Uni Door di Amor pa Dios

ORA cu e congregacion cristian a keda forma den e prome siglo di nos era, un di su caracteristicanan sobresaliente—apesar di e diversidad di su miembronan—tawata e union. E adoradonan ei di e Dios berdadero a bin di nacionnan na Asia, Europa y Africa. Nan a representa un variedad di antecedente: sacerdote, solda, esclabo, refugiado, hende di ofishi, hende profesional y comerciante. Algun tawata Hudiu, y otronan no tawata Hudiu. Hopi di nan na antes tawata adultero, homosexual, burache, ladron of estafado. Sinembargo, ora nan a bira cristian, nan a bandona nan practicanan malo y a bira hopi uni den fe.

Con bin cristianismo di prome siglo a logra trece tur e hendenan aki hunto den union? Con bin nan tawata na pas cu otro y cu hende en general? Dicon nan no a join den rebelion y conflicto? Dicon cristianismo di prome tawata asina distinto for di e religionnan principal djawe?

Ta Kico A Uni Miembronan di e Congregacion?

E factor principal cu a uni e creyentenan den prome siglo tawata amor pa Dios. E cristiannan ei a acepta nan obligacion principal di stima e Dios berdadero, Yehova, cu henter nan curason, alma y mente. Por ehempel, apostel Pedro, un Hudiu, a haya instruccion pa bishita e cas di un ciudadano stranhero, un persona cu  normalmente lo e no tawatin contacto estrecho cu ne. Loke a motiva Pedro pa obedece e instruccion tawata principalmente amor pa Yehova. Pedro y otro cristiannan di prome tawatin un relacion intimo cu Dios cu tawata basa riba conocemento exacto di Su personalidad, di loke el a gusta y no a gusta. Cu tempo, tur adorado a bin compronde cu tawata Yehova su boluntad pa nan ta “uni den e mesun mente y den e mesun opinion.”—1 Corintionan 1:10; Mateo 22:37; Echonan 10:1-35.

Un otro cos cu a uni e creyentenan tawata nan fe den Hesucristo. Nan kier a sigui su pasonan estrechamente. El a duna nan e mandamento: “Boso stima otro . . . mescos cu ami a stima boso. ... Na esaki tur hende lo sa cu boso ta mi disipel, si boso tin amor un pa otro.” (Huan 13:34, 35) Esaki lo no mester tawata un emocion superficial, sino amor di sacrificio propio. Kico lo tawata e resultado? Hesus a pidi den oracion relaciona cu hende cu pone fe den dje: “[Mi ta pidi] pa nan tur por ta un, mescos cu abo, Tata, ta den union cu mi y ami ta den union cu bo, pa nan tambe por ta den union cu nos.”—Huan 17:20, 21, NW; 1 Pedro 2:21.

Yehova a drama su spirito santo, of forsa activo, riba su sirbidonan berdadero. E spirito aki a promove union entre nan. El a haci posibel cu nan por a compronde siñansanan di Bijbel cu a ser acepta den tur congregacion. Adoradonan di Yehova tawata predica e mesun mensahe—santificacion di Yehova su nomber mediante Dios su Reino Mesianico, cu ta e gobierno celestial cu lo bai goberna riba henter humanidad. E cristiannan di prome a compronde cu nan obligacion tawata pa ‘no ser parti di e mundo aki.’ Pesei ki ora cu a surgi guera civil of conflictonan militar, cristiannan a keda neutral. Nan a haci esfuerso pa ta na pas cu tur hende.—Huan 14:26; 18:36; Mateo 6:9, 10; Echonan 2:1-4; Romanonan 12:17-21.

Tur creyente a asumi nan responsabilidad pa promove union. Con? Door di haci sigur cu nan comportacion tawata na harmonia cu Bijbel. Pesei apostel Pablo a skirbi cristiannan: “Encuanto boso manera di biba di antes, boso pone un banda e hende bieu”, y “bisti e hende nobo”, esta, bisti e personalidad nobo.—Efesionan 4:22-32.

Nan A Mantene Union

Creyentenan di prome siglo naturalmente tawata imperfecto y a surgi situacionnan cu a pone nan union na peliger. Por ehempel, Echonan 6:1-6 ta conta di un desacuerdo cu a lanta entre cristiannan Hudiu di abla Griego y esnan di abla Hebreo. Esnan di abla Griego a sinti cu nan a ser descrimina. Sinembargo, unabes e apostelnan a keda informa di e situacion, nan a atende e asunto na un manera rapido y husto. Mas despues, un cuestion di doctrina a hiba na un controversia tocante e obligacionnan di personanan no Hudiu den e congregacion cristian. A tuma un decision basa riba principionan biblico, y tur congregacion a acepta e decision aki.—Echonan 15:1-29.

E ehempelnan aki ta mustra cu den e congregacion cristian di prome siglo, desacuerdonan no a hiba na division etnico ni na desunion causa door di un actitud inflexibel pa cu cierto doctrinanan. Dicon no? Pasobra e factornan cu a promove union tawata suficiente fuerte pa tene e congregacion di prome uni y na pas. E factornan ei tawata amor pa Yehova, fe den Hesucristo, amor di sacrificio propio pa otro,  aceptacion di e guia di spirito santo, mesun comprondemento di siñansanan biblico, y e actitud di ta cla pa cambia nan comportacion.

Uni den Adoracion den Tempo Moderno

Ta posibel pa logra union den e mesun manera awe? Acaso e mesun factornan aki te ainda por uni miembronan di e mesun religion y haci posibel pa nan ta na pas cu tur rasa na tur parti di mundo? Si, ta posibel! Testigonan di Yehova ta uni den un hermandad mundial cu ta abarca mas cu 230 pais, isla y teritorio. Y nan ta ser uni door di e mesun factornan cu a uni cristiannan den prome siglo.

E cos principal cu ta contribui na e union cu Testigonan di Yehova ta disfruta di dje ta nan debocion na Yehova Dios. Esaki ta nifica cu nan ta haci esfuerso pa keda fiel na Yehova bou di tur circunstancia. Tambe Testigonan di Yehova ta eherce fe den Hesucristo y den su siñansanan. E cristiannan aki ta demostra un amor di sacrificio propio pa nan rumannan den fe y ta predica e mesun bon nobo di e Reino di Dios den tur e paisnan caminda nan ta activo. Gustosamente nan ta papia tocante e Reino aki cu hende di tur religion, rasa, nacionalidad y grupo social. Tambe Testigonan di Yehova ta keda neutral den e asuntonan di mundo, locual ta yuda nan resisti e presionnan politico, cultural, social y comercial cu ta causa asina tanto desunion den humanidad. Tur Testigo ta acepta nan obligacion di promove union door di comporta nan mes na harmonia cu normanan biblico.

Union Ta Atrae Otro Hende

E union aki hopi bes a lanta interes di personanan cu no tawata Testigo. Ilse, * por ehempel, un tempo tawata un soeur Catolico den un combento na Alemania. Kico a atra’e na Testigonan di Yehova? Ilse a bisa: “Nan ta e miho hendenan cu mi a yega di topa. Nan no ta bai guera; nan no ta haci nada cu ta perhudica otro hende. Nan kier yuda hende biba felis riba un tera comberti den Paradijs bou di e Reino di Dios.”

Un otro ehempel ta Günther, kende tawata un solda Aleman cu nan a manda Francia durante e segundo guera mundial. Un dia un domi a tene un sirbishi religioso pa e soldanan den Günther su unidad. E domi a pidi den oracion pa bendicion, proteccion y victoria. Despues di e sirbishi, Günther a bai bek na su puesto como vigilante. Cu su verrekijker el a mira cu e tropa enemigo na otro banda di e liña di bataya tambe tawatin un sirbishi religioso na encargo di un domi. Despues Günther a remarca: “Probablemente e domi ei tambe a pidi den oracion pa bendicion, proteccion y victoria. Mi a puntra mi mes con por ta cu iglesianan cristian ta na bandanan contrario di e mesun guera.” E impresionnan aki a keda graba den Günther su memoria. Despues di tempo Günther a bin den contacto cu Testigonan di Yehova, kendenan no ta participa den guera, y el a bira parti di nan hermandad mundial.

Ashok cu Feema tawata pertenece antes na un religion oriental. Den nan cas nan tawatin un altar na un dios. Pero ora cu malesa grave a asota nan famia, nan a reexamina nan religion. Combersando cu Testigonan di Yehova, Ashok cu Feema a keda impresiona cu e siñansanan di Bijbel y pa e amor cu tawatin entre e Testigonan. Awor nan ta publicadonan celoso di e bon nobo di e Reino di Yehova.

Ilse, Günther, Ashok y Feema ta uni hunto cu miyones di Testigo di Yehova den un hermandad mundial. Nan ta kere e promesa di Bijbel cu ta indica cu e mesun factornan cu awe ta uni nan den adoracion, pronto lo uni tur hende obediente. E ora ei lo no tin atrocidad, desunion ni division mas den nomber di religion. Mundo completo lo ta uni den adoracion di e Dios berdadero, Yehova.—Revelacion 21:4, 5.

[Nota]

[Plachi na pagina 4, 5]

Apesar cu e cristiannan di prome a bin di varios antecedente, nan tawata uni