Dios Ta Realmente Interesa den Bo

DEN momentonan di desesperacion ta masha normal cu nos ta busca yudansa di Dios. Al fin y al cabo, e ta “grandi . . . y abundante den fortalesa; su comprondemento ta infinito.” (Salmo 147:5) E ta den e miho posicion pa yuda nos trata cu nos problemanan. Es mas, Bijbel ta invita nos pa ‘drama nos curason’ dilanti dje. (Salmo 62:8) Pakico anto hopi hende tin e impresion cu Dios no ta contesta nan oracionnan? Esei kiermen cu Dios no ta interesa den nan?

En bes di core culpa Dios pa motibo cu aparentemente e no ta haci nada, corda bek riba e tempo cu bo tawata mucha. Ora bo mayornan no a duna bo tur loke bo a pidi, bo a yega di acusa nan cu nan no ta stima bo? Hopi mucha ta haci esei. Sinembargo, ora bo a bira grandi, bo a realisa cu amor ta ser manifesta den hopi manera, y cu un mayor cu semper ta bai na amen di su yiu y ta dun’e tur loke e pidi no ta dunando muestra cu e realmente ta stima su yiu.

Mescos tambe, si Yehova no ta contesta nos oracionnan semper manera nos ta spera, esei no kiermen cu e ta ignora nos. Echo ta cu Dios ta mustra su interes den nos tur den hopi manera.

Pa Medio di Dje “Nos Ta Biba”

Na prome luga, ta gracias na Dios cu nos “ta biba y ta move y ta existi.” (Echonan 17:28) E echo cu el a duna nos bida sigur ta un muestra di su interes amoroso den nos!

Ademas, Yehova ta duna nos loke ta necesario pa nos keda na bida. Bijbel ta bisa di dje: “E ta haci yerba crece pa bestia, y vegetacion pa hende cultiva, pa asina e por saca pan for di e tera.” (Salmo 104:14) De echo, no ta nos necesidadnan basico so nos Creador ta satisface. Den su bondad, e ta manda ‘awasero for di shelo y tempo di bon cosecha pa nos, y ta satisface nos curason cu cuminda y alegria.’—Echonan 14:17.

Pero kisas un hende ta puntra: ‘Si Dios ta stima nos asina tanto, pakico e ta laga nos sufri?’ Abo sa e contesta pa e pregunta ei?

Nos Por Culpa Dios?

Hopi hende ta sufri pa nan mes falta. Por ehempel, nos ta bon na haltura di cierto actividadnan cu ta hopi riscante y peligroso. Toch, hende ta risca practica inmoralidad sexual, bebe di mas, huma, uza droga, haci deportenan peligroso, core auto mucho duro, etcetera. Si un comportacion peligroso asina pone un hende sufri, ta ken e tin cu culpa? Dios of e mes pa su imprudencia? E Palabra inspira di Dios ta bisa: “No gaña boso mes: Dios no ta laga haci bofon di dje; pasobra loke un hende sembra, esaki tambe e lo cosecha.”—Galationan 6:7.

Ademas, hopi bes hende ta causa daño na otro. Ora un nacion ta bai den guera, sigur nos no por culpa Dios pa e sufrimento cu esei ta trece cu ne. Ora un criminal ataca un conciudadano, herid’e of causa su morto, nos por culpa Dios? Claro cu no! Ora un dictado oprimi, tortura y mata e personanan cu ta cai bou di dje, nos mester culpa Dios? Esei lo no ta rasonabel, no ta berdad?—Eclesiastes 8:9.

Pero ke tal di e miyones di hendenan cu ta biba den miseria of cu ta muri di hamber? Nos por culpa Dios pa esei? No. Nos planeta ta produci mas cu suficiente cuminda pa alimenta tur hende. (Salmo 10:2, 3; 145:16) Ta e reparticion desigual di e abundancia cu  Dios a duna ta hiba na hamber y pobresa extenso. Y egoismo di hende ta stroba nan di resolve e problema ei.

E Causa Basico

Ken anto nos tin cu culpa ora un persona bira malo of muri di biehes? Lo bo keda sorprendi pa sa cu ni pa esei bo no por culpa Dios? Dios no a crea hende pa bira bieu y muri.

Ora Yehova a pone e prome pareha humano, Adam cu Eva, den e hofi di Eden, el a duna nan e posibilidad di biba pa semper den un paradijs riba tera. Ma e tawata kier pa e tera ser habita pa hende cu lo a aprecia loke nan a haya. Pesei el a mara nan posibilidad di sigui biba na cierto condicion. Adam cu Eva lo a sigui biba den Paradijs tanten cu nan a keda obediente na nan Creador amoroso.—Genesis 2:17; 3:2, 3, 17-23.

Lamentablemente, Adam cu Eva a rebela. Eva a haya gana di scucha Satanas e Diabel. Esaki a gaña Eva y basicamente a bisa Eva cu Dios a keda sin dun’e algo cu tawata bon p’e. Pues asina Eva a scohe un rumbo independiente y a purba bira “manera Dios, conociendo bon y malo.” Adam tambe a join e den su rebeldia.—Genesis 3:5, 6.

Ora Adam cu Eva a peca den e manera aki, nan a demostra cu nan no a merece di biba pa semper. Nan a sufri e consecuencianan desastroso di pica. Nan forsa y vigor a mengua, y despues di un tempo nan a muri. (Genesis 5:5) Ma nan rebelion tawatin consecuencianan mucho mas serio. Ainda nos ta sufri di e efectonan di e pica di Adam cu Eva. Apostel Pablo a skirbi: “Door di un hende [Adam] pica a drenta den mundo, y morto door di pica, y asina morto a pasa pa tur hende, pasobra tur a peca.” (Romanonan 5:12) Si, pa motibo di e rebelion di Adam cu Eva, pica y morto a plama manera un enfermedad maligno den henter humanidad.

E Prueba di Mas Combencente di Dios Su Interes

Esei ta nifica cu Dios su creacion humano a ser ruina pa semper? No, y aki nos ta yega na e prueba di mas  combencente cu e tin interes den nos. Haciendo un gran sacrificio, Dios a percura e medio pa rescata humanidad for di pica y morto. E prijs di rescate tawata Hesus su bida perfecto, cu el a duna boluntariamente na nos fabor. (Romanonan 3:24) Pesei apostel Huan a skirbi: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” (Huan 3:16) Como resultado di e acto sobresaliente aki di amor, nos a bolbe haya e posibilidad di biba pa semper. Pablo a skirbi e Romanonan: “Un echo di husticia a trece hustificacion di bida pa tur hende.”—Romanonan 5:18.

Nos por ta sigur cu na e debido tempo di Dios, lo no tin sufrimento ni morto mas riba nos planeta. Mas bien, lo reina e condicionnan cu e buki di Revelacion a profetisa di dje: “Mira, e tabernakel di Dios ta meimei di hende, y e lo biba meimei di nan, y nan lo ta su pueblo, y Dios mes lo ta meimei di nan, y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” (Revelacion 21:3, 4) Kisas bo ta bisa, ‘Ami lo no t’ei pa mira e cosnan ei sosode.’ Sinembargo, echo ta cu bo por t’ei. Y asta si bo muri, Dios por lanta bo for di morto. (Huan 5:28, 29) Esei ta e proposito di Dios pa nos, y ta esei ta loke lo sosode. E declaracion di cu Dios no ta interesa den humanidad ta leu fo’i berdad!

“Hala Serca Dios”

Ta un consuelo pa sa cu Dios a dal e prome paso pa trece un solucion permanente pa e problema di sufrimento humano. Pero kico di aworaki mes? Kico nos por haci si nos perde un ser stima den morto of si nos yiu bira malo? Wel, e tempo pa Dios elimina enfermedad y morto no a yega ainda. Bijbel ta indica cu nos lo tin cu warda un poco mas pa esei sosode. Pero Dios no a laga nos desampara. Disipel Santiago a bisa: “Hala serca Dios y e lo hala serca boso.” (Santiago 4:8) Si, nos Creador ta invita nos pa forma un relacion personal intimo cu ne, y esnan cu haci esei semper lo sinti su sosten asta den e situacionnan di mas dificil.

Con nos por hala serca Dios? Rei David a haci un pregunta similar rond di tres mil aña pasa: “O SEÑOR, . . . ken por biba riba bo sero santo?” (Salmo 15:1) David a contesta su mes pregunta ora el a bisa: “Esun cu ta cana den rectitud y ta haci husticia, y ta papia berdad den su curason. E no ta calumnia cu su lenga, ni ta haci malo na su prohimo.” (Salmo 15:2, 3) Cu otro palabra, Yehova ta ricibi ken cu ta sigui e caminda cu Adam cu Eva a rechasa. E ta hala serca hende cu ta haci su boluntad.—Deuteronomio 6:24, 25; 1 Huan 5:3.

Con nos por haci e boluntad di Dios? Nos tin cu siña kico ta “bon y aceptabel den bista di Dios nos Salbador”, anto dicidi pa actua di acuerdo cu esei. (1 Timoteo 2:3) Esei ta encera gana e conocemento exacto di Bijbel, e Palabra di Dios. (Huan 17:3; 2 Timoteo 3:16, 17) Lesa Bijbel aribariba no ta suficiente. Nos tin cu imita e Hudiunan di prome siglo den Berea cu a tende Pablo predica. Bijbel ta bisa di nan: “Nan a ricibi e palabra cu bon boluntad y tawata scudriña e Scrituranan tur dia, pa mira si e cosnan aki tawata asina.”—Echonan 17:11.

Awe ta mescos. Un studio cuidadoso di Bijbel ta haci nos fe den Dios bira mas fuerte y ta yuda nos cultiva un relacion intimo cu ne. (Hebreonan 11:6) Tambe e ta yuda nos compronde exactamente con Yehova ta trata cu humanidad—e ta interesa no solamente den hende su bienestar riba termino cortico sino specialmente den e bienestar di termino largo di tur hende cu tin un bon disposicion.

Mira con algun cristian cu tin un relacion intimo cu Dios a expresa nan mes. Danielle di 16 aña a bisa: “Mi stima Yehova masha  tanto mes, y mi tin hopi di gradicie. El a duna mi mayornan amoroso cu di berdad ta stima mi y cu a siña mi di acuerdo cu su Palabra.” Un cristian na Uruguay a skirbi: “Mi curason ta yen di aprecio, y mi ta sinti mi impulsa pa gradici Yehova pa su bondad inmereci y pa su amistad.” Asta mucha chikito por ta amigo di Dios. Gabriela di shete aña a bisa: “Mi ta stima Dios mas cu tur cos den henter e mundo aki! Mi tin mi mes Bijbel. Mi ta gusta siña di Dios y di su Yiu.”

Awe, miyones di hende rond mundo ta completamente di acuerdo cu e salmista, kende a bisa: “Hala serca Dios ta bon pa mi.” (Salmo 73:28, NW) Nan a haya yudansa pa trata cu e problemanan cu nan ta confrontando aworaki, y nan tin e speransa sigur di biba pa semper den Paradijs riba tera. (1 Timoteo 4:8) Pakico bo no ta pone e meta di “hala serca Dios”? Si, Bijbel ta duna nos e siguransa cu “e no ta leu di cada un di nos.” (Echonan 17:27) Si, Dios realmente ta interesa den bo!

[Plachinan na pagina 5]

Yehova su interes den nos ta bisto den hopi forma

[Plachi na pagina 7]

Asta mucha chikito por hala serca Dios

[Plachinan na pagina 7]

Awe, Yehova ta yuda nos persevera. Na su debido tempo, lo e elimina enfermedad y morto