Sigui e Ehempel Cu Hesus A Pone

“Mi a duna boso un ehempel, pa boso tambe haci manera ami a haci cu boso.”—HUAN 13:15.

1. Dicon Hesus ta un bon modelo pa cristiannan imita?

DEN henter historia di humanidad, ta un persona so a biba sin nunca comete pica. Esei ta Hesus. Fuera di Hesus, “no tin ningun hende cu no ta peca.” (1 Reinan 8:46; Romanonan 3:23) Ta pesei cristiannan berdadero ta mira Hesus como un modelo perfecto pa nan imita. De echo, un poco prome cu Hesus su morto riba 14 di nisan di aña 33 di nos era, e mes a bisa su siguidonan pa imit’e. E di: “Mi a duna boso un ehempel, pa boso tambe haci manera ami a haci cu boso.” (Huan 13:15) Durante e ultimo anochi ei, Hesus a menciona varios manera cu cristiannan mester haci esfuerso pa imit’e. Den e articulo aki nos lo considera algun di nan.

Humildad Ta Necesario

2, 3. Den ki maneranan Hesus tawata un ehempel perfecto di humildad?

² Ora cu Hesus a urgi su disipelnan pa sigui e ehempel cu el a pone, e tawata papia spesificamente di humildad. Na mas cu un ocasion, el a conseha su siguidonan pa nan ta humilde, y riba e anochi di 14 di nisan, el a demostra su propio humildad door di laba pia di su apostelnan. Caba Hesus a bisa: “Si ami anto, e Señor y Maestro, a laba boso pia, boso tambe mester laba pia di otro.” (Huan 13:14) Ta despues di esei el a bisa su apostelnan pa sigui e ehempel cu el a pone. Y e ehempel di humildad cu el a pone tawata realmente excelente!

³ Apostel Pablo ta conta nos cu prome cu Hesus a bin na tera, e tawata “existi den e forma di Dios.” Sinembargo, el a bandona su gloria y a bira un simpel ser humano. Es mas, “el a humilia su mes door di bira obedecido te na morto, asta morto na un [“staca di tormento”, NW].” (Filipensenan 2:6-8) Pensa riba esei un rato. Hesus, e di dos persona mas halto den universo, a bai di acuerdo pa bira menos cu e angelnan, nace como un baby indefenso, lanta como un yiu sumiso na mayornan imperfecto y por ultimo muri manera un criminal desprecia. (Colosensenan 1:15, 16; Hebreonan 2:6, 7) Esta un humildad! Ta posibel pa imita e “actitud” mental ei y cultiva tal “humildad”? (Filipensenan 2:3-5) Si, esei ta posibel pero e no ta facil.

4. Kico ta e cosnan cu ta haci hende orguyoso, pero dicon orguyo ta peligroso?

 ⁴ Lo contrario di humildad ta orguyo. (Proverbionan 6:16-19) Orguyo a hiba na Satanas su caida. (1 Timoteo 3:6) Ta facil pa orguyo cria raiz den hende su curason, y unabes e ta eiden, ta dificil pa ranc’e afo. Hende ta yen di orguyo debi na nan pais, nan rasa, nan pocesionnan, nan educacion, nan logronan den mundo, nan posicion social, nan aparencia, nan habilidadnan atletico y pa hopi otro cos mas. Sinembargo, ningun di e cosnan ei no ta importante pa Yehova. (1 Corintionan 4:7) Y si nan ta haci nos orguyoso, nan ta daña nos relacion cu ne. “Si, maske SEÑOR ta eleva, e ta mira un hende humilde y djaleu ta vigila un orguyoso.”—Salmo 138:6, BPK; Proverbionan 8:13.

Humilde Meimei di Nos Rumannan

5. Dicon ta masha importante pa ancianonan ta humilde?

⁵ Ni sikiera loke nos ta contribui cu ne y logra den Yehova su sirbishi no mester haci nos orguyoso; tampoco e responsabilidadnan cu nos tin den congregacion. (1 Cronicanan 29:14; 1 Timoteo 6:17, 18) De echo, mas pisa nos responsabilidadnan ta, mas humilde nos mester ta. Apostel Pedro a urgi ancianonan pa no ta manera hende ‘cu tin dominio riba esnan cu a wordo confia na nan, ma siendo ehempel pa e tou.’ (1 Pedro 5:3) Ancianonan ta nombra pa fungi como sirbido y ehempel, no como señor y shon.—Lucas 22:24-26; 2 Corintionan 1:24.

6. Den ki aspectonan di bida, cristiannan tin mester di humildad?

⁶ No ta ancianonan so mester ta humilde. Pedro a skirbi na hombernan mas hoben, cu kisas ta orguyoso di nan mente cu ta capta cos mas lihe y nan curpa hopi mas fuerte compara cu di hende grandi: “Bisti boso mes cu humildad pa cu otro, pasobra ‘Dios ta resisti e orguyosonan, ma ta duna gracia na e humildenan.’” (1 Pedro 5:5) Si, ta masha importante pa un y tur refleha humildad manera Cristo. Humildad ta necesario pa predica e bon nobo, specialmente ora nos ta topa hende cu un actitud indiferente of di menosprecio. Humildad ta necesario pa acepta conseho of pa simplifica nos bida afin di por haci mas den sirbishi. Ademas, nos tin mester di humildad y tambe fe y curashi ora nos ta confronta publicidad negativo, atakenan legal of persecucion violento.—1 Pedro 5:6.

7, 8. Menciona algun manera cu nos por cultiva humildad.

⁷ Con un persona por vence orguyo y comporta su mes na un manera humilde, ‘considerando otro hende mas importante cu e mes’? (Filipensenan 2:3) E tin cu mira su mes manera Yehova ta mir’e. Hesus a splica cua ta e manera corecto pa mira nos mes ora el a bisa: “Boso tambe, ora boso haci tur loke boso a wordo ordena, bisa: ‘Nos ta esclabonan inutil; nos a haci solamente loke nos mester a haci.’” (Lucas 17:10) Corda cu nada cu nos haci no por para banda di loke Hesus a haci. Pero toch Hesus tawata humilde.

⁸ Ademas, nos por pidi Yehova yuda nos  cultiva e manera corecto di mira nos mes. Mescos cu e salmista, nos por pidi den oracion: “Siña mi bon discernimento y conocemento, pasobra mi ta kere bo mandamentonan.” (Salmo 119:66) Yehova lo yuda nos discerni y desaroya un punto di bista rasonabel y balansa di nos mes, y lo e bendiciona nos pa nos actitud humilde. (Proverbionan 18:12) Hesus a bisa: “Ken cu halsa su mes lo wordo humilia, y ken cu humilia su mes lo wordo halsa.”—Mateo 23:12.

Un Punto di Bista Corecto di Loke Ta Bon y Loke Ta Malo

9. Ki punto di bista Hesus tawatin di loke ta bon y loke ta malo?

⁹ Apesar cu Hesus a biba pa 33 aña meimei di hende imperfecto, el a keda “sin pica.” (Hebreonan 4:15) De echo, ora e salmista tawata profetisa tocante e Mesias, el a bisa: “Bo a stima husticia y a odia maldad.” (Salmo 45:7; Hebreonan 1:9) Cristiannan ta haci nan best pa imita Hesus den esaki tambe. Nan no solamente sa kico ta bon y kico ta malo; nan ta odia loke ta malo y ta stima loke ta bon. (Amos 5:15) Esaki ta yuda nan resisti nan inclinacionnan pecaminoso hereda.—Genesis 8:21; Romanonan 7:21-25.

10. Ki actitud nos ta refleha ora nos ta practica “maldad” sin repenti?

¹⁰ Hesus a bisa e Farizeo Nicodemo: “Esun cu ta haci maldad ta odia e lus, y no ta bin na e lus, pa su echonan no wordo exponi. Ma esun cu ta practica berdad ta bin na e lus, pa por wordo manifesta cu su echonan ta wordo haci den Dios.” (Huan 3:20, 21) Pensa riba esaki: Huan a identifica Hesus como “e lus berdadero, cu ta lusa tur hende.” (Huan 1:9, 10) Sinembargo, Hesus a bisa cu si nos ta practica “maldad”—cosnan cu ta robes, inaceptabel pa Dios—nos ta odia e lus. Bo por imagina bo ta odia Hesus y su normanan? Sinembargo, esei ta loke hende ta haci ora nan ta practica pica sin repenti. Podise nan no ta pensa cu nan ta odia Hesus y su normanan, pero Hesus si ta mir’e asina.

Con pa Cultiva Hesus Su Punto di Bista di Loke Ta Bon y Loke Ta Malo

11. Kico ta hopi importante pa nos por cultiva Hesus su punto di bista di loke ta bon y loke ta malo?

¹¹ Nos mester compronde bon cla kico ta bon y kico ta malo for di Yehova su punto di bista. Nos ta haya e comprondemento ei solamente door di studia e Palabra di Dios, Bijbel. Segun cu nos ta studi’e, nos tin cu pidi den oracion mescos cu e salmista: “Haci mi conoce bo camindanan, o SEÑOR; siña mi bo bereanan.” (Salmo 25:4) Pero no lubida cu Satanas ta engañoso. (2 Corintionan 11:14) E por laga algo malo parce aceptabel pa un cristian cu no ta alerta. Pesei nos tin cu medita profundamente riba loke nos ta siña y sigui cuidadosamente e conseho di “e esclabo fiel y prudente.” (Mateo 24:45-47) Door di studia, haci oracion y medita riba loke nos siña, nos lo por alcansa madures y ta entre esnan cu “pa motibo di practica, tin nan mente entrena pa discerni loke ta bon y loke ta malo.” (Hebreonan 5:14) E ora ei nos lo ta inclina na odia loke ta malo y stima loke ta bon.

12. Cua conseho biblico ta yuda nos pa no practica maldad?

¹² Si nos ta odia loke ta malo, nos lo no permiti deseo pa cos malo crece den nos curason.  Hopi aña despues di Hesus su morto, apostel Huan a skirbi: “No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke cu tin den mundo, e deseo di carni y e deseo di wowo y e orguyo di bida, no ta bin di e Tata, sino di e mundo.”—1 Huan 2:15, 16.

13, 14. (a) Dicon amor pa e cosnan di mundo ta peligroso pa cristiannan? (b) Con nos por evita di cultiva amor pa cosnan cu tin den mundo?

¹³ Tin hende kisas ta rasona cu no ta tur cos den mundo ta malo. Maske esei ta berdad, mundo y su atraccionnan facilmente por kita nos di sirbi Yehova. Y nada cu mundo ta ofrece no ta diseña pa hala nos mas serca di Dios. Pesei, si nos cuminsa stima e cosnan cu tin den mundo, asta cosnan cu riba nan mes no ta malo, nos ta cohiendo un rumbo peligroso. (1 Timoteo 6:9, 10) Ademas, mayoria cos den mundo ta realmente malo y por corumpi nos. Si nos ta wak pelicula of programa di television cu ta enfatisa violencia, materialismo of inmoralidad sexual, e cosnan ei por bira aceptabel, y despues asta un tentacion pa nos. Si nos ta anda cu hende kende nan interes principal ta pa mehora nan estilo di bida of pa crea oportunidadnan pa haci negoshi, e cosnan ei por bira lo mas importante pa nos tambe.—Mateo 6:24; 1 Corintionan 15:33.

¹⁴ Di otro banda, si nos tin delicia den e Palabra di Yehova, “e deseo di carni y e deseo di wowo y e orguyo di bida” lo no ta dje atractivo ei mas. Mas ainda, si nos ta anda cu hende cu ta pone e interesnan di e Reino di Dios na prome luga, nos lo bira mescos cu nan, stimando loke nan ta stima y evitando loke nan ta evita.—Salmo 15:4; Proverbionan 13:20.

15. Mescos cu tawata e caso cu Hesus, con nos por ser fortifica door di stima husticia y odia maldad?

¹⁵ Hesus a odia maldad y stima husticia, y esei a yud’e keda cu su bista fiha riba “e goso poni su dilanti.” (Hebreonan 12:2) Nos tambe por haci mescos. Nos sa cu “mundo ta pasa bai y su deseonan tambe.” Pesei cualkier placer cu e mundo aki ta ofrece ta un cos temporal. Sinembargo, “esun cu haci e boluntad di Dios ta permanece pa semper.” (1 Huan 2:17) Como cu Hesus a haci Dios su boluntad, el a habri caminda pa hende haya bida eterno. (1 Huan 5:13) Laga nos tur imit’e y beneficia di su integridad.

Persevera bou di Persecucion

16. Dicon Hesus a urgi su siguidonan pa nan stima otro?

¹⁶ Hesus a indica un otro manera cu su disipelnan lo a imit’e, bisando: “Esaki ta mi mandamento, cu boso stima otro mescos cu ami a stima boso.” (Huan 15:12, 13, 17) Tin hopi motibo pakico cristiannan ta stima nan rumannan. Na e ocasion aki, Hesus tawata pensa mas cu tur cos riba e echo cu mundo lo odia nan. El a bisa: “Si mundo odia boso, sa anto cu el a odia ami prome cu boso. ... ‘Un esclabo no ta mas cu su shon.’ Si nan a persigui mi, boso tambe nan lo persigui.” (Huan 15:18, 20) Si, asta ora cristiannan ta ser persigui, nan ta mescos cu Hesus. Nan tin cu cultiva un laso fuerte y amoroso cu otro pa yuda nan soporta e odio ei.

17. Dicon mundo ta odia cristiannan berdadero?

 ¹⁷ Dicon mundo lo a odia cristiannan? Pasobra mescos cu Hesus, nan ‘no ta parti di mundo.’ (Huan 17:14, 16) Nan ta neutral den asuntonan militar y politico, y nan ta cumpli cu principionan biblico, respetando e santidad di bida y siguiendo normanan moral halto. (Echonan 15:28, 29; 1 Corintionan 6:9-11) Nan metanan principal ta meta spiritual, no material. Nan ta biba den mundo, pero manera Pablo a skirbi, nan no ta ‘haci uzo completo di dje.’ (1 Corintionan 7:31) Ta berdad cu algun hende a expresa nan admiracion pa e normanan halto di Testigonan di Yehova. Pero Testigonan di Yehova no ta pasa por halto di nan normanan pa asina hende por admira nan y acepta nan. Como resultado, mayoria hende den mundo no ta compronde nan, y hopi ta esnan cu ta odia nan.

18, 19. Siguiendo e ehempel di Hesus, con cristiannan ta trata cu oposicion y persecucion?

¹⁸ E apostelnan di Hesus a mira e odio intenso cu mundo tin ora cu Hesus a keda aresta y ehecuta, y nan a mira con Hesus a trata cu e odio ei. Hesus su oponentenan religioso a bin pa arest’e den e hofi di Getsemani. Pedro a purba proteha Hesus cu un spada, pero el a bisa Pedro: “Pone bo spada bek na su luga; pasobra tur esnan cu saca spada lo perece pa medio di spada.” (Mateo 26:52; Lucas 22:50, 51) Ta berdad cu den pasado e Israelitanan a bringa cu spada contra nan enemigonan. Pero awor e situacion tawata otro. E Reino di Dios ‘no tawata parti di e mundo aki’ y e no tawatin ningun frontera nacional cu e mester a proteha. (Huan 18:36) Un djis Pedro lo a bira parti di un nacion spiritual, kende su miembronan lo tin nan ciudadania den shelo. (Galationan 6:16; Filipensenan 3:20, 21) Pues anto, Hesus su siguidonan lo a trata cu odio y persecucion manera Hesus a trata cu nan—sin miedo pero na un manera pacifico. Cu confiansa nan lo a laga cos den man di Yehova y steun riba dje pa haya e fortalesa pa persevera.—Lucas 22:42.

¹⁹ Añanan despues, Pedro a skirbi: “Cristo tambe a sufri pa boso, lagando un ehempel pa boso, pa boso sigui den su pasonan ... Ora cu el a wordo zundra, e no a zundra bek; ora cu el a sufri, e no a menasa, ma a confia su mes na esun cu ta husga cu husticia.” (1 Pedro 2:21-23) Manera Hesus a adverti, cristiannan a experencia persecucion severo atrabes di añanan. Tanto den prome siglo como den nos tempo, nan a sigui Hesus su ehempel y a establece un tremendo registro di fiel perseverancia, demostrando asina cu nan ta mantene nan integridad na un manera pacifico. (Revelacion 2:9, 10) Laga cada un di nos haci mescos ora nos ta confronta circunstancianan similar.—2 Timoteo 3:12.

“Bisti Boso cu Señor Hesucristo”

20-22. Den ki manera cristiannan ta ‘bisti Señor Hesucristo’?

²⁰ Pablo a skirbi e congregacion na Roma: “Bisti boso cu Señor Hesucristo, y no haci provision pa e carni, pa cumpli cu su mal deseonan.” (Romanonan 13:14) Cristiannan, na moda di papia, ta bisti Hesus manera bo ta bisti un paña. Nan ta haci esfuerso pa imita su cualidadnan y accionnan te na e grado cu nan ta bira un refleho—maske uno imperfecto—di nan Maestro.—1 Tesalonicensenan 1:6.

²¹ Nos por tin exito den ‘bisti Señor Hesucristo’ si nos familiarisa nos mes cu Hesus su bida y haci esfuerso pa biba manera el a biba.  Nos ta imita su humildad, su amor pa husticia, su odio pa maldad, su amor pa su rumannan, e echo cu e no tawata parti di mundo y e manera cu el a soporta sufrimento cu pasenshi. Nos no ta ‘haci provision pa cumpli cu e mal deseonan di carni’, es decir cu nos proposito principal den bida no ta pa alcansa metanan mundano ni pa satisface deseonan di carni. Mas bien, ora di tuma un decision of di atende un problema, nos ta puntra: ‘Kico Hesus lo a haci den e situacion aki? Kico lo e kier pa mi haci?’

²² Por ultimo, nos ta imita Hesus door di keda ocupa cu ‘proclamacion di e evangelio di reino.’ (Mateo 4:23; 1 Corintionan 15:58) Den e manera ei tambe cristiannan ta sigui e ehempel cu Hesus a pone, y e siguiente articulo lo trata con nan ta hacie.

Bo Por Splica?

• Dicon ta hopi importante pa un cristian ta humilde?

• Con nos por cultiva e punto di bista corecto di loke ta bon y loke ta malo?

• Con cristiannan ta imita Hesus su manera di trata cu oposicion y persecucion?

• Con ta posibel pa ‘bisti Señor Hesucristo’?

[Preguntanan di Estudio]

[Plachi na pagina 7]

Hesus a pone e ehempel perfecto di humildad

[Plachi na pagina 8]

Un cristian tin mester di humildad den tur aspecto di su bida, incluso den e predicacion

[Plachi na pagina 9]

Satanas por laga entretenimento inapropiado parce aceptabel pa un cristian

[Plachi na pagina 10]

Amor di nos rumannan lo fortifica nos contra oposicion