Pregunta di Lector

Un Cristian tin mag di duna un empleado di gobierno tip of regalo pa su servicio, of lo por considera esei como soborno?

Na unda cu Cristiannan ta biba, nan ta purba desplega sabiduria practico ora di trata cu situacionnan local, cordando cu loke ta aceptabel y legal den un pais, kisas por ta totalmente inaceptabel y ilegal den un otro pais. (Proverbionan 2:6-9) Claro cu un Cristian mester corda semper cu ken cu kier ta un huespet ‘den Yehova su tabernakel’ mester rechasa soborno of pasamento di placa bou di mesa.—Salmo 15:1, 5; Proverbionan 17:23.

Kico ta soborno? Segun The World Book Encyclopedia, “soborno ta nifica duna of ofrece algo di balor na un ... funcionario publico, kende na su turno ta viola su deber of e lei afin di beneficia e dunado.” Pues, sin importa unda bo ta biba, duna placa of regalo na un hues of un agente policial pa nan no cumpli cu lei of na un inspector pa e ignora un defecto of un violacion di lei, ta soborno. Loke tambe ta cai bou di soborno ta dunamento di regalo pa ricibi trato preferencial, por ehempel pa laga bo nomber bai prome riba un lista di espera of pa pasa dilanti di otro hende para den rei. Tal proceder ta revela tambe un falta di amor.—Mateo 7:12; 22:39.

Pero ta soborno pa duna regalo of tip na, laga nos bisa, un sirbido publico afin di obtene un servicio legitimo of pa evita trato inhusto? Por ehempel, den algun pais funcionarionan kisas no ta dispuesto pa inscribi mucha na scol, admiti un persona den hospital of stempel documentonan di imigracion sino te ora nan haya tip. Of nan por tarda pa procesa solicitudnan pa renoba licencia of permit.

E custumber di duna tip y e actitud general pa cu esei ta varia di un pais pa otro. Caminda tal pagonan ta e custumber of hende ta spera nan, algun Cristian kisas ta sinti cu tanten esei no ta viola lei, nan no ta violando principio biblico ora nan duna un funcionario tip pa cumpli cu su deber. Den algun pais hende ta asta mira e pagonan ei como un regalo pa suplementa e salario abou di un empleado publico. E cos importante ta pa corda cu tin un diferencia den duna un regalo pa haya un servicio legitimo y ofrece un soborno pa haya un fabor ilegal.

Di otro banda, tin Testigonan di Yehova cu ora nan ta haci peticionnan legitimo ta nenga di duna tip na inspectornan, funcionarionan di duana of otro hende, asta caminda tal dunamento di regalo ta un custumber. Como cu localmente e Testigonan ta conoci tanto pa e posicion aki basa riba nan consenshi como pa nan honrades, nan sa haya trato cu mayoria hende ta haya solamente despues di duna tip of regalo.—Proverbionan 10:9; Mateo 5:16.

En resumen, cada sirbido di Yehova tin cu dicidi pa su mes si lo e duna tip pa ricibi un servicio legitimo of pa evita un trato inhusto. Riba tur cos, e mester sigui un proceder cu ta lag’e cu un bon consenshi, cu no ta trece reproche riba e nomber di Yehova y cu no ta trompica otro hende.—Mateo 6:9; 1 Corintionan 10:31-33; 2 Corintionan 6:3; 1 Timoteo 1:5.