Beneficia di e Mihor Educacion Cu Ta Existi!

BIJBEL ta identifica Yehova Dios como e Creador di tur cos, incluso hende. (Genesis 1:27; Revelacion 4:11) Como e Magnifico Instructor, el a educa e prome pareha humano, Adam cu Eva, y a prepara nan pa biba den e bunita hofi di Eden. Su proposito tawata pa sigui educa nan y percura pa nan pa semper. (Genesis 1:28, 29; 2:15-17; Isaias 30:20, 21) Djis pensa ki futuro tawata spera nan!

Pero lamentablemente e prome pareha a tira nan futuro afo. Nan desobediencia a habri caminda pa e degeneracion moral y fisico di e rasa humano. (Genesis 3:17-19; Romanonan 5:12) Referiendo na e personanan cu a biba apenas un par di generacion despues cu hende a ser crea, Bijbel ta bisa: “SEÑOR a mira cu maldad di hende tawata grandi riba tera, y cu tur intencion di e pensamentonan di su curason tawata continuamente maldad so.”—Genesis 6:5.

Casi 4.500 aña a pasa desde cu Yehova a conclui cu hende ta constantemente inclina pa haci malo, y aworaki e situacion di humanidad ta mas piyo cu nunca. Hopi hende ta gaña sin cuero di cara, horta of ataca otro. Problemanan ta aumenta tur dia, mientras cu interes den prohimo ta mengua. No ta bisto cu mayoria relacion personal, incluso esnan den famia, ta den un berdadero crisis? Pero hende no por culpa Dios pa e situacion actual. Nan no por bisa tampoco cu Dios no ta interesa mas den e problemanan djawe. Semper Yehova tawata interesa den e bienestar di hende, y e ta dispuesto pa educa esnan cu ta acudi na dje en busca di guia pa logra un bida felis. Un 2.000 aña pasa el a manda su Yiu Hesucristo na tera y a demostra cu E ta interesa pa educa hende cu kier tin exito den nan bida. E tempo sumamente largo cu Hesus a ricibi instruccion di e Magnifico Instructor a capasit’e pa e laga un modelo di educacion perfecto pa nos.

Cristianismo Berdadero—Un Educacion

Hesucristo ta esun cu a institui cristianismo berdadero, un manera di biba basa riba amor. Den cristianismo berdadero tur pensamento y accion mester ta na harmonia cu e boluntad di Dios, cu e proposito di trece honor y gloria pa su nomber. (Mateo 22:37-39; Hebreonan 10:7) Esun cu tawata tras di Hesus su siñansanan tocante e caminda di bida aki tawata su Tata, Yehova. Na Huan 8:29 nos ta lesa tocante e apoyo cu Hesus a ricibi di Dios: “Esun cu a manda mi ta cu mi; e no a laga mi mi so, pasobra semper mi ta haci e cosnan cu ta agrad’e.” Si, Hesus tawatin e apoyo y guia di su Tata atrabes di su ministerio. E prome siguidonan di Hesus no tawatin cu enfrenta e desafionan di bida sin guia. Yehova a educa nan pa medio di su Yiu. E echo cu nan a sigui e siñansanan y ehempel di Hesus a haci nan mihor hende. Mescos ta conta pa su disipelnan awe.—Wak e cuadro “E Influencia di Hesus y Su Siñansanan”, na pagina 6.

Un caracteristica particular di cristianismo berdadero ta cu e ta encera educacion cu ta influencia  mente y curason di hende, y pesei ta logra cambia hende di paden. (Efesionan 4:23, 24) Pa menciona djis un ehempel, considera loke Hesus a siña hende tocante fieldad den matrimonio: “Boso a tende cu a wordo bisa: ‘No comete adulterio’; ma ami ta bisa boso cu ken cu wak un mohe pa dese’e, ya caba el a comete adulterio cu ne den su curason.” (Mateo 5:27, 28) Cu e palabranan aki, Hesus a siña su disipelnan cu nan curason mester ta limpi, y cu maske pensamento- y deseonan impuro no a ser realisa ainda, esakinan por tin consecuencia serio. No ta berdad cu mal pensamento por hiba na actonan cu ta ofende Dios y perhudica otro hende?

Pesei Bijbel ta duna e conseho aki: “No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.” (Romanonan 12:2) Podise bo ta puntra bo mes: ‘Ta realmente posibel pa renoba mi mente pa medio di educacion?’ Renoba mente ta nifica motiv’e den un otro direccion door di yen’e cu e principionan y instruccion di e Palabra di Dios. Bo por logra esaki door di acepta e educacion cu Dios ta provee mediante su Palabra.

Motiva pa Haci Cambio

“E palabra di Dios ta bibo y poderoso.” (Hebreonan 4:12, BPK) Ainda e ta eherciendo un influencia poderoso riba hende, y esei ta duna prueba cu e no ta bira anticua. E por duna un persona e motivacion pa cambia su rumbo den bida, acepta cristianismo berdadero y bira un mihor persona. E siguiente ehempelnan ta ilustra e balor di educacion biblico.

Emilia, menciona den e articulo anterior, a declara: “No tawata suficiente pa djis haci esfuerso riba mi mes pa mehora e situacion na cas. Ora mi a cuminsa studia Bijbel cu Testigonan di Yehova, mi a realisa cu tawatin speransa y mi a cuminsa cambia mi actitud. Mi a siña tene mas pasenshi y stop cu atakenan di rabia. Cu tempo, mi esposo tambe a cuminsa participa den e estudio. No tawata facil pa e stop di bebe, pero el a logra. Esaki a duna nos matrimonio un comienso nobo. Awor nos ta cristiannan felis y nos ta inculcando den nos yiunan e principionan excelente di Bijbel.”—Deuteronomio 6:7.

E educacion cu berdadero cristianismo ta percura por libra un persona di bicio y un estilo di bida inmoral. Manuel * a comproba esaki. Dia e tawatin 13 aña, el a bai for di cas y a cuminsa huma marihuana. Cu tempo, el a pasa pa heroina. E tawata tene relacion sexual cu homber y mohe a cambio di placa y un dak riba su cabes. Na algun ocasion Manuel tawata sostene su mes tambe door di comete  atraco. Casi semper e tawata bou di influencia di droga. Hopi bes, su conducta violento a pone cu el a bai sera. Un biaha el a pasa cuater aña tras di trali, y eiden el a haya su mes envolvi den traficacion di arma. Despues cu Manuel a casa, el a sigui cosecha e mal consecuencianan di e tipo di bida cu el a hiba. El a bisa: “Nos a bin resulta den loke un tempo tawata un haula di galiña. Esei tawata nos cas. Ainda mi ta corda con mi casa tawata cushna riba bloki. Nos situacion tawata asina precario cu mi mes famia tawata conseha mi casa pa e bai laga mi.”

Kico a cambia su bida? Manuel a contesta: “Un conoci di mi a bini nos cas pa papia tocante Bijbel. Mi a acepta su bishitanan djis pa mustr’e cu no ta existi un Dios cu ta interesa den hende. Mi a considera mi mes un prueba bibo di esei. Pero e Testigo su pasenshi y bon manera a impresiona mi, pesei mi a acepta su invitacion pa asisti na e reunionnan na Salon di Reino. Aunke algun di e personanan einan tawata sa di mi bida, nan a cuminda mi amigablemente. Nan a laga mi sinti mi mescos cu un di nan, locual tawata un gran consuelo pa mi. Tur esei a motiva mi pa dicidi di stop di uza droga y busca un trabou honrado. Cuater luna despues cu mi a cuminsa studia Bijbel, mi a cualifica pa participa den e trabou di predica, y cuater luna despues di esei, mi a batisa como Testigo di Yehova.”

Kico cristianismo berdadero a nifica pa Manuel y su famia? “Sin educacion di Bijbel lo mi tawata morto sigur hopi aña caba. E caminda di bida cu Hesus a siña hende a duna mi mi famia bek. Mi dos yiunan no tin nodi pasa den loke ami a pasa como hoben. Mi ta sinti mi orguyoso y hopi gradicido na Yehova pa e bon relacion cu mi tin cu mi casa actualmente. Algun di mi conocinan di antes a felicita mi y a bisa mi cu nan ta haya cu e bida cu mi ta hibando aworaki ta esun di mas mihor.”

 Den e bida cristian, un hende cu ta moralmente limpi mester ta fisicamente limpi tambe. John, kende ta biba den un area hopi pober na Sur Africa, a bin compronde esei. El a splica: “Tin biaha nos yiu mohe tawata pasa un siman sin baña, y aparentemente ningun di nos no tawata worry.” Su esposa a admiti cu nan cas tawatin un aspecto teribel. Pero cu educacion cristian, cosnan a cambia. John a stop di asocia cu un gang cu ta joyride auto y a cuminsa duna mas atencion na su famia. “Nos a siña cu como cristian, nos mester tene nos curpa y paña limpi. Mi gusta e palabranan na 1 Pedro 1:16 cu ta spierta nos pa nos ta santo pasobra Yehova Dios ta santo. Awor nos tambe ta purba duna nos cas simpel un toke agradabel.”

Bo Por Haya e Mihor Educacion

E experencianan menciona anteriormente no ta casonan excepcional. Como resultado di educacion basa riba Bijbel, miles di hende a siña hiba un mihor bida. Door cu nan ta honrado y diligente, nan doñonan di trabou ta aprecia nan. Nan a bira bon biciña y amigo, y nan ta mustra interes den e bienestar di nan prohimo. Nan ta determina pa evita bicio- y tendencianan carnal, y nan ta cuida nan salud fisico, mental y emocional mihor. En bes di dispidi nan recursonan cu bicio, nan ta uza esakinan pa e bienestar di nan mes y di nan famia. (1 Corintionan 6:9-11; Colosensenan 3:18-23) Sin duda, e resultadonan di pone na practica e siñansa di e Palabra di Yehova ta demostra cu cristianismo berdadero ta produci e mihor bida posibel. Ta trata aki di e mihor educacion cu ta existi. Relaciona cu e persona cu ta biba na harmonia cu e leinan di Dios, Bijbel ta declara: “Tur loke cu e haci ta prospera.”—Salmo 1:3.

Ta un animacion pa sa cu e Dios Todopoderoso, Yehova, ta dispuesto pa educa nos. E ta bisa di su mes: “Ami ta SEÑOR bo Dios, Kende ta siña bo, pa bo prospera, Kende ta guia bo den e caminda cu bo mester cana.” (Isaias 48:17) Si, Yehova a mustra cua ta e caminda pa medio di e ehempel y siñansanan di su Yiu Hesucristo. Hesus su siñansanan a cambia e bida di hopi hende cu a conoc’e tempo cu e tawata riba tera, y esei ta e caso tambe cu hopi otro hende cu awe ta biba segun su siñansanan. Pakico no tuma tempo pa haya sa mas di e siñansanan aki? Testigonan di Yehova den bo bicindario gustosamente lo yuda bo ricibi e educacion balioso ei.

[Nota]

[Cuadro/Plachi na pagina 6]

E Influencia di Hesus y Su Siñansanan

Zakeo a maluza su posicion como cobrado principal di belasting pa bira rico door di estafa y horta placa di hende comun. Pero el a cambia su bida door di aplica e siñansanan di Hesus.—Lucas 19:1-10.

Saulo di Tarso a stop di persigui e cristiannan y a comberti na cristianismo, locual a hacie apostel Pablo.—Echonan 22:6-21; Filipensenan 3:4-9.

Algun di e cristiannan na Corinto tawata ‘fornicado, adorado di dios falso, adultero, homosexual, ladron, golos pa placa, burache, blasfemado y estafado.’ Pero, ora nan a siña di cristianismo berdadero, nan a ‘wordo laba, santifica y hustifica den e nomber di nan Señor Hesucristo.’—1 Corintionan 6:9-11.

[Plachi na pagina 7]

Bijbel por mustra bo con bo por tin exito