Pregunta di Lector

Salmo 102:26 ta bisa cu tera y shelo “lo perece.” E declaracion ei ta nifica cu planeta Tera lo ser destrui?

Den un oracion na Yehova, e salmista a declara: “For di principio bo a funda tera; y e shelonan ta e obra di bo mannan. Nan lo perece, ma abo lo permanece; nan tur lo gasta manera un bisti; manera paña lo bo cambia nan, y nan lo ta cambia.” (Salmo 102:25, 26) E contexto ta mustra cu e versiculonan aki ta papia di e echo cu Dios ta eterno, y no tocante di destruccion di tera. E contexto ta mustra tambe dicon e berdad sumamente importante ei ta un consuelo pa sirbidonan di Dios.

E salmista, cu podise tawata den exilio na Babilonia, ta cuminsa cu un descripcion di su afliccionnan. E ta lamenta cu su bida ta pasahero “manera huma.” Ansiedad emocional intenso ta ataca su curpa, poniendo cu e ta sinti cu su wesonan ta “kima manera fogon.” E ta agota, “marchita manera yerba”, y e ta sinti su mes so, ‘manera un parha solitario riba dak di cas.’ Su pruebanan a pon’e perde su apetit, y su dianan ta yen di tristesa. (Salmo 102:3-11) Pero toch e salmista no a perde tur speransa. Dicon no? Debi na loke Yehova a priminti di haci cu Sion, esta, Herusalem.

Aunke Sion a ser destrui, Yehova a priminti cu lo e ser restaura. (Isaias 66:8) Pesei e salmista cu confiansa ta bisa Yehova: “Lo bo . . . tene compasion cu Sion; pasobra ta tempo pa tin misericordia di dje, pasobra e tempo stipula a yega. Pasobra SEÑOR a construi Sion.” (Salmo 102:13, 16) Anto e salmista ta bai bek na e topico di su sufrimento personal. De echo e ta rasona cu si Herusalem desola por ser restaura mediante e poder di Dios, Yehova sigur tin e capasidad pa rescat’e for di su condicion infelis. (Salmo 102:17, 20, 23) Tawatin un otro cos mas cu a motiva e salmista pa pone su pleno confiansa den Yehova. Kico esei tawata? E echo cu Dios ta eterno.

Yehova su existencia eterno ta para na contraste skerpi cu e bida cortico di e salmista mes. El a bisa Yehova: “Bo añanan ta dura di generacion pa generacion.” (Salmo 102:24) Anto e salmista a sigui bisa: “For di principio bo a funda tera; y e shelonan ta e obra di bo mannan.”—Salmo 102:25.

Sinembargo, Yehova su existencia eterno no por ser compara ni sikiera cu e edad hopi halto di tera y di shelo. E salmista ta agrega: “Nan [tera y shelo] lo perece, ma abo lo permanece.” (Salmo 102:26) Tera y shelo material ta cos cu por caba. Ta berdad cu Yehova a declara den otro versiculonan cu nan lo dura pa semper. (Salmo 119:90; Eclesiastes 1:4) Pero nan lo por ser destrui si esei tawata Dios su proposito. Na contraste, Dios no por muri. E unico motibo pakico e creacion material ta permanece “pa semper y semper” ta pasobra Dios ta mantene nan. (Salmo 148:6) Si un dia Yehova stop di renoba e creacion material, anto “nan tur lo gasta manera un bisti.” (Salmo 102:26) Mescos cu un hende ta biba mas largo cu su pañanan, asina tambe Yehova lo por biba bai laga su creacion, si e kier haci esei. Sinembargo, nos sa for di otro textonan biblico cu esei no ta su boluntad. E Palabra di Dios ta sigura nos cu Yehova a determina cu e tera y shelo literal lo permanece pa semper.—Salmo 104:5.

Ta un consuelo pa sa cu Yehova semper lo t’ei pa cumpli cu tur su promesanan. Sin importa ki pruebanan por bin riba nos, ora nos sclama na dje, nos por tin e confiansa cu lo e ‘considera e oracion di esnan desampara y lo no desprecia nan oracion.’ (Salmo 102:17) Si, e garantia cu nos ta haya den Salmo 102 cu Yehova lo sostene nos, ta mas solido cu e tera riba cua nos ta para.