impulsivo di balentia. E tabata sa di antemano cu lo e ser ridiculisa y maltrata, sentencia inhustamente y mata riba un staca di tormento. El a asta prepara su discipelnan pa e resultado aki, bisando: “Mira, nos ta bai Jerusalem, y e Yiu di hende lo wordo entrega na e sacerdotenan principal y escribanan; y nan lo conden’e na morto, y lo entreg’e na e paganonan. Y nan lo haci bofon di dje y scupi riba dje y sut’e y mat’e.”—Marco 10:33, 34.

3. Kico a contribui na Hesus su gran curashi?

³ Kico a contribui na Hesus su curashi extraordinario? Fe y temor di Dios a hunga un papel grandi. (Hebreonan 5:7, NW; 12:2) Pero mas cu tur cos, Hesus su curashi a origina di su amor, tanto pa Dios como pa su prohimo. (1 Juan 3:16) Si nos cultiva tal amor banda di nos fe y temor di Dios, nos tambe lo por desplega e mesun tipo di curashi cu Cristo a desplega. (Efesionan 5:2) Con nos por desaroya e clase di amor ei? Nos tin cu reconoce e Fuente di e amor ei.

“Amor Ta Bin di Dios”

4. Dicon nos por bisa cu ta Jehova ta e Fuente di amor?

⁴ Jehova ta e personificacion di amor y a la bes e Fuente di amor. Apostel Juan a skirbi: “Stimanan, laga nos stima otro, pasobra amor ta bin di Dios; y tur cu ta stima ta naci di Dios y conoce Dios. Esun cu no ta stima no conoce Dios, pasobra Dios ta amor.” (1 Juan 4:7, 8) Pues anto, un persona por cultiva amor manera esun di Dios solamente si e hala cerca Jehova mediante conocemento exacto y actua a base di e conocemento ei den obediencia sincero.—Filipensenan 1:9; Santiago 4:8; 1 Juan 5:3.

5, 6. Kico a yuda Hesus su siguidonan di prome desaroya e tipo di amor manera esun di Cristo?

⁵ Den Hesus su ultimo oracion cu su  11 apostelnan fiel, el a mustra e conexion entre conoce Dios y crece den amor, bisando: “Mi a haci bo nomber conoci na nan y lo mi hacie conoci, pa e amor cu cual bo a stima mi por ta den nan y ami den nan.” (Juan 17:26) Hesus a yuda su discipelnan desaroya e clase di amor cu tabata existi entre e cu su Tata. Mediante Hesus su ehempel y su palabranan el a revela loke e nomber di Dios ta representa, esta, Dios su cualidadnan maraviyoso. P’esei Hesus por a bisa: “Esun cu a mira mi a mira e Tata.”—Juan 14:9, 10; 17:8.

⁶ E tipo di amor ei manera esun di Cristo ta un producto di Dios su spirito santo. (Galationan 5:22) Ora cu na Pentecoste di aña 33 e cristiannan di prome a ricibi e spirito santo priminti, nan no solamente a corda e tantisimo cosnan cu Hesus a siña nan, sino tambe a compronde mas plenamente e nificacion di e Scritura. E comprondemento mas profundo aki evidentemente a fortifica nan amor pa Dios. (Juan 14:26; 15:26) Cu ki resultado? Cu curashi y entusiasmo nan a predica e bon nobo, riscando asta nan bida.—Echonan 5:28, 29.

Curashi y Amor den Accion

7. Kico Pablo cu Barnabas tabatin cu soporta durante nan gira como misionero?

⁷ Apostel Pablo a skirbi: “Dios no a duna nos un spirito di temor [“di cobardia”, NW], sino di poder y di amor y di sano huicio.” (2 Timoteo 1:7) Pablo tabata papia di experencia personal. Considera loke e cu Barnabas a pasa aden durante e gira cu nan a haci hunto como misionero. Nan a predica den hopi stad, incluso Antiokia, Iconio y Listra. Den cada stad, algun hende a bira creyente, pero otronan a resulta di ta opositornan agresivo. (Echonan 13:2, 14, 45, 50; 14:1, 5) Na Listra, un multitud furioso asta a piedra Pablo, y a bai lag’e pensando cu el a muri! “Ma ora cu e discipelnan a bin para rond di dje, el a lanta y a bai den stad. Y e dia siguiente el a bai Derbe cu Barnabas.”—Echonan 14:6, 19, 20.

8. Con e curashi cu Pablo y Barnabas a demostra ta refleha nan amor profundo pa hende?

⁸ Acaso e atentado aki contra Pablo su bida a spanta e cu Barnabas y pone nan stop di predica? Al contrario! Despues di ‘a haci hopi hende discipel’ na Derbe, e dos hombernan “a bolbe bai Listra y Iconio y Antiokia.” Pakico? Afin di encurasha e cristiannan nobo pa permanece firme den fe. Pablo cu Barnabas a bisa: “Dor di hopi tribulacion nos mester drenta e reino di Dios.” Ta bisto cu nan curashi a bin di nan amor profundo pa e “lamchinan” di Cristo. (Echonan 14:21-23; Juan 21:15-17) Despues di a nombra ancianonan den cada un di e congregacionnan recien forma, e dos rumannan a haci oracion y ‘a encomenda nan na Jehova, den kende nan a kere.’

9. Den ki manera e ancianonan di Efeso a reacciona riba Pablo su amor pa nan?

⁹ Pablo tabata un persona asina amoroso y cu curashi cu hopi di e cristiannan di prome a haya un amor profundo p’e. Corda kico a tuma luga na un reunion cu Pablo a tene cu e ancianonan cu a bin di Efeso, caminda el a pasa tres aña y a experencia hopi oposicion. (Echonan 20:17-31) Despues di a anima nan pa pastorea e tou cu Dios a confia na nan, Pablo a hinca rudia y a haci oracion hunto cu nan. Anto, “nan a cuminsa yora duro y a brasa Pablo y a sunch’e bes tras bes, masha tristo, specialmente pa e palabra cu el a papia, cu nan lo no mira su cara mas.” Esta un gran amor e rumannan aki tabatin pa Pablo! De echo, ora cu a yega momento pa bai, Pablo cu su compañeronan di biahe tabatin cu ‘ranca nan mes for di nan’, [NW] pasobra e ancianonan local no kier a laga nan bai.—Echonan 20:36–21:1.

10. Con Jehova su Testigonan di e tempo aki cu curashi a desplega amor pa otro?

¹⁰ Awe, superintendentenan biahero, ancianonan di congregacion y hopi otro ruman ta ser stima masha hopi pa e curashi cu nan ta mustra na fabor di Jehova su carnenan. Por ehempel, den paisnan asota pa guera civil of caminda e trabou di predica ta prohibi, superintendentenan  biahero y nan esposa a yega di risca nan bida y nan libertad pa por a bishita e congregacionnan. Di igual manera, hopi Testigo a sufri na man di gobernantenan agresivo y nan compinchinan pasobra nan no a traiciona nan rumannan Testigo ni a revela di unda nan tabata haya cuminda spiritual. Miles di otro cristian a ser persigui, tortura y asta mata pasobra nan no kier a stop di predica e bon nobo of stop di asocia cu nan rumannan den fe na reunionnan cristian. (Echonan 5:28, 29; Hebreonan 10:24, 25) Laga nos imita e fe y amor di e rumannan homber y muher yen di curashi ei!—1 Tesalonicensenan 1:6.

No Laga Bo Amor Fria

11. Den ki maneranan Satanas ta hiba un guera spiritual contra e sirbidornan di Jehova, y kico esaki ta rekeri di nan?

¹¹ Ora cu Satanas a ser tira abou na tera, e tabata determina pa baha su rabia riba e sirbidornan di Jehova pasobra nan “ta warda e mandamentonan di Dios y [ta duna] e testimonio di Hesucristo.” (Revelacion 12:9, 17) Un di e tacticanan di Diabel ta persecucion. Sinembargo, hopi biaha e strategia aki ta logra net lo contrario di loke Satanas ta desea pasobra e ta hala Dios su pueblo mas cerca di otro den e vinculo di amor cristian y ta motiva hopi di nan pa demostra mas celo. Un otro tactica di Satanas ta pa stimula nos inclinacionnan humano pecaminoso. Pa resisti e tactica aki nos tin mester di un otro tipo di curashi pasobra e lucha cu nos tin ta uno interno, contra mal deseonan cu ta den nos curason ‘traicionero y corupto.’—Jeremias 17:9; Santiago 1:14, 15.

12. Con Satanas ta uza “e spirito di mundo” den su intento pa debilita nos amor pa Dios?

¹² Den Satanas su arsenal tin un otro arma potente: “e spirito di mundo.” Esei ta mundo su inclinacion of motivacion dominante cu ta directamente contra di Dios su spirito santo. (1 Corintionan 2:12) E spirito di mundo ta fomenta golosidad y materialismo, esta, “deseo di wowo.” (1 Juan 2:16; 1 Timoteo 6:9, 10) Cosnan material y placa riba nan mes no ta haci daño, pero si nos amor pa nan mester surpasa nos amor pa Dios, e ora ei Satanas a haya un victoria. E poder di e spirito di mundo ta sinta den e echo cu e ta stimula e carni pecaminoso, e ta sutil, astuto y implacabel, anto mescos cu aire, e ta tur caminda. No laga e spirito di mundo contamina bo curason!—Efesionan 2:2, 3; Proverbionan 4:23.

13. Con nos curashi pa mantene nos puresa moral por ser poni na prueba?

¹³ Sinembargo, pa nos resisti y rechasa e spirito malicioso di mundo, nos mester tin curashi pa mantene nos puresa moral. Por ehempel, nos mester tin curashi pa lanta para y sali for di un teater of pa paga e computer of  television ora imagennan indecente aparece. Nos mester tin curashi pa rechasa presion negativo di nos pareunan y pa kibra cu mal asociacion. Di igual manera, nos mester tin curashi pa sostene Dios su lei- y principionan a pesar di bofon, sea bofon di compañeronan di scol, di coleganan di trabou of di bisiña y famia.—1 Corintionan 15:33; 1 Juan 5:19.

14. Kico nos mester haci si e spirito di mundo a contamina nos?

¹⁴ Pues, ta masha importante anto pa nos fortifica nos amor pa Dios y pa nos rumannan spiritual! Tuma tempo pa samina bo metanan y bo estilo di bida pa wak si e spirito di mundo a contamina bo den cualkier manera. Si esei a sosode—maske ta un crenchi asina—e ora ei haci oracion na Jehova y pidie duna bo e curashi pa saca e spirito di mundo afo y ten’e afo. Jehova lo no keda sin scucha e peticionnan sincero ei. (Salmo 51:17) Ademas, su spirito ta hopi mas poderoso cu esun di mundo.—1 Juan 4:4.

Enfrenta Pruebanan Personal cu Curashi

15, 16. Con amor manera esun di Cristo por yuda nos enfrenta pruebanan personal? Duna un ehempel.

¹⁵ Otro retonan cu e sirbidornan di Jehova tin cu lucha cu ne ta entre otro e efectonan di imperfeccion y biehes, cu hopi biaha ta hiba na malesa, incapasidad, depresion y tantisimo otro problema. (Romanonan 8:22) Amor manera esun di Cristo por yuda nos enfrenta e pruebanan aki cu exito. Considera e ehempel di Namangolwa, kende a lanta den un famia cristian na Zambia. Ora cu Namangolwa tabatin dos aña di edad, el a bira incapasita. El a conta: “Mi tabata sinti mi masha incomodo debi na esaki, pensando cu mi aparencia lo spanta hende. Pero mi rumannan spiritual a yuda mi mira e situacion diferente. Como resultado, mi a supera mi berguensa y cu tempo mi a batisa.”

¹⁶ Aunke Namangolwa tin un rolstul, hopi biaha e tin cu gatia riba su man y rudia ora cu e ta riba caminda di tera. Sinembargo, por lo menos dos biaha pa aña e ta participa den e ministerio como pionero ausiliar. Un doño di cas a yora ora cu Namangolwa a predica na dje. Dicon? Pasobra el a sintie profundamente conmovi pa nos ruman muher su fe y curashi. Prueba di Jehova su bendicion rico ta e echo cu cinco studiante di Bijbel di Namangolwa a batisa y un ta sirbi como anciano di congregacion.  Namangolwa a bisa: “Hopi biaha mi tin masha hopi dolor di pia, pero mi no ta laga esei stop mi.” E ruman muher aki ta djis un di e tantisimo Testigonan cu tin rond mundo kendenan ta fisicamente suak pero poderoso den spirito debi na nan amor pa Dios y pa prohimo. Esta precioso tur e personanan ei ta den bista di Jehova!—Hageo 2:7.

17, 18. Kico ta yuda hopi ruman soporta malesa y otro pruebanan? Duna algun ehempel local.

¹⁷ Malesa cronico tambe por desanima nos, asta haci nos deprimi. Un anciano di congregacion a conta: “Den e grupo di estudio di buki caminda mi ta asisti tin un ruman muher ta sufri di diabetes y ta pashent di nier, uno tin cancer, dos tin artritis severo y uno tin lupus plus fibromialgia [un forma di reumatismo]. Tin biaha nan ta sinti nan desanima. Sinembargo, nan ta perde reunion solamente ora nan ta hopi malo of den hospital. Nan tur ta regular den sirbishi di veld. Nan ta laga mi corda riba Pablo, kende a bisa: ‘Ora mi ta debil, e ora ei mi ta fuerte.’ Mi ta admira nan amor y nan curashi. Podise nan situacion ta duna nan un bista mas cla riba bida y riba loke ta realmente importante.”—2 Corintionan 12:10.

¹⁸ Si bo ta lucha contra debilidad fisico, malesa of cualkier otro problema, “haci oracion sin stop”, pidiendo Dios su yudansa ya bo no ta bira victima di desanimacion. (1 Tesalonicensenan 5:14, 17) Naturalmente, lo bo tin bo ups and downs den sentido emocional, pero purba enfoca riba cosnan spiritual y positivo, specialmente riba nos precioso speransa di Reino. Un ruman muher a bisa: “Pa mi, sirbishi di veld ta mi terapia.” Compartiendo e bon nobo cu otro hende ta yud’e mantene un punto di bista positivo.

Amor Ta Yuda Esnan Cu A Haci Malo pa Bolbe Cerca Jehova

19, 20. (a) Kico lo por yuda personanan cu a cai den pica pa haya e curashi pa bolbe cerca Jehova? (b) Kico nos lo considera den e siguiente articulo?

¹⁹ Pa hopi persona cu a bira suak spiritualmente of cu a comete pica no ta facil pa nan bolbe cerca Jehova. Pero nan lo haya e curashi necesario si nan arepenti di curason y rebiba nan amor pa Dios. Tuma por ehempel e caso di Mario, * kende ta biba na Merca. Mario a bandona e congregacion cristian, bira un alcoholico y drogadicto y, despues di 20 aña, a bai sera. Mario a conta: “Mi a cuminsa pensa profundamente riba mi futuro y a bolbe cuminsa lesa Bijbel. Cu tempo, mi a bin aprecia Jehova su cualidadnan, specialmente su misericordia, locual mi a pidie hopi biaha den oracion. Despues cu mi a sali for di prizon, mi a keda leu for di mi amistadnan bieu, mi a bai e reunionnan cristian y cu tempo a ser restaura. Fisicamente, mi ta cosechando loke mi a sembra, pero awor por lo menos mi tin un speransa maraviyoso. Mi no tin palabra pa gradici Jehova pa su compasion y pordon.”—Salmo 103:9-13; 130:3, 4; Galationan 6:7, 8.

²⁰ Un cos ta sigur, personanan den situacionnan similar na esun di Mario tin cu traha duro pa bolbe cerca Jehova. Pero e amor cu nan a rebiba—mediante estudio di Bijbel, oracion y meditacion—lo duna nan e curashi y determinacion necesario. Mario a ser fortifica tambe dor di e speransa di Reino. Si, hunto cu amor, fe y temor di Dios, speransa por ta un forsa poderoso cu ta beneficia nos bida. Den e siguiente articulo, nos lo analisa e precioso don spiritual aki mas djacerca.

[Nota]

Bo Por Contesta Esaki?

• Con amor a contribui na Hesus su curashi extraordinario?

• Con amor pa e rumannan a duna Pablo cu Barnabas un curashi excepcional?

• Mediante kico Satanas ta purba caba cu amor cristian?

• Amor pa Jehova por duna nos e curashi pa soporta ki tipo di pruebanan?

[Preguntanan di Estudio]

[Plachi na pagina 23]

Pablo su amor pa hende a dun’e e curashi pa persevera

[Plachi na pagina 24]

Nos tin mester di curashi pa sostene Dios su normanan

[Plachi na pagina 24]

Namangolwa Sututu