“Nos Mester Obedece Dios Mas cu Hende”

‘Nos Dios Por Libra Nos’

INTENCION di e evento tabata pa e ta algo impresionante. Nan a traha un imagen di oro masha grandi mes riba e sabana di Dura, aparentemente cerca di e stad di Babilonia. E imagen lo a keda inaugura durante un ceremonia special na cua lo a asisti funcionarionan halto cu mester a buig dilanti di e imagen na momento cu cuminsa toca un variedad di instrumento musical. Rei Nabucodonosor di Babilonia a decreta cu esun cu keda sin adora e imagen lo a muri den un forno supercayente. Ken lo a tribi desobedece e orden aki?

Pa sorpresa di esnan presente, tres persona cu tabata teme Jehova y ador’e—Sadrak, Mesak y Abed-nego—no a buig. Nan tabata sa cu esei lo tabata un violacion di nan devocion exclusivo na Jehova. (Deuteronomio 5:8-10, NW) Ora cu Nabucodonosor a exigi for di nan pa splica nan posicion firme, nan a bis’e sin tene miedo: “Si t’asina, nos Dios, kende nos ta sirbi, por libra nos for di e forno di candela cayente cayente, y e lo libra nos for di bo man, o rei. Ma asta si e no haci esei, sea sigur, o rei, cu nos no ta bai sirbi bo diosnan, ni adora e imagen di oro cu bo a lanta.”—Daniel 3:17, 18.

Ora cu a tira e tres Hebreonan den e forno di candela, ta un milager a pone cu nan a scapa. Dios a manda un angel pa proteha su sirbidornan fiel. Pero ya nan a scohe cu nan lo a prefera di muri y no desobedece Jehova. * Nan a tuma e mesun posicion cu e apostelnan di Hesucristo, kendenan mas cu seis siglo despues a declara dilanti di e corte supremo Hudiu: “Nos mester obedece Dios mas cu hende.”—Echonan 5:29.

Lesnan Masha Importante pa Nos

Sadrak, Mesak y Abed-nego ta ehempelnan excelente di fe, obediencia y lealtad. E tres Hebreonan a eherce fe den Jehova. Nan consenshi biblicamente entrena no a permiti nan participa den ningun acto di adoracion falso ni di devocion nacionalista. Cristiannan djawe tambe ta pone nan pleno confiansa den e Dios berdadero. Nan ta ser guia pa nan consenshi biblicamente entrena y nan ta nenga di participa den actonan di adoracion falso of den ceremonianan cu ta viola Dios su lei- y principionan.

E tres Hebreonan fiel a confia den Jehova y a nenga di renuncia nan obediencia na Dios pa haya a cambio reconocemento, status of gloria cu e Imperio di Babilonia tabata ofrece. E hombernan hoben ei a prefera di sufri y muri y no daña nan relacion cu Dios. Mescos cu Moises a haci mas prome, nan “a keda firme, como si fuera [nan] tabata mira Esun cu ta invisibel.” (Hebreonan 11:27) Sea cu Jehova a scohe pa libra nan di morto of no, e tres hobennan ei tabata dicidido pa mantene  integridad na dje y no compromete nan fe djis pa salba nan bida. Apostel Pablo, referiendo evidentemente na nan ehempel, ta menciona personanan fiel cu “a paga e poder di candela.” (Hebreonan 11:34) Awe tambe sirbidornan di Jehova ta manifesta tal fe y obediencia ora cu nan ta confronta pruebanan di integridad.

For di e experencia di Sadrak, Mesak y Abed-nego, nos ta siña tambe cu Dios ta recompensa lealtad na dje. E salmista a canta: “Jehova . . . [lo] no bandona su lealnan.” (Salmo 37:28, NW) Awe, nos no por spera cu Dios ta libra nos milagrosamente, manera el a haci cu e tres Hebreonan. Pero sin importa ki situacion dificil nos ta confronta, nos por tin sigur cu nos Tata celestial lo percura yudansa. Dios por sea elimina e problema, duna nos e fortalesa pa soport’e of resusita nos si nos mantene nos integridad te na morto. (Salmo 37:10, 11, 29; Juan 5:28, 29) Fe, obediencia y lealtad ta triunfa cada biaha cu nos integridad ser poni na prueba y nos scohe pa obedece Dios mas cu hende.

[Nota]

[Cuadro/​Plachi na pagina 9]

BO TABATA SA?

• E tres Hebreonan tabatin casi 30 aña ora cu nan a confronta e prueba aki di nan integridad.

• Evidentemente a haci e forno mas cayente posibel.—Daniel 3:19.