Buscamento di Felicidad

UN PAR di aña pasa, nan a haci hendenan na Alemania, Francia, Gran Bretania y Merca, e pregunta aki: “Kico bo tin mester pa bo ta felis?” Di esnan entrevista, 89 porshento a bisa un bon salu; 79 porshento a menciona un matrimonio of relacion cu ta duna satisfaccion; 62 porshento a menciona e recompensanan di ta un mayor; y 51 porshento tawata pensa cu un carera exitoso ta e factor decisivo pa felicidad. Y aunke sabiduria tradicional ta spierta cu placa no ta garantisa felicidad, 47 porshento di esnan entrevista si tawata combenci cu placa ta duna felicidad. Kico echo ta mustra?

Na prome luga, wak e supuesto conexion entre placa y felicidad. Un sondeo di e shen personanan mas rico na Merca a mustra cu nan no ta mas felis cu hende en general. Ademas, aunke hopi hende na Merca a casi redobla nan pocesionnan material den e ultimo 30 añanan, nan no ta ni un tiki mas felis cu nan tawata na antes, segun expertonan di salu mental. De echo, un informe a bisa: “Atrabes di e mesun periodo ei, e porsentahe di depresion a subi drasticamente. Suicidio di teenagernan a bira triple. Cifranan di diborcio a bira dobel.” Den alrededor di 50 pais, investigadonan cu a studia e conexion entre placa y felicidad a yega na e conclusion cu placa no por cumpra felicidad.

Awor, con importante e factornan manera bon salu, un matrimonio cu ta duna satisfaccion y un carera exitoso ta pa felicidad? Wel, si e factornan aki tawata absolutamente necesario pa haci un hende felis, kico ta para di e miyones di hendenan cu no ta gosa di bon salu y tur esnan cu no tin un bon matrimonio? Kico di parehanan casa sin yiu y tur e homber- y mohenan cu no tin un carera exitoso? Tur e personanan ei ta destina na un bida infelis? Y e supuesto felicidad di e hendenan cu actualmente ta gosa di bon salu y un matrimonio cu ta duna nan satisfaccion lo disparce si nan situacion cambia?

Nos Ta Buscando Felicidad na e Camindanan Corecto?

Tur hende kier ta felis. Esaki no ta un sorpresa pasobra e Creador di hende ta ser describi como “e Dios felis”, y el a crea hende den su imagen. (1 Timoteo 1:11, NW; Genesis 1:26, 27) Pues, ta masha natural cu hende ta busca felicidad. Sinembargo, hopi hende ta descubri cu tene un gara riba felicidad ta mescos cu tene santo den bo man; ambos ta sali for di bo man facilmente.

 Lo por ta posibel cu tin hende ta haci demasiado esfuerso pa haya felicidad? Filosofo social Eric Hoffer a pensa cu si. El a comenta: “E buskeda di felicidad ta un di e causanan principal di infelicidad.” Esei siguramente ta e caso si nos ta busca felicidad caminda no mester ta. Den tal caso, definitivamente nos lo haya nos cu decepcion y frustracion. Purba bira rico; lucha pa gana fama of reconocemento; sigui tras di metanan politico, social of economico; of djis hiba un bida cu ta consentra riba nos mes y riba satisface nos propio deseonan inmediatamente—ningun di e cosnan aki no ta duna nos felicidad. No ta nada straño anto cu tin hende a adopta e punto di bista ironico expresa door di un escritor cu a bisa: “Si nos djis stop di core tras di felicidad nos lo por biba basta dushi.”

Un punto hopi notabel ta cu e encuesta menciona na principio di e articulo aki a mustra tambe cu 40 porshento di e hendenan tawata di opinion cu bo ta haya felicidad door di haci bon y yuda otro hende. Anto 25 porshento a enfatisa cu fe y conviccion religioso ta hunga un papel importante den ser felis. Claramente, nos tin cu analisa mas profundo ta kico ta necesario pa haci nos berdaderamente felis. E siguiente articulo lo yuda nos haci esei.

[Plachi na pagina 3]

Hopi hende ta pensa cu placa, un dushi bida di famia of un carera exitoso, ta e yabi pa felicidad. Bo ta di acuerdo?