Capadocia—Caminda Hende A Biba den Casnan Forma pa Biento y Awa

APOSTEL Pedro a papia di Capadocia. El a dirigi su prome carta inspira entre otro na e hendenan cu a “biba como stranhero, plama tur rond den . . . Capadocia.” (1 Pedro 1:1) Ki tipo di luga esei tawata? Pakico su habitantenan tawata biba den luganan coba den piedra? Con nan a bini den contacto cu cristianismo?

“Diripiente nos a haya nos mes perdi den un mondi di baranca cu forma di ijscream den catuchi of cone”, segun e biahero Britanico W. F. Ainsworth, kende a bishita Capadocia den decada di 1840. Ainda e paisahe unico ta sorprende hende cu awe ta bishita e region aki di Turkia. Den e vayenan di Capadocia tin “estatuanan” straño di piedra agrupa banda di otro manera solda mudo. Algun ta parce schoorsteen enorme y ta mas cu 30 meter halto. Otronan ta parce catuchi, obelisco of padestul gigantesco.

Segun cu solo ta dal den e estatuanan aki durante dia, nan ta refleha varios color masha bunita. Mainta tempran nan ta ros cla. Pa merdia nan ta haya un color crem, y ora solo ta baha nan ta refleha un color di oro. Kico a crea e “mondi di baranca cu forma di catuchi y pilar” aki? Y pakico e hendenan di e region a coba nan casnan den nan?

Forma pa Biento y Awa

Capadocia ta situa den curason di e Peninsula di Anatolia, cu ta conecta Asia cu Europa. Si no tawata pa su dos volcannan e region aki lo tawata un plateau of meseta. Varios mil aña pasa, nan erupcionnan poderoso a cubri e area cu dos tipo di baranca: un tipo duro y preto, y un tipo suave cu yama tufa, cu ta un baranca blanco forma pa shinishi volcanico cu a bira duro.

Segun cu riu, awasero y biento a cuminsa coba den e tufa suave, nan a forma kloof den e barancanan. Cu tempo, algun di e seronan cu ta keda pega cu e kloofnan aki gradualmente a cuminsa habri for di otro y forma yen di columna manera catuchi, locual a duna e tera un paisahe di escultura cu bo no ta haya na ningun otro parti di mundo. Algun di e catuchinan aki a haya asina tanto buraco cu nan a cuminsa parce cas di abeha. E habitantenan tawata coba saca cuarto den e barancanan suave aki, y segun cu e famia tawata crece, nan tawata agrega mas cuarto. Nan a ripara tambe cu e casnan aki tawata fresco den zomer y cayente den winter.

Bibando na un Crusada di Civilisacion

Si no ta pasobra e hendenan cu tawata biba den e cuebanan di Capadocia tawata  biba na un crusada importante di civilisacion, nan lo tawata hopi isola. E famoso Caminda di Seda, e ruta comercial di 6.500 kilometer cu a conecta e Imperio Romano cu China, tawata pasa door di Capadocia. Ademas di comerciantenan, e ehersitonan di Persia, Grecia y Roma tambe a uza e ruta aki pa bai di un luga pa otro. E biaheronan aki a trece ideanan religioso nobo.

Pa siglo 2 prome cu nos era, tawatin comunidadnan Hudiu na Capadocia. Y na aña 33 di nos era tawatin Hudiunan di e region aki na Herusalem. Nan tawata einan pa celebra e Fiesta di Pentecoste. Pues, apostel Pedro a predica na e Hudiunan di Capadocia despues cu spirito santo a baha riba nan. (Echonan 2:1-9) Aparentemente algun hende a reacciona bon riba su mensahe y a bai cas bek cu nan religion nobo. Pesei Pedro, den su prome carta, a dirigi su mes na e cristiannan di Capadocia.

Pero segun cu añanan a pasa, filosofia pagano a cuminsa influencia e cristiannan na Capadocia. A yega asta dje leu ei cu den siglo 4 tres lider importante di iglesia di Capadocia a defende e doctrina antibiblico di Trinidad fuertemente. Nan tawata Gregorio di Nacianzo, Basilio e Grandi y su ruman Gregorio di Nisa.

Basilio e Grandi a boga tambe pa un bida sin luho y placer, estilo di frère cu soeur. E casnan humilde di Capadocia coba den baranca tawata hopi adecuado pa e bida di austeridad cu el a recomenda. Segun cu e comunidad cu a hiba un bida sin luho y placer a aumenta, nan a traha iglesianan completo den algun di e ‘ijscreamnan den cone’ mas grandi. Pa siglo 13, nan a coba casi tresshen misa den baranca. Hopi di esakinan a keda conserva te na dia djawe.

Aunke nan no ta uza e misa- y monasterionan mas, e estilo di bida di e hendenan si no a cambia masha atrabes di siglonan. Ainda tin hende ta biba den hopi di e cuebanan aki. Casi tur hende cu bishita Capadocia ta keda asombra con su habitantenan creativo a comberti formacionnan natural di baranca den casnan practico.

[Mapa na pagina 24, 25]

(Pa e texto den su formato completo , wak e publicacion)

CAPADOCIA

CHINA (Catay)