‘Mi Yudansa Ta Bin for di Yehova’

Ora Cu Biehes Bira “un Corona di Bunitesa”

“E MIHO bida cu bo por tin”, Muriel di 101 aña a bisa. “Un berdadero privilegio!” tawata e palabranan di Theodoros di 70 aña di edad. Maria, na edad di 73 aña, a bisa: “Mi no por a uza mi bida den un miho manera.” Nan tur a pasa henter nan bida den sirbishi na Yehova Dios.

E personanan di edad aki ta representa hopi adorado activo di Yehova rond mundo. Apesar di nan edad avansa, precupacion cu salu y otro circunstancia desfaborabel, keto bai nan ta sirbi Dios di henter nan alma. Den e congregacion cristian, e fiel personanan di edad aki ta bunita ehempelnan di debocion na Dios. Aunke nan circunstancianan kisas ta limita nan den loke nan por haci, Yehova ta duna hopi balor na nan sirbishi. *—2 Corintionan 8:12.

E buki di Salmo ta haci un bon observacion di e calidad di bida cu hende di edad cu ta sirbi Dios fielmente por spera di tin. Por compara nan cu un palo bieu y mahestuoso cu ta keda productivo. Relaciona cu e personanan aki, e salmista a canta: “Asta den nan biehes nan lo duna fruta; nan lo ta yen di vigor y berde-berde.”—Salmo 92:14.

Algun hende grandi kisas tin miedo di wordo hala un banda y ignora ora nan perde nan vigor pa motibo di biehes. David a roga Dios: “No benta mi afo den tempo di biehes; no bandona mi ora mi forsa ta faya.” (Salmo 71:9) Di kico ta depende si un persona lo fracasa of florece den biehes? Wel, si nos ta desplega e husticia cu Dios ta siña nos, nos lo florece en bes di fracasa. E salmista a canta: “E hende husto lo florece manera palma.”—Salmo 92:12.

Hende cu a sirbi Dios fielmente henter nan bida muy probablemente lo sigui duna bon fruta ora nan bira grandi. Den un sentido, hopi di e cosnan cu nan a haci den nan bida pa yuda nan mes of otro hende a duna bon resultado, mescos cu simiña cu ta spruit y crece bira un cosecha abundante. (Galationan 6:7-10; Colosensenan 1:10) Claro cu hende cu a desperdicia nan bida na empeñonan egoista cu ta ignora e camindanan di Dios por lo general no tin mucho di ofrece ora nan bira grandi.

E buki biblico di Proverbionan tambe ta enfatisa husticia como un adorno di biehes. Ei nos ta lesa: “Cabei blanco ta un corona di bunitesa ora e ser haya den e caminda di husticia.” (Proverbionan 16:31, NW) Si, husticia ta un manifestacion di bunitesa interno. Un hende cu a hiba un bida husto pa hopi tempo ta gana respet di otro hende. (Levitico 19:32) Ora cabei blanco ta acompaña pa sabiduria y birtud, esei ta resulta den honor.—Job 12:12.

Den bista di Yehova, un hende cu uza su bida na un manera recto pa hopi aña den su sirbishi ta algo bunita. E Scritura ta bisa: “Te na boso biehes ami [Yehova] lo ta mescos, y te na boso añanan di cabei blanco lo mi carga boso! Mi a traha boso y lo mi sostene boso; lo mi carga boso y lo mi libra boso.” (Isaias 46:4) Ta un gran consuelo pa sa cu nos amoroso Tata celestial  ta priminti cu lo e sostene y apoya su fiel adoradonan den nan biehes!—Salmo 48:14.

Ya cu un bida cu a pasa un tempo largo dedica den sirbishi fiel na Yehova ta bunita for di su punto di bista, esei no ta merece respet di otro hende tambe? Si nos tin e mesun punto di bista cu Dios, nos ta balora nos rumannan den fe cu ta di edad avansa. (1 Timoteo 5:1, 2) Pesei, laga nos busca maneranan practico pa mustra amor cristian door di percura pa nan necesidadnan.

Riba e Caminda di Husticia Mas Laat den Bida

Salomon ta sigura nos cu “den e caminda di husticia tin bida.” (Proverbionan 12:28) Edad avansa no ta stroba un hende di haya e caminda aki mas laat den bida. Por ehempel, na Moldova un homber di 99 aña a dedica su hubentud na promove idealnan comunista. E tawata orguyoso cu el a yega di combersa personalmente cu lidernan comunista renombra manera V. I. Lenin. Sinembargo, ora comunismo a perde su gara y despues a basha den otro, e homber di edad aki a perde proposito y direccion den bida. Pero na momento cu Testigonan di Yehova a mustr’e cu e Reino di Dios ta e unico solucion real pa problemanan di humanidad, el a acepta e berdad di Bijbel y a bira un studiante ferviente di e Scritura. Lamentablemente, el a muri prome cu e por a batisa como sirbido di Yehova.

Un otro ehempel ta di un señora di 81 aña na Hungria. Ora el a siña tocante e rekisitonan moral di Dios, el a realisa cu e mester a casa cu e homber cu ken e tawata compaña pa hopi aña. E señora a tuma un curashi y a splica su compañero di bida su punto di bista basa riba Bijbel. Pa su gran sorpresa y goso, e homber a acepta pa casa cu ne. Despues cu nan union a ser legalisa, e señora a haci progreso spiritual masha lihe. Ocho luna despues cu el a cuminsa cu su estudio di Bijbel, el a bira un publicado no batisa, y un poco despues el a batisa. En berdad, husticia ta manera un corona sumamente bunita pa hende grandi!

Si, cristiannan fiel di edad por ta sigur cu Dios tin interes den nan. Yehova lo no bandona hende cu ta keda fiel na dje. Mas bien, e ta priminti di guia, yuda y sostene nan asta den nan biehes. Y nan ta confirma e palabranan di e salmista: ‘Mi yudansa ta bin for di Yehova.’—Salmo 121:2.

[Nota]

[Comentario na pagina 9]

“Cabei blanco ta un corona di bunitesa ora e ser haya den e caminda di husticia.”​—PROVERBIONAN 16:31, NW

[Cuadro na pagina 8]

YEHOVA TA INTERESA DEN SU SIRBIDONAN DI EDAD

“Lanta para pa esun cu tin cabei blanco, honra e anciano.” —Levitico 19:32.

“Te na boso biehes ami lo ta mescos, y te na boso añanan di cabei blanco lo mi carga boso!”​—Isaias 46:4.