“Señor, Siña Nos Haci Oracion”

“Un di su disipelnan a bis’e: ‘Señor, siña nos haci oracion.’”—LUCAS 11:1.

1. Dicon un di e disipelnan di Hesus a pidi Hesus siña nan con pa haci oracion?

NA UN ocasion na aña 32 di nos era, un disipel di Hesus a observa Hesus ta haci oracion. E no por a tende loke Hesus tawata bisa su Tata, pasobra probablemente Hesus tawata haci un oracion silencioso. No obstante, ora Hesus a caba, e disipel a bis’e: “Señor, siña nos haci oracion.” (Lucas 11:1) Kico a motiv’e pa haci e peticion aki? Oracion tawata un parti regular di bida y adoracion di e Hudiunan. E Scritura Hebreo ta contene hopi oracion den e buki di Salmonan y tambe den otro parti. Pesei e disipel no tawata pidi pa Hesus siñ’e algo cu e no tawata sa nada di dje of cu nunca e no a yega di haci. Sin duda, e disipel tawata conoci cu e oracionnan di e lidernan religioso di hudaismo, oracionnan prescribi y pa formalidad. Pero awor el a observa Hesus haci oracion, y probablemente el a sinti cu tawatin un gran diferencia entre e oracionnan hipocrita di e rabinan y e manera cu Hesus a resa.—Mateo 6:5-8.

2. (a) Kico ta indica cu Hesus su intencion no tawata pa nos ripiti e oracion modelo palabra pa palabra? (b) Dicon nos ta interesa pa sa con pa haci oracion?

² Rond di 18 luna prome cu esei, den su Sermon Riba Sero, Hesus a duna su disipelnan un modelo con pa nan haci oracion. (Mateo 6:9-13) Podise e disipel aki no tawata presente na e ocasion ei, pesei Hesus bondadosamente a ripiti e puntonan esencial di e oracion modelo ei. Loke ta remarcabel ta e echo cu Hesus no a ripitie cu exactamente e mesun palabranan, locual ta indica cu no ta un oracion ritual el a duna pa ser resita bes tras bes for di cabes. (Lucas 11:1-4) Nos tambe, mescos cu e disipel kende su nomber no ta ser menciona, kier siña con pa haci oracion pa asina nos oracionnan hala nos mas serca di Yehova. Pesei laga nos analisa e version mas completo di e oracion modelo, esun cu apostel Mateo a skirbi. E ta consisti di shete peticion; tres ta relaciona cu e proposito di Dios y cuater ta relaciona cu nos necesidadnan material y spiritual. Den e articulo aki nos lo considera e prome tres peticionnan.

Un Tata Amoroso

3, 4. Ora nos ta papia cu Yehova y ta yam’e “nos Tata”, kico esei ta indica?

³ For di cuminsamento di e oracion, Hesus a mustra cu nos oracionnan mester refleha un relacion intimo y toch respetuoso cu Yehova. Hesus a papia principalmente na beneficio di su disipelnan cu tawata sinta pega cu ne riba e sero ei, y el a bisa nan pa dirigi nan mes na Yehova como “nos Tata cu ta den shelo.” (Mateo 6:9) Segun un comentarista biblico, sea cu Hesus a papia na e idioma Hebreo popular of na Arameo, e palabra cu el a uza pa “Tata” ta similar na e manera cu un mucha chikito cariñosamente lo a bisa “Tata.” Ora nos ta papia cu Yehova y ta yam’e “nos Tata”, esei ta indica  cu nos tin un relacion cariñoso y di confiansa cu ne.

⁴ Door di bisa “nos Tata”, nos ta duna di conoce tambe cu nos ta parti di un famia grandi di hende homber y mohe cu ta reconoce Yehova como e Dunador di Bida. (Isaias 64:8; Echonan 17:24, 28) Cristiannan ungi pa spirito a wordo adopta como “yiunan di Dios”, y na dje nan por “sclama: ‘Abba, Tata!’” (Romanonan 8:14, 15) Miyones di hende a bira nan compañeronan leal. E hendenan aki a dedica nan bida na Yehova y a simbolisa nan dedicacion door di batisa den awa. Tur e “otro carnenan” aki tambe por acerca Yehova den nomber di Hesus y yama Yehova “nos Tata.” (Huan 10:16; 14:6) Nos por acudi cu regularidad na nos Tata celestial den oracion pa alab’e, pa gradicie pa tur e maneranan cu e ta expresa su bondad na nos, y pa cont’e tocante e cosnan cu ta precupa nos, cu e confiansa cu e ta interesa den nos y ta percura pa nos.—Filipensenan 4:6, 7; 1 Pedro 5:6, 7.

Amor pa Yehova Su Nomber

5. Cua ta e prome peticion di e oracion modelo, y dicon e ta na su luga?

⁵ E prome peticion mesora ta indica loke mester ta na prome luga. E ta declara: “Bo nomber sea santifica.” (Mateo 6:9) Si, santificacion di Yehova su nomber mester ta e cos di mas importante pa nos pasobra nos stima Yehova y tin rabia di mira e tantisimo maneranan cu a trece deshonor y berguensa riba su nomber. Satanas, door di rebela y pone e prome pareha humano desobedece Dios, a calumnia e nomber di Yehova Dios pasobra el a cuestiona e manera cu Dios tawata eherce su soberania universal. (Genesis 3:1-6) Ademas, for di e tempo ei en adelante, Yehova su nomber a ser deshonra door di e actonan y doctrinanan bergonsoso di hende cu a pretende di ta representa Dios.

6. Kico nos lo no haci si nos ta pidi den oracion pa Yehova su nomber sea santifica?

⁶ Nos oracion cu ta pidi pa Yehova su nomber sea santifica ta mustra nos posicion relaciona cu e cuestion di soberania universal, esta, cu nos ta para completamente tras di Yehova su derecho di goberna e universo. Yehova kier pa e universo ser habita pa angel y hende cu boluntariamente y gososamente ta somete nan mes na su soberania husto pasobra nan ta stim’e y ta stima tur loke su nomber ta representa. (1 Cronicanan 29:10-13; Salmo 8:1; 148:13) Nos amor pa Yehova su nomber lo yuda nos pa no haci cosnan cu lo por trece deshonor y berguensa riba e nomber santo ei. (Ezekiel 36:20, 21; Romanonan 2:21-24) Pas di universo y su habitantenan ta depende di e santificacion di Yehova su nomber y di sumision na su soberania motiva pa amor. Pesei nos oracion, “bo nomber sea santifica”, ta un expresion di nos confiansa cu Yehova su proposito lo cumpli pa su alabansa.—Ezekiel 38:23.

 E Reino Cu Nos Ta Pidi P’e

7, 8. (a) Kico ta e Reino cu Hesus a siña nos pidi p’e den oracion? (b) Kico nos ta siña tocante e Reino aki den e buki di Daniel y di Revelacion?

⁷ E di dos peticion den e oracion modelo ta: “Cu bo reino bini.” (Mateo 6:10) E peticion aki ta estrechamente liga cu esun anterior. E instrumento cu Yehova lo uza pa santifica su nomber santo ta e Reino Mesianico, esta, su gobierno celestial, di cua su Yiu Hesucristo ta e Rei legitimo. (Salmo 2:1-9) E profecia di Daniel ta presenta e Reino Mesianico como “un piedra” corta for di un “sero.” (Daniel 2:34, 35, 44, 45) E sero ta representa Yehova su soberania universal, pesei e Reino representa door di e piedra, ta un manifestacion nobo di Yehova su gobernacion universal. Den e profecia, e piedra na su turno ta ‘bira un sero grandi y ta yena henter tera’, indicando cu door di goberna e tera e Reino Mesianico lo representa Dios su autoridad supremo.

⁸ Hunto cu Cristo den e gobernacion di Reino aki tin 144.000 persona mas, “cumpra for di entre hende” pa goberna cu ne como rei y sacerdote. (Revelacion 5:9, 10; 14:1-4; 20:6) Daniel ta referi na esakinan como “e pueblo santo di Dios Haltisimo”, kende, hunto cu Cristo nan Cabes, ta ricibi “reinado, autoridad y grandesa riba tur e reinonan na mundo. Reinado di e pueblo lo keda pa semper. Y podernan na mundo lo sirbi y obedece e pueblo.” (Daniel 7:13, 14, 18, 27, BPK) Esei ta e gobierno celestial cu Cristo a siña su siguidonan pidi p’e den oracion.

Pakico Sigui Pidi pa e Reino Bin?

9. Dicon ta apropiado pa nos pidi pa e Reino di Dios bin?

⁹ Den su oracion modelo, Cristo a siña nos pidi pa e Reino di Dios bin. Cumplimento di profecianan biblico ta indica cu e Reino Mesianico a keda estableci den shelo na aña 1914. * Pues, ta apropiado ainda pa nos sigui pidi pa e Reino ei “bin”? Sigur cu si. Pasobra den e profecia di Daniel, e Reino Mesianico, simbolisa pa un piedra, ta riba caminda pa un choke cu gobiernonan politico humano, simbolisa pa un imagen inmenso. E piedra aki ainda tin cu bin dal den e imagen ei cu un golpi asina duro cu lo e garn’e hacie stof. E profecia di Daniel ta bisa: “E reino ei lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”—Daniel 2:44.

10. Dicon nos ta anhela pa e Reino di Dios bin?

¹⁰ Nos ta anhela pa mira e Reino di Dios bin contra e sistema di cosnan malbado di Satanas, pasobra esaki lo nifica santificacion di Yehova su nomber santo y eliminacion di tur persona cu ta opone soberania dibino. Cu fervor nos ta resa: “Cu bo reino bini”, y hunto cu apostel Huan, nos ta bisa: “Amen. Bini, Señor Hesus.” (Revelacion 22:20) Si, laga Hesus bin pa santifica e nomber di Yehova y vindica Yehova su soberania, pa asina e palabranan di e salmista por bira un realidad: “Pa nan por sa  cu abo so, kende su nomber ta [Yehova], ta e Haltisimo riba henter tera.”—Salmo 83:18.

“Cu Bo Boluntad Sosode”

11, 12. (a) Kico nos ta pidi p’e ora nos resa pa Dios su boluntad “sosode na tera mescos cu den shelo”? (b) Kico mas nos oracion pa Yehova su boluntad sosode ta encera?

¹¹ Hesus siguientemente a siña su disipelnan pidi: “Cu bo boluntad sosode na tera mescos cu den shelo.” (Mateo 6:10) Universo a bin na existencia debi na e boluntad di Yehova. Criaturanan celestial poderoso ta grita: “Digno bo ta, nos Señor y nos Dios, pa ricibi gloria y honor y poder; pasobra abo a crea tur cos, y pa motibo di bo boluntad nan tawata existi, y a wordo crea.” (Revelacion 4:11) Yehova tin un proposito pa “tanto loke ta den e shelonan como loke ta riba tera.” (Efesionan 1:8-10) En realidad, ora nos ta pidi den oracion pa Dios su boluntad sosode, nos ta pidi Yehova pa cumpli cu su proposito. Ademas, nos ta mustra di e manera ei cu nos ta anhela pa e boluntad di Dios cumpli den henter universo.

¹² Mediante e oracion ei nos ta demostra tambe cu nos ta dispuesto pa harmonisa nos bida cu e boluntad di Yehova. Hesus a declara: “Mi cuminda ta pa haci e boluntad di esun cu a manda mi, y pa cumpli cu su trabou.” (Huan 4:34) Mescos cu Hesus, nos como cristiannan dedica ta deleita den haci e boluntad di Dios. Nos amor pa Yehova y pa su Yiu ta motiva nos pa no hiba nos bida “conforme e pasionnan di hende, sino conforme e boluntad di Dios.” (1 Pedro 4:1, 2; 2 Corintionan 5:14, 15) Nos ta lucha pa nos no haci e cosnan cu nos sa ta contrario cu Yehova su boluntad. (1 Tesalonicensenan 4:3-5) Door di aparta tempo pa lesa y studia Bijbel, nos ta sigui “compronde kico ta e boluntad” di Yehova, cu entre otro ta encera cu nos mester tin un participacion activo den predicacion di ‘e bon nobo aki di e reino.’—Efesionan 5:15-17; Mateo 24:14.

Yehova Su Boluntad den Shelo

13. Con Dios su boluntad tawata sosode hopi prome cu e rebelion di Satanas a tuma luga?

¹³ Yehova su boluntad tawata sosode den shelo hopi prome cu un di su yiunan spiritual a rebela y bira Satanas. E buki di Proverbionan ta describi Dios su Yiu primogenito como sabiduria personifica. E ta mustra cu durante un periodo di tempo cu ta mucho largo pa nos conta, Dios su Yiu unigenito tawata alegra of ‘regociha semper su dilanti’, felis di por haci e boluntad di su Tata. Cu tempo, el a bira Yehova su “trahado experto” ora di crea tur cos “tanto den e shelonan como riba tera, [cosnan] visibel y invisibel.” (Proverbionan 8:22-31; Colosensenan 1:15-17) Yehova a uza Hesus como su Palabra, es decir, su Bosero.—Huan 1:1-3.

14. Kico nos por siña for di Salmo 103 tocante e manera cu e angelnan ta cumpli cu Yehova su boluntad den shelo?

¹⁴ E salmista ta mustra cu Yehova su soberania ta riba tur creacion y cu e multitudnan di angel ta scucha su palabranan di instruccion y su mandamentonan. Nos ta lesa: “SEÑOR a establece su trono den e shelonan; y su reino ta goberna riba tur cos. Bendiciona SEÑOR, boso, su angelnan, poderoso den fortalesa, cu ta ehecuta su palabra, obedeciendo e bos di su palabra! Bendiciona SEÑOR, boso tur, su ehersitonan, boso cu ta sirbie y cu ta haci su boluntad. Bendiciona SEÑOR, boso tur, su obranan, na tur parti di su dominio [of, soberania].”—Salmo 103:19-22.

15. Con e echo cu Hesus a ricibi poder di Reino a contribui cu e boluntad di Dios ta sosode den shelo?

¹⁵ Despues di Satanas su rebelion, ainda e por a drenta den shelo, manera e buki di Job ta indica. (Job 1:6-12; 2:1-7) Sinembargo, e buki di Revelacion a profetisa cu lo yega e ora cu lo saca Satanas y su demoñonan for di shelo. E tempo ei aparentemente a yega poco despues cu Hesucristo a ricibi poder di Reino na 1914. Desde e tempo ei, no tawatin luga  mas pa e rebeldenan aki den shelo. Nan ta restringi na e bicindario di tera. (Revelacion 12:7-12) Den shelo no ta tende ningun stem mas cu ta disputa Yehova su soberania, sino solamente stemnan uni cu ta aclama “e Lamchi”, Cristo Hesus, y cu ta alaba Yehova den sumision. (Revelacion 4:9-11) Yehova su boluntad di berdad ta cumpliendo den shelo.

Yehova Su Boluntad pa Tera

16. Con e oracion modelo ta mustra cu loke cristiandad ta siña tocante e speransa di humanidad no ta corecto?

¹⁶ E iglesianan di cristiandad ta exclui tera for di e proposito di Dios, ya cu nan ta pretende cu tur bon hende ta bai shelo. Pero Hesus a siña nos pidi den oracion: “Cu bo reino bini. Cu bo boluntad sosode na tera mescos cu den shelo.” (Mateo 6:10) Nos lo por bisa—asta si nos tin hopi imaginacion—cu en general Yehova su boluntad ta sosode awe riba tera? Un tera plaga pa violencia, inhusticia, malesa y morto? Di ningun manera! Pesei nos mester pidi Dios sinseramente den oracion pa su boluntad sosode na tera, na harmonia cu e promesa cu apostel Pedro a skirbi: “Ma segun su promesa nos ta sperando shelonan nobo [e gobernacion di e Reino Mesianico den man di Cristo] y un tera nobo [un sosiedad humano husto], den cual ta biba husticia.”—2 Pedro 3:13.

17. Kico ta Yehova su proposito pa tera?

¹⁷ Yehova tawatin un proposito pakico el a crea tera. El a inspira profeta Isaias pa skirbi: “Pasobra, asina SEÑOR, Kende a crea e shelonan, ta bisa (E ta e Dios, Kende a forma tera y a trah’e; El a establec’e, y no a crea esaki pa e keda bashi, ma El a form’e pa e wordo habita): ‘Ami ta SEÑOR, y no tin ningun otro.’” (Isaias 45:18) Dios a pone e prome pareha humano den un hofi cu tawata un paraiso y a instrui nan: “Sea fructifero y multiplica, y yena e tera y haci esaki somete na bo.” (Genesis 1:27, 28; 2:15) Ta masha cla anto cu e proposito di e Creador ta pa un rasa perfecto di hende husto habita e tera. Hende cu felismente ta somete nan mes na Yehova su soberania y ta biba pa semper den e Paraiso cu Cristo a priminti.—Salmo 37:11, 29; Lucas 23:43.

18, 19. (a) Kico mester sosode prome cu Dios su boluntad tuma luga plenamente riba tera? (b) Ki otro aspectonan di Hesus su oracion modelo nos lo analisa den e siguiente articulo?

¹⁸ Yehova su boluntad pa e tera no por sosode nunca tanten cu e tera ta pobla cu hende homber y mohe cu ta resisti su soberania. Dios lo uza ehersitonan spiritual poderoso bou di e liderato di Cristo pa “destrui esnan cu ta destrui e tera.” Henter e sistema di cosnan malbado di Satanas—cu su religion falso, politica corupto, comercio golos y deshonesto, y forsanan militar destructivo—lo ser elimina pa semper. (Revelacion 11:18; 18:21; 19:1, 2, 11-18) Yehova su soberania lo ta vindica y su nomber santifica. Tur esaki nos ta pidi p’e ora nos resa: “Nos Tata cu ta den shelo, bo nomber sea santifica. Cu bo reino bini. Cu bo boluntad sosode na tera mescos cu den shelo.”—Mateo 6:9, 10.

¹⁹ Sinembargo, den su oracion modelo Hesus a mustra cu nos por pidi tocante cosnan personal tambe. Den e siguiente articulo nos lo analisa e aspectonan aki di su instruccion tocante oracion.

[Nota]

Como Repaso

• Dicon ta na su luga pa ora nos ta papia cu Yehova nos yam’e “nos Tata”?

• Dicon ta sumamente importante pa nos pidi pa Yehova su nomber sea santifica?

• Dicon nos ta pidi pa Dios su Reino bin?

• Kico nos ta indica ora nos pidi pa Dios su boluntad sosode na tera mescos cu den shelo?

[Preguntanan di Estudio]

[Plachi na pagina 9]

Hesus su oracionnan tawata hopi distinto for di e oracionnan hipocrita di e Farizeonan

[Plachi na pagina 10]

Cristiannan ta resa pa Dios su Reino bin, pa su nomber sea santifica y pa su boluntad sosode