Pregunta di Lector

Kico e areglo di e aña di Hubileo menciona den Levitico capitulo 25 a prefigura?

E Lei di Moises a stipula cu “e di shete aña e tera mester tene un sabat di sosiego.” Relaciona cu e aña ei, e Israelitanan a haya e siguiente mandato: “Bo no mag sembra bo cunucu ni snui bo plantacion di wendruif. No recohe loke nace di su mes despues di cosecha, ni cosecha bo wendruifnan di mata di wendruif cu bo no a snui; e tera mester haya un aña di sosiego.” (Levitico 25:4, 5) Pues, cada shete aña mester tawata un aña di sabat pa e tera. Y cada 50 aña, esta, e aña despues di shete ciclo di shete aña (un total di 49 aña), mester tawata un Hubileo. Kico mester a sosode den e aña ei?

Yehova a bisa Israel mediante Moises: “Boso mester consagra e di cincuenta aña y proclama libertad den e tera pa tur su habitantenan. E mester ta un Hubileo pa boso, y cada un di boso mester bolbe na su mes propiedad, y cada un di boso mester bolbe serca su famia. E di cincuenta aña mester ta un Hubileo pa boso; no sembra, ni cosecha loke nace di su mes despues di cosecha, ni recohe fruta di su matanan di wendruif cu no ta gesnui.” (Levitico 25:10, 11) Un Hubileo a nifica dos aña di sabat tras di otro pa e tera. Pero pa e habitantenan e Hubileo a nifica libertad. Tur Hudiu cu a ser bendi como esclabo mester a haya nan libertad. E propiedad cu un persona a hereda di su antepasadonan y cu lo e por a hay’e forsa ta bende mester a bini bek pa su famia. Hubileo mester tawata un aña di restauracion y liberacion pa Israel di antiguedad. Kico e ta prefigura pa cristiannan?

E rebelion di e prome homber, Adam, a pone humanidad bira esclabo di pica. Pa medio di e sacrificio di rescate di Hesucristo,  Dios a haci posibel pa hende wordo libra for di e gara di pica. * (Mateo 20:28; Huan 3:16; 1 Huan 2:1, 2) Na ki tempo cristiannan ta wordo libra di e lei di pica? Dirigiendo su mes na cristiannan ungi, apostel Pablo a bisa: “E lei di e spirito di bida den Cristo Hesus a haci [“boso”, NW] liber di e lei di pica y di morto.” (Romanonan 8:2) Hende cu tin e speransa di biba den shelo ta ricibi e libertad aki ora nan ser ungi cu spirito santo. Aunke ainda nan tin un curpa di carni imperfecto, Dios ta declara nan husto y ta adopta nan como su yiunan spiritual. (Romanonan 3:24; 8:16, 17) Pa e unginan, como grupo, e Hubileo cristian a cuminsa na Pentecoste di aña 33 di nos era.

Kico di e “otro carnenan” cu tin e speransa di biba pa semper riba tera? (Huan 10:16) Pa e otro carnenan, e Reino di Mil Aña di Cristo lo ta un tempo di restauracion y liberacion. Durante e Hubileo di Mil Aña aki, Hesus lo aplica e beneficionan di su sacrificio di rescate na humanidad creyente y lo elimina e efectonan di pica. (Revelacion 21:3, 4) Na fin di e Mil Aña di e Reinado di Cristo, humanidad lo alcansa perfeccion y lo ta completamente liber di pica hereda y morto. (Romanonan 8:21) Ora yega asina leu, e Hubileo cristian lo caba.

[Nota]

[Plachi na pagina 26]

E Hubileo di Mil Aña—un tempo di restauracion y liberacion pa e “otro carnenan”