Un Biahe Largo Ta Ser Recompensa

FOR di Republica Democratico di Congo ta bin e informe di dos ruman mohe carnal cu a dicidi di haci un biahe largo den un area asota pa guera pa nan por asisti na e Congreso di Districto “Duna Gloria na Dios” na e pueblo cu yama Lisala. Fuera di e instruccion spiritual y asociacion cristian cu nan a spera di disfruta di dje na e congreso, nan tawata ansioso pa topa representantenan di e sucursal di Testigonan di Yehova na Kinshasa. Debi na e guera civil den e pais, nan tawatin añanan sin mira un hende di sucursal, y nan kier a probecha di e oportunidad aki pa haci esei.

Cu canoa, e dos ruman mohenan a sali for di nan pueblo nativo cu yama Basankusu rumbo pa Lisala, un biahe di mas o menos 300 kilometer door di selva y dos riu. A tuma nan tres siman pa haci e biahe. Como cu ambos ta den sirbishi di tempo completo, uno tin 3 aña y e otro 19 aña den e trabou di pionero, nan a probecha di nan biahe pa plama e bon nobo di Reino. Nan a dedica un 110 ora predicando na e hendenan cu nan a topa durante nan biahe, y a laga 200 tratado y 30 revista.

Ora nan tawata pasa door di e riu, nan mester a nabega entre hipopotamo y crocodil cu ta comun den e region ei. Pues, tawata imposibel pa nabega anochi! Tambe nan a pasa door di hopi checkpoint of puesto di control militar.

Aunke esaki tawata un biahe hopi largo y agotador, e ruman mohenan tawata contento cu nan a haci e esfuerso. Nan tur dos tawata masha gradicido y contento cu nan por tawata presente na e congreso na Lisala. Nan curason tawata yen di entusiasmo pa e berdad, y e compania di e 7.000 rumannan presente a anima nan. Despues di e congreso, nan a confronta e mesun dificultadnan riba nan biahe di regreso, pero nan a yega cas y haya nan famianan sano y salvo.