‘Mi Yudansa Ta Bin For di Yehova’

Hobennan Cu Ta Alaba Yehova Ta Enrikece Nan Bida

“MI KIER lo miho cu tin den bida!” Asina un mucha homber teenager a expresa su expectativanan. Pero con un persona hoben por saca lo miho for di bida? Bijbel ta duna un contesta stret: “Corda ... riba bo Creador den e dianan di bo hubentud”!—Eclesiastes 12:1.

Alaba Yehova y sirbie no ta pa hende grandi so. Samuel, yiu di Elcana y Ana, tawata hopi jong ora cu el a bai sirbi Yehova na e tabernakel. (1 Samuel 1:19, 20, 24; 2:11) Un mucha mohe Hebreo di edad hoben a demostra su pleno fe den Yehova ora el a sugeri pa Naaman, capitan di e ehersito Sirio, bai serca profeta Eliseo pa e por a cura di su lepra. (2 Reinan 5:2, 3) Salmo 148:7 y 12 ta manda tanto mucha homber como mucha mohe alaba Yehova. * Tempo cu Hesus tawatin apenas 12 aña, el a mustra un interes profundo den e sirbishi di su Tata. (Lucas 2:41-49) Mas despues, algun mucha homber cu a mira Hesus den tempel, debi na nan entrenamento for di e Scritura, a grita: “Salba, nos ta roga, Yiu di David!”—Mateo 21:15, 16, NW.

Alabando Yehova Awe

Awe, tin hopi hoben entre Testigonan di Yehova cu ta orguyoso di nan creencianan y cu curashi nan ta papia cu otro hende tocante esei na scol y otro caminda. Considera dos ehempel.

Na Gran Bretania, e klas di Stephanie di 18 aña tawata papia tocante aborto y otro cuestionnan etico. E docente a declara cu awor hende por lo general ta acepta aborto y cu ningun mucha mohe no tin motibo pa rechasa e practica aki. Ora cu tur hende den klas a bai di acuerdo cu e punto di bista aki, Stephanie a sinti su mes obliga na defende su posicion basa riba Bijbel. E oportunidad pa haci esei a presenta ora cu e docente a puntra Stephanie kico e ta pensa. Aunke na prome instante Stephanie tawata nervioso, el a haci uzo di e ocasion pa presenta e punto di bista biblico. Cu su mes palabranan el a bisa loke Exodo 21:22-24 [NW] ta bisa y a splica cu si tawata malo pa causa daño na un yiu cu no a nace ainda, anto ta bisto cu aborto lo ta contra e boluntad di Dios.

E docente, kende tawata un miembro di clero, nunca a yega di lesa e versiculonan aki. Stephanie su testimonio duna cu curashi a hiba na hopi combersacion interesante cu e muchanan di su klas riba varios topico. Awor tin un mucha mohe cu ta acepta e edicionnan mas resien di E Toren di Vigilancia y Spierta! cu regularidad, y dos otro mucha mohe a asisti na un congreso di districto di Testigonan di Yehova pa mira Stephanie batisa como simbolo di su dedicacion na Dios.

Vareta di seis aña, kende ta biba na Surnam, a probecha di e oportunidad pa alaba Dios ora cu su juffrouw tawatin mester di consuelo for di e Scritura. E juffrouw a bin scol bek despues di un ausencia di tres dia, y el a puntra su alumnonan si nan tawata sa dicon e no tawata na scol.  Nan a contesta, “Juffrouw tawata malo toch?” E juffrouw a contesta: “No. Mi ruman mohe a muri, y mi ta sinti mi hopi tristo. Pues mi kier pa boso ta keto.”

E atardi ei mientras cu Vareta su mama a bai tira un cabes, Vareta tawata druk ta blader den e revistanan bieu, lesando e titulonan. El a topa E Toren di Vigilancia di 15 di juli 2001, cu e titulo “Tin Bida Despues di Morto?” Entusiasma, el a lanta su mama for di soño y a bisa, “Mami, Mami, wak! Mi a haya un revista tocante morto pa mi juffrouw!” Nan a manda e revista pa e juffrouw hunto cu un carta di Vareta. Vareta a skirbi: “Esaki ta specialmente pa juffrouw. Den Paradijs bo ta bai mira bo ruman mohe atrobe pasobra Yehova nunca ta gaña. El a priminti cu lo e trece un paradijs, no den shelo, pero riba tera.” E juffrouw a expresa su aprecio profundo pa e consuelo basa riba Bijbel cu e articulonan aki a dun’e.

Trahando pa Futuro

Yehova ta “e Dios felis”, y e kier pa hobennan ta felis. (1 Timoteo 1:11, NW) Su propio Palabra ta bisa: “Gosa di bo hubentud, gosa tanten bo ta hoben ainda.” (Predicador [Eclesiastes] 11:9, BPK) Yehova ta mira mas leu cu presente y ta conciente di e consecuencianan riba largo plaso di tanto bon como mal comportacion. Ta pesei su Palabra ta spierta hobennan: “Corda tambe riba bo Creador den e dianan di bo hubentud, prome cu e dianan malo bin y e añanan yega serca, di cualnan lo bo bisa: ‘Mi no tin goso den nan.’”—Eclesiastes 12:1.

Si, Yehova ta desea pa hobennan gosa plenamente di e precioso regalo di bida. Door di corda riba Dios y alab’e, hobennan por hiba un bida cu ta duna nan satisfaccion y recompensa. Asta ora nan ta confronta dificultad, nan por bisa cu confiansa: ‘Mi yudansa ta bin for di Yehova.’—Salmo 121:2.

[Nota]

[Comentario na pagina 9]

‘Alaba Yehova for di tera, ... tanto yoncuman como birgen.’—SALMO 148:7, 12

[Cuadro na pagina 8]

YEHOVA TA SOSTENE HOBENNAN

“Bo ta mi speransa; o Señor DIOS, bo ta mi confiansa for di mi hubentud.” —Salmo 71:5.

“[Dios] ta satisface bo deseonan cu cosnan bon, asina cu bo hubentud ta wordo renoba manera aguila.” —Salmo 103:5.