Un Lei di Amor Skirbi Riba Curason

“Lo mi pone mi lei den nan y lo mi skirbie riba nan curason.”—YEREMIAS 31:33.

1, 2. (a) Kico nos lo considera awor? (b) Con Yehova a manifesta su mes na Sero Sinai?

DEN e dos articulonan anterior, nos a siña cu ora Moises a baha for di Sero Sinai, su cara tawatin un briyo cu a refleha e gloria di Yehova. Tambe nos a trata e velo cu Moises a tapa su cara cu ne. Laga nos considera awor un asunto relaciona cu esakinan cu ta importante pa cristiannan djawe.

² Ora Moises tawata riba e sero, el a ricibi instruccion for di Yehova. E Israelitanan reuni dilanti di Sero Sinai tawata testigo di un manifestacion masha impresionante mes di Dios. “Tawatin strena y lamper y un nubia diki riba e sero y un zonido masha duro mes di trompet, asina cu henter e pueblo cu tawata den e campamento tawata tembla. ... Awor Sero Sinai tawata tur na huma, pasobra SEÑOR a baha riba dje den candela; y su huma tawata subi manera huma di forno, y henter e sero tawata sagudi masha duro mes.”—Exodo 19:16-18.

3. Con Yehova a duna e Dies Mandamento na Israel, y kico e nacion a bin compronde?

³ Yehova a papia cu e pueblo mediante un angel, y a duna nan e leinan cu a bira conoci como Dies Mandamento. (Exodo 20:1-17) Pues, no por tawatin ningun duda cu e leinan aki a bin di e Todopoderoso. Yehova a skirbi e mandamentonan ei riba tabla di piedra, pero Moises a kibra e tablanan ora cu el a mira e Israelitanan ta adora un bishe di oro. Yehova a bolbe skirbi e mandamentonan riba piedra. E biaha aki, ora Moises a baha for di e sero cu e tablanan, su cara tawata briya. E ora ei si tur hende lo a compronde cu e leinan ei tawata sumamente importante.—Exodo 32:15-19; 34:1, 4, 29, 30.

4. Dicon e Dies Mandamento tawata di gran importancia?

⁴ A pone e dos tablanan riba cua e Dies  Mandamento tawata skirbi den e arca di aliansa den e Santisimo di e tabernakel y mas despues den e Santisimo di e tempel. E leinan cu tawatin riba e tablanan ei a declara e principionan basico di e aliansa di e Lei di Moises y a forma e base pa e manera cu Dios lo a goberna e nacion di Israel. E leinan a duna prueba cu Yehova tawata trata cu un pueblo spesifico, un pueblo scohi.

5. Den ki maneranan Dios su leinan cu el a duna Israel a refleha su amor?

⁵ E leinan ei a bisa nos hopi di Yehova, specialmente di su amor pa su pueblo. Nan a resulta di ta un regalo precioso pa esnan cu a obedece nan! Un comentarista biblico a skirbi: “Ningun sistema moral cu hende a yega di formula sea prome of despues ... por aproxima, mucho menos iguala e dies mandamentonan aki di Dios of sobresali riba nan.” Relaciona cu e Lei di Moises den su totalidad, Yehova a bisa: “Si di berdad boso kier obedece mi bos y warda mi aliansa, e ora ei boso lo ta un tesoro peculiar riba tur pueblo, pasobra henter tera ta di mi; y boso lo ta pa mi un reino di sacerdotenan y un nacion santo.”—Exodo 19:5, 6.

Un Lei Skirbi Riba Curason

6. Ki lei a resulta hopi mas balioso cu lei skirbi riba piedra?

⁶ Si, e leinan divino ei tawatin gran balor. Pero bo tawata sa cu cristiannan ungi tin algo hopi mas balioso cu lei skirbi riba piedra? Yehova a profetisa cu lo el a sera un aliansa nobo, uno distinto for di e aliansa di Lei cu el a sera cu e nacion di Israel. “Lo mi pone mi lei den nan y lo mi skirbie riba nan curason.” (Yeremias 31:31-34) Hesus, e Mediador di e aliansa nobo, no a duna su siguidonan un codigo di lei skirbi. El a inculca e lei di Yehova den mente y curason di su disipelnan door di e cosnan cu el a bisa y haci.

7. Na prome instante, ta na ken a duna “e lei di Cristo”, y ken a acept’e mas despues?

⁷ Bijbel ta yama e lei aki “e lei di Cristo.” Na prome instante e no a ser duna na e nacion di Israel natural, cu tawata desendiente di Yacob, sino na un nacion spiritual, “e Israel di Dios.” (Galationan 6:2, 16; Romanonan 2:28, 29) E Israel di Dios ta consisti di cristiannan ungi cu spirito. Cu tempo, “un multitud grandi” di tur nacion, kendenan tambe ta haci esfuerso pa adora Yehova, a join e cristiannan ungi. (Revelacion 7:9, 10; Zacarias 8:23) Siendo “un tou” bou di “un wardado”, ambos grupo ta acepta “e lei di Cristo”, y ta laga e lei ei dirigi tur loke nan ta haci.—Huan 10:16.

8. Menciona un diferencia entre e Lei di Moises y e lei di Cristo.

⁸ Distinto for di e Israelitanan natural, cu mester a cumpli cu e Lei di Moises pasobra nan a nace den e nacion di Israel, cristiannan ta keda bou di e lei di Cristo di nan  propio boluntad, y factornan manera rasa y luga di nacemento no ta relevante. Nan ta siña tocante Yehova y su camindanan y ta anhela pa haci su boluntad. Siendo cu cristiannan ungi tin e lei di Dios “den nan”—skirbi na moda di papia “riba nan curason”—nan no ta obedece Dios djis pasobra e por castiga esnan cu desobedece; tampoco nan no ta obedec’e djis pa cumpli cu un deber. Nan obediencia ta hancra den algo mas fundamental y hopi mas poderoso, y e otro carnenan tambe ta obediente pasobra nan tin e lei di Dios den nan curason.

Leinan Basa Riba Amor

9. Con Hesus a indica cu amor tawata e esencia di e leinan di Yehova?

⁹ Nos por resumi e esencia di tur Yehova su lei- y statutonan den un solo palabra: amor. Esei semper tawata y semper lo ta un parti esencial di adoracion puro. Ora nan a puntra Hesus cua tawata e mandamento di mas grandi di e Lei, el a contesta: “Stima SEÑOR bo Dios cu henter bo curason, y cu henter bo alma, y cu henter bo mente.” E di dos tawata: “Stima bo prohimo manera bo mes.” Caba Hesus a bisa: “Riba e dos mandamentonan aki henter e Lei y e Profetanan ta basa.” (Mateo 22:35-40) Asina Hesus a indica cu no ta solamente e Lei cu e Dies Mandamento tawata basa riba amor, sino henter e Scritura Hebreo.

10. Con bin nos sa cu amor ta e punto central di e lei di Cristo?

¹⁰ Amor pa Dios y amor pa prohimo ta e punto central tambe di e lei cu tin skirbi riba curason di cristiannan? Sigur cu si! E lei di Cristo tin di aber cu un amor sinsero  pa Dios y ta encera un mandamento nobo—cristiannan mester tin amor di sacrificio propio pa otro. Nan mester stima otro manera Hesus a stima su disipelnan, y boluntariamente a entrega su bida na fabor di su amigonan. El a siña su disipelnan pa nan stima Dios y stima otro, mescos cu el a stima nan. E amor extraordinario cu nan ta mustra na otro ta e cualidad principal na cua por reconoce cristiannan berdadero. (Huan 13:34, 35; 15:12, 13) Hesus asta a instrui nan pa stima nan enemigonan.—Mateo 5:44.

11. Con Hesus a demostra amor tanto pa Dios como pa humanidad?

¹¹ Hesus a pone e ehempel perfecto den mustra amor. Como un criatura spiritual poderoso den shelo, gustosamente el a acepta e oportunidad di promove e interesnan di su Tata riba tera. Fuera di sacrifica su bida humano pa otro hende por biba pa semper, el a mustra hende tambe con nan mester biba. Hesus tawata humilde, bondadoso y comprensivo, y a yuda esnan carga y oprimi. Tambe el a comparti “palabranan di bida eterno”, y a traha incansablemente pa yuda hende siña conoce Yehova.—Huan 6:68.

12. Dicon nos por bisa cu amor pa Dios y pa prohimo ta inseparablemente liga cu otro?

¹² En realidad, amor pa Dios y pa prohimo ta inseparablemente liga cu otro. Apostel Huan a declara: “Amor ta bin di Dios ... Si un hende bisa: ‘Mi ta stima Dios’, y ta odia su ruman, e ta un gañado; pasobra esun cu no ta stima su ruman cu el a mira, no por stima Dios, kende e no a mira.” (1 Huan 4:7, 20) Yehova ta e fuente y tambe e personificacion di amor. Tur loke cu Yehova haci ta influencia pa amor. Nos ta stima pasobra nos a ser traha den su imagen. (Genesis 1:27) Door di mustra amor na nos prohimo, nos ta demostra nos amor pa Dios.

Stima Kiermen Obedece

13. Pa nos por stima Dios, kico nos mester haci prome?

¹³ Con nos por stima Dios, kende nos no por mira? E prome paso crucial ta pa siña conoc’e. Nos no por realmente stima of confia un persona desconoci. Pues, e Palabra di Dios ta anima nos pa siña conoce Dios door di lesa Bijbel, door di haci oracion y door di asocia cu esnan cu ya caba stim’e y conoc’e. (Salmo 1:1, 2; Filipensenan 4:6; Hebreonan 10:25) Specialmente e cuater Evangelionan ta hopi balioso, pasobra nan ta revela e personalidad di Yehova manera Hesucristo a refleha esei den su bida y ministerio. Nos deseo pa obedece Dios y imita su personalidad ta bira mas y mas fuerte segun cu nos ta siña conoc’e y ta aprecia e amor cu el a mustra na nos. Si, amor pa Dios ta encera obediencia.

14. Dicon nos por bisa cu e leinan di Dios no ta pisa?

¹⁴ Nos ta conciente di loke e personanan cu nos ta stima ta gusta y no ta gusta, y nos ta comporta nos mes di acuerdo cu esei. Nos no kier haci nada cu ta desagrada esnan cu nos ta stima. Apostel Huan a skirbi: “Esaki ta e amor di Dios, cu nos ta warda su mandamentonan; y su mandamentonan no ta pisa.” (1 Huan 5:3) Nan no ta pisa ni nan no ta hopi. Ta amor ta guia nos caminda. Nos no tin nodi siña henter un set di regla for di cabes pa dirigi delaster un stap cu nos dal; nos amor pa Dios ta guia nos. Si nos ta stima Dios, ta un placer pa haci su boluntad. Di e manera ei nos ta gana Dios su aprobacion, y nos ta beneficia nos mes ya cu su instruccion semper ta traha na nos fabor.—Isaias 48:17.

15. Kico lo motiva nos pa imita Yehova? Splica.

¹⁵ Amor pa Dios ta motiva nos pa imita su cualidadnan. Ora nos ta stima un persona, nos ta admira su cualidadnan y ta purba di  ta mescos cu ne. Considera e relacion entre Yehova cu Hesus. Nan tawata hunto den shelo pa podise miles di miyones di aña. Nan a desaroya un amor profundo y puro pa otro. Hesus a parce su Tata celestial asina perfectamente cu e por a bisa su disipelnan: “Esun cu a mira mi a mira e Tata.” (Huan 14:9) Segun cu nos ta siña conoce y aprecia Yehova y su Yiu, nos ta sinti nos motiva pa ta mescos cu nan. Nos amor pa Yehova, hunto cu e yudansa di su spirito santo, lo capasita nos pa “pone un banda e hende [of, “personalidad”, NW] bieu cu su practicanan malbado, y ... bisti e hende nobo.”—Colosensenan 3:9, 10; Galationan 5:22, 23.

Amor den Accion

16. Dicon nos actividad di predica y siña hende ta demostra nos amor pa Dios y pa prohimo?

¹⁶ Como cristian, nos ta laga nos amor pa Dios y pa prohimo motiva nos pa participa den e trabou di predica e Reino y haci disipel. Asina nos ta haci Yehova Dios contento, pasobra e “ta desea pa tur hende wordo salba y yega na conocemento di e berdad.” (1 Timoteo 2:3, 4) Pesei nos por haya goso door di yuda otro hende skirbi e lei di Cristo riba nan curason. Y ta un placer pa nos mira nan progreso segun cu nan ta transforma nan personalidad pa e refleha e cualidadnan divino di Yehova. (2 Corintionan 3:18, NW) En realidad, e regalo di mas precioso cu nos por duna otro hende ta di yuda nan siña conoce Dios. Esnan cu acepta Yehova su amistad por disfruta di dje pa eternidad.

17. Dicon ta mas sabi pa cultiva amor pa Dios y pa prohimo en bes di amor pa cos material?

¹⁷ Nos ta biba den un mundo caminda  hende ta duna gran balor na cos material y ta asta stima nan. Sinembargo, cos material no ta keda pa semper. Hende por horta nan of nan por daña. (Mateo 6:19) Bijbel ta spierta nos: “Mundo ta pasa bai y su deseonan tambe, ma esun cu haci e boluntad di Dios ta permanece pa semper.” (1 Huan 2:16, 17) Si, Yehova lo keda pa semper, y tambe esnan cu ta stim’e y sirbie. Pues anto, lo no ta mas sabi pa nos cultiva amor pa Dios y pa hende en bes di core tras di e cosnan di mundo, cu asta den e miho circunstancia t’ei djis pa un tempo?

18. Con un misionero a demostra amor di sacrificio propio?

¹⁸ Personanan cu ta sigui tras di amor ta trece alabansa na Yehova. Tuma por ehempel Sonia, un misionero na Senegal. El a studia Bijbel cu un señora cu yama Heidi, kende a haya HIV di su casa incredulo. Heidi a batisa despues cu su casa a muri, pero no a dura hopi cu su salud a bai atras y el a keda hospitalisa cu AIDS. Sonia a conta: “E personal di hospital a haci nan best, pero nan tawata masha tiki. E congregacion a haci un apelacion pa haya rumannan boluntario pa atende Heidi su necesidadnan den hospital. E di dos anochi cu e tawata hospitalisa, mi a drumi banda di su cama riba un cama di habri abou y a yuda cuid’e te na su morto. E docter encarga a bisa: ‘Nos problema di mas grandi ta cu hopi biaha asta famianan ta bandona nan hendenan ora cu nan sa cu nan tin AIDS. Dicon abo, cu no ta su famia, no ta di e mesun pais, ni sikiera di su mesun color, a bai di acuerdo pa core un riesgo?’ Mi a splic’e cu pa mi, Heidi tawata echt mi ruman mohe, como si fuera nos tawatin e mesun mama cu tata. Unabes mi a siña conoce e ruman mohe nobo aki di mi, tawata un placer pa mi cuid’e.” Por cierto, Sonia su esfuerso amoroso pa cuida Heidi, no tawatin ningun mal consecuencia p’e.

19. Siendo cu nos tin e lei di Dios skirbi riba nos curason, di kico nos tin cu probecha?

¹⁹ Entre e sirbidonan di Yehova nos por haya hopi ehempel di amor di sacrificio propio. No tin un codigo di lei skirbi cu ta identifica e pueblo di Dios awe. Mas bien, nos ta mira cumplimento di loke tin para skirbi na Hebreonan 8:10: “Esaki ta e aliansa cu lo mi sera cu e cas di Israel despues di e dianan ei, SEÑOR ta bisa: lo mi pone mi leinan den nan mente, y lo mi skirbi nan riba nan curason. Y ami lo ta nan Dios, y nan lo ta mi pueblo.” Laga nos semper aprecia y balora e lei di amor cu Yehova a skirbi riba nos curason y probecha di tur oportunidad pa demostra amor.

20. Dicon e lei di Cristo ta algo sumamente balioso?

²⁰ En berdad ta un gran goso di por sirbi Dios hunto cu un hermandad mundial cu ta desplega tal amor! Personanan cu tin e lei di Cristo skirbi riba nan curason ta posee algo sumamente balioso den e mundo sin amor aki. No solamente nan ta disfruta di Yehova su amor sino tambe di e banchi fuerte di amor cu tin den e hermandad. “Mira, ki bon y ki dushi ta pa rumannan biba hunto den harmonia!” Aunke Testigonan di Yehova ta biba den hopi nacion, ta papia hopi lenga y ta representa hopi cultura, nan ta disfruta di un union religioso sin igual. E union aki ta trece Yehova su aprobacion. E salmista a skirbi: “Ayanan [meimei di un pueblo uni den amor] SEÑOR a ordena e bendicion, bida pa semper.”—Salmo 133:1-3.

Bo Por Contesta?

• Con importante e Dies Mandamento tawata?

• Kico e lei skirbi riba curason ta?

• Ki papel amor ta hunga den “e lei di Cristo”?

• Den ki maneranan nos por desplega amor pa Dios y pa prohimo?

[Preguntanan di Estudio]

[Plachi na pagina 25]

E Israelitanan tawatin leinan skirbi riba tabla di piedra

[Plachinan na pagina 26]

Cristiannan tin e lei di Dios skirbi riba nan curason

[Plachi na pagina 28]

Sonia hunto cu un mucha mohe di Senegal na e congreso di districto 2004