Resisti e Spirito di un Mundo Cu Ta Sigui Cambia

“Nos a ricibi, no e spirito di mundo, sino e spirito cu ta bin di Dios.” —1 CORINTIONAN 2:12.

1. Den ki maneranan Eva a ser gaña?

“E COLEBRA a gaña mi.” (Genesis 3:13) Cu e poco palabranan ei e prome mohe, Eva, a purba splica dicon el a rebela contra Yehova Dios. Loke el a bisa tawata berdad, aunke esei no a hustifica su malecho. Apostel Pablo despues a skirbi bou di inspiracion: “[Eva] a ser completamente gaña.” (1 Timoteo 2:14, NW) Eva a kere e mentira cu si e comete un acto di desobediencia, esta, come di e fruta prohibi, esei lo a benefici’e y lag’e bira manera Dios. Tambe el a ser gaña relaciona cu e identidad di esun cu a gañ’e. Eva no tawata sa cu en realidad ta Satanas e Diabel a papia mediante e colebra.—Genesis 3:1-6.

2. (a) Con Satanas ta gaña hende awe? (b) Kico ta “e spirito di mundo”, y ki preguntanan nos lo bai considera?

² For di e tempo di Adam cu Eva en adelante, Satanas a sigui gaña hende. De echo, e ta “gaña henter mundo.” (Revelacion 12:9) Su tacticanan no a cambia. Aunke e no ta uza un colebra literal mas, e ta sigui sconde su identidad. Mediante e industria di entretenimento, medionan di comunicacion y otro maneranan, Satanas ta gaña hende y laga nan kere cu nan no tin mester di Dios su guia amoroso ni tampoco ta beneficia di dje. Diabel su campaña di engaño a produci den hende na tur parti un actitud of spirito di rebelion contra Bijbel su leinan y principionan. Bijbel ta yama esaki “e spirito di mundo.” (1 Corintionan 2:12) E spirito aki tin un influencia profundo riba creencia, actitud y comportacion di esnan cu no conoce Dios. Con hende ta manifesta e spirito ei, y con nos por resisti su influencia perhudicial? Laga nos mira.

Normanan Moral Ta Bai Atras

3. Dicon “e spirito di mundo” ta manifesta su mes mas y mas den tempo moderno?

³ Den tempo moderno, “e spirito di mundo” a manifesta su mes mas y mas. (2 Timoteo 3:1-5) Probablemente bo a ripara cu normanan moral ta bayendo atras. E Scritura ta splica  dicon ta asina. Despues cu e Reino di Dios a keda estableci na aña 1914, un guera a cuminsa den shelo. Satanas cu su angelnan demoño a ser derota y tira abou den bicindario di tera. Furioso pa esei, Satanas a intensifica su campaña mundial di gaña hende. (Revelacion 12:1-9, 12, 17) Tur manera cu e por e ta purba “gaña, si ta posibel, asta e eliginan”, esta esnan scohi. (Mateo 24:24) Como pueblo di Dios, nos ta su blanco principal. E ta haci esfuerso pa destrui nos spiritualidad ya asina nos lo perde Yehova su aprobacion y e prospecto di bida eterno.

4. Con e sirbidonan di Yehova ta mira Bijbel, y con mundo ta mir’e?

⁴ Satanas ta purba desacredita Bijbel, e buki precioso cu ta siña nos tocante nos Creador amoroso. Yehova su sirbidonan ta stima Bijbel y ta apreci’e masha hopi. Nos sa cu e ta e Palabra inspira di Dios, no e palabra di hende. (1 Tesalonicensenan 2:13; 2 Timoteo 3:16) Sinembargo, e mundo di Satanas kier pa nos pensa net lo contrario. Por ehempel, e introduccion di un buki cu ta ataca Bijbel ta bisa: “No tin nada ‘santo’ na Bijbel, tampoco e no ta ‘e palabra di Dios.’ No ta santonan inspira pa Dios a skirbie, sino mas bien sacerdotenan en busca di poder.” Hende cu wordo combenci pa kere e declaracionnan ei facilmente por bira victima di e punto di bista eroneo cu nan ta liber pa adora Dios con cu nan kier; of pa no ador’e mes.—Proverbionan 14:12.

5. (a) Kico un autor a bisa tocante religionnan conecta cu Bijbel? (b) Con algun idea comun di mundo ta compara cu loke Bijbel ta bisa? (Inclui e cuadro na e siguiente pagina.)

⁵ Den algun pais, atakenan direct y indirect contra Bijbel, hunto cu e hipocresia religioso di hende cu ta pretende di ta apoya Bijbel, a pone cu mas y mas hende ta condena religion, incluso religion cu nan ta conecta cu Bijbel. Den medionan di comunicacion y circulonan academico, religion ta bou di atake. Un autor a remarca relaciona cu e situacion den hopi pais: “Publico en general tin un punto di bista negativo pa cu hudaismo y cristianismo. E opinionnan di mas faborabel ta considera nan como ouderwets pero agradabel; e opinionnan di mas negativo, [ta considera nan ideanan] como anticua cu ta stroba madures intelectual y ta obstaculisa progreso cientifico. Den añanan resien e sintimento di desprecio aki a escala den hacimento di bofon y hostilidad abierto.” E hostilidad aki hopi bes ta origina serca hende cu ta nenga cu Dios ta existi y cu a bira vano of “inutil den nan speculacionnan.”—Romanonan 1:20-22.

6. Kico mundo ta pensa di practicanan sexual cu Dios ta condena?

⁶ Pesei no ta un sorpresa cu hende ta dual bai mas y mas leu for di Dios su normanan di comportacion. Por ehempel, Bijbel ta describi relacionnan homosexual como “actonan indecente.” (Romanonan 1:26, 27) Tambe Bijbel ta declara cu esnan cu ta practica fornicacion y adulterio lo no hereda e Reino di Dios. (1 Corintionan 6:9) Sinembargo, den hopi pais nan  ta considera e practicanan sexual ei como aceptabel y den buki, revista, cantica, pelicula y programa di television nan ta asta presenta nan como comportacion fasinante. Y mundo ta considera hende cu bisa cu nan ta desaproba e practicanan ei como hende mente sera, cla pa husga, y cu no a keda al dia cu pensamento moderno mas ilumina. En bes di mira e normanan di Dios como un manifestacion di su interes amoroso, mundo ta mira nan como cos cu ta stroba hende su libertad y satisfaccion personal.—Proverbionan 17:15; Hudas 4.

7. Ki preguntanan nos mester haci nos mes?

⁷ Meimei di un mundo cu ta tuma un posicion cada bes mas fuerte contra Dios, lo ta sabi pa nos wak nos propio actitud y normanan. Periodicamente, hunto cu oracion nos tin cu analisa nos mes honestamente pa haci sigur cu nos no ta bezig ta drif bai pocopoco for di Yehova su manera di pensa y su normanan. Por ehempel, nos lo por puntra nos mes: ‘Mi ta entretene mi mes cu topiconan cu algun aña pasa lo mi a keda leu for di dje? Mi a bira mas tolerante pa cu practicanan cu Dios ta condena? Mi ta inclina na tuma asuntonan spiritual menos na serio compara cu antes? E manera cu mi ta hiba mi bida ta mustra cu mi ta pone interesnan di Reino na prome luga den mi bida?’ (Mateo 6:33) Meditando riba e preguntanan ei lo yuda nos resisti e spirito di mundo.

“Nunca Drif Bai”

8. Con un persona lo por drif bai for di Yehova?

⁸ Apostel Pablo a skirbi na su compañeronan cristian: “Ta necesario pa nos presta mas cu e atencion custumbra na e cosnan cu nos a tende, pa nos nunca drif bai.” (Hebreonan 2:1, NW) Un barco cu ta drif bai for di su rumbo no ta yega su destino. Si un capitan no presta atencion na biento y coriente di awa, su barco facilmente lo por drif pasa un haf voorbij cu ta safe y bai pega den baranca. Asina tambe, si nos no presta atencion na e berdadnan precioso di e Palabra di Dios, facilmente nos lo por drif bai for di Yehova y naufraga spiritualmente. No necesariamente nos tin cu rechasa e berdad totalmente pa esei pasa cu nos. De echo, hopi persona no ta rechasa Yehova diripiente y deliberadamente. Mayoria biaha, nan ta bira envolvi pocopoco den algo cu ta stroba nan di presta atencion na e Palabra di Dios. Casi sin cu nan ripara, nan ta drif bai den pica. Mescos cu un capitan cu ta na soño, e personanan ei no ta lanta for di soño si no te ora cu ta mucho laat.

9. Con Yehova a bendiciona Salomon?

⁹ Considera e bida di Salomon. Yehova a confi’e cu e reinado di Israel. Dios a permiti Salomon traha un tempel y a dirigie pa skirbi partinan di Bijbel. Na dos ocasion Yehova a papia cu ne, y Yehova a dun’e rikesa, fama y un reinado pacifico. Mas cu tur cos, Yehova a bendiciona Salomon cu gran sabiduria. Bijbel ta declara: “Dios a duna Salomon sabiduria y discernimento grandi y grandesa di curason, manera e santo cu tin canto di lama. Y e sabiduria  di Salomon tawata surpasa e sabiduria di tur e hombernan di oriente y tur e sabiduria di Egipto.” (1 Reinan 4:21, 29, 30; 11:9) Un hende lo por a pensa cu si tin un hende cu probablemente lo keda fiel na Dios, esei lo ta Salomon. Sinembargo, Salomon a drif bai den apostasia. Con esei a sosode?

10. Ki instruccion Salomon a keda sin obedece, y cu ki resultado?

¹⁰ Salomon tawata conoce e Lei di Dios y a comprond’e cabalmente. Casi sigur e tawata interesa specialmente den e instruccionnan stipula den e Lei pa esnan cu bira rei den Israel. Entre e instruccionnan ei tawatin uno cu ta bisa: “[E rei] no mester tuma hopi esposa pa su mes, pa su curason no desvia.” (Deuteronomio 17:14, 17) Apesar di e instruccion masha cla ei, Salomon a tuma sheteshen esposa y tresshen concubina. Hopi di e mohenan aki tawata adora diosnan stranhero. Nos no sa dicon Salomon a tuma asina tanto esposa, ni nos no sa con el a hustifica esei. Loke si nos sa ta cu el a desobedece un instruccion masha cla di Dios. E resultado tawata precis manera Yehova a spierta. Nos ta lesa: “[Salomon] su esposanan a haci su curason desvia pa sigui tras di otro diosnan.” (1 Reinan 11:3, 4) Pocopoco pero sigur, su sabiduria dibino a disparce. Salomon a drif bai. Cu tempo, Salomon su deseo pa agrada su esposanan pagano a tuma e luga di su deseo di obedece y agrada Dios. Esei tawata sumamente lamentabel, pasobra mas prome ta Salomon mes a skirbi e palabranan: “Sea sabi, mi yiu, y haci mi curason contento, pa mi por contesta esun cu reprocha mi”!—Proverbionan 27:11.

E Spirito di Mundo Ta Poderoso

11. Con loke nos ta hinca den nos mente ta afecta nos manera di pensa?

¹¹ E ehempel di Salomon ta siña nos cu ta peligroso pa rasona cu pasobra nos conoce e berdad, influencianan mundano lo no afecta nos manera di pensa. Mescos cu cuminda fisico tin efecto riba nos curpa, cuminda mental tin efecto riba nos mente. Loke nos ta alimenta nos mente cu ne ta forma nos pensamento y actitud. Companianan ta reconoce cu esaki ta berdad, y ta pesei nan ta gasta miles di miyones di florin pa aña na propaganda pa nan producto. Propagandanan cu tin exito ta uza palabra- y plachinan cu ta tenta y stimula e anhelo y deseo di e consumido. Hacidonan di propaganda sa tambe cu si hende mira un propaganda un of dos biaha, esei por lo general no ta pone nan core bai cumpra e producto. Sinembargo, si den transcurso di tempo nan wak e propaganda bes tras bes, esei hopi biaha ta pone consumidonan mira un producto cu aprobacion. Propaganda ta duna resultado; si no tawata asina ningun hende lo ta inverti den dje. E ta eherce un influencia profundo riba e actitud y manera di pensa di e publico.

12. (a) Con Satanas ta influencia hende su manera di pensa? (b) Kico ta mustra cu cristiannan por ser influencia?

¹² Mescos cu un hacido di propaganda, Satanas ta promove su ideanan door di presenta nan den maneranan atractivo, sabiendo cu  despues di tempo e por combence hende pa pensa mescos cu ne. Via entretenimento y otro medionan, Satanas ta gaña hende y laga nan kere cu bon ta malo y malo ta bon. (Isaias 5:20) Asta algun cristian berdadero a bira victima di Satanas su campaña di plama informacion falso. Bijbel ta spierta: “E spirito ta bisa claramente cu den e ultimo temponan algun lo cai for di fe, door di paga atencion na spiritonan engañoso y doctrinanan di demoñonan, pa medio di e hipocresia di gañadonan, kende nan mes consenshi a wordo kima como si fuera ta cu hero cayente esaki a wordo haci.”—1 Timoteo 4:1, 2; Yeremias 6:15.

13. Kico ta cai bou di mal compania, y con e hendenan cu nos ta anda cu ne ta influencia nos?

¹³ E spirito di mundo por afecta nos tur. E biento- y corientenan di Satanas su sistema ta poderoso. Sabiamente Bijbel ta spierta nos: “No laga hende gaña boso: ‘Mal compania ta daña bon custumber.’” (1 Corintionan 15:33) Mal compania por ta cualkier cos of cualkier persona—asta den congregacion—cu ta refleha e spirito di mundo. Si nos ta rasona cu mal compania no por haci nos daño, anto nos lo tin cu conclui tambe cu bon compania tampoco no por yuda nos. Ki un kibocacion esei lo ta! Bijbel ta splica e asunto bon cla ora e ta bisa: “Esun cu anda cu hende sabi lo ta sabi, ma un compañero di hende bobo lo sufri daño.”—Proverbionan 13:20.

14. Den ki maneranan nos por resisti e spirito di mundo?

¹⁴ Pa resisti e spirito di mundo, nos tin cu anda cu hende sabi, esnan cu ta sirbi Yehova. Nos tin cu yena nos mente cu cosnan cu ta edifica nos fe. Apostel Pablo a skirbi: “Tur loke ta berdadero, tur loke ta honorabel, tur loke ta husto, tur loke ta puro, tur loke ta bunita, tur loke ta di bon fama, si tin algun birtud y si tin algo digno di alabansa, laga esakinan ocupa boso mente.” (Filipensenan 4:8) Como hende cu tin boluntad liber, nos por scohe ki asuntonan nos ta ocupa nos mente cu ne. Laga nos semper scohe pa pensa riba cosnan cu lo hala nos mas serca di Yehova.

E Spirito di Dios Ta Mas Poderoso

15. Con cristiannan den antiguo Corinto tawata distinto for di e otro habitantenan di e stad ei?

¹⁵ Distinto for di e hendenan cu ta ser gaña door di e spirito di mundo, cristiannan ta ser guia door di Dios su spirito santo. Tawata na e congregacion di Corinto cu Pablo a skirbi: “Nos a ricibi, no e spirito di mundo, sino e spirito cu ta bin di Dios, pa nos conoce e cosnan cu Dios a duna nos gratuitamente.” (1 Corintionan 2:12) Antiguo Corinto tawata un stad completamente envolvi den e spirito di mundo. Mayoria di su habitantenan tawata asina inmoral cu e expresion “corintianisa” a haya e nificacion “practica inmoralidad.” Satanas a ciega mente di e hendenan. Consecuentemente, nan a compronde masha tiki of nada tocante e Dios berdadero. (2 Corintionan 4:4) Sinembargo, Yehova pa medio di su spirito santo a habri wowo di algun di e Corintionan, y a haci posibel pa nan haya conocemento di e berdad. Dios su spirito a motiva nan y guia nan pa haci cambionan grandi den nan bida di manera cu nan por a ricibi su aprobacion y bendicion. (1 Corintionan 6:9-11) Aunke e spirito di mundo tawata fuerte, e spirito di Yehova tawata mas fuerte.

16. Con nos por ricibi Dios su spirito y keda cu ne?

¹⁶ Mescos ta e caso awe. Yehova su spirito santo ta e forsa mas poderoso den universo, y e ta dun’e libremente y generosamente na tur cu pidi p’e cu fe. (Lucas 11:13) Sinembargo, pa nos por tin Dios su spirito, nos mester haci  mas cu djis resisti e spirito di mundo. Tambe nos tin cu studia e Palabra di Dios regularmente y aplic’e den nos bida di manera cu nos spirito—nos actitud mental—ta harmonisa cu Dios su manera di pensa. Si nos haci esei, Yehova lo fortifica nos pa resisti cualkier tactica cu Satanas por uza pa destrui nos spiritualidad.

17. Den ki maneranan e experencia di Lot por ta un consuelo pa nos?

¹⁷ Aunke cristiannan no ta parti di mundo, nan ta den mundo. (Huan 17:11, 16) Ningun di nos por evita e spirito di mundo totalmente, pasobra kisas nos ta traha of asta biba cu hende cu no ta stima Dios ni su camindanan. Nos ta sinti mescos cu Lot, kende tawata sintie masha “oprimi”, asta tormenta, door di e obranan malbado di e hendenan di Sodoma, meimei di kendenan e tawata biba? (2 Pedro 2:7, 8) Si ta asina, nos por cobra animo. Yehova a proteha y libra Lot, y e por haci mescos pa nos. Nos Tata amoroso ta mira y sa den ki circunstancia nos ta, y e por duna nos e yudansa y fortalesa cu nos mester pa por mantene nos spiritualidad. (Salmo 33:18, 19) Si nos depende riba Yehova, confia den dje y invoc’e, lo e yuda nos resisti e spirito di mundo, sin importa con dificil nos situacion por ta.—Isaias 41:10.

18. Dicon nos mester warda nos relacion cu Yehova manera un tesoro?

¹⁸ Den un mundo aleha for di Dios y gaña pa Satanas, nos como e pueblo di Yehova ta bendiciona cu conocemento di e berdad. Pues nos ta experencia un goso y pas cu mundo no tin. (Isaias 57:20; Galationan 5:22) Nos ta aprecia e speransa maraviyoso di bida eterno den Paradijs, caminda e spirito di e mundo moribundo aki lo no t’ei mas. Pesei laga nos warda nos relacion precioso cu Dios manera un tesoro, y sea alerta pa corigi cualkier tendencia pa drif bai spiritualmente. Laga nos hala mas y mas serca di Yehova, y e lo yuda nos resisti e spirito di mundo.—Santiago 4:7, 8.

Bo Por Splica?

• Den ki maneranan Satanas a gaña hende?

• Con nos por evita cu nos ta drif bai for di Yehova?

• Kico ta mustra cu e spirito di mundo ta poderoso?

• Con nos por ricibi e spirito cu ta bin di Dios y keda cu ne?

[Preguntanan di Estudio]

[Tabel na pagina 11]

SABIDURIA DI MUNDO VERSUS SABIDURIA DI DIOS

Berdad no ta absoluto; hende ta traha nan mes berdad.

“[Dios su] palabra ta berdad.”—Huan 17:17.

Pa distingui bon for di malo, confia bo sintimentonan.

“E curason ta mas engañoso cu tur cos y ta totalmente corupto.”—Yeremias 17:9.

Haci manera bo kier.

“No ta keda na hende pa dirigi su pasonan.”—Yeremias 10:23.

Rikesa ta e yabi pa felicidad.

“Amor pa placa ta raiz di tur sorto di maldad.”—1 Timoteo 6:10.

[Plachi na pagina 10]

Salomon a drif bai for di adoracion berdadero y a acudi na diosnan falso

[Plachi na pagina 12]

Mescos cu un hacido di propaganda, Satanas ta promove e spirito di mundo. Abo ta resistie?